مشكله مالقيت لها حل

[ابورشيد]

يا اخواني عندي مشكلةمالقيت لها حل
وهي ان عندي جيب تويوتا جي اكس ار موديل 97 والمشكلة هي ان الموتر يهز يمين ويسار عند سرعة 80 وكذلك عند سرعة 120 والهز كانك متعلق علي جنب السياره وواحد ثاني يهز مع الجهة الثانية وهذي الهزه تكون اذا كان الموتر محمل0 علي فكره انا مركب تانكي مويه .
هذي الحالة حصلت معي قبل سنه وماعرفنا لها حل وغيرنا المساعدات كلها بجبريال ولكن مافيه حل ومره كنا في البر وبنشر علينا الكفر يوم غيرناه ضبط الموتر وصار تمام 0 يوم وديناه للبنشر لقينا فيه شق والهواء يدخل بين طبقات الكفر وهو اللي يسوي عدم التوازن للسياره0
الان رجعت هذه الهزه مره ثانيه وغيرت طقم كفرات كامل مع ان الكفرات كانت بحالة ممتازه ولكن لقطع الشك باليقين ولكن ماراحت الهزه بعدين وديته لميزان قالو ان الدفرنس طالع علي جهه وصلحناه بعدين قالوا ان جلب الاذرعة الامامية والخلفية تبغي تغيير وغيرناها ولكن االمشكلةهي هي بعدين وديته لورشه وقالولي لازم تغير اليايات الخلفية وتفك الكعكات وسويناها لكن مازالت المشكلة موجودة0
تكفون اللي عنده حل لايبخل علي فيه0

[القماري]

أخوي أبورشيد
الظاهر أنك كاد الموتر على الآخر ماخليت شيء إلا وغيرته والمشكلة ماتغير عليها شيء
أحسن حل بع الموتر وخذ غيره :D
بس قبل ماتبيعه ودي أشارك معاك بفكرة عن المشكلة (أنت تقول الموتر يهز يمين ويسار) الهز وين بالخلف أو الأمام؟
إذا كان بالخلف فهو كما أعتقد إما مشكلة في الكفرات أو اليايات أو إحتمال أن تانكي الموية مش موزون صح عندك (هذى تحتاج خبير في ذا الموضوع)
ثانيا إذا كان الهز في الأمام وفي سرعة معينة من 80 إلى 120 فأعتقد أن الكفرات بحاجة إلى ترصيص أو وزن أذرعة أو شد (تربيط) في ذراع التوجيه.
عادة سيارات الدفع الرباعي تعاني من وجود هذه الهزة الخفيفة في هذه السرعة وذلك بسبب إستخدام السيارة بالطرق الوعرة وإهمال الصيانة الدورية (ترصيص ، تربيط ، تشحيم ، ميزان ، ومستوى ضغط الهواء في الكفرات أو إستخدام كفرات سيئة التصنيع أو قديمة)
مع تحياتي لك

[مكشات]

إحتمال تكون المشكلة من جنط الكفر اللي بنشر عليكم :)
حاول تسوي تبديل للكفرات مع الإستبنه وتجرب لحد ماتروح الهزة .
تمنياتي لك بالتوفيق
أخوك
مكشات

[الخبير]

السلام عليكم
يا ابو رشيد لا تصلح شئ إلا وانت ماخذ ضمان من صاحب الورشة انه يبي يصلح المشكلة.
انا تعليقي فقط على تانكي الموية ، مثل ما قال اخوي القميري يمكنه مهوب موزن صح و أيضاً يمكنك معبي نصفه بس ، لذلك يولد بعض الإهتزاز.

[صقر]

الاخ ابو رشيد

السلام عليكم ورحمة الله وبركاته

اذا سمحت ا لي انا اعتقد ان تانكي المويه ماله دخل في الرجه اللي بالموتر مع احترامي لآراء الاخوة

المشكلة في اعتقادي من حاجتين مابقي غيرهما

الاولى قد تكون في الجنط... استبدل الجنوط كلها وجرب

الثانية انصحك اخي بتركيب (فرارات) (اقفال الدبل)....... أو تغيير عمود الدبل أو استعارته من احد الاصدقاء واذا كان العيب من العمود فأمامك حلين اما انك تركب عمود جديد او من التشليح... او تركب فرارات.
وما نطول عليك .... اضغط على هذا الرابط
http://www.mekshat.com/vb/showthread.php?s=&threadid=5025

[المستشار الخبير]

السلااااااااااااام عليكم وبعد
الرجة الي في التانكي ترا مهيب سهلة اذا كاااااان كبير لذلك تانكي البنزين في السيارات يجي طامن بقدر الامكان وفيه من داخل شرائح مثقبة لتلافي حدوث الرجة وصفع الامواج داخل التانكي يعني مقسم من داخل الى غرف وبينها ثقوب..................



وشكراااااااااااااااااا

[ابورشيد]

مشكورين علي تفاعلكم يااخواني الاعزاءهذي المواقع اللي يحرص عليها الواحد والابلاش
اخواني الكفرات جدد وبعدين مرصصه واحد واحد وتانكي المويه صحيح كبير لكنه المنيوم شغل اليحيي وهم مسوين فيه قواطع علشان مايلعب وانا مركب فرارات من زمان والشك عندي الان هي اما ان يكون من الجنوط او من المساعدات مع اني يوم غيرو لي اليايات الخلفية قالولي بان المساعدات سليمة والجنوط يوم غيرو لي الكفرات ورصصوها ماقالو لي انها مطعوجة. واللة ماادري ؤشلون اشكركم علي تفاعلكم والسلام عليكم.

[ابو الريم]

الاخ ابو رشيد .........


ارجوا الاجابة على هذه الاسئلة ....
1- الرجه من الامام ام من الخلف ؟؟؟
2- الرجه موجودة سواء كان التانكي معبأ ام لا ؟؟؟
3- ممكن تقولي نوع الكفرات اللي انت مركبها والجنوط ؟؟؟؟ ووتتأكد من حجم الترصيص الموجود عليه ( قطع الرصاص الموجودة على الجنط كبيرة ولا صغيرة ) ؟؟؟؟؟؟
4- انت تقول في البداية انك غيرت المساعدات الى جبريال فهل غيرت الاربع ؟؟؟؟ وعلى اي دقة وضعتها -خفيف.وسط . ثقيل ؟؟؟؟


ارجوا اجابتي على هذه الامور وعذرا على التأخير :)


تحياتي ابو الريم ,,,,,

[الجمس]

اخوي ابو رشيد
السلام عليكم ورحمه الله وبركاته
المشكله اللي تكلم عنها سبق وان حصلت معي وماخليت شي من اللى تقوله ماسويته ولكن بدون فائده .
وفي الاخير اتضح ان السبب من مساعد الدركسون وبعد ماغيرته انتهت المشكله .
اقترح انك تفحص المساعد الاقشر وتاكد انه سليم 100% لان الرجه سوف تتضاعف مع مرور الوقت وتصبح خطيره (لاني بغيت اروح فيها لكن الله ستر) . الشي الثاني مع احترامي للاخوان ماعتقد ان الكفرات والجنوط فيها بلا والا كان ماترصصت الا بكيلو اوكيلوين رصاص وانت تقول الكفرات جديدة.

مع تحيات اخوك الجمس

[ابورشيد]

مشكورين اخواني الاعزاء لهذا التفاعل
الرجة من الخلف وهي تقريبا تمايل يمين يسار
الكفرات نوعها برجستون والجنوط شد بلاده
انا غيرت الاربع مساعدات كلها والدقه ماادري عنها
الرجة تكون واضحة اذا كان الموتر محمل وانا عادة اعبي التانكي عند اي طلعه اوسفر
بالنسبه للترصيص فالقطع صغار
اما بالنسبه لمساعد الدركسون قال لي حق الميزان انه يحتاج تغيير لكنه قال لي بانه مايأثر علي الاتزان والله اعلم.

[البوصلة]

اخـــوي .. الله لايهـينــك تأكد من عمود كردان والصلبان .
وتحياتــــي للجميع

[المستشار الخبير]

السلاااااام عليكم اخوييييييي
قبل ما تغير شي وتكلف على نفسك
شيك على الرمان حق الكفرات الاربع وده للصناعية وقلهم يشيكون على الرمان
يمكن انك مطامر بالسيارة واثرت علية
..............



وشكرااااااااااااااااا

[ابو الريم]

ابو رشيد ان شاء الله هذا الموضوع يفيدك
http://alsaha.fares.net/sahat?128@156.cBlgdpYSBa3.117577@.ef162ba