المساعد الشخصي الرقمي

مشاهدة النسخة كاملة : سؤال لأهل الخبره كيف اطعس


بدوي متحضر
20/08/2006, 03:52 PM
السلام عليكم ورحمة الله وبركاته

ادري بها السؤال في ناس بتضحك وتقول وش يبي هالغشيم والا وش يبي هالحضري بس في نظري الواحد يتعلم ويسأل احسن من المهايط والواحد مافي راسه, بس بصراحه ودي اطعس واحب اطعس بس كلما طعست غرزت وابيكم تنصحوني بالطريقه الاقضل للتطعيس وانا موتري بليزر 4x4 دبل 6 سلندر
(4200) قوته بس احيانا وانا مشغل الدبل يغرز ماأدري وش اسوي ؟
جراب
20/08/2006, 04:07 PM
السلام عليكم ورحمة الله وبركاته

تحية طيبة أخوي بدوي متحضر أما بعد :

فأنا أنصحك بتنسيم الهواء الي في الكفرات علشان يرتاح الموتر معك و تتمشى وأنت مرتاح البال , لان البعض هداهم الله يعتقد إن معة دبل ما يحتاج لتنزيل الهواء وهذة طريقة خاطئة منهم .

والله أعلم

والله يطعمك من خيره ويكفيك شرة .
Riyadh-boy
20/08/2006, 04:10 PM
يا راعي الموضوع لو سألك واحد وقالك ؟؟
كيــــــــف اسووق ؟؟ وشلون بترد عليـه؟؟
اتوقع الجواب مقارب .
غالي
20/08/2006, 05:43 PM
نصيحه اخوي لوجه الله
لاتدخل الرمل الا وانت حاط كفراتك ضغط الهواء من 13 الى 18 والمناسب 15 علشان ماينسلخ عليك الكفر اذا نسمت زياده وقمت تلف بالرمال
وتذكر اخوي الكريم مافيه جيب يدخل بالرمل ولايغرز
اتحدى اي شنب يجيبلي جيبي وتدخلبه مسافات بالنفوذ ولا يغرز
لازم تنسم لابد منه
التنسيم بالبر مثل تعبية الكفرات هواء على الازفلت
ــــــــــــــــــــــ
ملاحظه: اذا لم تقم بتنسيم الهواء في الرمال وتقوم وتزر على مكينة موترك يطلع لها خربات غير متوقعه
اقلها البلوف والحراره وممكن يسبب تشعر براس المكينه
والله اعلم
ــــــــــــــــــــــــــ
واخيرا : جرب انت نسم وادخل الرمل بتلقى ماشاء الله موترك يلعب بالرمال لعب كنك على الازفلت حتى لو تدعس خفيف جدا تلقاه يرقى
والله اعلم
وملاحظه2: اذا موترك توماتيك لا تطعس الا بالنمره الي تحت D يعني يكون نمره 2 وعند الطلعات المرتفعات وانت تمشيء على خفيف استخدم نمره 1 بس لاتزر عليه واجد
:)
شبح الصحراء
20/08/2006, 05:48 PM
التطعيس يا اخي العزيز ليس بالتعليم ولكن بالممارسة ، في البداية لا بد ان تواجه صعوبات وتغريزات ولكن مع الزمن تتقن العملية وللمعلومية التطعيس رياضة صعبة وخطرة وانصحك بالبداية ان تأخذ معك عدد من اصدقائك واختيار أماكن سهلة واعتبر العملية نزهة برية ومع الوقت سوف تجد انك اتقنت التطعيس .
من نجد
20/08/2006, 06:16 PM
فعلا لأخي الكريم تنسم الكفر يساعد على عدم التغريز
المتليك
20/08/2006, 06:27 PM
كما لابد من توفر الاشياء التاليه

1/ ماطور هواء
2/ شيول حجم صغير
4/ صاجات للرباض اواستخدم وطايات الارجل للسياره طبعا عند التغريز
5/ واير قلص
وتوكل على الله قبل كل شيئ
Trail Blazer
20/08/2006, 06:57 PM
بالنسبة لسؤالك أخوي ..

أعتقد الشباب وفوا وكفوا ..

لكن أنا معي نفس موترك .. وبأعطيك تجربتي ..

تنسيم الكفرات وجعل ضغطها 15-20 .

حط القير على النمرة 2 .

انتبه لـ اللحية لأن البليزر نازل شوي . ( يعني لا تسرع وانت تطعس - ارق النفد بهدوء وراح ترقاه زي سلام عليكم - )

ولا تشيل همّ التغريز ..

:)
باترول 4×4
20/08/2006, 11:04 PM
وعليكم السلام ورحمة الله وبركاته
صراحة ماعندي مأضيفه فقد أفاد الإخوان وأجادوا ، لكن أقول : نسم الكفرات من 18- 20 وتوكل على الله وامش على هونك إلى أي مكان داخل النفود ولا تجور على موترك حتى لو شفته بدا يحفر وقف ثم قدم وارجع إلين يمشي معك ، وترا الخبرة وأنا أخوك تجي مع الأيام وأنا أجزم ان مافيه أحد من عشاق البر أو التطعيس ماحصل له غراز .
بدوي متحضر
21/08/2006, 07:38 AM
الله يعطيكم العافيه ويجزاكم خير والله ماقصرتوا لكن عندي سؤال؟

في واحد من الشباب يقاله غالي يقول اذا موترك توماتيك لا تطعس الا بالنمره الي تحت D يعني يكون نمره 2 وعند الطلعات المرتفعات وانت تمشيء على خفيف استخدم نمره 1 بس لاتزر عليه واجد

السؤال ابيكم تشرحونها لي وهل ينفع اني استخدم ال D الثقيل مع الدبل .
ومشكور ماقصرتم
بن دوخي
21/08/2006, 08:30 AM
اخوي بدوي حضري ال D 1 2 3 هذي كلها فقط لتحديد غيار القير عند المشي بالسيارة مثلاُ :

1 يعني القير مسموح له بتغييره واحده فقط .
2 يعني القير مسموح له بتغييرتين فقط .
3 أو D يعني القير مسموح له بثلاث تغييرات فقط .
و ((D)) يعني Over sbed يعني ترييح القير في السرعات العاليه اذا تعدت سرعة السيارة الثمانين.

وهذي مالها علاقة بالدبل ممكن تحط الدبل على الخفيف مع وضع القير على ((D)) مع تنسيم خفيف لهواء الكفرات وتتمشا تمشي .. :no2: ونصيحه لا تجور على السيارة خاصة وهي معلقه على الدبل لأنه يضر القير والدبل ..

اخوك ابو فهد
dr.mekshat
21/08/2006, 09:09 AM
هلا بأخوي بدوي الحقيقه انا أأييد كلام اخواني

انه ضروري تنسيم الكفرات وبعدين ترا لازم تاخذ كم طقه :confused: على الراس تتعلم منهن

يعني بتغرز مره ومرتين وثلاث وبالاخير بتصير تعلمنا السواقه بالنفود :cool:

وانت ما سمعت المثل وش قال

" قال طلعت قال ايه قال غرزت قال لا قال اجل ما طلعت "

يعني طعم الطلعه بالحفر والدفن والغبره

بس لايجي التغريز بوقت النفس خايسه :mad:

وبالتوفيق انشالله اخوي
الجرنـاس
21/08/2006, 01:09 PM
اخي / بدوي متحضر



كلام الشباب كله صحيح لكن تمعن في كلامهم وفهمه حتى تطبقه تطبق صحيح

وتذكر ان سيارتك من الوزن الثقيل ولاتصلح لمثل هذه الأمور إلى على خفيف

ولك مني بعض الإرشادات لعلها تفيدك

أولا - قم بتنسيم الهواء ( من كفرات السياره ) لاتفهم غلط

ثانيا - استعمل الدبل الصغير L يعني الدقمه مع غيار الجير من خفيف الى اثقل اذا دعت الحاجه يعني لشفت ان عزم السياره يخف

ثالثا - لاتستعمل الدبل الكبير H إلا اذا غرزت السياره وستعمل معه الجير في وضع خفيف مثل 3 ولا تستعمل الغيارات الثقيله مثل 1 او 2 تذكر ان الدبل الثقيل لإخراج السياره من التغريز فقط

رابعا - عند التغريز لاتضغط على السياره وحاول ان تخرجها ببطء شديد لانك اذا ضغطت على البانزين تحفر الكفرات وتغرز زود

خامسا - مثل ما افاد بعض الأخوه جرب في مكانات سهله مثل الزباير وترك الطعوس لاحقا

سادسا - تذكرا جيدا ان هذه الرياضه خطره واحتمال الإنقلاب بها ( لاسمح الله ) وارد خاصه للعليمي توخ الحذر وتدرب على الخفيف حتى تستفيد من اخطائك

اخيرا - الله يحفظك
الشقردي
21/08/2006, 01:24 PM
وكلام أخونا القرناس على متمه:
أعتقد ان المتعارف عليه أن الدبل الخفيف H هو اللي للممشى العادي
أما الدبل الثقيل L هو اللي اذا غرزت أوجيت تسحب أحد مغرز.

الـ H تستخدمه في السرعات العالية(High Speed) الى 80 (حسب كتالوج سيارتك)
الـ L تستخدمه في السرعات البطيئة(Low Speed) الى 40 أو أقل (حسب كتالوج سيارتك)
باترول 4×4
21/08/2006, 01:29 PM
الله يعافيكم جميعا .
على إثراء الموضوع .
بدوي متحضر
21/08/2006, 01:45 PM
مشكور يالنشاما والله ماقصرتوا وفيتو وكفيتو
والله بصراحه استفدت من كلام كل واحد فيكم وعرفت أشياء ماكنت اعرفها
لكن الله يجزاكم خير وماقصرتم والوعد اليوم في الهاف مون
الجرنـاس
21/08/2006, 01:50 PM
وكلام أخونا القرناس على متمه:
أعتقد ان المتعارف عليه أن الدبل الخفيف H هو اللي للممشى العادي
أما الدبل الثقيل L هو اللي اذا غرزت أوجيت تسحب أحد مغرز.

الـ H تستخدمه في السرعات العالية(High Speed) الى 80 (حسب كتالوج سيارتك)
الـ L تستخدمه في السرعات البطيئة(Low Speed) الى 40 أو أقل (حسب كتالوج سيارتك)


انت صح يعطيك العافيه
وجهة نظر
21/08/2006, 05:53 PM
سلام عليكم
كلام جميل ومفيد وصحيح اغلب ماقيل ...........
(وشكل راعى الموضوع واللي ردوا شباب الله يستر عليهم )
حماس لتطعيس:D
المهم تري ياشباب الثمامه والطعوس اللي حولها ماهي مقياس
والله من كثر ماهي مدهوكه لو تمشي بـ (طياره ) غرزت.:j
والله لوتذكرونها ( الثمامه ) وقت مضى لو تمشي بـ (سيكل)
ماغرزت .
&{أبوعـمـر}&
21/08/2006, 06:29 PM
عندنا في القصيم يعبون الكفرات غاز اكسجين وهذا اسمعه والله واشوف بالصور اوإذا حظرت تلقى دبه ورا وإذا سألت وشي يقولون أكسجين يمكنك قد شفتها صح وعلى الشروكي المرهم خاصه وحط لك فلاتر مثل الي بالصوره.
اسف مالقيت الا صوره وحده للي معه دبه الغاز ومقاس الصوره كبير.
http://www.mekshat.com/pix/upload/images19/mk32720_rb30150[1].jpg

http://www.mekshat.com/pix/upload/images19/mk32720_aabb.jpg
abuamer1412@maktOOb.cOm
بدوي متحضر
22/08/2006, 11:06 AM
وش دعوه ابو عمر ابحارب انا

على العموم شكلك راعي طعوس في القصيم
الله يعطيك العافيه
أبو سيف السيف
22/08/2006, 11:14 AM
نسم كفراتك وطق الدبل الخفيف ورح ولا يردك الطعس .. لا تطعس وكفراتك مليانه ترا يعدم عليك الدبل