شوركم يالربع ...باثفندر 2002...ولا ناتيفا...!!!!!!!!!!

[mr.salih]

السلام عليكم ورحمة الله وبركاته..

يالربع بدووون مقدمات..

عندي سياره سيدان وابي ابيعها... وودي بساره تكون للبر والمدينه....تكسر الكيبورد من كثر ما اقرا وشوف واسال .... عن السياره المناسبه...بس قبل لا اقولكم السيارات الي توصلت لها بقولكم استعمالي..

اول شي السياره الي بشتريها راح تكون الوحيده فالبيت وانا طالب جامعي...ومافي غيري فالبيت والبقيه الوالده الله يحفظها.وأختي....استعمالي 60%مدينه 40% بر...

والمبلغ الموجود..30الف فقط لاغير..وقد ينقص قليل...

أما السيارات:

حصلت هايلكس 99..بس رادني انها كلبليتر...والحوض ما استفيد منه..وسعرها 28.....عن طريق معرفه..

وهايلكس 2004..ديزل....ب28 أن ماكنت واهم....وعن طريق معرفه...بس ديزل:(.....والحوض برضه ما استفيد منه...

باثفندر....وهذا من اول ماشفته حبيته...بس كرهته بسبت الخرابات...لاكن بعد الفحص والتقصي .. تبين لي ان موديل 2003 وفوق هو الي يعاني من الخرابات خاصه 2003....لذالك فكرت بموديل 2002...( كم سعر 2002)

جيب متسوبيشي...حصلت ناتيفا موديل 2006 ب30.الف ...وبرضه الجيب ذا وباجيرو واضح انه حق كرررف ...بس رادني حسب ما سمعت...قطع غياره غاليه....والمشكله انه معقد يعني مو اي ورشه تقبله...


باستخدامي لديره والطلعات الخفيفه..وانا من المدينه يعني مافي طعوس ماغير بطانيج وحصى..والسفر مررره فالسنه..

ما كتبت هذا الموضوع الا اني اثق بعد الله بنصيحتكم.....اي نصيحه لاتبخلون علينا....

وسلاامتكم

[mr.salih]

يالربع كم سعر البرادو 2000...وتحت...

[شاووش]

الله يرزقك من واسع فضله
الباثفاندر افضضل خيآر صرآحه
اتوقع تحصل من 25 الا 35 الف تقريبا
تزيد وتنقص حسب النظافه والله العالم ..

[صياد الجبل]

اشوف الباث حلو ولكن احرض على النضيف والموديلات 2002 و 2003 حلوه لكن احرض على النضيف

وعندك جيب ربع باترول من موديل 91 الى 96 تحصل بمبلغ هذا ولكن احرض على النضيف

وعندك الجيب الربع التويوتا احرض على موديلات تكون فوق 92 الى 97 واحرض على النضيف

ولاتستعجل وعند الهايلوكس حلو والددسن احرض على غمارتين والحوض حلو تستفيد منه في نقل العفوش واغراض البر

ولاتستعجل

[على رمشي تمشي]

احد اخوياي يملك ناتيفيا بصراحه موتر جبار وقطع غياره نوعا ما معقوله - يتميز بكبر ووسع السياره ويعيبه ضعف المكينة فقط لكن يؤدي الغرض المطلوب - بالتوفيق

[mr.salih]

عدنا اليكم من جديد

يالربع....بعت سيارتي ودورت سياره هايلكس ولا باث وماحصلت ...ورجعت على السيدان

ولان بديت افكر مره ثانيه بعد ماحصلت ناتيفا 2007 ماشيه 250 ...نظظظيفه......

وش رايكم ابي استخدمها 3سنوات كحد اقصى.....بس المشكله الناس تقول القطع ناااار وانا ماني موظف .....فاخر سنه فالجامعه

مع اني شفت اسعار القطع واشوفها عاديه....


شوركم..><

[m3ax]

معاد فيه ولا سيارة قطع غيارها رخيصه ابد

كل السيارات ارتفعت قطع غيارها حتى التويوتا اللي الناس ماخذين فيها مقلب

المتسوبيشي اسعار قطع غيارها مرتفعه شوي لكن عمرها اطول بكثير من اغلب السيارات

توكل على الله وافحص الموتر وتاكد من نظافته واشتره

[ابا الأفلح]

شف وانا اخوك
انا ابنصحك ابعد عن المستعمل ووجع الراس ( مستعمل ماشي فوق ال 150 الف وفوق ابعد عنه ) ترا بيشغلك
انا معاي صغيره مره وقير تماتيك ودفع امامي والله اني اطعس بها واطلع مطاليع الجيوب
وسفر وديره موتر خدوم مره بس يعيبها انها واطيه ولهاا فتره طويله معي
انصحك تدور على اكسنت والا يارس نظيفه مره والا صني جديده تراهي ب 40 الف بسمك مديل 2012 عند معرض نجد
وريح راسك من الورش ووجع الراس والنصب من المرتزقه الاجانب وجب قطع ود قطع والله بيرزقك وتشري جديد ان شاء الله

[mr.salih]

M3ax الله يعطيك العافيه..وصحيح كل شي غلا مهو بس القطع

ابا الافلح انت الي معك ناتيفا...وكيف واطيه انا اشوف ارتفاعها طيب....والحمد لله معي كامري من احسن مايكون....بس ودي فيساره بر وخط.....وانت عارف الجديد سعره نار والمستعمل ناااار....وصراحه الناتيفا معجبني....بس بغيت اسال عنه زياده....ماودك اخذه ثم ابلش فيه

[ابا الأفلح]

لا وانا اخوك انا معي موتر صغير مره
بس المستعمل ودك تاخذذه نظيف ومن شخص تثق فيه
وانصحك تسوي صيانه وترتيب لموترك اريحلك او انك تخلي موترك لا تبيعه
وتاخذذ موتر للبر كسره بس قير ومكينه كويسات
وبتوفيق

[Salamah.y]

الناتيفا مع ولد عمي , و الصراحه موتر طيب مآ عليه
جودته عآلية , مقارنه بالسيارات المنآفسه , و يعيبه زي مآ تفضل أخونآ
ضعف شوي بالمحرك , و لكن مهي مشكله دام مآنت رآعي طعوس , و إستخدآمك أغلبه بالمدينة
امممـ ,, مع ولد عمي صار له حول سنتين , و مآ شكى منه الحمدلله ~
و القطع رغم غلآهآ الا أنك تغير القطعه , و أنت متأكد أنهآ أصليه , و رآح تعيش معك بحول الله

,

و فيه أخوه الكبير , الباجيرو , أيضاً ممكن تحصل حول السعر هذآ
بس يكون موديل أقدم شوي , على 2003 و 2004 , نا أقول أحرص على النظيف
على شان ما يبهذلك , خصوصا ً انه الموتر الوحيد بالبيت !!

,

امممـ ,, ما فكرت بالجيب التويوتا القديم
صالون موديل 85 الى 91 ؟!

هالموآتر لو توفقت بشي نظيف , تنسى الورش مع التوفيق
تروح المكآن اللي تبي و بآلك مرتآح و متطمن
محركات قوية تتحمل الكرف , و غير معقده , و قطع الغيار بكل مكان و رخيصة
اي ورشه ممكن تصلحه لك , لو تعطل به اي شي لا سمح الله
عيبهآ , قلة الراحة خصوصاً من 89 و تحت
كذلك , الموديل يعتبر قديم , إذا انت تهمك المظآهر
مع اني اشوف انهآ جميله جداً , و لهآ رونق خآص

,

بالأخير أقول , الله يرزقك من وآسع فضله , و يخليك لأهلك ذخر
و يخليهم لك , و يوفقك بالجآمعه و ينجحك دنيآ و آخره ~