المساعد الشخصي الرقمي

مشاهدة النسخة كاملة : إسـتـفـسـار عـن ( الــددســـن ) أرجـوا الـدخـول والافــاده عـاجـلاً لاهنتوا ..



الشقردي 205
06/09/2012, 03:53 AM
السلام عليكم ورحمة الله وبركاتة ..


صباحكم / مساكم / الله بالخير ..


يا إخوان ابي رايكم بـ النيسان ددسن شرايكم فيها كـ إستخدام ..


حق الكد وللبر وللديره وللجلد والصبر وكل شي ..


ناس واجد انصحوني فيها وقالوا الددسن سياره حقت كد وخراباتها قليله وبسيطه وخذها ولا تشاور ..


وانا ما قد سقت قير عادي وان شاء الله ابي اتعلم له ..


وشرايكم بـ الددسن وبـ القير العادي من كل ناحية افيدوني لاهنتم ..


ويعطيكم العافيه ..


بـ إنتظاركم ..

الأحوذ
06/09/2012, 09:06 AM
السيارة ممتازة جدا بالنسبة لسعرها جديدة ، و لا تخلو سيارة من أعطال ، و ممكن الدفرنسين أفضل...

كثير السؤال
06/09/2012, 09:45 AM
الددسن به عيوب ولاكن تعود عليه اذا كنت واحد صبور
مثلا الحنه حتى بالنمره الخامسه اصوات البيبان قراقيش حتى بالجدد
مطبه شين يقص الظهر ولاتنفع للي معه عايله
عزمه ضعيف مقارنه بالسيارات الاخرى

ومميزات الصبر والبساطه والخلو من التعقيدات الالكترونيه
اذا كنت راعي كرف وكد لاتدور غيره

انا معي ددسن 10 اكرهه لاكني متعود عليه وصار عيوبه شي عادي عندي

مشلخ الذيب
06/09/2012, 12:57 PM
الددسن مكده وصبر

عيوبه الحنة .. الحنة حسب ماقيل لي ركب مراوح كهرب وتروح ان شاء الله

مشلخ الذيب
06/09/2012, 01:01 PM
هذا رابطة الددسن في احد المنتديات شف الصفحة الاولى كل شي فيها

http://www.doraan.com/vb/showthread.php?t=52597

ابو فهد...
06/09/2012, 04:56 PM
الدسن من ٢٠١١ وتحت زين ياباني اما ٢٠١٢ تايلندي

كل نظر
06/09/2012, 05:03 PM
الدسسن ما فيه مشكلة الا الكهرب واما عزم السيارة وصبرها وجلدها ما فيها كلام

أبويوسف3
06/09/2012, 06:38 PM
ماذا تعني يا حبيبنا ( كلٌ نظر ) بــ مشكلة الكهرب 000

كل نظر
06/09/2012, 10:51 PM
ماذا تعني يا حبيبنا ( كلٌ نظر ) بــ مشكلة الكهرب 000


باخوى انا كان عندي ددسسن اربع وثمانين من زمان وطفشني من كثر خرباته فالبواجي وانتهاء بالظفيرة كاملة لا تقول قديم والله عليه عزم ما هو صاحي لدرجة يطرح عبارتين بدون مبالغة وتكره على الشوك يمشي معاك لكن خرابات الكهرب ما تضمنها وتخاف منها تصلحها اليوم وتشترى قطعة جديدة فاليوم الثاني ما كنك صلحت شيء وماهو بس المشكلة في الاربع والثمانيين بل في كل المويلادت القديمة بدون استناء وهي مجربه من الجميع وباعناه لواحد في الديره ومن بعدها ما نشتري الا تويوتا وبس

شكرا على سؤالك

وطن العزة
07/09/2012, 01:58 AM
توكل على الله وخذه موتر يكد كد الويل

عندنا وحده آخذناها وكاااله لها حول 20 سنه

القير توظب بعد 15 سنه بسبب الاهمال وعدم تغير فحمة الكلتش والدسك

المكينه وضبناها قبل سنتين توظيب ستاندر بدون خرط و لا شي

واللي يقول مشاكل كهرب هذا اكيد لاعب بالاسلاك او بشي يخص الكهرب

وبالنسبه للمطب >> كفر هانكوك او يوكوهاما عريض وتحس بالفرق


ولا تنسى الاستخاره

Shqra
07/09/2012, 07:55 AM
جربت ددسن وارد الكويت الظاهر ٢٠٠٩ مدري ٢٠٠٦

قير أوتو ~ وكآن رائعاً :)

أؤويدك ونعمَ الإختيار لكن شوف أوتو أريحلك

قناص 28 عفيف
07/09/2012, 10:51 AM
كلي نظر 84 وعممت على كل الموديلات هذا مو منطق
والله كان عندنا 83 موتر مااشتكت من شئ والحين عندنا 85 ورده الله يستر عليها مافيها اي مشاكل وسافرنا عليها خطوط طويله ومن اروع مايكون
وموترك له حول 30 سنه تبيه على وكالته

الحربي181
07/09/2012, 09:12 PM
حذير تحذير تحذير
ابعد عن الددسن خذلك هلكس من 2005وتحت

Shqra
07/09/2012, 11:51 PM
هايلوكس غمارتين ٤x٤ قير أوتو ٢.٧

هذا أفضل بيك أب جديد قوي وقطع غياره متوفره ودبل ومريح والظاهر سعره بالتسعينات

لكن إذا ودك حق كرف وكد وموديل جديد مالك إلا الددسن وهذي ميزة تحسب لنيسان

الباترول الجديد يوم نزل ماوقفوا إنتاج الباترول القديم (حق الكرف)
والنافارا يوم نزل ماوقفوا إنتاج الددسن القديم

أما الهايلوكس يوم نزل البلاستيك وقفوا إنتاج حق الكرف ٢٠٠٥ وتحت
ويوم نزل الكروزر الجديد سحبوا على اللي قبله

وألحين الناس يدورون الكروزر ٢٠٠٦ وسعره مرتفع

aaeenn
08/09/2012, 09:14 AM
اذا تقصد الددسن الياباني وليس النافارا فعيبه الوحيد ان ما فيه عيوب

H_S_L_T
08/09/2012, 09:52 AM
وعليكم السلام ورحمه الله وبركاته

حاول تدور خليجي دفرنس يمد يجيك الدفرنس افضل ومافيه حنه بس ماادري اي نوع من الخليجي هو المهم انه يقطع برابع 195
موفق خير

فارس العمور
08/09/2012, 04:26 PM
سعره طيب مقارنه بغيره
وانصحك بالخليجيه من قطر او الكويت وغيرها
لانها اقل سعر ودفرنسها مريح للمكينه يعني حنتها بسيطه من تجربه

هائم
08/09/2012, 04:58 PM
شريت ددسن قبل ثلاث سنوات مديل 97ماشي 220الف وركبت كفرات سبورت مقاس الطول70 العرض225 الجنط 14ماشاء الله عليها الي اليوم هذا ماشي 700الف كيلووعليهن اللدسن مبروكه وبالله التوفيق

ابونومان
08/09/2012, 11:02 PM
الددسن للكرف والصبر لايعلا عليها

الشقردي 205
10/09/2012, 03:55 AM
الله يعطيكم العافيه وبيض الله وجيهكم ..

أبويوسف3
10/09/2012, 06:51 AM
ما هو أفضل كفر على الددسن ، حيث كثر الكلام على أنواع الكفرات اللي تناسب الددسن 0
نريد القول الفصل في ذلك ، وأقصد بالكفر المناسب اللي يصلح لدخول البر بدون كلفة على مكينة السيارة
وكذلك وهو الأهم أنك إذا مسكت خط لا يؤثر على عزم السيارة ، وكذلك لا يؤثر على لف الدركسون 0

ahmad hamad
05/11/2012, 02:12 AM
عن تجربه شخصيه استخدمت الددسن اكثر من 6 سنين سياره حقت كرف ما اذكر خرب فيها شي مع اني كارفها ومبهذلها صدمت فيها صدمتين كل صدمه اقوى من الثانيه ومع اني صلحتها تصليح اي كلام لكن ماشيه ولا قالت شي حتى لو خربت بتمشي معك سياره لك وللزمن وسعرها ماينزل لكن عيبها مثل ماقالو الشباب مطبها قوي شوي والمرتبه اللي ورا مكان الرجلين ضيق ماعدا الموديلات القديمه قبل ال 98 واسعه

بن عويف
05/11/2012, 01:28 PM
الله يالدستن
انا اعطيك علم الموديل ( من 82 إلى 85 )
صاموله صاموله
اما غيرها ما عاد لي بها علم
وفقك الله

هدد 1
05/11/2012, 01:42 PM
الددسن عيوبها سير المروحه بس وغيره ماعندك مشكله كانت معي ومشيتها 450 الف ومكينتها تقول وكاله

المنيعي1
06/11/2012, 12:47 AM
الددسن به عيوب ولاكن تعود عليه اذا كنت واحد صبور
مثلا الحنه حتى بالنمره الخامسه اصوات البيبان قراقيش حتى بالجدد
مطبه شين يقص الظهر ولاتنفع للي معه عايله
عزمه ضعيف مقارنه بالسيارات الاخرى

ومميزات الصبر والبساطه والخلو من التعقيدات الالكترونيه
اذا كنت راعي كرف وكد لاتدور غيره

انا معي ددسن 10 اكرهه لاكني متعود عليه وصار عيوبه شي عادي عندي

الله يهديك الددسن عزمه ضعيف
يارجال عندنا 2005 طلعت عليه مرة بالخامس ادوسله وتفز ماشاء الله عليه كأنك مرجعه نمرة

ابو طلال8666
06/11/2012, 08:11 AM
الددتسن الجديدة به مشاكل
اسلاك الديلكو ضعيفة دايم تطلع من الفيش
وضيق بالمرتبة الخلفية