وش رايك بربع هاذي علومهم ؟

[سلمانـ]

السلام عليكم ورحمة الله وبركات


في موضوع مع الأسف صار يؤلم الكثير منا الا وهو التقنيه الحديثه وماذا فعلت بنا لاشك ان الهواتف وغيرها من التقنيات منها الفائده ومنها المضره حينما تقع بأيدي صغار العقول او قليل الذوق وهنا اذكر بعض ماحصل معي من هذه التقنيه


قبل يومين كنت مسافر الى مكان قريب وكان لي اجتماع مع بعض الأصدقاء المملين مع الأسف كان عددهم مايقارب 8 اشخاص وطبعا كنا نروح ونجي على سيارتي الجيب علشان نكون مع بعض ونسولف ومانكون متفرقين بسيارتين المهم احنا نروح نطلع هنا وهناك نتقهوى ونكشت للبر احيانا والجماعه كلهم معاهم بلاك بيري وايفون وجالكسي وهذا اللي يقطع القلب وانا ياجماعه صاير السواق واللي اشتري الأغراض واللي اضف الأغراض بعد كل طلعه واللي يقهرني وانا اسوق ماحد يسولف معاي الا قليل الأغلبيه ماسكين جوالاتهم ويدردشون ومهما اتكلم واهاوش ماحد يعبرني والله ناس ممله بشكل فضيع وبعد مانطلع ونجلس ازين لهم شاهي وافرش الفرشه ثم ينزلون من السياره ويجلسون وبعد الطلعه الكل يركب وهذا اللي يقدر عليه واذا مشيت ماتشوف الا اللي نايم ولا ماسك الجوال واذا جا وقت الفطور ولا العشى ماحد يتكلم ولا يدفع فلوس يسكتون وانا يامسكين مااصبر اطفش من سخافاتهم ثم ادفع الدراهم واجيب الأكل وهم بس لاهين باللي معهم وبس شاطرين بالأوامر رح للمكان الفلاني ورح للمكان الزفت بوجه العدو وبعد مانرجع من الرحله والله العظيم ماحد يفكر حتى يشيل زبالته من سيارتي ياكلون ويشربون وينكرون



سألتكم بالله وش الحل مع هالأشكال والمشكله اني ما عندي اصدقاء تقريبا والمصيبه ان هالأوادم قرايبي واخوي يعني يمكن نقول عنهم الأقارب عقارب ويمكن اللي ينقال عنه اخوي اللي ماجابته امي ماهو من نصيبي

[SAS2]

ههههههه وسع صدرك سالفتك تساهيل وما صار من اخوياك شي دامهم ما ضروك والقطة اهم شي تجمعها عشان ما يبقى بالنفوس شي

ودام الي معك اقاربك مالك الا تتحمل وانت تظحك يمونون عليك وما فيها شي واذا متظايق من تصرفهم فهمهم باسلوب مرح وفية ابتسامة

واذا ما فهموا خلهم منت مجبور عليهم مع ان جميلك معهم ما راح ينسونة بس لا تخرب شغلك معهم وتمن عليهم بشي يا تكمل انت تظحك والا خلهم اختر

وسلامتك يالغالي

[سلمانـ]

نورتني بمشاركتك يالغالي الموضوع مو فلوس ندفعها بالعكس ويمكن نصرف كثير مما نملك علشان نستانس لاكن زعلي انا ومقصدي من الجوالات اللي صارت تبعد القريب وتقرب البعيد وضيقت صدري لاشفت ربعي وسمعت ذاك المثل اللي يقول ربع تعاونو ماذلو هذا مقصدي وانا اخوك واللي مايعينك وهو بجنبك وش الفايده منه

[ابوراكان تبوك]

ههههههههههه افضل حل خذ الجوالات وقفل عليها بدرج السياره ( من باب المزح )

بالعكس يا اخوي الاقارب ليسوا عقارب مهما كان هذولا عزوه وموضوع الكشتات اكشت معهم وخل العزبه كل مره على واحد وهكذا

[سلمانـ]

واحد منهم الله يجزاه خير قال اقتراح اني اعطيهم جوال ابو كشاف للرحلات والسفريات علشان اذا حب واحد منهم يدردش مايلقى الا الكشاف يتسلى فيه:D:D:D

[مدمن الشات]

لو أني مكانك لكان خيمت في مكان بعيد عن برج الجوال

[wrs3975]

ههههههه وسع صدرك سالفتك تساهيل وما صار من اخوياك شي دامهم ما ضروك والقطة اهم شي تجمعها عشان ما يبقى بالنفوس شي

ودام الي معك اقاربك مالك الا تتحمل وانت تظحك يمونون عليك وما فيها شي واذا متظايق من تصرفهم فهمهم باسلوب مرح وفية ابتسامة

واذا ما فهموا خلهم منت مجبور عليهم مع ان جميلك معهم ما راح ينسونة بس لا تخرب شغلك معهم وتمن عليهم بشي يا تكمل انت تظحك والا خلهم اختر

وسلامتك يالغالي


كلام جميل وماعليه زود...

[escape_man]

اكشت بشعبان ونفود نساح وما وراها

مافي 3G

يعني جواله .,. يقلبه يقلبه .,. كنه ابوكشاف :good2:

[ابوكشتات]

الله يعينك عليهم حاول تدور اخويا ثانيين غيرهم

[sniper2009]

ههههههه نصيحتي لك طالما عزيزين عليك وماتقدر تفارقهم خش وعيش الجو مثلهم انت باين عليك هبة ريح بس لاتكون على حساب نفسك انصحك اشتر بلاك بيري وعليه شغل الواتس اب والطلعات خلها على الكل لاتدلعهم كل طلعه بسيارتك اطلع سياراتهم وعيش حياتك

[ابولولو]

اول شى انت ماجور ولك اجر عظيم بصلت القرابه وتجميعهم والله لايضيع اجرك وتعبك معهم

ثانيآ انت شكلت تحب البر والوناسه وصابر عليهم ولا لك احد ثانى تكشت معه

ثالثا حاول قبل ماتحركون من الديره وزع المهمات واتفق معهم وكنى ادرى لو قلتلهم شى يبون يهونون بسرعه لانهم شكلهم على جريف هههههههه

الزبده حاول تكشت مع احد ثانى وتحسسهم باالمسوليه وخلهم هم اللي يدورن عليك وتغلى عليهم شوى

انا اعرف ان يصير واحد او اثنين باالرحله راعين اجهزه وعجازين ام اخويكم عجب كلهم الله يهصبر عليهم وابى اسميهم بعد اذنك (فرقه حسب الله)هههههههههه

اتمنا ان الله يصلح لهم ولنا الحال

[سلمانـ]

مدمن الشات وابو لولو ولا يهونون باقي الجماعه كلامكم جميل اولا الكشته في مكان مافي ابراج جوال هذا حل والثاني توزيع الشغل عليهم بين الطبخ والشاي وغسل المواعين وبالنسبه لخوي اللي يقول خلك معك بلاك بيري وواتس اب الصراحه انا معي بس اتركه بالسياره واهتم باللي حولي ووقت الكشته نبي العلوم الغانمه والسوالف الطيبه من رجال شرواك ولا الجوال نخليه للوحده يسلينا ومن رايي ان استخدام البلاك بيري في مجلس النشاما وجمعة الأخوه ماهيب مرجله المفروض الواحد يقدر المجلس اللي هو فيه يعني تتخيل نفسك مطنش اللي جالسين معاك وجالس تراسل والله مالها سنع

[مدمن الشات]

مدمن الشات وابو لولو ولا يهونون باقي الجماعه كلامكم جميل اولا الكشته في مكان مافي ابراج جوال هذا حل والثاني توزيع الشغل عليهم بين الطبخ والشاي وغسل المواعين وبالنسبه لخوي اللي يقول خلك معك بلاك بيري وواتس اب الصراحه انا معي بس اتركه بالسياره واهتم باللي حولي ووقت الكشته نبي العلوم الغانمه والسوالف الطيبه من رجال شرواك ولا الجوال نخليه للوحده يسلينا ومن رايي ان استخدام البلاك بيري في مجلس النشاما وجمعة الأخوه ماهيب مرجله المفروض الواحد يقدر المجلس اللي هو فيه يعني تتخيل نفسك مطنش اللي جالسين معاك وجالس تراسل والله مالها سنع

شكرا لك أخي سلمان
وأحب أن أضيف لك شروطي اذا أرادت مجموعة من الشباب خروجي معهم..
وهي:-

1- أنا ما أكشت الا اذا كان فيه نوم أما نطلع الصبح ونرجع الليل هذي من الممنوعات..

2-يمنع أحضار دش أو لابتوب أو أيباد.

3-لازم نخيم في مكان بعيد عن الاسفلت وبعيد عن أبراج الجوال.

4- وهي الأهم يمنع الأطفال من الكشتة لكثرة أزعاجهم في الرحلة..

[سلمانـ]

شروطك حلوه وتكمله للمتعه بالرحله والنوم بالبر روعه تحس نفسك مكشاتي من جد وانا بصراحه افضل اطلع بعيد عن الديره لأن بعض الرجال مايصبر عن عياله وبيته وكل شوي يبي يروح للديره

[الشقردي 205]

إخوي دامها ميانه وقرايب عادي مافيها شي وسع صدرك ونا اخوك ..


والبلاك بيري تراه ونيس وبـ صراحه انا من المدمنين عليه هههههه ..


لكن قبل لاتطلعون وزع الشغل عليهم صارحهم وقول لهم يالربع ترى كل واحد له شغله ..


مثلاُ واحد يطبخ وواحد يغسل المعاميل وواحد يقهوي .... الخ ..


وطلعة البر ما لها طعم بدون ميانه ووناسه حنا نبي الفكه من الرسميات ..



والصداقه لا تعتمد عليها بـ شكل كبير ترى والله اصدقائي ينعدون بـ الاصابع لاتعتمد إلا على نفسك وقرايبك ..


الله يوفقك ويوفقنا إخوي والله يشرح صدورنا اللهم امين ..

[قلب ذيب]

انت عودتهم على كذا.
اتركهم وخذ معك خوي واحد فقط .
ربعك ذولا ناس اتكاليين , وانت عودنهم على الاعتماد عليك .
اتركهم حتى لو كانوا اخوانك وبيعرفون مكانتك ومقدار تضحيتك من اجلهم يوم بيخاوون غيرك .
الحقيقه هاذولا مايستاهلون الخوووووووووه .

[ربيع الكشته]

هذه النصيحة زمان اول كانت بناقة لقحه و 7 كيلوا اقط , خذها مني مجاناً

اطبع موضوعك والردود الطيبه لبعض الاعضاء واشطب على اسمك اذا ماتبغاهم يعرفون نكك

اطبع صور على عددهم ووزعها عليهم في اقرب طلعه ,,, وسلامتك

لازم تكون جاد راح يضحكون يستهترون يصحون خل ملامحك جاده .

[أبوعابد 22]

ذولي مانقصهم وانت بكرامه الا تحفضهم
وترضعهم وتنومهم
وشذا الاخوي
اطلع بلحالي ازين

[فياض الربيع]

والله انا من رايي انهم مايصلحون خاصه انها ماوقفت حتى على الجوال انت تقول انك تشتغل لحالك

وتدفع لحالك بالله هذولي اخويا اسحب عليهم مهوب رجاجيل قسم بالله ياصبرك عليهم لو جلست في بيتك

افضل

[عدد وحدد]

الله يهدينا وياك وكل مسلم

[ابوعبدالرحمنن]

والله ياخوي سلمان انت رجالاً وليده ومخاواتك تنشرى بس ذولا مايقدرون الرجال
ومالك الا تدور غيرهم لانهم بعد فتره بيجيك احباط منهم
ومحاكيك صارت معه نفس الحركه :):):)

[عاشق دياري]

وعليكم السلام

مشكلة الجوالات اغلب الناس يعانون منها
وانا واحد منهم ولا لها حل للاسف
والله بعضهم تكلمهم ومن قل الحياء يقولك اصبر دقيقة بشوف شي وتلاقيه على لعبة او استقرام

عندي استراحة مع الشباب وانا احب الطبخ دائماً
انجبر اشتغل واقطع واطبخ لحالي بعض الاحيان
وفي الأخير يقوم ولا يكثر بالخير او يشيل شي او يساعد
بعدها حرمت اطبخ فيها اذا بغيت اطبخ طلعة اقرب مكان والعزبة موجودة .

والكشتات حاجة ثانية
لا جاء الأكل قام وغيره جالس ولو قلت له غسل قدر يتضايق ومن غير نفس

أصحاب الحركات هذي ( زلايب )
ولا ينفع معاهم الا تتركهم وترتاح

واكشت مع رفيق واحد بس ذيبان
ولا اكشت مع مجموعة وفيهم اتكاليه حتى لو فيها وناسة .

وسلامتك
والمعذرة على الإطالة

[كحيلان تميم]

اذا تبي شوري ..

هذي كلمه دايم اكررها من زمان ومازلت وانا مقتنع فيها ..

الطلعه بشكل عام بر ولا تمشي ولا مشوار قريب .. ياتطلع مع واحد ذيب زيك وشرواك واحدن ينشد به الظهر ورجال وكفو بمعنى الكلمة ولا لا تطلع مع احد اذا مالقيت وش لك بوجع الراس .. ان شاء الله لو ما تطلع الا لحالك بس تلقا راحتك احسن من يجي معك احد يغثك ويخرب جوك ..!!