سيارتك اف جي ، وحجم الشنطة صغير .. تفضل هنا :D

[hamad3983]

بسم الله الرحمن الرحيم ..
السلام عليكم ورحمة الله وبركاته ..

تحية طيبة لكل الاخوان ، وبالذات راعين الاف جي :D

البعض مننا يعاني من صغر الشنطة ، يعني لو حط جركلين ماء وعزبة قهوة وشاهي وعزبة طبخ وحزمة حطب امتلت الشنطة ..

وبهالموضوع اقدم لكم طريقتي في توفير اكبر قدر ممكن من المساحة بالشنطة
والحين ولله الحمد معي ماء يكفي 4 ايام للاستخدام الاقتصادي وحطب ليومين وعزبة طبخ كاملة وعزبة قهوة وشاهي ودافور كبير وفرش ورواق ومركا وكرسي نار وذراية + مساحة كافية لاغراض البقالة ليومين + مساحة زايدة .. الكل بيستغرب كيف اف جي ويصير فيه كل هالمساحة !!
الحل بالصور (اتمنى من المشرفين في حالة ان الصور كبيره يصغرونها الله لايهينهم) :-

1- تانكي الماء من نوع فايبرجلاس من مصنع الوطني يجي للاف جي بالملي وضد تغير الطعم والرائحة (من واقع تجربة) 80 لتر بـ 200 ريال :-


http://www.mekshat.com/pix/upload06/images/2012/12/mk36760_1.jpg


2- طريقة توصيل لي التانكي : الافضل انك تركب بزبوز صغير بمحبس بالتانكي لان في حالة لاقدر الله انقطع اللي تروح تسكره من التانكي ، وميزة الاف جي فيه فتحة بارض الشنطة تحت الديكور تقدر توصل من خلالها اللي الى تحت السيارة

http://www.mekshat.com/pix/upload06/images/2012/12/mk36760_2.jpg

3- تركيب الحنفية تحت السيارة بطريقة مخفية : يعني لو تبي تستخدم الماء لازم تبوبز عشان تشوف الحنفيه ، ويفضل تركيب محبس اخر في اخر اللي عشان يسهل الاستخدام بحيث انك بداية الطلعة تفتح المحبس الاول المرتبط بالتانكي وتسكر باب الشنطة وتصير تستخدم المحبس الاخير

http://www.mekshat.com/pix/upload06/images/2012/12/mk36760_3.jpg


4- تركيب الطبق من السنيدي ، ووظيفة الطبق يقسم الشنطة قسمين لتوفير المساحة ، وطريقة تركيبه (نفك الارجل الخلفية ويكون ارتكازه على التانكي من الخلف والامام مستند على الارجل الامامية) ومن واقع تجربة الطبق هو العنصر السحري في تكوين هالمساحة ، بـ 260 ريال :-

http://www.mekshat.com/pix/upload06/images/2012/12/mk36760_4.jpg



5- بالنسبة للفرش ، في الطلعات الخفيفه افضل (المده) وهي فرش تكون حول النار بطول مترين في متر وفي الصوره فيه مدتين

http://www.mekshat.com/pix/upload06/images/2012/12/mk36760_5.jpg

6- وهنا من وجهة نظري افضل مكان لتركيب المدات ، علما ان هذا المكان يشيل 4 مدات

http://www.mekshat.com/pix/upload06/images/2012/12/mk36760_6.jpg

7- وهذي صورة للطبق بعد تسكير مكان المدات وكل شي جاهز

http://www.mekshat.com/pix/upload06/images/2012/12/mk36760_7.jpg

8- وفي هذه الصورة واضح جالون مويه وعزبة قهوة وشاهي تكفي 4 الى 5 اشخاص ، وجابون الموية حاطه (وسوسه) والمفروض اشيله لان الماء في التانكي حلو


http://www.mekshat.com/pix/upload06/images/2012/12/mk36760_8.jpg

9- وفي هذه الصورة حطيت باقي حطب عندي ، والمكان هذا مع الرص والتلفيز ممكن تحط فيه حطب يكفسك ليومين ، ولو تشيل جركل الماء وتدف العزبة شوي يسار بتكون المساحة اكبر بعد

http://www.mekshat.com/pix/upload06/images/2012/12/mk36760_9.jpg

10- وهذي صور ختامية بعد تقفيل كل شي ، وتوضح الصورة المساحة الكبيره فوق الطبق ، واللي تكفي تحط فيها كل اغراضك

http://www.mekshat.com/pix/upload06/images/2012/12/mk36760_10.jpg


وفي الختام اتمنى ان يكون الموضوع مفيدا ودالا للباحث عن مساحات اضافيه في الشنطة ، ان اصبت في من الله وحده وان اخطأت فمن نفسي والشيطان ، وان كان من تعليق لدى الاخوة او استفسارات مطروحة ، فنحن هنا لنستفيد وجزاكم الله خيرا ، والسلام عليكم و رحمة الله وبركاته ..

[SAS2]

متكتك وشغلك كامل والكامل وجهه وماشالله عليك راعي عزم

[hamad3983]

بيض الله وجهك ، ومرورك شرف لي

[ابوعقيل81]

ماشاء الله

الله يعطيك خيرها

[hamad3983]

الله يجزاك خير .. شرفت وانرت

[على رمشي تمشي]

الله يعينكم على الاسود يجمع الغبار - لو تغير الشراع لنفس لون الطبق يطلع ممتاز
والله يعطيك من خيره

[ماجد الحايلي]

عاش والله هذا الترتيب الحلو
ومقيوله
الحي يحييك

[hamad3983]

الله يعينكم على الاسود يجمع الغبار - لو تغير الشراع لنفس لون الطبق يطلع ممتاز
والله يعطيك من خيره

الاسود ميزته بالصيف لانظفته مايبين ان فيه شي مركب .. امين بيض الله وجهك

[hamad3983]

عاش والله هذا الترتيب الحلو
ومقيوله
الحي يحييك

تعيش ياخلفهم .. مرورك الاحلى

[يكفيني نظرة]

ماشاء الله اول ماشفت حجم التانكي قلت شكلك بتقول هذا التانكي وباقي الاغراض بالسله فوق السياره :D ..
بس ماشاء الله شغل مرتب ..

[صليب الراي]

مبددددددددع

شغل مرتب وحلوووو

الله يهنيك ويطعمك خيره يارب

[أبوهشام2]

ماشاء الله شغل مرتب ومتكتك

[لاتكب البيالة]

السلام عليكم
اخي الكريم تصميم وترتيب جيد
لكن ان جاء الصدق وبغيت تنام بالبر بتطلع لك الف غرض وغرض
الرواق المظلة الخيمة وين تحطه ولا الفرش وين بتكون ولو ثلاجة
انا اشوف ان صغر مساحة الشنطة معاناة وتجبرك تتخلى عن كثير من اغراضك انا معي سفاري واشوف الشنطة غير كافية واحاول اتخلص من بعض الاغراض هذا وحنا 3 بكشتت يومين

[hamad3983]

ماشاء الله اول ماشفت حجم التانكي قلت شكلك بتقول هذا التانكي وباقي الاغراض بالسله فوق السياره :D ..
بس ماشاء الله شغل مرتب ..


ههههههه لالالالا الامور مستتبه ، نورت يا بعدي

[hamad3983]

صليب الراي ، الله لايهينك ، امين وياك .. نورت

[hamad3983]

ماشاء الله شغل مرتب ومتكتك

كلك ذوق يابو هشام ، نورتا

[hamad3983]

السلام عليكم
اخي الكريم تصميم وترتيب جيد
لكن ان جاء الصدق وبغيت تنام بالبر بتطلع لك الف غرض وغرض
الرواق المظلة الخيمة وين تحطه ولا الفرش وين بتكون ولو ثلاجة
انا اشوف ان صغر مساحة الشنطة معاناة وتجبرك تتخلى عن كثير من اغراضك انا معي سفاري واشوف الشنطة غير كافية واحاول اتخلص من بعض الاغراض هذا وحنا 3 بكشتت يومين

مايخالف وانا اخوك كلامك صحيح ، لكن ابشرك انا بالتنهات ومعي الرواق والفراش ، لكن الخيمة مستحيل تجي ، والثلاجه معي وحده صغيره ، الامور سالكه وانا اخوك هههههههه

[تساهيل1]

شغل مرتب
يامال العافيه

بس لاعاد تصور بالليل للان وضوح الصور 50%

وتسلم الايادي

شكرا

[hamad3983]

ههههههه ابششر يابعدي غابت عن بالي

[al-rmali]

ماشاء الله شغلك مرتب
والسالفه ماهي مجامله
لكن عندي ملاحظه يالغالي
لو تغسل الموتر وتنزل الصور بحجم مناسب
افضل للمشاهده وتيسير وصول الفائده
شكراً ,,

[.أبوعبدالرحمن]

و عليكم السلام ورحمة الله وبركاته


شغل تشكر عليه وفكرة رائعة وفرت مكان للأغراض وهذا للترتيب

وأهنيك على الإبداع يا مبدع

[سامي18]

يعطيك العافيه

[hamad3983]

ماشاء الله شغلك مرتب
والسالفه ماهي مجامله
لكن عندي ملاحظه يالغالي
لو تغسل الموتر وتنزل الصور بحجم مناسب
افضل للمشاهده وتيسير وصول الفائده
شكراً ,,

صح صدقت وكلامك على متمه ، لكن فكرة التصوير جت بسبب ان عندي بحث اصلحه وجالس اتهرب منه هههه وفترة الشتاء عموما الشنطة ما انظفها لاني لو نظفتها بكرا تتوصخ ، نورت

[hamad3983]

ابو عبد الرحمن

مرورك نور الموضوع ، شكرا

سامي
الله يعافيك

[البيرق الرحال]

شغل مرتب ماشاء الله

عندي التانكي الواقف اللي ورى المرتبه ومايركب الطبق مشكلته :(

تقدر تطول رجلين الطبق حيث يكون مرتفع ؟

وإذا ماعليك امر شلون سلكت للتانكي بالضبط عشان يصير تحت ؟

[AbdulAZiz M]

موضوع تشكر عليه بصراحه

الطبق دائما اشوفه في السنيدي ولا فكرت اخذه لكن بعد موضوعك شكلي باخذه خصوصا لان ما يغثني إلا الحطب اذا جاء اعواد كبيرة

انا عندي تانكي اسفل السيارة 95 لتر تقريبا يعني بتكون الشنطه مساحتها اكبر
بتجربتي يوم الخميس شلت عزبة طبخ وعزبة قهوة وشاهي وحطب وفرشه 4 في 3 متر وماطور هواء وشنطة عدة وجركلين ماء حلو ( وسوسه مثل ما تقول ) وباقي في الشنطة سعه ،، اجل لو ركبت الطبق ودمجت عزبة القهوه مع عزبة الطبخ بتتحسن الامور كثير :)

الله لا يهينك على كل حال

[hamad3983]

شغل مرتب ماشاء الله

عندي التانكي الواقف اللي ورى المرتبه ومايركب الطبق مشكلته :(

تقدر تطول رجلين الطبق حيث يكون مرتفع ؟

وإذا ماعليك امر شلون سلكت للتانكي بالضبط عشان يصير تحت ؟

التانكي الواقف ماراح يضبط عليه الطبق لانه رفيع مرة ، واقصى ارتفاع للارجل اتوقع 45 سم
والتسليك فيه بارض الشنطة ديكور بلاستيك ، اذا فكيته بتلقى دائرة مسكرة بربل
اضغط الربل ضغطه بسيطه وينفتح ، مد اللي وحط البلاستيك اللي شلته وترجع امورك كما هي

[hamad3983]

موضوع تشكر عليه بصراحه

الطبق دائما اشوفه في السنيدي ولا فكرت اخذه لكن بعد موضوعك شكلي باخذه خصوصا لان ما يغثني إلا الحطب اذا جاء اعواد كبيرة

انا عندي تانكي اسفل السيارة 95 لتر تقريبا يعني بتكون الشنطه مساحتها اكبر
بتجربتي يوم الخميس شلت عزبة طبخ وعزبة قهوة وشاهي وحطب وفرشه 4 في 3 متر وماطور هواء وشنطة عدة وجركلين ماء حلو ( وسوسه مثل ما تقول ) وباقي في الشنطة سعه ،، اجل لو ركبت الطبق ودمجت عزبة القهوه مع عزبة الطبخ بتتحسن الامور كثير :)

الله لا يهينك على كل حال

اول شي لاهنت
ثاني شي ، بما ان عندك تانكي تحت ، وبتركب طبق ، خل الجزء اللي تحت للحطب والماء الحلو ، والجزء اللي فوق لباقي الاغراض ، مع رني غير مؤيد ابدا ابدا ابدا لفكرة دمج العزبتين

[سمي الذيب 151]

كفوووووو يالذيب

[abusummer]

فكرة :good2:
فيه سؤال هل دفع الماء قوي
بعدين الي يقول ما يكفي ترا الرجال يتكلم عن حاله او خويه اذا طلع ام اني بحمل عزبي ز عزب الشله و هم ايش يسوون يجون بجفي حنين:eek: