مشكلة تحتاج ( حل + توعيه + تعاون + عقاب صارم )

[كاشت بالبر]

السلام عليكم ورحمة الله وبركاته

كيف حالكم ان شاء الله بخير

اليوم بتكلم عن موضوع رافع ضغطي بقوه ومنتشر عند بعض المتخلفين

الا وهي

تسكير ( صفط ) المرايات الجانبيه + تغبير جميع زجاج السياره

يمشي على عماها وكل شوي يحد احد :mad:

ويسبب حوادث لخلق الله


يا اخي المرايات الجانبيه مهمة جدا وايضا كل زجاج السياره مهم للرؤيه وتجنب الحوادث


لكن هالآوادم ما ادري وش يحسون فيه ؟
يعني يعتقدون اننا بنقول ما شاء الله عليهم مواترهم كشخه وحركه والخ ...
بالعكس والله العظيم استحقره ويرفع ضغطي بتصرفاته الغبيه

ما رأيكم بهؤلاء الأشخاص ؟ هل تعجبك تصرفاتهم ؟
ماذا تفعل لو رأيت أحداً منهم ؟
ماذا تفعل لو ( حدّك ) واحد منهم ؟
ماذا تفعل لو ( صدمك ) واحد منهم ؟


الفئه الثانية

ماسك سرا عند الاشارة ( جهة اليمين ) , يجيك واحد أو مجموعة أشخاص ويسكرون الخط المخصص للي يبي يروح يمين , يعني يكونون واقفين جنبي على اليمين , ومسكرين الشارع على خلق الله ( وش ذنب هالمساكين اللي ينتظرون ) , ويعرقلون حركة السير , ولا يحترمون الناس اللي ماسكه سرا عند الإشاره

واذا فتحت الاشارة وجيت انا امشي .. الا غصب يبي يدخل قدامي ويمشي قبلي , ولو تحده يرقى الرصيف :D

انا عن نفسي احاول احده غصبن عليه ( كلنا واقفين ونبي نمشي ) لكن ما اعطيه مجال يحدني ويعرقل حركة السير

يعني الزبده

خلك مثل الناس وامسك سرا , وإلا ترى بنحّدك :D :p


وش موقفك اذا شفت احد من الفئه هذي ؟
والخ ...

عبّر وقل اللي بخاطرك وطلّع حرتك فيهم :D

[4800VTC]

المتخلفين معبين الشوارع
هذا مصفط مرايات +وهذا مضلل+وهذا مغبر +وهذا ب البلاك بيري
الله يعين بس

[Salamah.y]

والله ما تحس بحجم التخلف بشوارعنا
الا اذا رحت دول قريبه جداً ماهي بعيده ~
قطر - الامارات << فرق كبيييير سبحان الله
احترام النظام و الشارع للجميع
حتى اذا واحد اخطأ , تحس كل الناس تنظر له بإستحقار

اما هالاشكال اللي تكام عنهم
الله يفك العالم من شرهم , هذا يبلاك بمصيبه
اما يضرر سيارتك او تضطر تخانق و العواقب وخيمه
الواحد بس يحاول يتجنبهم قدر المستطاع ~

لا و زد عندك ظاهره منتشره بالخطوط
لو تسافر بالليل ,, يمشون بدون انوار و على سرعات جنونية
ما اعرف وش الانجاز العظيم و النقله التاريخيه اللي سواها يوم مشى بدون نور!!!
بس يعرض نفسه و الناس للخطر , و ممكن الضحية تكون عائله بريئه ~

,

الله يهدينا وياهم الى الخير
هذا اللي نقدر نقوله ,, جزيت خيراً @~

[.أبوعبدالرحمن]

وعليكم السلام ورحمة الله وبركاته


ههههههههههههههههههه

يا رجال وسع صدرك مستحيل تربي همج زي هذي العينة

أمس كنت ماشي في طريقي وفي أمان الله تفاجأت بأحد البهوات

يلف علي فجأة وضربت له بوري والله العظيم بهدوء يعني ما أزعجته

بس أبي أنبهه إلا والرجال وراي يكشح بالنور ويحدني يبي يوقفني ليش

تضرب بوري وليش تحدني !!! المشكلة أني كنت في طريقي يعني متأكد

أني في المسار إللي لي وهو أكبر دليل أن الخطأ عليه كان يبغى يتجاوز تريله

هههههههههههههههه وخذ سب وشتم ولكن الحمدلله كان بفضل الله ثم رحمة في أطفالي

إللي معي أخذت الأمور ببساطة وتركته يقول إللي بخاطره ومع ذلك كان قليل أدب

بعد ما ضمن أنه بعيد مني سوا حركة بيده لا تليق بمسلم ولا بشهر كريم ولا بأحد

عياله معه ( هو بعياله وأنا بعيالي ) يعني والله ما عاد تقدر تقول شيء

ومثل قولة أحد عيال عمي ( صعبة تربي إللي بالشارع كلهم ) فلذلك عليك بالصبر

ولك الأجر إن شاء الله وسامح واعفو عن الكثير وخل نيتك لله تجد الأجر والمثوبة

بإذن الله ( وسع صدرك تراهم ما هوب نافعينك إذا ضرب فيك عرق وإلا إذا جاك ضغط وإلا سكر )

[rpk]

كنك داري امس بغي يضفني فورد مكتم الموتر والله لا يعمينا معي موتر طول في عرض لاكن وش تقول غير دق البوري الهواء واخرشه وانزع قبله لكي يتأدب هههههههههههههههههههههههههههههه

[كديان]

بارك الله فيك على طرحك و حسك
طلعت لنا مشكلتين هالحين
راعين البلاك بيري مع ناس كبار سن
تلاحظ مسكر المسار الايسر مهدي و اثره يطقطق بالوتس ايفون او البلاك
او تفتح الاشارة و جبهته بالايفون

والثانية راعين الفورد
يمشي بالشارع و مهدي كانه ملك و الموتر يا ما هج يمين او يسار
يما اكلنا الرصيف يلف و هو ما انتبه
عزيزي صاحب الفورد لقد تم اكل الرصيف بنجاح و انكسر الجنط

[rpk]

^^^^^^^^^^^^^^^^^^^

سبحان الله فعلا ويش جوكم يا حقين الفورد منبطح كائنه في جلسه ورجله علي المكيف الله يكرمكم واذا انت تعرفه وتقوله ليش ما تسوقون زين يقول الموتر كبير الحين الموتر له معك كم سنه ولا تمكنت من سوقته شئ غريب ولا ننسى ظاهره ضرب الفرامل فجأه والمشكله ما حوله احد اعذرونا علي الاطاله

[ابو خالد 1992]

والله كثرو اللي كذا يتبلاك ولاناظرت وطليت فللي يسوق بزقة مكدش وراكب هايلكس :looney: تجي تقولة لييية مسفط مراياتك يقولك نصب وتحصل موترة انظف من وجهه. لاكن مثل ماقال احد الاخوان( صعبة تربي إللي بالشارع كلهم ) فلذلك عليك بالصبر

[كديان]

ابو خالد من القديمين انت ههه
طلعت غبره ترى به اعضاء ما يدرون و شي بزقه
ههههههه

[قناص الأشهب]

أووووة أنت طبيت علا الجرح
أنا مايغبني في الحياة زي أصحاب الفوردات الموتر مريح وكبير وأضن الواحد يدلخ فيه يارفعت الضغط اذا حدك من غير سبب ولا اذا مسك فرامل وهو لحالة ولاقدامة احد ولا تحاول تتجاوز تحصل السيد الأيسر كلة مسكر وقدامك ألف سيارة وتتجاوز من االيمين ومن علا الكتف وتكتشف ان ما فيه زحمة مجرد فورد ينتظرونه يوخر عن طريقهم هذاك الوقت اتمنى معي بليزر موديل 80 كان معي استغفر الله بس سامحوني عصبت ........
وفيه عينه عاد ذولي مدري تحن عليهم ولا تدعي عليهم ولا تدعيلهم هذا طال اعماركم أعمارهم لاتتجاوزالـ ...؟ ومعه موتر مزعج الناس في الشارع بصوت الموتر والدبات اللي مركبها ويستعرض في كل حارة وكل ملف جاك يزر للموتر تقول ياولد راعي فراري ولا لمبرقيني وبعض الأحيان يركبون مواتر شيوخ وتنغبن كيف انه كسرها ولعب فيها يعني مو حسد ولكن المواتر ما تستاهل العبث علا العموم أنتهى كلامي

[ملك الفكتوريا]

هههههههههههههههههههههههههه يا هذا الفورد المسكين والامريكي كله بصراحة


الرجال مرتاح وماشي على راحته

غيروا طايوطا والياباني واركب الماني او امريكي


ما تنلامون ما غير مناقز من اول المشوار تبي توصل بسرعه وتريح ظهرك


على العموم الفورد منتشر بكثره ويمكن بكل حارة تلقى اثنين ثلاثة فصعب تحكم عليهم كلهم


ولا تنسون الهايلوكس والكامري المساكين لا رساوه ولا عزل ولا امان ولا مكينه تكيف ومع ذلك طاير


والا الفورتشنر اربعه سلندر بالخط يضحك مسكن يتعب مع الاكسنت



سلموا لي على الالماني والامريكي


وبخصوص المفخره

يا طاير الرجال علقت عليه

والا عله ما يفتح الخط