افضل مكان للعزب

[محمد ابو سعد]

السلام عليكم ورحمة الله وبركاته
افضل مكان لبيع وتجهيز العزب وارخص طبعا مريت السنيدي اليوم والله لايوريكم الاسعار السكن بالرياض

[ابو خالد 1400]

مخرج ١٥ الكشاته وبرق الحيا والبريه ماعرف مكانه لاكن انت علمنا وش العزبه الي تبي قهوه ولا طبخ علشان الاعضاء يفيدونك

[الأحوذ]

الرمايه ممتاز و البريه لا تعداه...

[عاشق هدد 6]

والله كل عزبه لها سعر على حسب الخامه فيه شي صيني وشي تنزاني اصلي

والصدق الكل غالي .. مخرج 14 البريه ومخرج 15 برق الحيا والكشاته

[محمد ابو سعد]

والله عزبة طبخ السنيدي عزبة طبخ تنزاني ب 214

[AROO]

انا في رأيي تروح للكشاته ﻻن اسعارهم طيية جدا بالمقارنة بغيرة بعد كذا البرية
بالأضافة لمحل بيتي والرحلة انا ما شريت من عندهم لكن للأمانة الناس تثني على اخلاق ابوعمر وابوحسن والباقين والاحلى فيهم انه مايهم شريت او ماشريت من عنده اهم شي انهم يدلونك على الطيب وين تحصلة
وانت ظن انك في حاجة الناصح قبل البايع

[محمد ابو سعد]

مشكور اخوي بس محلات بيتي والرحله وين موقعهم مشكور

[__abo saleh__]

السنيدي يكفيك عندة جميع الاغارض اللازمة بس فيها عدم الجودة
انصحك تجمعها على كيفك مثلا اغراض تشتريها من محل الاواني والباقي تشترية من عروق الشمال أو فهد للرحلات اذا كنت بالقصيم

[ابن العودة]

بنسبه للعزبه
انا وجه نضري انك تمر الغرابي
وتخذ لك شنطه تنزانيه وبدون صدنوق ( اخف للحمل )
والاغراض رح لحقين الاواني وجمع لك الي بخاطرك

تقبل تعقيبي

[محمد ابو سعد]

الغرابي تقريبا بكم التنزاني

[قناص مزاجي]

الغرااابي فصل فيه ارخص ترا نص المحلات تفصل هناك والسنيدي تفصيل الصين وشنطته تتقطع عراويها

[نصوب المنشى]

افضل لك انك تجمعها انت علشان تاخذالمقاسات المناسبه لك من قدور وابراريق وغيرها وبيكون السعر اقل

[أسير المساري]

الكششششششششششششششششششششششششششششاته ينافسون الجميع بالاسعار وهم ارخص معرض بالرياض والله مالي علاقه فيهم ولا اسوق لهم لكن انا جربت برق الحيا والسنيدي وغيرهم وكانو الكشاته افضلهم في الاسعار اما السنيدي وبرق الحيا فأسعارهم نااااااااااااااااااار انصحك روح للكشاته وبتشوف الاسعار اللي تعجبك

دعواتك

[anas alothman]

للمعلوميه بس يا اخوان انا رحت للغرابي وشفت القماش الي عندهم ماش فسألت احد اصحاب المحلات صديق لي قلت وين القا القماش الزين قالي الموجود الحين ماهوب تنزاني اصلي التنزاني له اكثر من 3 شهور منقطع والله اعلم

[هابكيدو]

الكشاتة هو أفضل المعارض حالياً من حيث الأسعار بعده برق الحيا....
هذا اذا ما لك رغبة تروح الغرابي

[يكفيني نظرة]

الاواني مر السعر الاخير بالروضه وضف منه والباقي محلات البر..

[سيف الظفير]

الكشاتة ارخص واحد في محلات البر كلها
جودة وسعر وتنوع طب وتخير بكل اللي تحتاج وراعيه ابو خالد موجود دايم


ولكن الشناط لا تتعدا ابد


محل البرية عند ابو صالح



والله غيرت كل الشناط الثلاث اللي عندي بداية ذو الحجة بشناط البرية الزينة بعد ما جربت اكبر مقاس منها


تفصيل خياط خامة شكل مقاسات


شئ محد قدر ياصل ربع مستواه


راعيه ابو صالح 24 ساعة موجود او ابو يزيد

[محمد ابو سعد]

مشكوورين يأخواني

[محمد ابو سعد]

مشكوورين ياخواني وماقصرتو

[هواي الدهناء]

انا بالنسبه لي مريت السنيدي ولقيت الشناط مرقعه .غريبه منهم رحت لبرق الحيا ولم تعجبني لكن مريت رفيقي ابوصالح جعله يسلم ولقيت عنده الشناط الصح مقاسات حلو والخياط راكز والتفصال المضبوط خذت من عنده عزبة الطبخ القدور كلها مع القدر الكاتم

[أبو الفهد]

السلام عليكم
مثل ما قال بعض الأخوان - عليك بالغرابي - خذ لك شنطة عزبة اللي ترغب ،،، وباقي الأغراض نصيحة اشترها من محلات الأواني ، وعليك بالأصلي - دلال ،، أباريق ،، قدور - صحية وتدوم لك أكثر .

[الوديّ]

الغرابي .. تلقا شنط معروضة عندهم والا فصل المقاس اللي تبي .. فرق في السعر ارخص من محلات البر والكشتات .

[محمد ابو سعد]

اليوم رحت لليوسف للتفصيل ولقيت شنطه طبخ مقاس وسط تنزاني ب150 زين سعرها

[عز نفسك]

الله يعين على غلاء الاسعار

[الأحوذ]

تبون شي ما يقول لا ، صندوق الالمنيوم من عند الرمايه ٣٠٠ ، ٤٠٠ ، ٥٠٠ ، كبير و سط صغير ممتاز ، و اتمنى يكون موجود عند غيره نفس الجودة بسعر أقل...

[محمد ابو سعد]

يعني الشنطه ب 150 زينه ولالا مع العلم انها تنزاني وقيمتها بالسنيدي ماتقل عن 200

[اصيل نجد]

هلا باخوي محمد ابو سعد امسي عليك وعلي الاخوان كلهم ودي ادلي بدلوي معكم شف يالحبيب الشنطه لاتخذها مجهزه انت جهزها افضل لك بكثير بالنسبه للشنطه اشير عليك خذها من الغرابي سوق الخيام فيه شي ممتاز والمعاميل لرح لسوق السباله وجهز احلا عزبه اهم شي القدور والتباسي احرص على الستيل النظيف الجبر والدلال معروفه الدلال الطيبه العساف افضل شي واباريق الشاهي عندك المعدن ابو تاج الهندي هاذا للشاهي اذا تبيه علي حطب وابريق استيل اذا تبيه علي الغاز وربي يدلك للاصلح تحياتي لك وللاخوان

[محمد ابو سعد]

مشكور اخوي ع النصيحه
وابشركم شريت عزبه من البريه ب140 تنزاني وجهزتها بمبلغ كلي مع الشنطه ب500

[اصيل نجد]

الف مبروك والبريه ممتازين فيه ابو يزيد رجال نصوح بالحيل علي كل حال مبروك الله يطعمك خيرها ويكفيك شرها ويجعلها من مداخيل السعد عليك

[محمد ابو سعد]

الله يسمع منك اخوي ومشكور

[ابوخالد2004]

الغرابي وبس

[عاشق البر1409]

السلام عليكم ورحمة الله وبركاته ي الغالين عودتمونا على كل جديد في اغراض البر الله يعافيكم ويقويكم على طاعته ي الغالين لا هنتوا ابي أفصل عزبة طبخ و لا أعرف محلات بالرياض -- أسمع و أشوف في المنتديات المختصة بالكشتات يفصلون في الغرابي بس ما قالوا وين المحلات او اسمائها ليت اللي يعرف يفيدني وله دعوة في ظهر الغيب

[alking]

وين موقع الكشاته؟

[قلب الداهية]

مخرج 15 باتجاه الشرق اشارة المقبره على يمين المحل

[شيخ بني تميم]

افضل شي وارخص شي الغرابي لاكن في الشتاء غويلين شوي اغلب محلات الرحلات خربو من تالي

[مكشاتي مدني]

حياك الله اخوي شف وانا اخوك يعتمد على حسب نوع العزبة اللي تبيها وانا انصحك تسوي عزبتين وحدة حقت شاهي وقهوة خفيف اذا بغيت تشيلها وماتتعبك بدل ماتكون بشنطة وحدة كبيرة عزبة القهوة والشاهي تتكون من دلة قهوة وابريق شاهي وابريق تفويح للماء وابريق معدن لطبخ للقهوة النوع الهندي وبيالات وفناجيل ودافور صغير كوري خفيف للشاهي والقهوة وعلب عدد 4 قهوة وهيل وسكر وشاهي وتكون تنزاني والعزبة الثانية حقت طبختكون نوع تنزاني واكبر حجم وتتكون من دافور ايطالي 7 رطل للطبخ من البرية لان شغلهم ناهي جدا يحطون لك قاعدة حديدية ممتازة وقدر ضغط حسب المقاس اللي تبي وانا اشيل معي 11 لتر وملعقة كبيرة ملاس وملعقة غرف كبيرة وسكين ولوح تقطيع وليفة للدلة وقداح وصحن كبير للرز وصابون واسفنج وعلب حسب العدد اللي تحتاجة للملح والبهارات وباقي التوابل اللي تفضل استخدامهاملقاط للحطب ومركى حديد ثلاثي او رباعي حق الشاهي والقهوة اذا بتصلحها على حطب وافضل مكان انصحك فية للعزب المتكاملة البرية شارع الزبير بن العوام حي الروابي راعية ابو صالح نصوح وطيب ويراعيك في الاسعار وبالتوفيق

[تربة الشمال]

من وجه نظري اشوف محل البريه من ناحية الجوده تمام ولاكن الاسعار لك عليهاء فيه غلا

[gr73mri]

بنسبه للعزبه
انا وجه نضري انك تمر الغرابي
وتخذ لك شنطه تنزانيه وبدون صدنوق ( اخف للحمل )
والاغراض رح لحقين الاواني وجمع لك الي بخاطرك

تقبل تعقيبي



:good2::good2::good2::good2::good2::good2::good2:: good2:

[gr73mri]

البريه اذا ماخاب ظني انه اغلى المحلات الموجوده
برق الحيا والسنيدي ممتاز من ناحية ادوات الرحلات بشكل عام ، لكن تجهيز العزب وكذا انصحك مثل ماقال الاخ ابن العوده