***&&&((( سومتي 24 ساعه )))&&&***

[(هزاع)]

بسم الله الرحمن الرحيم
السلام عليكم ورحمة الله وبركاته
بالمثل
انا عارضلي طير وتساوموه الاجود
واحد الاخوه يدورله طير وسام وقروشه محدوده ولايبي غير طير واحد
هل لاكتب سومتي 24 ساعه معه حق الرجال يدور ولايبي يرتبط قطعة ايام
او ان راعي الطير يرد على موضوعه ولايهمل السومات حتى ولوماجازتله
عطونا الراي يالاجواد

[عاذي]

السلام عليكم ورحمة الله وبركاته
ابو مشعل كل عيد وانتم بصحة وعافية
الا وش رايك باللي طيرة يسام قبل عام او قبل فترة واذا بان فالطير عيب وجاء يبيعة قال الطير مسيوم قريب بالمبلغ وقدرة متى سيم قال قريب بس مالة مدة وقعد يقلد على السومة السابقة .. هذا وش رايك فية .

[ربع خالي]

وعليك السلام ورحمة الله وبركاته
هلا يابو مشعل
نعم معه حق. مثله مثل صاحب البضاعه اللي يدور اعلا السعر
ومثله مثل اللي يدفع عربون لصاحب البضاعه ويكون بينهم وقت معلوم وان تعدا الوقت انتهى الربط بالعربون وراح العربون على صاحبه بإنتهاء المده
وبالنسبة لي. ماني بحاط سومتي وانتظر الين يروح على بعض من الموسم وانا انتظر !
هذي وجهة نظري خاصه بي ولا اعممها
وكلٍ ورايه
تقبل مروري

[الامبراطوري]

سومة الطير سومة اللحظة ان بعتني والا الله يرزقني ويرزقك

[ابوماجد-1]

في كل شي طير او سلعه غيره

السوم سوم وبين ويجب على راعي السلعه يرد على السوام

اما يقول بعتك او يترك المزاد يمشي واذا مازادو عليه

ونوى يبيع لصاحب اخر سومه يشاوره ان بغاهـ بسومته او براحته

والعـــرف واضح وكلكم خير وبركــه

[الريمى]

تبي الصراحه انا اشوف ان اللي ٢٤ معه حق...لان بعض الناس اسوم منه شيهانه وهذي حصلت لي السوق المزاد بعد يومين
والرجال عارض سلعته بالمنتدي واسوم ويو ويومين مايرد ويجي وقت السوق اروح ادور غيره لان ماله حق ينصبني البيعه ومايرد الا بعد يومين ثلاث
لان اذا سمت المفروض يرد مايطنش انا مادري هو يبي يبيع ولا مايبي يبيع مايصير يربطني معاه
ولو مثلا حصلت شيهانه وانا سايم منه قبل يومين اخلي الشروه تروح
وانا انتظر اخينا متي يرد باع ولا ماباع
هذا رايي ال ٢٤ تجبره يرد واذا مارد راحت السومه ..
واشكر اخوي علي الموضوع

[وكري2007]

سومة الطير سومة اللحظة ان بعتني والا الله يرزقني ويرزقك

كلااااااااااااام سليم 100%

[الجره جديده]

بالنسبه للبيع والمشترا في نفس وقت البيع والمشترا

السلعه اللي تعرض للبيع يقلد سومها اثناء عرضها فقط
خاصه ان الطيور معرضه بين اليوم والليله لأي مشكله تصادفها
وخاصه اذا كان البيع عن طريق منتدى المنتدى ماهو عبله اهد الطير فيه واشوفه
اسوم على حسب الصور اللي اشوفها وحسب كلام راعيه هذا اذا ما توفر لي ان نروح نشوف هداد الطير خاصه هالايام اغلب الطيور مطلعه من المقيض ماهي مستعده
في هالحاله انا سمت طير نقول بعشره وراعيه قال جزاك الله خير يعني ما باعني
جاء واحد من البكره وفرق سومتي وراح شاف الطير ماجاز له او اكتشف من الشخص اللي ناوي يشري ان الطير فيه مشكله بعد ما قلب الطير وما عاد يبيه هون عنه
في هالحاله بيتصل علي راعيه ويقول انا بعتك طيب انا ياللي سمت بعشره شفت الرجال ماباعني وشريت طير ثاني خلاص ما يقدر يلزمني بسومتي ولا له حق يقول اني تخليت عن السومه
وحتى لو انا ما بعد شريت طير بيصير عندي شك وخوف اذا باعني بعد يوم او يومين ليش ما باع في نفس اليوم اذا هي تخارج معه البيعه
اسف ع الاطاله
زبدة الكلام للسوام حق ان يقول سومتي 24 ساعه لان لو راعي الطير بيبيع بنفس السوم بيبيع اثناء سماعه للسومه
انتهى الكلام

[باترول هدد]

حييت يابو مشعل

تحديد الوقت مثل الشرط وهذا المفروض

لان بعد 24 ساعه لو يدق صاحب السلعه على اللي سام ولابقاها معه حق ولا يدينه بشء , ولاله حق يقلد على السومه بعد 24 ساعه ولكن معه حق يقلد على السومه قبل مضئ 24 ساعه


أنا البارح سمت لي غنم من رجال وهي قبلي مسيومه بـ 1400 وزود فيها إلى 1600 ولاباعني وكررت عليه ولاحيت عليه ولاباع قلت ترى سومتي مسحوبه لاعاد تقلد على سومتي ولاتتصل علي .
وشرايك يابو مشعل

[ماجد9]

يا اخواني البيع بالمزاد يكون القبول والرفض بالسومه بنفس الحظه لا هي يوم ولا يومين لان هذا مزاد
مثل حراج السيارات على المزاد مافي شي اسمه 24 ساعه او يوم
اما بخصوص البيع والشراء بدون سوم ماله وقت محدد متي ما حب يبيع صاحب السلعه يبيعها يوم او يومين او اكثر
ولكم تحياتي

[عبدالله بن الشيخ]

صبحكم الله بالخير جميعاً

أولا ياخوان لازم نفرق بين المزاد المباشر , اللي يحصل في الاستراحات أو أي مكان , حيث يتم فيه السوم والبيع مباشرة أو عدم البيع , وأتوقع أن هذا خارج موضوع النقاش .

الأخ هزاع يقصد البيع طويل النسم ( إن صح التعبير ) وهو اللي يحصل في المنتديات أو عن طريق الجوال والواتساب والبلاك بيري والتويتر والمدعى ونحوه .

وفي هذه الحالة قد تكون بين السومة الأولى والسومة الثانية اسبوع أو تزيد المدة أو تنقص والأمر طبيعي ياخوان , المهم أن يكون الإنسان صادق فيما أُعطي به من السومات في الطير .

مثلاً ياخوان : أنا عارضلي طير حر صايد وفاعل , وسيم الطير مني قبل عشر أيام بـ 10,000 ولابعت .
الأمر طبيعي ياخوان أن صاحب السومة يكون تصرف بفلوسه , أو شراله طير ثاني , لأن سومته كانت بنفس اللحظة حتى لو ما قال سومتي لمدة 24 ساعة , الرجال يسوم الطير بنفس اللحظة وأنت تجيبه إما بعت وإما لا , وانتهى .
وليس من حقك أنك تجيه بعد أيام وتقوله محد زاد على سومتك والسوم واقف عليك ولازم تشتري الطير , إلا إذا رضي .

أيضا ياخوان صاحب الطير صادق لما قال أُعطيت في الطير 10,000 ولابعت , ومعناتها يبغى أكثر , ومن أبسط حقوقه أنه يقول الطير مسيوم بـ 10,000 حتى لو كانت السومه قبل شهر , وليس من حق المشتري أن يكسر سوق أخوه ويقوله : السومه قديمة , طيب بعتني بالسومه , طيب بعتني بـ 9000 , ونحوه من الكلام اللي يقهر .

هذا مجرد وجهة نظري ياخوان , وقد أكون مصيب وقد أكون مخطئ , والعفو والمعذرة من الجميع .

[قرناس ثالث]

سومة الطير سومة اللحظة ان بعتني والا الله يرزقني ويرزقك

[لبيه يمنادي]

سومة الطير سومة اللحظة ان بعتني والا الله يرزقني ويرزقك