فورد اكسبلور تغير زيت القير

[القوة العاشرة]

انا شريت فورد اكسبلورر ماشي 90 زيت القير ما غير من وكالته


هل اذا غيرته خبط القير لانه سمعت اذا ابط زيت القير ما تغير ثم بعدين غيرته خبط القير

افيدون جزاكم الله خير

[عبدالرحمن.1]

حاول تغيرة

[Suliman-]

عندي وجهة نظر بذكرها لك بعد السالفة :

خويي اشترى مثل هالموتر ومن القراده راح غير الزيت والله من بعدها ماشاف خير القير الى الحين كل تبديله يطق طقه اقوى من الثانيه وقالوله يبي توظيب او تبديل قير .

وجهة نظري :
شيك على الزيوت مثل اذا ناقص زوده بأصلي واذا تمام خله على حاله ..


مجرد وجهة نظر لك الحق بالقبول ولك الحق برفض وجهة نظري

[لبيه يا منادي]

السلام عليكم غير الزيت وتوكل على الله حط زيت أصلي موتر كرافت
معي اكسبلور وغيرت الفلتر والزيت كلام غير صحيح

[.أبوعبدالرحمن]

حياك الله أخوي القوة العاشرة

غيّر زيت القير عند ورشة معروفة ومضمونة أو خذ موعد عند الوكالة

وغيّر الزيت عندهم .. طبعا تغيير الزيت يكون كل تقريبا ما بين 40 ألف كم

إلى 70 ألف كم .. وتأخير الزيت يسبب تكون ترسبات في القير .. و تخف لزوجة

الزيت .. و فيه كثير من الناس يتعيجز ياخذ موعد عند الوكالة أو يروح للصناعية

لورشة معروفة لتغيير زيت القير و يروح لمحلات تغيير الزيوت ويغيير زيت المكينة

وزيت القير وهذا في نظري خطأ .. لأن زيت المكينة سهل ومتعودين عليه لكن زيت

القير يختلف لأنه يحتاج بعد تنزيل الزيت تنظيف الظاهر لنا بعد تنزيل الزيت و تركيب

فلتر إذا السيارة محتاجة لتغيير الفلتر وغيره من هذه الملاحظات إللي تخفى على 99%

من عمالة محلات تغيير الزيوت وهذا أتوقع إللي حصل مع خوي أخونا سليمان .. أتمنى

إني أفدتك

[Suliman-]

ابو عبدالرحمن الرجال مغيره عند القرعاوي اللي بعنيزه ومغيرن معه الفلتر !

بس ماندري وش العلم مع ان الموتر ممشاه مهب واجد

[nice path]

غيره بالتجزيء نزل بمقدار علبه وحط بدالها جديد واصبر اسبوع وكرر العمليه على قد سعة القير (٣ او٤ علب) وبعدين غيره كامل مع الفلتر وان شاء الله يسلم القير
الطريقة مجربه وفعاله

[على رمشي تمشي]

احد اخوان اصدقائي معك اكسبلور غير الزيت مع الفلتر وخبط القير ولا نعلم عن سبب ذلك
الافضل لو تروح للوكالة اضمن لك

[الحاجز]

انا كان معي لومينا ماشية 200000 ماغيرت الزيت كلن يقول لاتغير الزيت يخبط القير رحة لم ورشة فيها تركي وسئلته ضحك وقال الكلام غير صحيح وغير الزيت وقعدت معي سنتين مثل الساعة توكل على الله وغير الزيت

[PATHFINDER 4]

انا اغير زيت القير كل 40.000 وهالكلام لباثفندر 2005

وسبق وتركته الى 70.000 توكل على الله وغيره

بعض الوكالات تغيره على 80 الف

ودام موترك وكالة شيك على الكتيب يعطيك كل المعلومات الخاصة بموترك

ولا تعتمد على كلام الاخوان بشكل كامل لان معلوماتهم تختلف من سيارة لسيارة ارجع لدليل المالك

[المرن]

غيره بالتجزيء نزل بمقدار علبه وحط بدالها جديد واصبر اسبوع وكرر العمليه على قد سعة القير (3 او4 علب) وبعدين غيره كامل مع الفلتر وان شاء الله يسلم القير
الطريقة مجربه وفعاله

هل تعرف احد جربها

[كبسولة2]

نعم أخي الكريم الطريقة مجربة وكتبت عنها في المنتدى موضوع مستقل

غير على التدرج أسحب علبة وحط علبة جديدة لمدة اسبوع

وبعدها كرر العملية لمدة 4 اسابيع مع المشي الخفيف على الموتر

طوال فترة التغيرات بدون ضغط عليه

بعدها بإمكانك تغير الزيت والفلتر معاً بدون مشاكل بإذن الله

اليك الرابط

http://www.mekshat.com/vb/showthread.php?t=493228

[جاسم الرفاعي]

اخوي افضل طريقة تاخذ السياره للورشه طفي موتر لمدة 3 ساعات و بعدها تخليه يسحب 2 لتر من الدهن و يضيف بداله 2 لتر شرط يكون الزيت المضاف وكاله لا تاخذه من محلات قطع غيار

و بالنسبة للمدة الي ذكرتها لان الزيت الفاسد فاقد اللزوجه يكون وزنه اخف من الزيت جيد فيرتفع لفوق لهذا قلتلك طف السياره 3 ساعة ليفصل الزيت الرديء عن زيت جيد


جرب هذي الطريقه و كررها مره ثانيه بعد شهرين و بعدها بدل الزيت بالكامل مع فلتر

( لاتصدم كلتشات القير بتبديلها فجاه من غير سابق انذار احتمال تبوش كلتشات ) اتوقع هذي افضل طريقه

[المنبسط]

من خلال تجربة
غير الزيت وكل ماخذت لك خمس سنوات وحولها غير منظم القير لانه هو من اكبر اسباب خراب القير في الاكسبلور وقيمته تقريبا 800
والله ييسر امرك
غير الزيت في الوكالة او عند مركز متخصص في فورد