نصيحه من اخ الى اخ بخصوص ( تجليده حماية الوجهية )

[مخ سعودي]

السلام عليكم ورحمه الله وبركاته
اسعد الله صباحكم ومساءكم بالمسرات
اخواني من باب الاخاء والنصح قمت بتركيب حماية وجهية من شارع الغرابي على انها اصليه ويحلف لي العامل ومكتوب عليها المانية المهم ركبتها وجلست سنة في السيارة اسافر عليها واروح واجي ودخلت السيارة بالامس الى التلميع لازالتها وتلميع السيارة خارجيا وتفاجات بان تجليده الحماية هي اخطر من العج اعدمت وجه الموتر عدام يوم فكوها كلها صمغ غير كذا شالت بعض البويه من طرف الباب وزوية الكبوت وطرف الرفرف مع العلم ان البويه وكاله يعني السيارة ماجاها رش ابد وتندمت لكن وش ينفع الندم ولمعوا السيارة ببنزين علشان الواجهه كلها صمغ ويالله يالله رجع لمعه الكبوت
فانا من باب حب لاخيك المسلم ماتحب لنفسك حبيت اطرح الموضوع كي اكون عبره لكم وتوبه ماحطها والحمد لله على كل حال كان نفسي اصور موتري بعد ماشالوها لكن بصير كل مادخل المنتدى اتحسر عليه

[شاووش]

الله يعوضك خيرر ..
وجزاك الله خير على التنبيه

[وسم الحر]

الله يجزاك خير بالنسبة للمحلات المتخصصة في شمال الرياض لاتكون مثلهم بس الله يستر انا جيت لمحل ركبت عندهم الوجيه يوم جيتهم بعد سنه علشان اسوي تلميع مجاني من عندهم كل ست شهور لقيت المحل مسكر وناقل شكله خسر الله العالم او الاجار غالي عليهم لكن الله يستر اذا مثل كلامك مشكور

[ksaboss]

جزاك الله خير على النصيحة
و بعض التجليدات في الغرابي تحترق من الحراره و يقلب لونها اسود و تشوه السيارة

[sgl2002]

كل التجليدات تعدم البويه

[بدوي جنوبي]

كل التجليدات تعدم البويه

يا راجل :D
حتى المحلات اللى تعطى ضمان 10 سنوات
يوم جيتهم قالو ب 2000 ريال :eek:

[المقبلي]

السلام عليكم ورحمة الله وبركاته وبعد .
نشكر الأخ على هذه النصيحة
ولكن هناك شركات عالمية متخصصة في العزل ومن الشركات اللي تحضرني الآن
في كول بس هذولا غالين
ثري إم 3m
جونسون
زيبارت وهي شركة محترمة
وغيرها من الشركات اللي تعطيك ضمان أقل شي خمس سنوات وشغلهم نظيف
إذا إنت مسوي عند وحدة من هذي الشركات فهي مصيبة

[مخ سعودي]

الله لايهينكم والحمد لله على كل حال توجهت اليوم الى البيان ولقيت عندهم سمكري ممتاز طمس ببوية نفس بوية الوكاله الاماكن التي تسبب التجليده بإزلتها واحس انها مو واضحه
اما اللي ركبتها عليها ضمان سنتين والضمان موجود وراح اتوجه للمحل اللي ركبت عنده واكرشه قدم زباينه حتى لو ماحصلت على تعويض بسبب التجليده
بالنسبة لي قريت على التجليده الماني وهذا اللي شجعني اركب كما ان السعر له دور واشوف الناس واجد اللي يركبونها

[theb-99]

الله يجزاك خير والله اني كنت ابي اركب بس يوم شفت الموضوع هونت

[مخ سعودي]

اخوي ذيب ان كنت تبي تركب ركب الاصلي حق درايف سفن او شركه معروفه وخل الغرابي عنك نصابين يارجال وحتى الشركات الاصلية الله اعلم بهم عند ازالتها

[طواش]

والله مركبينا ولحد الان ممتاز مرة قريب سنه والامور طيبه والضمان 5 سنوات

[اسم قديم]

يمدحون البرقع وقت السفر وبسسسسسس

والله ضحك ضحك يجيني ابو شكيم شو ما شو وهاتك مبالغ كلام فاضي

[مسير عليهم]

على موتري حامي ومركبه راعيه الاول ومازال موجود وعلى كلامه ضمان 5 سنوات لكن حالياً بدا ينقشع التجليد ولاتضررت البويه وسببها اشتخدام ضغط الماء وقت غسيل السيارة

الغرابي لو يقولون لي بنركبها لك ببلاش قلت ماابيها اخسر 2000 ريال ولا يلعب علي يماني بـ 400 ريال

[ابورايف]

أشكرك على التنبيه

هذي بحد ذاتها مشكله

شكرا لك

[أبوفيصل 2007]

بارك الله فيك يا المخ :)

[مخ سعودي]

الله يطول اعماركم
والمخ خبط امس يابو فيصل بس الحمد لله سويت رسيتور ورجع النظام اوكيه (:
توجهت امس للبيان عندهم سمكري محترف حط نفس البويه على الاماكن اللي راحت والحمد لله تحسها مخفية الحين

[Cyber]

نصيحة اتجهوا الى التسوق من الانترنت فهم اكثر امان وضمان

[ابو جراح-خالد]

الله يعوضك
بس الله يهديك لورايح لحد هالشركات يضمنون لك سيارتك

[WWS]

كل التجليدات تعدم البويه


يا راجل :D
حتى المحلات اللى تعطى ضمان 10 سنوات
يوم جيتهم قالو ب 2000 ريال :eek:


نصيحة اتجهوا الى التسوق من الانترنت فهم اكثر امان وضمان


ليه آشتري مؤتر ؤآحـآفظه ؤ آسؤي له حمـآيه ؟؟؟
عشـآن لآ بعته يجيب مكسب ؟؟
يعني مـآتهنيت بمؤترك ؤ صرت تجهزه للي يبي يشتري منك ؤقت آلبيعه
آجلد آلمؤتر لين تحس آنك دـآفع به دم قلبك مؤ تضبطه للي يبي يشتريه

كل سنه آسؤي تلميع كـآمل للمؤتر ؤ بس ؤ بـ 350 ريـآل من برـآ ؤ من دــآخل
مع بدـآيه آلصيفيه

آلتجليد آللي بمحلآت آلزينه ؤ آللي بـآلمحلآت آللي لهـآ آســآمي رنـآنه
كلهـآ نفس آلخـآمه آللي بـآلزينه يتشرؤنه من آلآسـآمي آلرنـآنه بـآلرؤل

آجل حمـآيه تؤصل آلى 2000 آؤ آكثر ؟؟؟!!

(( تبؤن تشؤفؤن آلنصب عندنـآ بـآلتظليل آلعـآزل آللي يبـآع بـآلمحلآت آلمشهؤره
آبحثؤ بـمؤقع آمـآزؤن ؤ آيبـآي ؤ تعرفؤن آلنصب كيف يصير
ؤ قـآرنؤ آلسعر ))

قـآلؤ ضمـآن .. آلشركـآت هنـآ آخر مـآتفكر به آلضمـآن ؤ آؤل مـآتفكر به آيقـآع آلمؤـآطن بـآلمصيده عن طريق آيهـآمه تلميع كل 6 شهؤر
ؤ ـخـآمه عريقه ؤ لهـآ سمعه عـآلميه
ؤ صفق سعر .. ؤ فيه من يغريه آلسعر ؤ يقؤل غـآلي آكيد زين

الله يرحم ضعفنـآ ؤ ضعفكم

[سيف الظفير]

عليك بالشركلت العالمية الامريكية الاصلية وبس اللي فيها تقنية النانو

[عريدان]

المستفيد من هالكركبه الأجنبي ويمكن متخلف وبعده والشريطي ... وأنت تخدمهم بفلوسك ومن جيبك ولا تستمتع وقبل همك كيف تعطيهم والا تحفظ لهم موترك.... أنا ما يقهرني ألا واحد يلبس على موتره من تحت ومن فوق ويخلي البلاستيك ويمكن يلبس الوجهيه والسقف والقزاز ... اللهم عافنا

[مخ سعودي]

صادق وانا اخوك لكن الموتر انا شاريه جديد وسفرياتي واجد بحكم الاهل في منطقة وانا في منطقة والموتر راح يخدم معي ان شاء الله ٨ سنوات او اكثر وصعبه اشوف وجهيته ممسوحه ومتشوهه واذا ظبطت شي فهو بالاساس راجع لي قبل الشخص الاخر اللي بعدي بالعكس اسوي صيانة لموتري وانظفه واهتم فيه افضل من ارش بويه كل سنه او سنتين لذلك ركبت الحماية وماستفدت شي لكن الحمد لله على كل حال وجاري التفكير في طريقة ما لحماية الواجهه غير البرقع وتجليده الحماية

[أبوفيصل 2007]

الله يطول اعماركم
والمخ خبط امس يابو فيصل بس الحمد لله سويت رسيتور ورجع النظام اوكيه (:
توجهت امس للبيان عندهم سمكري محترف حط نفس البويه على الاماكن اللي راحت والحمد لله تحسها مخفية الحين
ماشاء الله تبارك الله ماشاء الله كان عليك دعاء شايب
وفقت في طرحك للموضوع ونصحك للاخوان وفقك الله في فني ورشة البيان يا معلم :good2:

[emm]

جزاك الله الجنة

[طواش]

راي اخوانا wws
ممتاز كد الموتر ولا تحنه لكن عند البيع النظافة تفرق في السعر

[صب لي فنجال]

الله يجزاك خير على النصيحه ويرحم والديك

[ابو طاهر]

الشكر على النصيحة

والاهتمام باخوانك المسلمين

[مخ سعودي]

الله يجزاكم بالخير ولايريكم مكروه

[الغريب12]

بورك فيك وجزيت خيرا والله توي شاري جيب ومحتار والمشكلة طريقي كثير العج

[مخ سعودي]

والله اخوي الغريب ياتركب الاصليه حقت 3M & Vcool& Drive7 او لاتركب التجاري لكن الاصليه يمدحونها ولاعندي علم انا كانت تجربتي من حقت الغرابي اللي مكتوب عليها المانية وللاسف الشديد طلعت ماش

[بدوي جنوبي]

والله اخوي الغريب ياتركب الاصليه حقت 3M & Vcool& Drive7 او لاتركب التجاري لكن الاصليه يمدحونها ولاعندي علم انا كانت تجربتي من حقت الغرابي اللي مكتوب عليها المانية وللاسف الشديد طلعت ماش


المشكله السعر مبالغ فيه
معقوله الوجهيه ب 2000 ريال :mad:

[مخ سعودي]

وكل عارف لكن وش الحيله يالغالي البرقع يعدم الرفرف مع الوقت والتغبيره وجودها كعدمها والفيري اسوى انواع الحماية