وش اسوي في الناس ابلشوني ؟!

[ensultan]

سيارتي لكزس 460 LS وكل فترة القى تهديد ( ورقة معلقة على الباب ) بتخريبها , مع اني والله ما قد أذيت أحد , وقبل فترة انمخشت بمفتاح بطريقة عشوائية على رفرفها الأيمن !! واآخرتها اليوم الصباح لقيت على بابها ورقه مكتوب فيها لا عاد اشوف سيارتك في الحارة !! مدري من هو اللي مستقصدني؟! هل هو عنده عقدة من اللكزس؟ هل هو حاقد علي؟ مع اني مسالم ولاني حق مشاكل وحالي حال نفسي.. قد بلغت الدوريات بالتهديدات بس مهم فاضين لي يثبتون دورية عندها. فكرت اركب كاميرات مراقبة لكن كيف ووين ؟ اللي يقدر يساعدني لايبخل على بفكرة والا يدلني على محل كميرات لهذا الغرض ,,,

[مخ سعودي]

شف يالغالي
انت لزق ورقه بعد اكتب فيها انا اسف ان جرحت شعورك او اذيتك لكن اهدي الي مشكلتي حتى اقوم بتقويم نفسي
او انك تستاذن يوم وتجلس تراقب سيارتك الين يجي طايح الحظ وتسلمه الى اقرب مركز لانك ان حارشته ورطت فيه ولا اقصد انقاص فيك لكن بعضهم مريض نفسي
والله يكون في عونك
بالنسبة لي سبق وان حصلت معي شريت سيارة وكاله وكنت في العمل والسيارة جنب المكتب طلعت الا واحد كاتب مشاعره واحسايسه على الكبوت وتارك المشرط اللي سوى فيه الحركه بكل امانه رشيت الكبوت ورجع سوى نفس الحركه في الاخير صرت اوقف برى انا فاضي اراقب سيارتي او اراقب عملي والشكوى لله في الاخير عطيت هندي عندنا عشره ريال وجلس يراقب الموتر الين كشف اللي سواها وبصراحه ماكنت متوقع رجال كبير في السن وابو عيال لكن قلبه اسود يالله العافية علشان السيارة جديده كرشته وهزاته ورشيت الكبوت والحمد لله انتهت مشكلتي

[TwisToOoO]

لاحول ولاقوة الا بالله العلي العظيم

الله يعينك ياخوك

وخاصة اذا كنت ساكن في بعض المناطق الي مايبون احد يسكن فيها الا الي من جماعتهم

بصراحة ما ادري وش اقولك

بس ناس ماتذكر الله ولا تخاف الله

[ensultan]

انا ابغاه يجيني يكلمني بنفسه , والا يحط رقم جواله وانا اكلمه حتى لاييقابلني مو مشكلة . وانا مالي الا اني اسايسه واعرف وش يبي ! بس واضح ان عنده مشكلة نفسيه والا ماكان سوى هالحركات , وانا بعد قاهرتني حركته الاولى يوم مخش رفرف السيارة و ودي اغوله شوي ثم ازنده السجون عشان كذا فكرة الكاميرة تراودني.

[بيتر بن عدوان]

والله شي غريب صراحه طيب انت وانا اخوك دخل سيارتك بالقراش عشان لو جاها شي بيكون اعتداء على السياره داخل املاكك يمكن وقتها تقدر تحاج الشرطه انك قدمت بلاغ ولا سوو شي

[عشق ابدوي]

ركب كمره وريح راسك

[ensultan]

وين اركبها وكيف؟ اذا تعرف أحد عنده كميرات في الرياض دلني عليه لاهنت, انا قد شفت سيارة همر مركب عليها كميرة مراقبة بس ماسألته من وين ركبها , مدري اني باحتاجها .

[عبدالعزيز بن احمد]

السلام عليكم

الله يأجرك في مصيبتك ويكون الله في عونك وعون الجميع

وانا اخوك رح لمخرج 12 عند السنيدي وتلقى محلات حقين كمرات المراقبه
خذ الكميرات صيني ( مافيه اﻻ صيني ) وخذ حساس الكامرا ( امريكي) وتاكد انه امريكي

ميزة هذي الكاميرات تسجل عند الحركه فقط
مثلا اذا تحرك شي بالشارع تسجله لو كان قطو
اما اذا كان الشارع فاضي وما فيه اي حركه ماتسجل انا افضل النوعيه هذي

اتمنى اني افدتك
والله يكتب اللي فيه الخير للجميع

[ensultan]

الليلة ان شاء الله امر على السنيدي, ماقصرت ياغالي والله يكتبلك الأجر ...

[AxR979]

بس وش فايدة الكاميرا اذا الرجال متلطم ؟

[الدوسري2010]

ارفع يدك في ليل مافيه نور لرب السموات والارض والله مايخيب رجاك وادع عليه

[Daym]

الكاميرا ذي ممتازة جدا

http://i.imgur.com/fbbPc.jpg

[رِجم]

اذا قفلت باب سيارتك قل استودعك الله اللذي لا تضيع ودائعه وان شاء الله ما يضرها شيئ

عن ابي هريـرة رضـي الله عنــه عن النبي صلى الله عليه وسلم انه قــال(من اراد ان يسافر فليقل لمن خلفه :استودعكم الله الذي لاتضـيع ودائـعـه))

وهذا الحفظ عـام في السفر وغـيـرة وامــان من شـــر كل من به شــــر من الذين يتعدون على الناس ممن يقوم بالسلب والتـــعــدي ...

[ensultan]

جزاكم الله خير,, تفاعلكم دليل على نفوسكم الطيبة والتي لاترضى الإعتداء والتجني ..

[راعي الشاخوفه]

ونا اخوك اسمع دخل موترك فالبيت
ولا حط لك كمرة ولامن عرفته انصحه لكن لو صفقته بروح يشتري موية نار
وينثرها على موترك وياالله رش كامل
واذا كبدك ممترة منه وص احد يجلدة لين يبرك فالارض

[مدهوش]

يمناك لا عدمناك يا راعي الشاخوفة .... هذا يبي له دبغ دبغ ليييييييين يعض الأرض ولا تدبغه انت عشان ما يضر السيارة ... شف لك واحد (حبنتي) مفتل شوفته تجيب الماغص وعطه الضوء الأخضر والله يجبر مصابك

[صياد الجبل]

يارجال هذا الحسد الحسد ومايسوي في قلوب البشر الله يكفينا البلا يارجال

يقول الشاعر يوم ليله سرابه

اهل المصالح يارفيقي كثيرين
واهل النميمه والحسد مايعدون
لاصرت طيب قالو فلان مسكين
ولاصرت فاهم قالو فلان ملعون

.....................

اخوي عندك حلين الحل الاولى الكميرات ولاجيت تركبها انتبه لاحد يشوفك

او انك تترسله بمكان وتراقبه ولاشفته امسكه واضربه الين مايشوف الموت

ولامن بردت قلبك فيه وده للشرطه يكملون الباقي فيه ........

وانا خوك معك موتر مثل هذا ماشاء الله المفروض اول شي تسوي له قراش داخل البيت افضل وامن عليه

الله يعطيك خيره ويكفيك شره ويبعد عنك الحساد والاعداء

[bloodomen]

استودع سيارتك عند الله قبل كل شيء
ركب كاميرا مراقبة وشوف من يطلع

[أبا مجاهد]

والله وانا اخوك انها غبنه لكن الله يعينك سارتلي بموتري المره الاولى مخش السياره وطنشته وبلغت الجيران باللي سار المره الثانيه مخشها وزعلت حقيقه وقلي احد الجيران عنه وطلع ولد مراهق ومسكته وغسلت شراعه لكن انقلبت السالفه علي اشتكى ابوه للشرطه ولولا الله ثم وقوف احد الجيران معي وادلى بشهادته كان رقدت بالحجز والحمدلله ع كل حال
الزبده كلم جيرانك ع الموضوع عل وعسى يكون بيدهم شي

[ابونبيل]

ركب جهاز انذار في اجهزه حساسه جدا لو تصرخ جنبها تون على طول

[سعيد المعمري]

اولا : الله يعينك في مصيبتك و يجيرك من الشر

ثانيا : اتخذ الحرص بالاسباب

1- شهد جيرانك على الي يصير لك بحيث لو صار شي يكونون شاهدين معك
2- ركب جهاز انذار صوتي للسيارة (ونان)
3- ركب كميرا مقابل وقوف سيارتك في الجدار

ان اصبت فمن الله و ان اخطات فمن نفسي و الشيطان

والله يوفقك .....

[Salamah.y]

يارجال , المظلوم و ان ضاع حقه عند الخلق , ما يضيع عند الخالق
ارفع يدك , و اطلب ربك , اول شي انه يكيفيك شره و شر غيره
و ان الله يهديه , لنفسه و أهله و دينه , و ان الله يغنيك بخيره و فضله عن الخلق و يعوضك

,

الاشكال هذي الله يهديهم بس , مريضين الله يشافيهم
صارت لنا عند البيت , انسرق 3 اسبيرات من سياراتنا بليلة وحدة
و مره ثانيه انكسرت قزازة موتر اخوي و الحمد لله ماكان فيه شيء ثمين بالداخل
و اخر مره قبل حوالي اسبوع انسرق سبير سيارة جدي , حسبي الله على الظالم
هذا غير المخوش و المسامير اللي تحط قدام الكفرات
يارجال قبل 10 - 15 سنة , اذكر كان عمي مستحيل يقفل سيارته و حتى النوافذ يتركها مفتوحه
و الوضع عادي تبات السياره برى ولا احد يلمسها
و الحين , لو تبي تنزل تفتح الباب بس , ما تامن على سيارتك
الحمد لله على كل حال , و الله ناخذ اسابيع ما شفنا سيارة شرطه بالحاره

,

الله يعوضك خير و يكفيك شر و اذية الناس
مووفق @~

[PATROL]

حتى لو تحط كاميرا يمكن ماتفيدك اذا الرجال متلطم
لكن اذا وقفت قل استودعك الله الذي لاتضيع ودائعه (فودائع الله لاتضيع)

[البحر الجديد]

كاميرا في الجدار وحساس حركة مثل ما يقول احد الاخوة.
الله ينصرك عليه، ويكشف لك أمره، ويبرد قلوبنا معاك.

[الشنه]

حط له ورقه على باب السياره
نفس المكان اللي يترك فيه رسالته



اترك شغل البزران والنسوان
دق الجرس وقابلني ونتفاهم

هذا جبان وخسيس واسلوبه منحط

[سحب ممطرة]

هذا أنسان مريض نفسي و يعاني من حقد و حسد مزمن أنصحك بحاجتين ..

1- أستودع الله سيارتك

2- أدع علية أذا قمت لصلاة الليل .. فأنت مظلوم و دعوت المظلوم ليس بينها و بين الله حجاب

[كاشت بالبر]

قولو آمين

عسى يدينه للشلل .. آمين

عشان يعرف نعمة يدينه .. ناس تتمنى يدين عشان تفتح القرآن وتقلب صفحات القرآن وتغنيهم عن حاجة الناس

وناس تستخدم النعم اللي عندهم في المعاصي وأذية خلق الله

وحقك ما راح يضيع عند رب العالمين
حتى يدينه بتشهد عليه

لو هو رجال يكلمك وجه بوجه


ومسأله أنك تكتب آسف .. انا لا اوافق الإخوان في هذه النقطه
لأنك تقول انك مسالم ولا عليك من احد ولا اخطيت على احد
بيستانس اذا شافك تكتب آسف .. وما راح تستفيد

اكتب له بورقه ( عسى يديك للشلل .. آمين + كلام عن عقوبة أذية خلق الله ) وحطها بنفس المكان اللي يكتب فيه

واذا ما فاد معه

استقعد له واذا شفته .. امسكه وادبغه ومردغه اليييييييين يعض الأرض

واعرف مكان بيته وسيارته

اذا سوا شيء لسيارتك .. سو لسيارته نفس الشيء !


وحاول تدخلها داخل البيت .. وخل معك سلاح :butt3:

عشان لو حاول ينط ويدخل بيتك ويخرب سيارتك

لا يلوم إلا نفسه


ناس مريضه تجبرك على المشاكل .. يضرونك ويضرون انفسهم


يمكن يكون مريض نفسي و لو تسوي له شيء .. تتوهق فيه و تتورط
لكن تصدق ان فيه ناس مريضين نفسيا احسن وافضل من الناس العاديين

[مشكلة القير]

سو لك بايكــه ( صندقـه )

[راكب الشفر]

والله هالحالة تدل على مدى الحقد والحسد المنتشر
موتري اول ماشريته جاء واحد وصدمة من عند البيبان وواضح انه متقصد لاني موقف عند البيت وشكله عرض الموتر
ودق ريوس وفرم الموتر
ما اقول الا حسبي الله ونعم الوكيل
والا الحين الصدمة لازالت مسوية قلق من تنسيم للبيبان

[مكشآتي للآخر]

ورى ماتتحقط له يوم تشوف نفسك فآضي -- - انا مثلك حصلت معـي بس تختلف شوي
اني كنت موقف الموتر جنب البيت مو قدامة في النافذ
المهم لاحظت يوم اني فتحت الباب انه المسجل فية محاولة سرقة له حاول يطلعة وماآقدر --ماسويت شي ولا حركت السيارة ولا حاجة
قلت إكيد له يوم بيرجع يحاول يكمل -- وخليت السيارة موقفة في محلها -
على اساس اني بتحقط له اسبوع كامل ولا صار شي وبعدين غفلت عنها يومين جيت لها لقيت منسرق المسجل حقه
طبعآ انا اتذكر اني حطيت صورة لمحاولة السرقة في هذا المنتدى وبعدها إنشآل خخ
قهر ..
الله يعينك إخوي على مصيبتك بس حاول انك تدخل سيارتك في الطبيله

[sgl2002]

قل له وش درّى الحريم بالسيارات

لو انه رجال كان كلمك بس شكله حرمه بدون محرم

[super benelli]

فيه جهاز انذر حساااس جداا

حتى البس اذا مشى فوق السياره طلع صوت , وحتى اذا احد ضرب بوري جنب السياره يطلع صوت حساس جداا ..

وميزته الانذار يطلع في السياره ويطلع عندك في الرموت (كانه منبه جوال)

[بيك اب 4X4]

شفلك عاطل او اثنين و خلهم يراقبون الموتر بالتناوب
و لهم 500 ريال إذا صادوه

[أبوطاوي]

يالغالي الحل عنندي...
روح لمسجد الحاره وبعد صلاة العشاء<<عشان اغلب الناس يكونون متواجدين في بيوتهم في وسط الاسبوع طبعا...
رح للأيمام لعد الصلاة واستاذن منه 5 دقايق على المكرفون...
وكلم اهل الحاره بطريقتك الخاصه...وانشاء الله بيهتدي الي سوا بسيارتك المشوخ

[برطش]

والله يخوي احس انه واحد من اخوياك مزحه ثقيل ويبي يمقلبك قد صارت معاي حركه مشابهه لحركتك

[هدفي قرناس]

لاحول ولاقوة الا بالله العلي العظيم
الله يعينك

[S3llo]

يهون المشخ عن الاسيد واحد من الشباب ناصب موتره يوم جا ولاها طايحه البويه حسبي الله عليه جعله يصب بأذنه اللي ما يخاف الله

[ابوعقيل81]

قولو آمين

عسى يدينه للشلل .. آمين

عشان يعرف نعمة يدينه .. ناس تتمنى يدين عشان تفتح القرآن وتقلب صفحات القرآن وتغنيهم عن حاجة الناس

وناس تستخدم النعم اللي عندهم في المعاصي وأذية خلق الله

وحقك ما راح يضيع عند رب العالمين
حتى يدينه بتشهد عليه

لو هو رجال يكلمك وجه بوجه


ومسأله أنك تكتب آسف .. انا لا اوافق الإخوان في هذه النقطه
لأنك تقول انك مسالم ولا عليك من احد ولا اخطيت على احد
بيستانس اذا شافك تكتب آسف .. وما راح تستفيد

اكتب له بورقه ( عسى يديك للشلل .. آمين + كلام عن عقوبة أذية خلق الله ) وحطها بنفس المكان اللي يكتب فيه

واذا ما فاد معه

استقعد له واذا شفته .. امسكه وادبغه ومردغه اليييييييين يعض الأرض

واعرف مكان بيته وسيارته

اذا سوا شيء لسيارتك .. سو لسيارته نفس الشيء !


وحاول تدخلها داخل البيت .. وخل معك سلاح :butt3:

عشان لو حاول ينط ويدخل بيتك ويخرب سيارتك

لا يلوم إلا نفسه


ناس مريضه تجبرك على المشاكل .. يضرونك ويضرون انفسهم


يمكن يكون مريض نفسي و لو تسوي له شيء .. تتوهق فيه و تتورط
لكن تصدق ان فيه ناس مريضين نفسيا احسن وافضل من الناس العاديين


اعجبني ردك بجد شي يقهر




وياليت راعي الموضوع يعلمنا بالجديد ترى حرقت قلوبنا على السالفة :f

[سوبر مكشات]

مالك الا ربك
اذا تركت سيارتك قل استودعتك الله الذي لا تضيع ودائعه

واذا كان عندك قراج دخلها فيه
واذا ما عندك شفلك اي بيت في الحي وقل لراعيه ابستأجر منك مكان في قراجك
وعلمه بالمشكله..
وقل لامام المسجد بالحي يفيدك بحل مشكلتك

[وجعين]

شف ونا خوك انا عندي مكسيما موقفه عند الباب ومخليه لسفر وفي يوم من الايام انسرقت ورده ربي بس مفحط عليه وكلفتني حول 5000 ريال عقبه ركبت كميرا وجلست اراقب ولا فاد لاني لانمت جا الحرامي وكسر القزازه ثم يشتغل الانذار وينحاش الحرامي وذا قمت الصباح اشوف القزازة مكسوره والباب مفتوح واخر شي اكتشفت ان الحرامي ولد جيرنا عاد وش تسوي مسكته وهدته بلعربي قلتله تراى السياره من الليله ان جاة شي ابكسر رجلينك وسحبك لشرطه جلست حول شهر بس بديت اشوف اخوياه حول السياره اخر شي ركبت باب بايكة وريحت راسي رغم ان جارنا شد عن الحاره لكن ما مثل باب البايكه السياره تنام بجنبك

[الهمرH2]

أخوي عثمان معاه مكسيما 2008 بعد ما شراها بثلاث أسابيع

شغل السياره الصباح و علطول ولعت لمبت الزيت ؟؟؟

شفنا العيار و أثر فيه سكر مكبوب داخل المكينه !!!

السكر إلي يحط مع الشاي و الحلى


الطريقه الصحيحه إنك تشتري زيت من أرخص الأنواع

ثم تغير كل يوم لين يختفي السكر

أستمرينا أسبوعين ثم راح كله ولله الحمد


المشكله إن السكر من النوع الخشن

[ابويزن2010]

يالغالي الحل عنندي...
روح لمسجد الحاره وبعد صلاة العشاء<<عشان اغلب الناس يكونون متواجدين في بيوتهم في وسط الاسبوع طبعا...
رح للأيمام لعد الصلاة واستاذن منه 5 دقايق على المكرفون...
وكلم اهل الحاره بطريقتك الخاصه...وانشاء الله بيهتدي الي سوا بسيارتك المشوخ


هههههههههههههههههه
من جدك انت

[أبوفيصل 2007]

أخوي عثمان معاه مكسيما 2008 بعد ما شراها بثلاث أسابيع



شغل السياره الصباح و علطول ولعت لمبت الزيت ؟؟؟


شفنا العيار و أثر فيه سكر مكبوب داخل المكينه !!!


السكر إلي يحط مع الشاي و الحلى



الطريقه الصحيحه إنك تشتري زيت من أرخص الأنواع


ثم تغير كل يوم لين يختفي السكر


أستمرينا أسبوعين ثم راح كله ولله الحمد




المشكله إن السكر من النوع الخشن


اعوذ بالله وفي احيانا يضع في البنزين بلاوي حسبي الله ونعم والوكيل
فعلاً من قال الجار قبل الدار

[ensultan]

الحمدلله الوضع إلى الآن طيب, وحتى السيارة لي شهر ماغسلتها والله مدري وش فيها ,, خايف أغسلها وأشوف تشطيبات وحكوك غير اللي فيها, ونفسي تراودني أبيعها ! كرهوني فيها عيال الحرام !