ايهم افضل تانكي ماء حديد ام ألمنيوم ؟؟ تصويت

[جنتلـ]

السلام عليكم ورحمة الله وبركاته

مرحبا وسهلا بالاخوان

بحكم قرب الشتاء والطلعات والبر والوناسه ان شاء الله

لدي جمس صح وفيه توانك ماء لكن قديمة والحين بغيرها لكن صرت بين امرين

اركب توانك من حديد ام من المنيوم ؟ مع اني احمل في الشاص اشياء كثيره مثل الحطب والخيام
وانا سمعت ان الالمنيوم خفيف ممكن ينشق لكن ميزته انه مايصداء ولا يغير طعم المويه

فا ابي رايكم افضل حل بالنسبة لي .. هل اركب المنيوم واسوي له حماية من قماش تلبيسه او حماية حديد
وهل وزنه الالمنيوم اخف بكثير من الحديد؟؟
وبعد لو طولت عليكم ايش افضل طريقة للتركيب هل على الجوانب ام باول الشاص عشان وزن الموتر ؟
واي الاماكن في بريدة تركيب وتفصيل افضل ؟؟

وشاكر لكم

[السحاب]

وعليكم السلام ورحمة الله وبركاته
الأخ الكشميري
لامجال للمقارنة بين الحديد والالمنيوم:no2:
فالالمنيوم أخف وضد الصدأ ولايتغير طعم الماء فيه
أنصحك بالالمنيوم أو الستانلس ستيل
جربت الاثنين وكلهن تمام
بالنسبة للستيل تأكد أن اللحام يكون ستيل لأن البعض يخلط لحام حديد معه
وعندك محل عروق الشمال متخصص في هالأمور
تحياتي

[المترو]

السلام عليكم ورحمة الله وبركاته

اخي الكريم الكشميري

افضل طريقه لتانكي الشاص الفرش على ارضية الحوض بحوالي من 5 الى 10 سم ولا تقرب الحديد ابداً ابداً لانه كم شهر وهو مصدي ومغير لون وطعم الماء وترميه

افضل شيء السان استيل افضل شيء قوي يتجمل الاحمال فوقه والعفوش لكن تأكد من اللحام يكون ستيل وليس حديد

او كا اختيار ثاني الومنيوم لكن يجب وضع صاجه فوقه كا واقي حديدي لحمايته (واشوف انه ا غير عمليه )

المترو

والسلام

[ابو فهد 911]

مثل ما قالو الشباب الستان ستيل افضل شيء لكن وزنه ثقيل مره اتوقع اثقل من الحديد وغالي الألمنيوم ممتاز وخبنط عريض


وبالنسبه للمحلات في بريده فيه واحد اسمه الرحيلي عند اشارة النجر ممتاز ومجرب

[نيشان نجد]

أنا أنصحك بالستيل لأنه يتحمل

[مسافر1]

الأنواع ثلاثة أخي الآن ..
حديد .. ألمنيوم . استل استيل .
النوع الثالث هو الأفضل والأغلى كذلك ..
الحديد ربما يعيش معك مدة وذلك حسب اختلافات معينة .
أتمنى أن توفق للأصلح ..

[جنتلـ]

حيرتوني طلع خيار ثالث الي هو الستيل

طيب يتحمل تحميل العفش فووقه مثل الخيام والحديد

وهل زي ماذكر اخونا افرش نصف الحوض افضل من التوانك التقليدية على الجوانب ؟ لاني بحاجة لترات كثيرة بصراحة
وبالنسبة لوزن الستيل اثقل من الالمنيوم والحديد ؟؟

وشاكر لكم بنتظار المزيد من الاراء والمشاركات والاقتراحات

[Abo Nader]

السلام عليكم...

أخوي أنصح أنه يكون ورا الغماره على طول على شان الثقل و على حسب مقاس التانكي تتحكم باليترات...
بالنسبه للحديد ميزته مره رخيص بس المشكله أنه إذا بغيته ما يصدي يبيلك تعتني فيه يعني ما يقل من ربع التانكي و كذا...
أعرف بعض الشباب محافظين عليها ويغيرون الما كل وقت ولا صدا معاهم...
و الله يكتبلك الي فيه الخير...

[راعي المقانيص]

حبيب قلبي الكشميري لك مني أطيب تحيه

لاتحتار نهائيا ركب ستانلس ستيل ملي ونص أو 2ملم وراح يتحمل لو تبي تركب فوقه عفش بيتكم كله لان ميزته مايصدي ويعيش معك فترة ماهي بسيطه ( الموتر ينتهي وهو ما انتهى )

اما بخصوص انك تبي تركبه في نص الحوض ( تانكي صدر ) ما انصحك لان الجمس معروف أن الشاص حقه يفتل ولكن مادري عن الجموس الجديدة وأنصحك تركبه على الجوانب.

واذا قررت تركبه نهائي بنص الحوض لاتنسى تركب له قواطع داخل التانكي علشان مايلعب بالموتر اذا كان الماء واصل نص التانكي مع لفه او شي على طول يزحف بالسيارة وخصوصا اذا كان التانكي كبير ولكن القواطع الداخلية تحجز الماء علشان مايجي دفعة وحده على جهة معينه يصير يندفع بالتدريج .

واما بالنسبه عن المواقع في القصيم ما اقدر افيدك ياغالي ولكن الاخوان ماقصروا عطوك الافادة

وتقبل تحياتي ،،،،،،،،،،،،

[عمار السفينه]

نصيحه لاتدور غير الستيل شفني مركبه لي حول 5 سنين وهو تمام ماشاء الله , ومن ناحية التحمل احط عليه تقريباُ200 كيلو ولا قال لا ماشاء الله

[جنتلـ]

راعي المقانيص ياسلام عليك كلام من ذهب وعجبتني فكرة القواطع الداخليه .. هل احطها بشكل عشوائي ؟؟ وتكون من نفس الستيل ؟ او مايلزم اي مادة مو مشكلة .

خراب السفينة تسلم ياقلبي عقبال 10 سنين يارب

[بن فيصل]

ركب ستانلس ستيل ونم باذن الله
وتاكد من الملاحظات الى اذكروها الاخوان وبالتوفيق

[جنتلـ]

تسلم اخوي بن فيصل ماقصرتوا