ساعدوني في تجهيز باثفندر 2005

[ابوجليله]

السلام عليكم
مساكم الله بالخير وتقبل الله منا ومنكم صالح الاعمال ...
ياخوان افيدوني في تجهيز باثفندر2005 تجهيز كامل للرحلات البريه تشمل افضل الكفرات المناسبه للرمال وللشعبان +المساعدات واليايات+بطاريه إضافيه مع افياش +تانكي الماء +كشافات انوار فوق التنده

أرجو التكرم بالرد
ولكم جزيل الشكر

[ابوجليله]

تكفوووون شبااب الي يعرف لا يبخل علينااا...

[owwn]

الباثفندر مايركب له بطاريه اضافيه
احسن كفرات هانكوك
ركب ياي استرالي خلفي
مساعدات شد البلد زينه لاتغيرها الأ اذا خربانه غيرها بنوع زي الاصلي اسمه KYB على ماأعتقد
اشتر لمبات من عند رفيق الدرب وركبها عند الدفع الرباعي في العروبه
تاكي مويه خلف المرتبه عند السنيدي
وخل معك علبتين زيت إحتياط ههههههههههه

[ابوجليله]

مشكور اخوي الله لايحرمك الاجر
البديل للبطاريه الاضافيه
موقع رفيق الدرب
تاكي السنيدي مضمون من التسربات وتغير الطعم

[ابوسند7716]

يوجد شبك علوي فوق التنده تفصيل المواهب مع قواعد للشراع و تسليك للكنود
اذا تبي ارسلي

[ابوسند7716]

بخصوص المساعدات _ ورا فكسار طبعآ ترهيم لكن ممتاز ومطب الموتر يطلع مهبول
امامي استرالي وهو غالي لكن في مونرو مساعد ممتاز وسعر رخيص
اليايات ورا ياي استرالي الياي الامامي ركب كعكات 1ونص

[عزوز 2005]

اولاً / مسامير ثلاجة المكينه لحمها أو فكها

ثانياً/ زيت مكينة السيارة أنتبه منه لاينقص وانت ماتدري بعدين يخبط عليك يعني عايره بأستمرار وأفضل زيت سوبر جي تي علبته سوداء لأنه ثقيل شوي

ثالثاً/ البطاريه الأحتياط مافيه مكان لها وبعضهم يغير القديمة ويركب مكانها بطاريتين صغار وأنا ما أنصحك أبداً وأحذرك من هالطريقه لأن الكهرباء بالباث فايندر حساس جداً ولاتظيف أي شي يخص الكهرباء من كتاوت واشياء كماليه ماعدا لمبة بالكبوت من رفيق الدرب أو اي لمبه تعجبك يعني بأختصار ركب لمبة بالكبوت فقط

رابعاً/ غير اليايات الخلفيه فقط وركب يايات استراليه من عند الرمايه بالتخصصي

خامساً/ الكفرات أفضل شي هانكوك بس يكون نفس مقاس شد بلاده

سادساً/ السيارة من الأسفل فيها صاجه بلاستك تحت الكارتير غيرها وركب صاجه حديد عند ورشة النويصر بالصناعيه القديمة بالرياض

سابعاً/ تانكي المويه ركب تانكي واقف خلف المرتبه واذا ما أعجبتك التوانكي عند السنيدي او غيرة فصل تفصيل افضل لك عند ورشة اليحيى أللي عند مقبرة النسيم بالرياض

ثامناً/ إذا كنت ترغب بتركيب شبك فوق التنده فية شبك أسمه قصيمي ممتاز وعملي وقوي وشكله حلو تلقاه بالغرابي ب 900 ريال

تقريباً هذي الأشياء اللي أحسها ضرورية للبر والباقي حسب رغبتك ووجهة نظرك
تحياتي ولاتنسانا من الدعاء

[owwn]

مشكور اخوي الله لايحرمك الاجر
البديل للبطاريه الاضافيه
موقع رفيق الدرب
تاكي السنيدي مضمون من التسربات وتغير الطعم
رفيق الدرب بحي العقيق شمال الرياض بس مو شرط تروحله تحصل اللبات عند محلات الرحلات الكبيره مثل برق الحيا وغيره
البطاريه مافيه بديل للأسف بس ركب بطاريه كبيره 80 امبير
تانكي السنيدي والله ياخوك ماجاربته
ولا تنسى تقوى النور لان الباثفندر نوره ضعيف ركب كتاوت اختصار للوقت رح لمحل شاهين في مخرج 14 عنده كل شي

[ابوجليله]

الله بجزاكم خير ولايحرمكم الاجر
اخوي وصف اولي لورشة النويصر

[nice path]

بالنسبة للتانكي ركب فيبر أحسن من الالمنيوم لا طعم ولا ريحة وسعته 90 لتر خذه من الوطني أو الوادي
وزيت المكينه بترومين الترا7 وشيك عليه كل 2000 كيلو
الكفرات برجستون طويل عمره وقاسي والهانكوك أقصر عمر ولين
جميع ماذكرت عن خبره وتجربه ولا هوب قصور باللي قبلي
والله يبارك لك فيه

[PATHFINDER 4]

يعطيك خيره ويكفيك شره افادوك الاخوان
واذا تبي المزيد شيك على مواضيعي (اضغط على اسمي) بالتوفيق