استفسار بخصوص كفرات بالون ماكسس 2012 للي جربهن

[جاسم العنزي]

اخواني تحية طيبة وبعد
ابارك لكم اولاً بشهر رمضان المبارك واسال الله ان يبلغكم اياه وان يتقبل صيامكم وقيامكم

ودي اركب كفرات بالون لكن محتار اي المقاسات انسب هل (825) ام (900) ؟

ارجو ممن لديه علم لا يبخل علينا مشكوراً.

[H.I.L.A.L]

حسب نوع السياره
كل سياره الرفارف حقتها تحتلف عن الثانية
حسب الارتفاع

نصيحه لاتاخذ شي يقعد يحك بالرفارف لانك في الاخير بتخسر كفر وبودي

[جاسم العنزي]

اشكر لك اخوي على مرورك وردك.بالنسبة لنوع السيارة فتك 2005 رقم 2 لكن ودي اعرف وش الفرق بين النوعين وبانتظار مشاركة بقية الاخوة الاعضاء .

[ابوسند9]

اخوي جاسم
حياك الله
بالنسبه للفرق بين ما ذكرت ال 900 ارفع واعرض واغلى واثقل
اما 825 عكس ال 900 بالاضافه الى انها اخف بكثير ,طبعا هذا الكلام اذا كان الجنط عندك او الرنق مقاس 16
وحسب مافهمت منك ان السياره عندك سفاري 2 اذا معناه ان الجنطوط عندك 17 لذا بالون 825 مايجي جنط 17
اذا هناك فرق كبيرجدا بين بالون مقاس 900 جنط 17 وبالون مقاس 825 جنط 16 من حيث ثقل وخف السياره عندك القياده
لذالك انا ما انحصك انك تركب بالون مقاس 17 لان السياره راح تطلع ثقيله مره بالقياده لذا انصحك تركب جنوط 16 اصليه اللي تجي على السفاري 1 او تركب جنوط هلل
نجي للبالون مقاس 16 ال 900 وال 825
ال 825 ميزتها انها خفيفه مره وما كأنك مركب بالون لكن عيبها انها نازله شي بسيط
وال 900 عكس ال 825
اما الافضل ركب اي نوع بس اهم شي ابعد عن الماكسس والاسيام تاير

[ك م ر 222]

السلام عليكم جميعا ورحمة الله وبركاته

إخواني الفضلاء أولا : مبروك عليكم الشهر وتقبل الله منكم ,

ثانيا : لاهنتم مالفرق بين كفرات البالون ( سيام تاير , مالون , ماكسس ) ؟؟؟

مشكوووووورين أرجو الإفادة من ذوي الخبرة فقط !!!

[ك م ر 222]

ننتظر أصحاب الخبرة .................

[خبايا انسان]

عن نفسي ,, ما اعرف الا فرق واحد الي هو السعر ,, ارخص سعر الماكسس ,,


انا جربت الماكسس فقط ,, الصناعات الاوله القديمه , الحمد الله مابقيت وعر او رمله الا قطعتها بالماكسس ومايعيبه الا الرجه الخفيفه عند بعض السرعات ,, والرجه حظوظ تلقى ماكسس يرج وماكسس مايرج

[أبو تميم 506]

هلا اخوي ك م ر اخبر السيام تير ثقيله شوي وميزتها ماتتسحل بسرعه لاكن السعر غالي شوي 700 وشوي على خبري ، اما الماكسس فسعره حلو و ماعليها تمشي ، واغلب الناس ياخذونها ،
المعذره المالون مالي خبره فيه

[عبدالله عارف]

مبروك الشهر ع العموم
اخوي ابو سند انا عندي تايوتا جي اكس ار 99
وش اطيب له هل اركب جنوط هلل 16 على بالون 825

واسالك هل سيارتي جنطها 16 او 17؟؟

لك شكري وتقديري..ِ

[ابو محمد543]

السلام عليكم

كيف حالكم

حبيت احط موضوع عن البوالين علشان كلن يستفيد وابي اللي جرب ماكسس الدفعه الجديدة 2012 يعلمنا لان فيه ناس مدحوهن وكل واحد يحط تاريخ الكفرات واي اسبوع ومقاس الجنط وملاحظاته عليهن طبعا 2012 لان اللي قبله2011 الفتنامي معروفه مشاكله وانا جربته اقسا مطب من التايوانيات ورجه ونقص هواء وتسلخ مع الوطية

الصراحه انا تعبت من التدوير في البوالين وعجزت احصل شئ نفس البالون الماكسس التايواني والانواع الثانية اللي يمدح واللي يسب وضعنا بينهم بالنسبة لي انا جربت المالون جنط16 الصراحه كفر فاشل ماأحس اني مركب بالون
1- قاسي مطبه اقوى من الكفرات المضلعه
2-اذا وقفت اربع ساعات وفيها يسفط الكفر لكن يالله يعتدل اوصل لبيتنا وهو توه وحتى لو قدمت السيارة شوي نفس السالفه بس يخف السفطه .
3-ثقيل على السيارة ويتشلخ مع الوطية.
بس ميزته شكل ورساوه

وفيه نوعين بعد البحث وناس مدحتهن لكن نبي اللي جرب
1-اكمي.
2-هنديات مدري وش اسمهن

[خيرها بغيرها]

السلام عليكم
ابو محمد

انحش اركز ساقك من البوالين
جربت لين دخت
وارتحت يوم تركتها واستعملت الكفرات العادية بأنواعها
البولين رجة تسحت حوادثة الله يكفينا الشر واجد
اغلب الشباب بدا يرتاح مثلي
ودمتم سالمين

[ابو محمد543]

السلام عليكم
ابو محمد

انحش اركز ساقك من البوالين
جربت لين دخت
وارتحت يوم تركتها واستعملت الكفرات العادية بأنواعها
البولين رجة تسحت حوادثة الله يكفينا الشر واجد
اغلب الشباب بدا يرتاح مثلي
ودمتم سالمين

وعليكم السلام

حياك الله اخوي

المشكله اذا تعودت على البالون ماتستغني عنه بالنسبة لي ما ارتاح بالجيب اللا اذا صار عليه بوالين

[ابو محمد543]

ياجماعه سمعت ناس يقولون ان الماكسس 2012 الدفعه الثانية صار فيه ضمان وصار افضل من قبل
وانا اتصلت قبل شوي على وكالة ماكسس بالرياض قالي الهندي البالون ماعليه ضمان وش العلم

[مازن الصعب]

بالنسبة للبالون الجديد (( بريسا ))

يعطون عليه ضمان سنة

بس الاحظ عليه انه ينقص مع الجنط اسرع من القديم

[sgl2002]

خلك من البوالين افضل

عندك الهانكوك دعسه شاهين وعند السوموتمو شاهين كلها تقوم بالواجب

[ابو محمد543]

بالنسبة للبالون الجديد (( بريسا ))

يعطون عليه ضمان سنة

بس الاحظ عليه انه ينقص مع الجنط اسرع من القديم


هذا الخوف ينقص هواء

عندي طقم ماكسس تايواني 2 2010 و2 2007 مركبهن مقاس 17 والجيب دايم واقف والكفرات لهن سنتين عندي كل شهرين ثلاث شهور اعاير الهواء يصيرن ناقصات 5-8 زي الكفرات العاديه اما الفتنامي كل ثلاث ايام ينقص 20

اخخ بس لو يرجع التايواني


ياليت احد يفيدنا عن الماكسس 2012

[ابو محمد543]

خلك من البوالين افضل

عندك الهانكوك دعسه شاهين وعند السوموتمو شاهين كلها تقوم بالواجب
خابرهن حلوات ولينات ويكدن وافضل من البالون استخدام

بس البالون عشق لاينتهي واللي يتعود عليه ماراح يتركه بالنسبه لي الجيب اذا صار عليه كفرات غير البالون احس ان فيه خلل

[google-999-]

انا ياطويل العمر مركب اكما تايوانيه من تقريبا 8 شهور مطبها لين والحين الكفرات الي ورى بدن يتسحتن شوي
لكن انا اشوفها افضل من المكسس مقاس الكفرات 17

[تميم2222]

انحححححححش عن الماكسس ..نصيحه .. واحد خابرها من طلعت .. والله هي كانت حلوه اول ماطلعت لكن من سنتين والشركه باديه تخنبق والكل يشتكي منها ... تحياتي

[GMC 111]

الماكسس منظر بس وسلبياته اكثر من ايجابياته

والمشكله ماعاد اقدر اغيره تعودت عليه هو ورجرجته :)

[ابوسند9]

ابو محمد حياك الله
خذ العلم اللي يجمد على الشارب
اولا_ بالنسبه للبالون الاول التايواني وانت تعرف خلاص غير موجود وانتقل المصنع من تايوان الى فيتنام وبعدها تغير
ثانيا_ ا لبالون الفيتنامي النوع الاول تعرف كلا يشكي منه سواء رجه وتنسيم مع الاجناب ويسلخ
ثالثا_البالون الفتنامي النوع الثاني بريسا نفس الاول بالضبط اللهم غيرو بعض الكتابات مع اجناب الكفر
وانا الان مركب بريسا والله كل ثلاث ايام اروح للبنشر اعبي هواء
وبالنسبه للضمان ماعليه ضمان لاكن المحلات هم اللي يعطنوك ضمان محل
وقبل فتره كلمت وكيل ماكسس بالقصيم والرياض وسئلتهم عن الضمان قالوووو البالون ماعليه ضمان
وحاولت استفسر منهم وايش الفرق بين نوعي الفتنامي قالو مافيه فرق واحنا ندري انه فيه مشاكل وجالسين نحاول يرجع المصنع لتيوان
الزبده انحش من الماكسس وبس وللعلم احينا يوصل الترصيص للكفر الواحد 300 جرام وجنط اصلي
وبالنسبه ل اكمي والهندي ابالولو فيه ناس تمدح وناس تسب لكن با اعتقادي ان الهندي افضل
واللى عندك دنلوب وميزته خفيفه مره لكن عمره 25 الف كيلو

[ابوسند9]

اخوي
الماكسس لا يقربك لانه كان يصنع في تايوان وكان ممتاز وبعد انتقل لفيتنام و تغير صار يسلخ ويرج وينسم مع الاجناب
الاسيام زي ماقال اخونا ابو تميم
المالوان والهيرو زي بعض وبرضو سعرها غالي بحدود 750 ريال لكن مشكلته انه عريض مع الجنب بزياده وتوقع بالارض الوعره ينشق مع الجنب

[ابو محمد543]

الله يعطيكم العافيه وماقصرتوا

ابو سند الله يحيك
خابر البريسا ومشاكله وهو اخو الماكسس
انا قالي واحد في منتدى يقول جرب الماكسس ٢٠١٢ الدفعه الثانيه يقول افضل من قبل ماينسم واللين مطب وودي احد يفيدنا من اللي جربوا دفعة ٢٠١٢

[WWS]

آلكفرـآت آلبـآلؤن آلهنديه
...
..
.
آسمهـآ
آدفـآنس
ؤكيلهـآ ،، خـآلد آلصـآفي
بـآلغرـآبي قدـآم ؤكيل فـآلكؤن >> بحلس
شـآرع آلريل

[هويدي]

عندي الفين وعشره تسحلن تقول لصاتك
وودي اغيرهن وش رايكم بالمالون والهيرو
وياليت اللي عنده خلفيه عن الاسعار ينورنا

[4x4ofroad]

عيب البالون 825 مو متوفر
يعني اذا ضرب عليك واحد بتتعب لين تلقاه
وغير كذا الفتك دواه ال900 على جنط 16
اجمل وانصب ومتوفر وماراح تحس بثقله مقارنه بالبالون ال17
البالون ال17 عله وثقيل ويحك بالنسافه الاماميه اذا لفيت اخر شي



راعي الجي اكس ار
اذا جنوط موترك شد بلد فهي اكيد 16
البالون ال900 افضل
واللي يبي يركب 825 فيه انواع احسن
مثل الهانكوك دعسه الشاهين او الدنلوب او الشاهين
كلها متوفره وتكد اكثر من البالون ال 825

[أبن ثعلي]

اخوي انصحك ما تركب كفرات بالون


تراه فرامل السياره معها ماهوب هذا الزود بمعنى اصح راح تختلف معك الفرامل وتقل فاعليتها

هذا حسب افادة بعض الزملاء

كان فيه نقاش حول هذا الموضوع وذكر اكثر من شخص عدم فاعليتها في الخط لاسيما انها خطيره اذا انفجرت عليه لا سمح الله


اخيراً الله يكتب لك اللي فيه خير وخيره

[خيال العيون]

السلام عليكم جميعاً

اخوي ابو محمد

بالنسبة للبالون الماكسس انا جربت القديم وصراحة كفر ارتحت له بقوة سويت له ترصيص ليزر ولا شفت رجه من بعده .
اما الماكسس الجديد والله ما جربته لكثرة مشاكلة ولعلي طحت بنوعية اردى واخس من الماكسس صراحة .

جربت الهندي أبولو ولكنه سيئ بمعنى الكلمة . اول مشكلة واجهته مع الكفر . يسوي نفس المالون لو وقفت مدة ساعتين بس وحركت السيارة تحصل السيارة كأنه تعرج من صفطة الكفر . والثانية يحتاج ترصيص كرتون علشان تخف الرجة ولا تحصل احد يضمن لك زوال الرجة واول ما تطلع من المحل تحصل الموتر يرج كأنك ما سويت ترصيص .

والحين انا اعاني منهن من ثلاث شهور وعارضهن للبيع وعسى الله يفكنا منهن .

وصراحة الأبولو ما انصح فيه ابداً .

[google-999-]

الجميع متفق على ان المكسس الجديد مايصلح
واالمالون معروفه مشكلته
بس محد تطرق للهيرو

[المسروحي]

تشكر ياصااااحب الموضوع ....
انا بعد ناااوي اركب ....
ياليت الأخوان يفيدونا

[ك م ر 222]

الله يعافيكم جميعا

ما قصرتوووووا

أنا شريت موتر به 4 كفرات سيام والاستبنة ماكسس , واحتجت الاستبنة وركبتها , وطلعت صغيرة شوي بالنسبة لسيام ,

فحبيت أشوف الفرق بينهم علشان أطقم للجيب

[ابوسند9]

والله يخوي ابو محمد الدفعه الاولى او الثانيه ولو تجي ثالثا كلها زي بعض واذا ودك تركب ركب وغامر
وبالنسبه للي يسئل عن الهيرو هو نفس المالون بالضبط

[ابوسند9]

والله اخوي طبعا ارفع كفر معروف هو الاسيام
لكن اذا كانت الاسيام جديده او نظيفه فا الافضل انك تركب واحد جديد او تشوف لك واحد مستعمل

[ابو محمد543]

الله يعطيكم العافيه

عندي سؤال للمشرف انا منزل موضوع باسمي وشلون اندمج موضوعي مع شخص
ثاني والموضوع مختلف ياليت تفيدني

[خبايا انسان]

ياشباب عطونا العلم الاكيد ؟ ؟ ؟


ابي 2 بوالين ماكسس ,,


اشتري جديد ولا انحش ؟ ؟

[وجعين]

الي يقولك انحش من البوالين مهب راعي بر انا ماشفت بل بوالين عيب الا الرجه بس متى بعد ما ينتهي الكفر يعني بعد مايروح اكثر من نص عمر الكفر يبدن يرجن بس احلى مافيهن انهن مايبنشرن ابد الا بمسمار

[وجعين]

السلام عليكم جميعاً



اخوي ابو محمد


بالنسبة للبالون الماكسس انا جربت القديم وصراحة كفر ارتحت له بقوة سويت له ترصيص ليزر ولا شفت رجه من بعده .
اما الماكسس الجديد والله ما جربته لكثرة مشاكلة ولعلي طحت بنوعية اردى واخس من الماكسس صراحة .


جربت الهندي أبولو ولكنه سيئ بمعنى الكلمة . اول مشكلة واجهته مع الكفر . يسوي نفس المالون لو وقفت مدة ساعتين بس وحركت السيارة تحصل السيارة كأنه تعرج من صفطة الكفر . والثانية يحتاج ترصيص كرتون علشان تخف الرجة ولا تحصل احد يضمن لك زوال الرجة واول ما تطلع من المحل تحصل الموتر يرج كأنك ما سويت ترصيص .


والحين انا اعاني منهن من ثلاث شهور وعارضهن للبيع وعسى الله يفكنا منهن .



وصراحة الأبولو ما انصح فيه ابداً .

جزاك الله خير على ها المعلومه واحد من اخوييى كان يبي يركبهن