عاجل المشوره لاندكروزر او باترول

[الوباله]

السلام عليكم ورحمة الله
بإختصار بشتري سياره هاليومين ومحتار بين لاندكروزر2013 GXR 8V او باترول 2012 2013 الشكل الجديد
وانا رجال ادخل صحراء شبه يومي
المشوره يجماعة الخير وما شاورتكم الا لثقتي بكم

[owwn]

انصحك بصلاة الإستخارة
لانك سوف تدخل في دوامه المتعصبين لتويوتا وكذلك نيسان
توكل على الله وشف الي يجوزلك شكله ومواصفاته بعد ماتستخير

[الربذي]

وعليكم السلام شوف اخوي انت وين رغبتك اما النصائح فكلا يبي ينصحك بالي يحب هو ويميل له الي معهم تويتا يبيك تايوت يوالنيسان مثلها
انا لو بمكانك اخذت نيسان اقوى عزم من التويتا واخف واوسع وربي يبارك لك مقدما ويعطيك من خيره ويكفيك شره وترا فيه عروض بالمنتدى

[ملك الإحسآس]

النيسان فخم ومواصفات
الاندكروزر حلو
استخير افضل
بس اللي يكرهك بالنيسان الوكيل فقط
والا ما به عذروب

[الوباله]

الله يجزاكم خير والله انها حيره

[ابو نواس]

النيسان ماقد استخدمته ولكن مواصفاته عاجبتني كثير يعيبه كبر حجمه وهذي وجة نظري
يقولن وليس انا انك لو زودت عليه الحمل ان الصدام الخلفي يحوش مع الحجر والمحاوي إذا كنت راعي طعوس

[راكب الشفر]

خذ نيسان باترول وانت مغمض
شف فرق السعر بين السيارتين وفرق المواصفات لمصلحة الباترول
واهم شي استخير
مشكلة الباترول وكيلة والحين لعيسى مسك وكالة نيسان وان شاء الله يكون فيه تحسن

[كثير السؤال]

التحمل يمكن لصالح تايوتا
والاداء لصالح نيسان
اتوقع الطبخه كذا والله اعلم تحتاج مقارنه موسعه من خبير علشان تعرف اللي يناسبك
والناس تختلف حسب الاستخدام والرغبه

لو تجرب الموترين وتشوف اللي ترتاح له

[الوباله]

الله يجزاكم خير على التفاعل
لقيت الباترول se 8V 2012 فل كامل ثلاث شاشات ومراتب جلد وجنط 20 وفتحه 320 حصان عند العيسى بــ٢٣٦
واللاندكروزر 2013 GXR 8V فتحه وشاشه وجنط 18 مخمل سعودي بـــ230
الباترول افضل موصفات والسعر متقارب لكن اللاندكروزر يمسك سعره عند البيع
والمحير بالموضوع ايهما اصبر واجود في الجلد والكرف في الصحراء
لكن ما اقول الا يالله الخـــــيــــِره
ولا نستغني عن خبراتكم

[عاشق مكشات]

وش جاب الثرا بالثريا


اكيد لاند على اسمه مفخره الارض ولو فكسار احسن

[منصور الفايز]

وعليكم السلام

كل الموترين مافيهم اي شي ... من اروع المواتر خصوصا عندنا
لكن بالاختيار -اصابعك مهيب سوى والاذواق تختلف- شف وش اللي يجوز لك واعجبك .. وتوكل على الله

والله يوفقك ويوفق الجميع

[الوباله]

الله يرعاكم جميعاً

[جبل الووز]

شف اذا تبي صبر وقوة تحمل تايوتا انا جربت تايوتا عزالله مكده ولا تحس ولا خرابات ولا شي يهزه وشيك في جيبك ,,

ونا ما قد جربت البترول ولا عمري ركبته هذا الي عندي واحسن شي الاستخاره

[مخاوي السراب]

خذ نيسان 2012 الشكل القديم فتك 4800 شكل وقوه وخفه والقير حسب الرغبة والسعر مغري
ولا خذ تويوتا لاند جي اكس اهم شئ لاتاخذ نيسان الشكل الجديد نصيحة اخو لاخوه تراه فاشل وسعره يطيح النصف بمجرد الاستعمال.
وانت حر الله يوفقك

[قناص 28 عفيف]

مااقدر اقول رائي لانها امانه
ولكن الباترول في الامارات رخيص حدود 180 الف اقل فئه قير عادي
واطرح لك خيار ثالث بما انك راعي بر وجلد فتك الشكل القديم

[صياد الجبل]

جكسار وبالتوفيق ولاتنسى الصلاه اخر الليل والدعاء

[sgl2002]

كل السيارتين ترئ نفس بعض

بس يتفوق الباترول بقوة المكينة


واذا تاخذ قير عايدي افضل

[Salamah.y]

برأيي ان السيارتين لهن سمعتهن الطيبه و كل موتر يتميز عن الثآني بشي
إذا انت نآوي تستخدم و تبيع بفتره قصيره , التآيوتآ يمشي أكثر بالسوق
إذا تبي الموآصفآت و الرآحه , الدآخلية , النيسآن يتفوق
الكرف و الجوده , برايي ان الموآتر التآليه كلهن حول بعض
طبعاً مآ جربتهن , و لكن أشوف ان التويوتآ قلّت جودته كثير مهو زي الموديلآت السآبقه
و عموماً اي موتر بالدنيا يبي له حشمه و محآفظه و صيآنه !!

,

اذا تدخل نفود وآجد و طلعآت جبآل
خذ الموتر اللي يآرد به قير عآيدي , مهمآ كان الأوتوماتيك مريح و قوي
يبقى العآيدي أفضل بكثييييير بالبر , أقل تعقيد , و يتحمل الجور و السحب

و حتى فيه خيآر الفتك زي الشكل القديم , هذا يكفيك محركآته مآشاء الله
,

دآم ان الأسعآر متقآربه , جرب الموترين إذا لك معآرف معهم مثلهن
و استخر , و عسى الله يكتب لك اللي به الخير @~

[PATHFINDER 4]

كل الموترين ماشاء الله تبارك الله طيبات بالحيل

يميز اللاند على الباترول (شئ واحد فقط) يمسك سعره وشييييييييييييك متى مانويت تبيعه ماتخسر فيه ابد ابد
لكن
يميز الباترول على اللاند
اكبر قوة (انشط من اللاند بكثير)
اكثر مواصفات وانظمة -منها نظام الزحف على سبيل المثال- وهذا غير موجود بالجكسار فقط في الفكسار
فخامة (3شاشات وجلد ورادار)


شئ اخير ترا سعره غالي هنا 236 الف لكن نفس مواصفاته تحصله في الامارات 220
واذا تبي قير عادي ومن تجربة بعض الاخوان يقولون انه يروح على الباترول 400 حصان في القومة ونشيط مرة
سعره يبدا من 180 اظاهر

والله يكتب لك مافيه الخير استخر

[حلم البحر]

ماشاءالله الموترين كلن له مواصفاته
لكن تفرق بالبيع لصالح تايوتا
واستخروناخوك ان شاءالله بيدلك ربي على الي به خيرة لك ان شاءالله

[ذيب زلفاوي]

لو مكانك اخذ الباترول ولا تفكر بالبيع استانس بقريشاتك. الباترول يفرق كثير بالقوه والوسع والمواصفات ونظام التعليق المطور والمريح

[الوباله]

اشكر الجميع على المرور وكتب الله اجركم

[أنصر نبيك]

أنا شوري مختلف التاهو أريح وأطلق وأقوى من الاثنين وأترك عنك يمسك سعره أو مايمسك أنت تبيه للاستعمال
وليس البيع

[Vortech]

السلام عليكم.....

النيسان ما عليه كلام.... لكن نصيحه يا تاخذ قير عادي والا تاخذ 400 حصان...

الــ 320 حصان تماتيك ترى يحتر عند طول الوقفه.... هذا كلام ناس مجربين الانواع الثلاثه...

أما التويوتا فشي راجع لك....

حصلت وارد البريمي جلد 3 شاشات 320 حصان تماتيك بــ 231 الف ريال ...

وحصلت جكسار 2012 وارد عبدالغني سبير علاق... مخمل بدون شاشه بــ 230 الف....

وخذت الجكسار وخليت النيسان....

الوكاد لك انه نسبة التصويت في المنتديات لصالح النيسان لكنني ما حصلت النسبه هذي على ارض الواقع.

والله يوفقك دنيا وآآآآخره