للفاهمين فقط

[غالي]

السلام عليكم ورحمة الله وبركاته
سؤال على الطاير
وش سبب في بعض الجيوب ان غرزت وانت على الدبل الخفيف تدعس وطاية البانزين والكفرات ماتدور؟؟؟؟!!!
معنا اليوم شيروكي وكنا عند حفيرة نساح وغرز وهو يحاول يطلع ماتدور كفراته بس نسمع صوت المكينه.
ومهوب اول جيب اشوفه كذا قد صار للاندكروزر في اكس ار هالسالفه .. والمشكله الدبل الثقيل يبداء يحفر ويسقط الموتر
الي يعرف ليش كذا ....يتفضل ويدلو بدلوه
شكرا

[الوشاح]

لأن ترس الدبل الخفيف ( كبير ) يعطيك سرعه عاليه وقوه اقل





بعكس ترس الدبل الثقيل ( صغير ) يعطيك قوه عاليه وسرعه اقل





إذا غرز الموتر عندك حلين





الاول .. عشق الدبل الخفيف ورجع للخلف مترتقريبا ثم شد على الموتر





الثاني .. عشق الدبل الثقيل





.. انا استخدم الحل الاول ..





تحيتــي لكــ

[غالي]

هلا والله اخوي الوشاح
ترا نسيت اقول المواتر توماتيك
ماظنتي ان القير العادي بيسوي كذا
وحتى على الريوس ماتدور الكفرات ليش؟؟؟ والموتر امس كان متعلق
يعني المفروض تدور الكفرات
وشكرا على المعلومات اخوي الوشاح كثر الله خيرك

[مسافر1]

يجب عليك أخي مباشرة استخدام الدبل الثقيل ...
حال التغريز أو السحب حتى يستطيع العمل . وحتى لا يحرق الكلتش ..

[مهراس]

السلام عليكم ورحمة الله وبركاته

الأخ غالي: يمكن السواق حاط تعشيق الدبل في الوضع (N) وهو مايدري أو معصب!!!!!!!!!!:bounce:

[رعد الشمالية]

لاصار اوتوماتيك عليه السلام زين مافرط معك
عليك بالقير العادي

[المترو]

السلام عليكم ورحمة الله وبركاته


هذا شيء طبيعي بالسياره التماتيك سوى تويوتا او اي نوع اخر
القير له حد معين من القوه اذا وصل اليه وقف واحذر تشد عليه زياده ينفرط او يحتمي ويحرق زيته وبدل تغريزه عطال قير

وهذه احد عيوب القير التماتيك اذا وصل لحد معين لا تستطيع تجور عليه ويطلع مثل العادي تمتل فيه الى ان يطلع بالقوه او المروه وكأني بالقير التماتيك اسمعه يقول هذا حدي لكن دام الموتر يميشي ماعليه خلاف
والسلام

المترو

[Trail Blazer]

طيب جرب تحط القير على نمرة أقل ..

بدال D حطه على نمرة 2 أو 1

[Alhzzen]

اممممم صحيح كلامك هاذاي في الفي اكس ار انا صارت لي مره في الدبل الخفيف
بس انا على طول من اشوف الموتر بداء يضعف عزمة (بدا الرمل يسحب السيارة لان الكفرات ممتليه)
اما هاذي زي ماقال لك في الدبل الخفيف يكون القير مريح مايشد على التروس لو يشد احتمال يخترب القير او يروح عليك
اصلن دايركت اول مااتغرز على الدبل الخفيف وقف ونسم وعشق الدبل الثقيل

طريقتك تجي ان السيارة تكون متعلقه وثقل السيارة على جهة وحدة ماايشتغل لو تحطة في الثقيل يتحرج بس لا تدوس كثير لانه يحفر عليك

االكفر مايدور اتوقع انه شغلت سيفتي للقيور التماتك على شان ماتخرب

شكرا

[غالي]

اخواني
المسافر1
مهراس
رعد الشماليه
المترو
Trail Blazer
ALhzzen
شكرا لمروركم ومشاركاتكم
والي فهمته من بعضكم ان الوضع عادي يعني؟؟
لان صاحب الموتر يقول ابروح اكشف على الدبل او انه منظم القير... قلت استن اسألك
وفعلا ماطلعت السياره الا يوم سحبناه ....... وكان داخل مانسم ولا نسمناله الا يوم غرز وهذا غلط ... لكن تعيجز راعي الموتر لان مكاننا قريب جدا في الرمل
واخوي مهراس لا انا سقته ومتأكد حاط الدبل
شكرا لكم

[تــــوني]

حياك الله اخونا غالي

بالنسبة لانه يدعس والكفرات ما تدرو (زيت القير احتمى من الجور عليه :no2: وزي ماتفضلت انه مانسم هذي بحد ذاتها مشكله ) يطفي السيارة ويخليها لين تبرد ويحاول يطلع بالدبل الثقيل بس على خفيف ولازم ينسم والا سيارة تساعده يطلع
وعشان اربط لك الحرارة في ضعف العزم تشوف السيارات في الصيف يضعف عزمها نتيجة الحرارة وهذا شي ملاحظ على العكس تماماً في الشتاء .... ولك التحية

[غالي]

والله مشكله يا توني كان كل سيارة بيحتمي زيت قيرها ونستناه علشان يبرد ساعه والا حولها هذي مشكله :(
طيب فيه زيت قير تنصحون فيه يتحمل ولا يحتر مثل الزيوت العاديه؟

لازم ياشباب نحل هالمشكله
صح راعي الموتر استغرب يمكن لاننا في الصيف والا بالشتاء الجو بارد ولاتصير معه هالحركه

[الوشاح]

الموضوع طبيعي .. اخوي غالي





كل الجيوب كذا .. أذا غرزت صعب تطلع بالخفيف إلى إذا كنت منزل الهــوا





والشروكي التماتيك متعب بالدبل الخفيف .. مايمشي على سيره بالطلعات الصبعه





ومن تجربه .. إذا غرز الموتر وبلشت حط بالكفرات 10 وعطه الثقيل و نمره 3





والله لو توجهه لجدار يطلعه :)



زيت القير .. ماعتقد له تأثير واضح



صحيح يحتمي .. إذا غرزت وطولت لاكن ماعليك .. الشروكي السعودي يجي للقير اديتر



والامريكي مايجيله .. لاكن ماشوف فيه مشكله

[anas]

صارت المشكلة معاي في باترول 2006 سفاري قيرين والسبب لأني ما نسمت الكفر وبعد ما نسمته على 15 ايضا لم تطلع السيارة ولكن يوم حطيت الدبل الثقيل طلع ولله الحمد لكن المشكلة بعد ما خرجت من الطعوس سرت اسمع صوت عند تشغيل السيارة يصدر من تحت السيارة صوت دقة لا ادري ما هو ... في احد يفتينا في هذا الصوت؟((سلملي على القير العادي وبس))

[غضنفر]

يا جماعة الخير
بُحَ صوتنا ونحن ننادي في هذا المنتدى وغيره
تنسيم الكفرات ضروري جداً حتى لو انك منتب داخل كثير في الرملة
واذا ما نسمت بترتفع حرارة السيارة وبيحتر القير وتبي تجهد المكينة وبتبدى تسمع اصوات في السيارة
وشوله كل هالحوسة
خذ من وقتك الثمين 5 دقايق للتنسيم و 12 دقيقة للنفخ
وصلى الله و بارك

[alyaaah]

السلام عليكم والرحمه
عندي تعليق بسيط
اذا كانت السياره لاندكروزر او نيسان
دوران الكفرات يعتمد فيهن على القير والمكينه و (الدفريشن) وهو اهم شي عشان الكفرات اتدور كلها بنفس السرعه والقوه
اذا كان الوزن على كفر معين بتلقا الكفرات الثانيه اتدور إلا الكفر اللي عليه الاعتماد عشان تطلع السياره
بعض الموديلات منهن فيه مفتاح على يمين الاستيرنق عشان يقفل الدفريشن
اول ما تغرز خف الهوا من الكفرات واحط الدبل واقفل الدفريشن عشان ادور الكفرات كلها مع بعض وتطلع السياره
واللي ما فيهن قفل للدفريشن ما عندك حل إلا تخف الهوا من الكفرات وتخلي الشباب يهزون السياره
اما اذا كان الغرز اكثر في جهة الكفرات الأماميه .......... لاعب السكان او الاستيرنق لليمين واليسار كامل بدوران بطيء لقدام وورا وحاول انك ما تخلي الكفرات تحفر زياده

والسموحه

[غضنفر]

نسيت حاجة مهمة
معظم سيارات الدفع الخلفي يكون الكفر الذي يدور واحد والاخر يدور معه
يعني بعض السيارات يكون فيها الكفر الايسر هو الذي يدور والايمن يدور اذا دار الايسر
لأجل الفهم اكثر جرب ترفع السيارة عند مغسلة
حط السيارة بــ 1 امسك حدى الكفرات الخلفية وادعس بنزين
بتلاحظ ان واحد فقط من الكفرات ( الايمن او الايسر) هو الي بيدور والاخر لن يلف <<< ملينا من الدوران قلنا نغيرها باللف

[خليف العيد]

اخوي
ابغا اقولك يمكن صاحب السيارة ماله علم في
فلتر القير اويكون زيت القير ناقص شوي
فهذا يأثر كثير على قوة السياره
تأكد من كلامي
اخوك ابوسامي



اللهم انت الشافي المعافي اشفي اخينا (الباهي)

[غالي]

يعطيكم العافيه ياخوان
وشكرا لمروركم
واتوقع ان داخل فيها حراره زيت القير وحساس يفصل
مثل ماقال احد الاخوان
مسكت الخط ومحمل وتخبرون انتم الشيروكي حراره
والخبر بيتأكد انشاء الله لين وداه للورشه يفحص على الدبل
شكرا لكم