أستفسار عن تانكي وطبق

[ناصر الدوسري]

السلام عليكم ورحمة الله وبركاته
يا جماعة الخير أنا احتاج تجهيز سيارتي الفورتشنر للطلعات يكون فيها تانكي ما وطبق
وش أفضل مكان تدلوني عليه بالرياض وتكون أسعاره مناسبة
وهل لازم اني اشيل المرتبة الثالثة لأني احتاجها بعض الأحيان حيث اني لقيت موضوع لأخونا 010 خالد 010 على هذا الرابط
http://www.mekshat.com/vb/showthread.php?t=243285
مع العلم ان طلعاتي خفيفة مب ذاك الزود لكن الواحد وده يكون جاهز ومرتب

[الأحوذ]

إذا جاهز لا بد تشيل المرتبة و التفصيل أفضل إذا بغيت المرتبة ، و أنا أخذته من البريه خزان مع طبق مع تلبيسه للباترول ، و انصح به...

[PATHFINDER 4]

انصحك اذا بتشري تانكي وطبق رح للسنيدي (خامة افضل من غيره خصوصا برق الحيا سيئ واغلى من السنيدي)

وكلامي مب تحيز للسنيدي لكني جهزت موتري بتلبيسه وتانكي وطبق وكلها من السنيدي
قارن الاسعار
التانكي السنيدي 70 لتر 580 مدري اذا ارتفع
ووقتها نفس الحجم برق الحيا 700 ريال

الطبق سعره عند السنيدي ماخذه قبل 3 شهور 260
يبيعه برق الحيا (ونوعية اقل جودة من السنيدي بكثير لا من الارجل ولا من البطانة العلوية) يبيعه 275
التلبيسه ما اذكر كم شريتها لكن ما ظن فيه فرق بينهم

الزبدة تبي تجهز موترك وتبي شئ مرتب ونظيف خذ جاهز من السنيدي وبتدعيلي
برق الحيا شغله دمار وانت بكيفك سير على الاثنين وقارن

وانصحك تشيل المرتبة الثالثة عشان الطبق اما اذا منت شايلها ماتقدر تركب الا التانكي وبيكون واصل للباب

[غازي الاسمري]

اسمع العلم يا ذيبان اللي يجمد على الشارب وان شاء الله انك بتدعيلي

اول شي التانكي
حدد تبي ( المنيوم ، استيل ، حديد ) او ( فيبر قلاس )
الحديد ما انصح به نهائيا لانه يصدي
الاستيل افضل شي
بس غالي ،،،

اذا تبي سعر مناسب ،، وشيء عملي وكويس
عليك بمحل الوطني للخزانات ،، عنده تانكي فيبر علي الكيف
وسعره حول ٢٥٠ ريال !! يا بلاش ويدووومم معك ،،

اول شي تشتري التانكي
تقول وين محلهم !!
ابشررر
تمشي يا طويل العمر مع طريق الفحص الدوري
وتدخل مع مخرج خالد بن الوليد ( تدخل وجهك جنوووب )
يجيك المحل علي يمينك عند الاشاره
وعندهم مقاسات حلوه ( افضل مقاس بوجهة نظري ٨٥ لتر ،، ممتاز جدا وحجمه حلوو )

لا منك اخذته تروح محل ( اليوسف للخيام )
هذا افضل واطلق محل تفصيل وتلبيس ومظلات وكل ما يطري علي بالك عنده تفصيل وجاهز ،،

اذا تبي الوصف ابشررر به ،،
تمسك طريق خريص وانت داخل من الدائري الشرقي ( وجهك يكون شرق )
الين تجيك وكالة الجميح على يمينك ،،
بعدها وكالة الجميح ( همر + كاديلاك) بعدها على طول شارع مزدوج
خش معه يمين ،، امش شوي يجيك على يمينك

تروح وتشوف انواع التلبيسات اللي عنده
ان عجبتك زين ،، ما عجبتك خله يفصل لك على مزاجك
عاد اكيد فيه نوع بيعجبك بحط لك صورته مركبه على موتري
ممتاز جداً ،، وضد المويه وضد كل شي ،، يعني لا تخاف تتوسخ الشنطه من اي شي ان شاء الله

وتعطيه التاتكي ،، وتخليه يلبسه قماش تنزاني مبطن باسفنج ،، عشان التاتكي يصير يتحمل شوي
وبرضه شكله يكون اجمل بكثير
وانشب له بالاسعار وبيراعيك ان شاء الله

وهذي بعض الصور لموتري

هذي صورة التلبيسه
http://i.imgur.com/mJgkH.jpg

وهذي صورة للتانكي قبل البسه
لاني حطيته عندهم وخلص بعد يوم او يومين !! والله اني ناسي
http://i.imgur.com/SyMrL.jpg

وهذي في احد الطلعات ،، ما شاء الله التانكي حجمه مناسب والتلبيسه تحمي الداخليه مضبوط
http://i.imgur.com/v00xk.jpg

طبعا هالصور للتواتكي واحجامها
http://i.imgur.com/x3dcQ.jpg

وهالصوره وانا اقارن بين ٩٥ لتر اللي يجي تاكي علي المرتبه
وبين الـ ٨٥ ،، اللي اشتريته وعجبني وهو مناسب جداً جداً للطبخ والقهوه والشاهي يكفيك ٣ ايام تقريبا ..
http://i.imgur.com/FGcC0.jpg

طبعاً لا خلصت وركبت التلبيسه والتانكي
ما ادري اذا عند اليوسف اطباق او لا
بس مر برق الحيا
ومر البريه
ومر السنيدي
وشوف الافكار فالاطباق
وشوف الاسعار
بعدين روح الكشاته ،، اكيد بتحصله الارخص
واذا فيه شي براسك ،، يفصلون لك ..

والله يوفقك ان شاء الله ويكتب لك ما فيه الخير ...

[ناصر الدوسري]

كفيتوا ووفيتوا الله يجزاكم الجنة قولوا امين