تحذير من نوع لكفرات البالون

[عيون الغلا]

السلام عليكم ورحمة الله وبركاته
أعزائي زوار موقع مكشات

لأود الإطاله عليكم
لأهل الكفرات البالون ومفضليها أنا جربت البالون من نوع maxxis وركبت منها الكثير أي مايقارب ثمانية أطقم وعلى سيارات مختلفه ولا كن هذا الكفر لايأتي إلا مقاس 16\900 فقط وهو نوع لايعلى عليه ولا فيه مثله لاصوت ولارجه لاكن فيه نوع منهن 6 غاط هذا لايقربك ولا ببلاش لأنه يظرب مع العلم ان كفر البالون مايظرب بس هذا النوع اللي هو 6 غاط ظرب معي مره وفكن الله منه { بغا يموت } والماريه الواضحه على الكفر اللي 6 غاط تحصل على الكفر كتبه كبيره 115 N هذا اللي لايقربك اما النوع المظبوط والزين تحصل كتبته 119 N هذا هو النوع الزيييييييييين ...

حبيت أنوهكم لأن مثل هذا الشي واجب علي وعلى غيري تنويه الغير للسلامه
والله يفككم من الشر والمصايب


وتقبلوا وافر تحياتي وأصدق أمنياتي وأشكركم على مروركم الكريم

[خالد 3000]

بيض الله وجهك ياعيون الغلا يالسنافي

[الدبل الثقيل]

سبام تاير ماهو أفضل منه ؟

[يوسف نت]

الحمد لله على سلامتك اخوي
وجزاك الله خير على تحذير اخوانك

[أبوزيد]

ماقصرت

عافاك الله

[الاستاد]

بيض الله وجهك ياعيون الغلا يالسنافي :good:

[صقر]

أولا الحمد لله على السلامة اخي عيون الغلا .

ثانيا جزاك الله خير على هذه النصيحة .

انا جربت الــ maxxis وهو من أفضل ما جربت من البالون .. ولكن هذا النوع الـ 6 غاط ماسمعت احد جربه الا أنت .

شكراً على هذه المعلومات القيّمة , وبارك الله فيك.

[anas]

يعجبوني الناس اللي يجيب علم طيب ينفع المكشاتيين ... دمت بود اخي عيون الغلا.

[عيون الغلا]

بسم الله الرحمن الرحيم

أعزائي المشاركين

-خالد 3000
-الدبل الثقيل
-يوسف نت
-أبوزيد
-الاستاد
-صقر
-أنس


أما بالنسبه لك أخوي الدبل الثقيل أنا ماقد جربت النوع هذا ولا سمعت ان أحد يمدحه وإلا أمجربه


أشكركم على مروركم الكريم وأنا ماسويت الا واجب من الواجبات اللي علي تنفع أخواني وأعزائي وتفيدهم

وفقنا الله وأياكم لما يحب ويرضا....

[دله وفنجال]

السلام عليكم...
اخوي الغالي عيون الغلا مشكور على النصيحة وهذا دلليل على حرصك لسلامة اخوانك من الكفرات المغشوشة...
لكن حبيت اضيف بعض النقاط . البالون 6 غاط هذا فاشل بجميع الانواع لانه مايستحمل الكرف ولايدوم كثيراً بس الحسنة الوحيدة انه أخف من ا8 غاط فقط لاغير.
اما من ناحيت الماكسس فهو يجي بمقاس 16 ويجي 17 ونا الي مركبة 17 8 غاط وممتاز جداً جداً لاكن عيبة الثقل وثقلة ملحوض على عزم الموتر (الموتر vx-r ) واذا كان الجنط 16 فأنا انصحك اتركب سيام تير التايلندي تراه بلجودة افضل من الماكسس ولا فرق ويكرف كرف وهذاله عندنا له 3 سنوات ماشفت منه شيء وركب على اربع مواتر ومع ذالك لم يتأثر من كثر الفك والتركيب والمشي لاكن للاسف مايجي 17 ولاكان ركبته وتراه اعرض من الماكسس ...
وأذا كنت تبي نصيحة البالون لاتمشي علية وناقص هواه لان عدو البالون قل الهواء بسرعه يتمسح واذا تمسح توقع اي شيء لانه أدنات الدون يبي يشق الكفر (خبرك نايلون 100%)...
وعلى العموم البالون كفر بكل ماتعنية الكلمة ان بغيتة للنفود ونبغيتة جلد ونيغيته وعر ونبغيته شكل يخلي الشين زين...
هذا والله اعلم...

[ضلع الرقيبه]

بيض الله وجهك

[المخيال]

بيض الله وجهك

ماقصرت يالغالي

الله يعطيك العافية

[هاوي الله]

افضل كفرات وعن تجربه وعن واحد جرب جميع أنواع البالون هي كفرات :

سيام تاير - 900 / 16 - 6 غاط

ضُم فيها ولا تضييع &

[الهـ911ـدد]

ما قصرت يالغالي وشكرا على اهتمامك ...
بـس حبيـت اوضـح شي
انا مجـرب البالون ومركب اكثر من طقـم او بالاصح اكثر من نوع .. بالنسبه للي تكلم عنـه مآكسس .. هذا صيني وتقريبا نوع متوسط من البالون ... ودنلوب افضـل منـه .. لـكن اللي ما فـوقه شي ولا يغطي عليه شي بين كفرات البالون ... هو السيــآم تآيــر .. افضــل نوع بالون جربته بين هالانواع تقريبـآ ... الماكسس اللي تقول على مقناصي وتجربتي لـه 3 شهـور بالكثير يمسـح زرعـه وانا الصراحه جربته مره وما اعجبـن
بـس السيـآم .. انا اضمـن لـك سنـه وهو مثل ما شريته اذا انت محافظ .. ومثل ما يقولون التجربه خير مثال ... .. واتمنى تجرب السيـآم .. وعلى فكره هو مقطوع من السوق هاليومين واذا حصلته بتحصله غالي شوي
بس انا حصلته بالامارات بـ 370 تقريبا ارخص من سعر السوق هنـآ ..
اتمــنــى اني افدتكــم

[عيون الغلا]

عموما جزاكم الله خير وماقصرتوا وأشكركم على مشاركاتكم

وأنا حبيت أبين هذا النوع من هذي الماركه أن راعيه مخطور الله يستر علينا وعليه


والله يكفيكم من الأخطار ويفككم منه
,,,,,,,,

[خيام الندم]

أخـــوي عيووون الغلا أنا شخصيا جربت الكفرات اللي حذرت منها عدة مرات وكلها تجريب أجرام مع الوعر والحصى والسكاكين ومطراد وعاذر نفووود وفك وأفك مع الحصى ... والنوع مكسس أن 115 والحقيقه ماشفت منها شي أبد ...... وصارت كنها صلعة مصري وزي العسل .................. وتقريبا 5 طقووووم

[عاشق الجنوب]

انا مركب سيام بالون على جي ام سي ونيت 6 غاط بس مسويلي رجة بالموتر عنيفة انا توقعت عندي مشكلة بالسيارة ورحت غيرت كل شي مقصات وذراع دركسون وشغلات كثيرة كلفتني 5000 الاف ريال واخر شي طلع كفرات البالون وللحين موقف الموتر ولاغيرت البالون بس وش تنصحوني اخذ بدلهم لاني مليت من رجة الموتر عفت سواقته بسبب رجته .

[تــــوني]

جزاك الله كل خير

ماقصرت وصلت المعلومة وكل الشكر

[الرهدن]

السلام عليكم 00

جزيتم خيرآ جميعآ وخاصة أخينا الغلا00



.

[عيون الغلا]

السلام عليكم ورحمة الله
عزيزي خيام الندم
انا ركبتهن جدد وقنصت للجنوب وجلست عشر ايام وجيت وبعده سافرت للرياض وانا راجع ضرب واحد وحصلت الثاني مكرررش يعني مصعرر ومن عقبه طير لي بالبالون السته غاط لأنه الصراحه بغا ينهين انا والموتر لانه تخبر بالون ومقاس 900 يعني كبير تحسه على الموتر فما بالك يضرب أعدم علي البيبان الاثنين اللي قدام وورا ومزر اسلاك الضفيره وشق الرفرف وعفط الصدام وقطع ليات تانكي البانزين يعني شي والله ماتخيلونه مع العلم انه كفر ورا يمين واعدم الديره بس عسالله يستر عليك ياخيام الندم وانتبه منهن تكفا ...

عزيزي عاشق الجنوب

انا أنصحك بهذا النوع اللي هو 8 غاط الصراحه انه كفر انا والله ركبة امس طقم خمس كفرات بألف وستميه 1600
وانا مقتنع به بس انتبه 8 غاط مهوب 6 غاط

ولكم تحياتي
واشكر الجميع على المرور والمشاركه
,,,

[مايغرز]

يا جماعة بعدوا عن البالون تراه حق النفوذ ماهو مصمم تمشي فيه 160 عل القار بعز شمس الله يااخوان سلامتكم قبل كل شي

[محسن اليامي]

الله لا يهينك على التنبيه

[الخرب - قطر]

السلام عليكم ورحمه الله وبركاته
اشكركم على هالموضوع القيم من وجهه نظري الشخصية احسن ما استخدمت في البالون ( هيرو ) نوعيه ممتازة لارجه ولافيه وعورة وافضل من السيام عيبه الوحيد انه ثقيل

[خيام الندم]

السلام ةعليكم أخي عيون الغلا ... للمعلوميه وأنت أدرى مني ليس من المعقــوول أبدا أن تكوون جميع كفــرات مكسس 115 ,, 6 bLy غاط سيئه أو أن فيها عيب وتنفجر و.... وذم شركــه كبيره مثل مكسس ليس بالهــين !! فالشركه تخاااف على سمعتها !! ولا يمكن أنها تصنع كفــــر بهالردائه !! فمثلا شركة فايرستون فقدت سمعتها منذ عشر سنوات ولم تستطيع أسترداد سمعتها ألى الان بسبب خطأ في كفرات أنتجتها في المكسيك !!
ومكســـس كفرات صممت بجووده قائقــه جدا ومشهوود لها بجميع أحجامها وغاطاتها .. وال 8 غاط خصص للشديد الوعووره وشوك العاذر مثلا وال6 ..115غاط خصص لما دون ذالك و 112 أقل قوه وهكذا .. وال6 غاط يمتاز بخفة وزنه ولا يقارن ب 8 غاط فال 8 غاط ثقيل جدا يخفض عزم السياره جدا وال6 غاط وزنه معقوول جدا .. واللي مهوب رايح لوعووره شديده يأخذ 6 غاط .. ال6 غاط لها زبائنها ولا يتخلوون عنها وال8 غاط لها زبائنها وهكذا ,,,,,,,,,,,,,,,,
الامر الثاني ::: ( كفــــراتك ) ال 6 غاط ربما أنها تعــرضت لتخزين سئ ولو كان تاريخها جديد !! فأنت لم تتطرق لتاريخها !!!
أو أصابتها عين فالعين حـــق !! أو أنـها تعرضت لوعــوره شديده وســــــــرعه زائــــــده !!!
فلا نحكم بأن الســـته 6 غاط فااشل أبدا .. فأنا أمدحه وأمدح وزنه المعقوول وأداءه الممتاز في مجاله المخصص له .... ولو ركبت 8 غاط وهو سيئ التخزين أوتاريخ قديم أو أسرعت به 180 مثلا فأنت في خطر !!
وللمعلوميه :: كفر مكسس اللي يجي ملفووف بشطرطون هذا من الامارات ويكون أخف وزن .. بالغاطات
واللي يجي بدون شطرطون هذا من الوكيل بالمملكه وهو الأفضل .... تحيااتي

[عيون الغلا]

عزيزي خيام الندم
الكفرات تاريخها جديد وبعدين واحد منهن صعرر والثاني ضرب يعني مهوب معقول ان المشكله بالتخزين او الاستخدام مع اني مااخفيك اني قنصت بهن أرض وعره بس ماشفت منهن شي الا بعد ما مشيت عليهن تقريبا الفين كيلو من بعد هذاك المقناص
ولا كن الله اعلم
وتحياتي لك ولجميع المكشاتيين
,,,,

[خوي الريح]

الله يعطيكم العافيعه على المعلومات القيمه

[HISTORIAN]

الله يجزاك خير

[هاوي موتري96]

جزاك الله الف خير والله يعطيك العافيه اخوي عيون الغلا
البالون ممتازه جدآ بس عيبها ماتصلح داخل الديره
والمعروف ان دواها النفووووود

[الدكتور 2007]

الله يجعلك عون للمسلمين وحمد لله علي سلامتك يا الغالي ما قصرت

[بواردي الدلم]

عيون الغلا

تؤبر ألبي

عز الله إنك كفو الله يجعلها في ميزان حسناتك

[مضاد]

يعطيك الف عافيه

[خالد الفالح]

بيض الله وجهك على التنويه للتفرقه بين الاثنين 115 والطيب 119

[هويدي]

الحمدلله على سلامتك ويعطيك العافيه على التنبيه

واحب انبه بدوري عن الشاهين التالي (الطويل) انصلخ علي ثلاث كفرات والحمدلله سلمت بفضله

مامثل السيام تاير 6 غاط حجمه اكبر من الماكسس 8 غاط
ويصبر بس يعيبه الثقل واستغلال الزيود اللي دبلو سعره

[faris2006]

بيض الله وجهكم على النصايحة

[عيون الغلا]

كل الشكر لكم
لكم الإحترام والتقدير
دمتم