استشاره اهل الخبره ناوي اشري جيب

[منصورالشمري]

السلام عليكم
حبيت استشير اهل الخبره لاني متردد بين
جيب باجيرو 2013
او فور تشنر 2013
او فورد اكسبديشن 2013

طلعات بر خفيفه وسفر متكرر للرياض من حائل كل شهر تقريبا مرتين
وشكرا لكم

[أنصر نبيك]

إذا للسفر استبعد الفورشنر كأنك تسوق هايلوكس بيكسر ظهرك تكسير
الباجيرو جودة عالية وصناعة متقنة وأفضل من اللاندكروزر حالياً لكن قطع غياره ناااااار جارنا عنده لانسر
انكسر عليه الكشاف الصغير تحت الصدام حجمه مايزيد عن بوصه راح الوكالة قالوا له سعره ب 1800 ريال
إذا بتقدر عليه فهو خيارك المثالي الاكسبديشن ممتاز لكن حجمه كبير زيادة عن اللزوم واذا نويت عليه
لاتشتريه بدون دبل

[محمد-الرس]

توكل على الله وخذ أمريكي الفورد حلو, ولو تحصل يوكن ولا تاهو ولا سييرا غمارة ونص شي طيب .حافظ عليها تعيش معك سنوات ان شاء الله .

التويوتا رديئ والراحة والسلامة معدومة ,,,


بالتوفيق ..

[الشامخ 66]

ميزة الفورتشنر اذا بغيت تبيع مايطيح من قيمته
وقطع الغيار متوفره وسعرها معقول وقليل الخرابات ويكفي انه تيوتا
ولاكن مهن راحهى والعزل ردي

[صباح الشمري]

وعليكم السلام والرحمه
اذا تبي بس الثلاث سيارات الي ذكرت
عليك بالفور تشنر ويكون سته سلندر
قطع غيار ويحافض علي القيمه لو بعت
وينفع ديره ونفود

[اتجاه السحاب]

الأكسبدشن أفضل خاصه للسفر
أما الفورنشر ماينفع ابد لاراحه ولاعزل هواء

[منصورالشمري]

جزاكم الله خير جميعا
والله بلشه كثره السيارات وللاسف اكثرها بلاستك ماهي مثل قوه السيارات القديمه
لكن الباجيرو شكلي ابركز عليه

[المعتصم بالله555]

السلام عليكم اخوي منصور
اولا الاستخاره
واذا قررت على الاكسبدشن خذ قصير

[عبدالله الموسي]

فوووووورتشنر

[عيون الافعى]

اكسبديشن وانت مغمض للسفر تانكيين و اشياء حلوه كثيره او انت حق طلعات بر خذلك باجيرو او خذ اكسبديشن دبل حق كولو

[ابوزياد وراما]

الله ييسرلك الخير حيثكان اوصيك بالاستخارة
الاكسبدشن سيارة فى السفر مريحه جدا واسعارها مقبوله
واخيرا الله يسرلك الخير

[على رمشي تمشي]

الاكسبدشن ممتاز جداً وحتى الباجيرو - اما الفورشنر يفقد الراحه

[صليب الرأس]

الباجيرو وبس

[al-rmali]

والله مادري عنك يالعشير انت شريت للحين ولا باقي
على العموم اذا شريت الله يعطيك خير الموتر ويكفيك شره

أما اذا ماأشتريت رايي لك
الباجيرو ممتاز وبقوه شكل وكد ومد
يعيبه قطع الغيار غاليه جداَ جداَ ولو كانت غاليه بحدود المعقول انا اشتريه قبلك
الفورتشنر مع انه تايلندي بس يكد كد عجيب ومتوفره القطع بكثره يمسك قيمته
يعيبه عدم الراحه العزل سيء على كلام المستخدمين يصحن بالبر اذا بغيت تقلص
اكسبديشن ما اعرف عنه شي الصراحه ما اضلم حظي

لكن مدام معك قيمة الباجيرو وتبي تطلع عن الخيارات اللي ذكرت انصحك
تفكر بالبرادو ( في اكس 1 او تي اكس ال قير تماتيك )
ترى مايعيب الموتر شي من ناحية استخدامك
يمسك قيمته متوفره قطعه قوي ويكد يمدحونه بالعزل والراحه

[أبا مجاهد]

الفورشنر لااعتقد يقارن بالسيارات المذكوره
الباجيرو اكثر جوده لكن مثلك خابر الوكيل وغلاء القطع

[هايل العتيبي]

عليك بالياباني
افضل من الامريكي
واذا جيت تبيعه يمسك قيمته
مو مثل الامريكي اذا بعته يطيح نصف القيمه