الطريقه الأفضل لأستخدام الدبل

[جاروود]

بسم الله الرحمن الرحيم


كل عام وانتم بخير

عندي سؤال مع علمي وقت ماحطيت الموضوع اغلب الشباب ضاهرين البركه في الموجدين


والي في البر ارجو انه مايبخل علينا أذ جا انه يفيدنا

سؤال هو ماهي الطريقه المثلا لأستخدام الدبل للحفاض عليه وأطالة عمره

وأيضا الأستفاده منه في النفود

وأنا اقصد الدبل العادي

والدبل الكهربائي

للأفاده العامه


انا عندي بعض المعلوات بس أخاف احطها وينفذونها الشباب ولاتصير ذيك الي مره ويقعدون يدعون علي لأن خبرتي بيني وبينكم ماهي كافيه
فأتمنا من الشباب أهل الخبرة والمعرفه انهم يفيدوننا جميعا نحن أعضاء المنتدى





فأتمنا منكم الأجابه ولأ قول الأسراع فيها لأني واغلب أعضاء المنتدى ظاهرين ولي مهوب ضاهر يبي يضهر
وأتمنا منكم تحري الأجابه المفيده لأن هاذ دبل فيه موت وحياة (لو قطع في الربع الخالي) ولا في الدهناء

مع السلامه

[القماري]

عطنا فرصة بعد العيد وإن شاء الله تجيك لعلوم الزينة ، أهم شيء وطي الهواء في الكفرات من 20 إلى 12 حتى لاتتعب الموتر والدبل.

[NIGHT STAR]

تصدق انا ماقد شغلت الدبل لأن موتري دفع رباعي مستمر يعني بتلة يشتغل والحمد لله ماقد احتجتة الا في حالات اضطرارية مثل سحب سيارة مغرزة وما شابة ذلك.
تحياتي لك

[الخبير]

السلام عليكم
شف يا الحبيب
الدبل يستخدم عادة في الطرق الوعرة إلي ما تقدر تمشي بها في العادة بدون دبل ، الكفرات لازم تكون منسمة من 20 إلى 10 .
احرص على الدبل ولا تشد عليه واجد .
لا تزيد السرعة عن 70 كلم بالساعة.
إحرص على تفقد السيارة بين فترة و اخرى.
لا تستخدم الدبل 4L إلا إذا كنت فعلاً تحتاجه.

[راعي عنيزة]

4L لا تشبكه او تفصله الا وانت واقف تمامااااااااااااااااااااااااا

اما الخفيف فانت وسيارتك ، بعض السيارات تشبكه على سرعه 80 عادي وبعضهم لازم اقل

[البيرق]

السلام عليكم ورحمة الله

الحقيقة انا أول مرة اشارك في هذا المنتدى المميز وكثيراً ما استفدت منه ويدل على ان اعضاءه شقرديه ورجال طيبين ، حبيت اشارك معكم في هذا الموضوع ولدي استفسار عن طريقة استخدام الدبل انا واعوذ بالله من كلمة انا طرقتي في استخدام الدبل (احياناً) اشغل الدبل الثقيل وأقوم السيارة بالثالث تعطيك هذه الطريقة احساس بأنك تقود السيارة مابين الدبل الخفيف والثقيل وسبحان الله بهذه الطريقة ما يرد السيارة تغريز ولا طلعات وعره ، هل طريقتي هذه تظر بالدبل ام لا؟ وشكرا لكم على حسن تجاوبكم

اخوكم البيرق

[GMC]

الحقيقة إن الدبل يبيله عناية تامة، خاصه في المواتر الجديدة
بحيث أولا انك يجب عليم انك تشغله قبل ما تدخل الرمل بحيث تكون السياره مرتاحه ولا تحتاج عزم في الحركه ولا تضرب التروس في بعضها بقوه(يعني اتروس الدبل والفلنجات) خاصة في المواتر القديمة الي ماهي كهرب
ثانيا حاول انك ما تمشي على الطريق ونت مشغل الدبل
اما الدبل الثقيل فهو مهم بس في الحاله الضروريه يعني اذا غرس الموتر وعيا يطلع والسحب امافي غير هالحالتين ما أنصحك تستخدمه لأنه يهد الكلتش ويتعب القير
مع مراعات انك تخف الهو على الكفرات عشان ما تتعب الموتر
وسلا متك يالغالي ولا يهون الربع


اخوك راعي الجمس