انا صدمت واحد ونحشت

[الكاشت 911]

السلام عليكم

ياجماعة الخير انا رجال صدمت واحد ونحشت
ويشهد الله علي اني متندم اشد الندم اني نحشت ولا ادري وش اسوي هالحين
والنوم والله ماعاد يجيني اني شايل همه ليومكم طبعا الصدمة مب قوية يعني اتوقع حكة في الرفرف وانكسرت مرايته والله اني نادم اشد الندم وطبعا انا ما اعرف راعي الموتر ولا رقمه ولا كان والله رحت له واعتذرت منه وعوضته والله اني نادم تكفون ي الربع وش تنصحوني اسوي

[sameer_1798]

وعليكم السلام ورحمة الله
اسئل شيخ ويفتيك إن شاء الله

[صدى الاطلال]

قدر التلفيات ماليا
وتصدق بها على نيته

[ابو خالد 1992]

مثل ماقال اخوي سامر اسئل شيخ لا تخلي ششي بذمتك

[ذيب زلفاوي]

اتوقع لو تبلغ المرور وتشوف اذا يعرفونه

[شاووش]

وعليكم السلام ورحمة الله
اسئل شيخ ويفتيك إن شاء الله

1+
هذا افضل حل عشان تريح ضميرك

[فتك 800]

رح للمرور اللي بمنطقتك وهم يفيدونك

وحط رقمك عندهم واسال

واذا مابوه حل قدر قيمة التلف اللي صار وتصدق بوه

[صاحب المراجل]

وعليكم السلام ورحمة الله
اسئل شيخ ويفتيك إن شاء الله
+2
مثل ما قال اخوي sameer

[8080tarek]

انا ماانصحك تروح المرور ممكن يكون فيها مسائله ولامشكله عليك .
انصحك ترجع المكان الي صدمته فيه وتسال فيه بلاخص اذا كان عنده محلات تجاريه اسال ممكن احد يعرفه ولا يعرف اي شي عنه ..ممكن يكون زبون عندهم.

اسال الله ان يتقبل منك ويغفر لك ويكتبلك الاجر

[كثير السؤال]

تصدق وانوه له وادع له بظهر الغيب واطلب من الله السموحه

[الكاشت 911]

والله يا اخوان ان ما انوم الليل

طيب فرضا لا قدر الله بلغ على سيارتي

وش السواة

او وش التدبيرات اللي بتكون بعدها

وانا سمعت ان البلاغ ينمسح بعد شهر وانا ان شاء الله ناوي اتصدق عنه

[سيد النشاما..]

توجه لاقرب مرور بلغهم واحتمال يعطونك مخالفة هروب 900 ريال
واحتمال مايعطونك اذا شافوك جيتهم ... ي كحيلان
ومن ناحية صاحبك اللي صدمته راح يبحثون في الحوادث المسجلة ضد مجهول .. واذا حصلوا البلاغ بيتواصلون معه وبتنحل قضيتكم ...

من كلام واحد جنبي شغال بالمرور ..... وفقك الله

[الكاشت 911]

توجه لاقرب مرور بلغهم واحتمال يعطونك مخالفة هروب 900 ريال
واحتمال مايعطونك اذا شافوك جيتهم ... ي كحيلان
ومن ناحية صاحبك اللي صدمته راح يبحثون في الحوادث المسجلة ضد مجهول .. واذا حصلوا البلاغ بيتواصلون معه وبتنحل قضيتكم ...

من كلام واحد جنبي شغال بالمرور ..... وفقك الله

طيب ي الخوي اخاف يكون فيها توقيف او شي ولا تنسى ان السيارة مب باسمي

[أبو راشد 33]

ماأتوقع فيها توقيف إذا أنت رايح تسدد
و حتى إن كان فيها توقيف أهم شي تبري ذمتك و مجرد ماتسدد اللي عليك تطلع هذي متأكد منها
أنت رح للمرور وسجل بلاغ بنفس مواصفات السيارة اللي صدمتها ( اللون - النوع - الموديل إن أمكن ) و المكان و الوقت
أهم شي لازم تتصرف ترى فيها ذمة و حقوق ناس و الله يسهل أمرك

[شهادة مجروحة]

اخي الكريم ان شاء الله ان في قلبك خير دامك ندمان

اهل العلم يقولون بوجوب براءة الذمة وفي مثل حالتك لايصح التصدق لانه بالامكان معرفة من اخطأت بحقه . الا اذا تعذر ذلك انت مقر بأنك مخطيء فتكفير خطأك لازم تتحمله وهو انك تروح تبلغ واستعن بالله وصدقني اذا اخلصت النية راح ترجع بيتك وكل اللي راح يصير ياخذون بياناتك والسيارة وحتى لو ماهي باسمك . افضل واسلم لك من عذاب الضمير .

الصدقة في حال بذل السبب ولم تجد الشخص .. وذكر العلماء ان الله سبحانه قد يغفر لمن اخطأ في حقه اما الخطأ في حق العباد فيجب ان يوفى اليهم في الدنيا او الاخرة .

اتمنى ذكر نوع السيارة المصدومة والمكان.

تحياتي لك

[الكاشت 911]

يا اخوان الحادث له اسبوع تقريبا

انا اخاف اني اروح للمرور ثمن يمرمطون فيني او في ابوي اللي ماله حيلة

واخاف ان الرجال مابلغ في هالحالة وش السواة !!

انا إنسان أحس اني بنفجر ما اقدر اتحمل راسي ينبض وعظامي احس انها بتتفكك معد لي حيلة

[الكاشت 911]

اخي الكريم ان شاء الله ان في قلبك خير دامك ندمان

اهل العلم يقولون بوجوب براءة الذمة وفي مثل حالتك لايصح التصدق لانه بالامكان معرفة من اخطأت بحقه . الا اذا تعذر ذلك انت مقر بأنك مخطيء فتكفير خطأك لازم تتحمله وهو انك تروح تبلغ واستعن بالله وصدقني اذا اخلصت النية راح ترجع بيتك وكل اللي راح يصير ياخذون بياناتك والسيارة وحتى لو ماهي باسمك . افضل واسلم لك من عذاب الضمير .

الصدقة في حال بذل السبب ولم تجد الشخص .. وذكر العلماء ان الله سبحانه قد يغفر لمن اخطأ في حقه اما الخطأ في حق العباد فيجب ان يوفى اليهم في الدنيا او الاخرة .

اتمنى ذكر نوع السيارة المصدومة والمكان.

تحياتي لك

السيارة اللي صدمتها أتوقع

كامري 2011

المكان امام مدارس التوحيد الأهلية في حي السويدي

[YUKON_GMC]

مثل ماقال لك اخوي : شهادة مجروحة

لازم بالاول تبذل كل جهودك لمعرفة اللي صدمته منها تبليغ المرور حتى لو ترتب على ذلك سجن او غرامه اذا تبي تبري ذمتك ..

وحتى لو سجن كلها 24 ساعه بالكثير وتدفع المبلغ وتطلع مافيه قص رقبه والسياره اذا ماهي باسمك تجيب صاحبها او تأخذ منه وكاله

اما اذا انك تبي الهين وتدووور لك اسهل مخرج معناته ان ذمتك وسيعه ولاهمك

[د.داهوم]

(( إِنَّ اللَّهَ لا يَغْفِرُ أَنْ يُشْرَكَ بِهِ وَيَغْفِرُ مَا دُونَ ذَلِكَ لِمَنْ يَشَاءُ وَمَنْ يُشْرِكْ بِاللَّهِ فَقَدِ افْتَرَى إِثْمًا عَظِيمًا))[النساء:48]؟

(( إِنَّ اللَّهَ لَا يَغْفِرُ أَنْ يُشْرَكَ بِهِ وَيَغْفِرُ مَا دُونَ ذَلِكَ لِمَنْ يَشَاءُ وَمَنْ يُشْرِكْ بِاللَّهِ فَقَدْ ضَلَّ ضَلَالًا بَعِيدًا)) [النساء:116]

واضح اخي الكاشت انك نادم بشدة والله اسمه العفو الغفور .. لكن لا يمنع مع هذه التوبة ان تستفتي احد العلماء الأفاضل المؤهلين بإصدار الفتوى.

غفر الله لنا ولكم ولكل مسلم.

[سيد النشاما..]

يارجال سهالات والله
رح لمرور السويدي اقرب مركز وامسك اي عسكري لو جندي وبينهي موضوعك
خويي يقول يجون ناس كثيرين بمثل هالحالة ويخلصون على طول

[الكاشت 911]

يارجال سهالات والله
رح لمرور السويدي اقرب مركز وامسك اي عسكري لو جندي وبينهي موضوعك
خويي يقول يجون ناس كثيرين بمثل هالحالة ويخلصون على طول

طيب ياخوك مرور السويدي وينه فيه

ثاني شي لو فرضنا ان الرجال مابلغ وش الإجراءات اللي بتتخذ

انا خوفي كله ان فيها توقيف وقلق وانا ولله الحمد ماقد دخلت للتوقيف هذا اللي خايف منه

[ذيب زلفاوي]

ماتوقع اان فيها توقيف واذا صار تطلع بكفاله

يعني الامر سهر وتوكل على الله

[ابونبيل]

بلغ المرور لان هو مايقدر يصلح سيارته الا اذا خذ ورقه تصليح من المرور واكيد انه مبلغ

رح والله يغفر لك

[الكاشت 911]

بلغ المرور لان هو مايقدر يصلح سيارته الا اذا خذ ورقه تصليح من المرور واكيد انه مبلغ

رح والله يغفر لك

طيب ي الخوي اروح للمرور وش اقول لهم ثاني شي الموتر باسم الوالد

[الكاشت 911]

^^^^^^^^^^^^^^^

للرفع

[كعمور]

وش السيارة الى انت صدمت

[الكاشت 911]

وش السيارة الى انت صدمت

كامري 2011 او 2010

[الكاشت 911]

انا احس اني بنفجر كلمت الوالد قبل شوي قال يا رجال لا تروح للمرور وتدخل نفسك في مشاكل ثمن يركبون عليك قضايا وانا والله اني معد اتحمل الوضع هذا

[N أبورغد N]

اخوي معليش في هالمواضيع لازم تتبع الطريقة الصحيحه
تروح المرور وتدخل على المدير وتحكيله المشكله لانه غالبا بيكون احلم من في القسم
والافضل تاخذ ابوك معك وتبحثون عن اي معرفه في المرور تحسبا للحجز اي فرد في المرور بينفع ان شاء الله
ودام توجهك لحق فثق بالله الي خفت منه يوم تبي تبري ذمتك

[الكاشت 911]

اخوي معليش في هالمواضيع لازم تتبع الطريقة الصحيحه
تروح المرور وتدخل على المدير وتحكيله المشكله لانه غالبا بيكون احلم من في القسم
والافضل تاخذ ابوك معك وتبحثون عن اي معرفه في المرور تحسبا للحجز اي فرد في المرور بينفع ان شاء الله
ودام توجهك لحق فثق بالله الي خفت منه يوم تبي تبري ذمتك

يا ابو رغد المشكلة اني قلت للوالد يروح معي للمرور وهو رافض الفكرة نهائيا يقول اخاف يركبون علينا قضايا غيرها وفرضا انه مابلغ انا وش موقفي في هالحالة وانا والله مابي الوالد يدخل للتوقيف تعرف انت الوضع الوالد ماله وهالسوالف

[شهادة مجروحة]

اخي الله يحفظك .. اللي يسمعك يقول رايح المباحث بقضية سياسية :p

ماراح يوقفون الوالد ولا شي لانه مارتكب الحادث والامور سهالات الحمدلله لا اصابات ولا وفيات .. هونها وتهون ..وقول لابوك الشيطان ما مات هو اللي يكبر الموضوع وبيحملونا قضايا وغيرها عشان ماتروح وتضل آثم وقوله لو واحد صدم سيارتك وهرب بتدعي عليه ولا لا ؟ اكيد بقولك نعم . اجل كيف ترضى يابوي صاحب السيارة يدعي ويحسب علي وربما تصديني دعوة تهلكني ..الظلم ظلمات واللي ماترضاه يابوي على نفسك وعلى عيالك وحلالك هم الناس مايرضونه على انفسهم وعيالهم وحلالهم ..

ومثل ماقال ابو رغد كلم المدير والا من ينوب عنه وروح القسم بدل عذاب الضمير .

[باوزير]

كلم المدير يعلق ورقة انه من موتره كامري انكسرت مرايته عليه يراجع المدير و تكون متفق مع المدير انه اذا جا راعي الكامري تستسمح منه و تصلح موتره و كذا ابريت ذمتك

[stranger]

افضل حل
اتصل على المرور وحدد لهم موقع الحادث ولأي منطقة تابع وراجع المرور وعطهم مواصفات السيارة والتاريخ وان شاء الله تنتهي مشكلتك

[التعـ King ـديل]

رح للمرور والله يعينك على التكيه بالتوقيف لين يجي خصمك وتسدد لهم مخالفه الهروب وتصلح موتره

[YUKON_GMC]

يارجال ترى الدعوى كلها صدمه بسيطه وقضيتك عند المرور ماهي عند المباحث والا الاستخبارات ..

رح للمرور وقول انا حكيت في موتر الرجال وكنت مستعجل وناوي ارجع له ..

يمكن ان الرجال اخذ رقم لوحة سيارتك ومبلغ عنك واذا مسوك قبل تجيهم تكون المشكله اكبر


واجد الحوادث اللي زي كذا واكيد الرجال اخذ منهم ورقة اصلاح ومسجل عنهم بالكمبيوتر كل بياناته

وكل الدعوى غرامه وقيمة اصلاح يمكن ماتوتصل 3000 ريال لو كنت قادر على دفعها ..

ولو ماكنت قادر عاد الله يعينك دبر عمرك

[N أبورغد N]

يااخي الخطاء وقع منك ولا بد من تصحيحه
واذا ابوك رافض هل طاعته في هذا الامر يرضي الله سبحانه
اذا ماتبي تروح المرور ابحث عن اي معرفه في المرور يستعلم عن موضوعك
ويقدر يجيبلك اسم ورقم الرجال اذا مبلغ ويعلمك هل على السياره تعميم
ترى المعقبين ممكن يفيدونك وكل شيء بحقه
والله يعينك على نفسك وعلى هالمشكله البسيطه
وطع الشور لا تعود نفسك الا على الخير وترتاح
والدليل ماعرفت تتهنى بالنوم فلا تعود نفسك الردا وانا اخوك

[bloodomen]

تصدق واستغفر الله
وان الله غفور رحيم

[الكاشت 911]

رح للمرور والله يعينك على التكيه بالتوقيف لين يجي خصمك وتسدد لهم مخالفه الهروب وتصلح موتره


طيب فرضا ماجاء ولا كان مبلغ وش السواة

[ابوصالح3]

الله يكثر من أمثالك

[stranger]

اذا ما بلغ هذيك الساعة تقدر تتصدق بنية الرجال والله ييسرلك امرك

[ذيب زلفاوي]

انت مكبر السالفه وهي سهله

ادخل على الظابط وقله اني صدمت واحد ونحشت والموتر باسم ابوي وابوي كبير بالسن ومابيه يدخل توقيف ولا شي صدقني حتى مخالفة الهروب مهيب جايتك بالعكس بيمدح فيك وبيساعدك بالي يقدر عليه لان الظباط مب مثل الافراد الفراد والعسكر العاديين غالبا يجيك رجال عاقل وفاهم الوضع

[حبيب الامس]

عز الله انهم نصحوك يا ابن الحلال
رح للمرور وتوكل على الله

[com.الطراعيز]

الله يعينك

[شادي الاول]

لا انصحك تروح للمرور لان الشخص في هذه الحالة مجهول وارى والله اعلم بوجوب الصدقة لان اذا رحت للمرور حتحصل قضايا وبلاغات وشكاوي كثيرة مسجلة ضد مجهول ولا سمح الله تتسجل باسمك احد هذه القضايا مثل قضايا الدهس والوفيات والله اعلم

[الكاشت 911]

لا انصحك تروح للمرور لان الشخص في هذه الحالة مجهول وارى والله اعلم بوجوب الصدقة لان اذا رحت للمرور حتحصل قضايا وبلاغات وشكاوي كثيرة مسجلة ضد مجهول ولا سمح الله تتسجل باسمك احد هذه القضايا مثل قضايا الدهس والوفيات والله اعلم

طيب ماعندك معرفة في المرور

[دحيم الفزعة]

لا انصحك تروح للمرور لان الشخص في هذه الحالة مجهول وارى والله اعلم بوجوب الصدقة لان اذا رحت للمرور حتحصل قضايا وبلاغات وشكاوي كثيرة مسجلة ضد مجهول ولا سمح الله تتسجل باسمك احد هذه القضايا مثل قضايا الدهس والوفيات والله اعلم



السلام عليكم
الله يهديك لا تفتي إلا إذا عندك علم
ومشكور على إجتهادك

[باترول 88]

ابذل كل جهدك على شان تحصل صاحب السياره
رح مكان الحادث وانت تقول عند مدارس ف اكيد صاحب السياره ياخذ عياله من المدرسه انتظره وان شاء الله تحصله


واذكر قبل اسبوعين كنت راجع من جامعه سلمان بالخرج يوم الاربعاء وكان احد زملائي بالمحاضر راجع بنفس طريقي
وفجئه شطف من عندي صني لونها اسود طااير بعدها بكيلوا لقيت سياره قاالبه وداخله على مزرعه نزلنا وطلعنا الرجال وتفاجئت انه معي بالمحاضره والحادث شنيع جدا وسسب الانقلاب ان راعي الصني حده وزحت سيارته وقلبت وراعي الصني هج ولا رجع
والرجال صارله اسبوعين ما ججاء للجاامعه ولا ادري وش حاالته والله يكون بعونه
وادعوووله يارجاال بالشفاء العاجل

[ابو البر]

بيض الله وجهك يا بطل

رسولنا صلى الله عليه وسلم قال
(الخير في أمتي الى يوم القيامه )

وابشرك الآمور ان شاء الله بسيطه ومثل ما قالو الاخوان رح للمرور وبتلاقي ناس يحبون الخير
وبيساعدونك على ابراء الذمه .

اكرر شكري وأعجابي بموقفك النبيل ولو انه جاء متأخر لاكن ما عليه.

[المطرب]

اذا انت ببلده صغيره راح تلقاه....واذا بمدينه استفت شيخ

[أبوعذااب707]

والله نصيحه لوجه الله رح للمرور وقلهم انت الي صدمته وبتصلح سيارته وان شاء الله يتنازل ما تدري


والله اني منغبن اليوم كنت في مطععم وطلعت لقيت سيارتي مافيها شنطه صدمها واحد وشرد والله قهرني الناس الي شافوه ما اخذوا رقم اللوحه بس عطوني اوصاف السياره
((ولكن اذا ما واجهته بالدنيا بواجهه عند الله يوم القيامه والله لو يبقى له حسنه ويدخل الجنه ما اتنازل))

[N أبورغد N]

888888888888
العفو كنز اسأل الله ان لايحرمك اياه
وما اللومك الحق حق
والله المستعان

[ذابل الريق]

اول شئ تأنيب الضمير دليل ياخوي عن طيب اصلك وطيب تربيتك وانك تملك قلب مفعم بالايمان ومعرفة الله سبحانه وتعالى
ثانيا اجتهد في البحث عن اللي صدمته ولو تبحث عن طريق المرور يمكن مبلغ عنك وكذا تعرفه
ثالثا اذ اجتهدت وماحصلت عليه قدر الصدمة وبقيمتها تصدق بها بنية عن راعي السياره اللي صدمته

[فنجال شاهي]

شوف يا خوي انت روح للمرور وقلهم على السالفه واذا خايف من التوقيف خذ معك واحد من ربعك او قريب لك مرافق ويكون موظف حكومي مدني يعني غير عسكري وخله ياخذ معه صوره من بطاقة الاحوال عشان اذا طلبو احد يكفلك وماتدخل التوقيف

[بدوي جنوبي]

يغلق الموضوع