بوت للتجديد

[hsish]

ياخوان عندي بوت وحاب اجددة في جدة ابغي يدلني علي ورشة للستيل والفيبر ومكانيكي جيد وسلامتكم

[م/عبدالله]

حياك الله ... تجيك رساله على الخاص ان شاء الله

[shark man]

السلام عليكم

برضوا انا ودي أجدد البوت يعني صيانة المكينه والشراع ونقعه يعني تقريبا كل شئ
وسلامتكم

[عقام الرايس]

انا جربت ورش جده وصراحة تعبت معاهم ...

لكن اقترح ان الواحد يحدد الي يبغاه بالظبط يعني مثلا نقعه وشغل فيبر ... شغل ستانلس ستيل وشراع ... صيانة مكاين

وبعد كده الله يعينك تخلص شغلة ورا شغلة لان صعب تلقى ورشة فيها كل انواع الصيانة الا ويكون لديهم اما سعر غالي او شغل تعبان او لف ودوران في المواعيد

كان فيه فلبيني اسمه عبدالرحمن في ابحر الجنوبية في ورشة مقابل مرسى الاندلس (الي فيه محل وائل رواس) هذا الفلبيني والشهادة لله معلم فيبر درجة اولى وبعده جا واحد ثاني فلبيني ايضا بعد ما استلم الورشة ابو عيد الغامدي وهذا ايضا الفلبيني ممتاز جدا انا اشتغلت عنده شغل فيبر وشغلة عال العال وسويت عنده نقعه وبوية لقارب من سنتين والنقعة حتى الان ماسكة وشادة حيلها تقول مالها ستة شهور

هذي الورشة متخصصه في شغل الفيبر والشراع لكن عيبهم لما كان مالكها ابو عيد الغامدي ان عندهم للاسف لف ودوران تاخذ منهم كلام زي العسل لما تسلم القارب ولما تجي تستلم تلاقي كلام ثاني ومعاملة ثانية وانا ما ودي اشهر في الرجال لكن هذا حق والناس لازم تاخذ حذرها وانا سمعت انه باع الورشة لشخص ثاني

شغل الميكانيكا عند عبدالرزاق في ورشة رسلان وهذا الشخص موسه حاد نسبيا لكن شغلة ممتاز والرجل حسب ما تعاملت معه وتعامل معه كثيرون تجد فيه الامانة وعيب الورشة هذي اسعارهم فلكية ولم اجرب شغل الفيبر عندهم

فيه ورشة في ابحر الشمالية الي هم وكلاء ايفن رود انا رحت لهم وقابلت المسؤل (نسيت اسمه) وصراحة الرجل قمة في الاخلاق والتعامل وشغلهم كما هو واضح احترافي واسعارهم لا باس بها ولكن لم اتعامل معه شخصيا ومدحه لي بعض الشباب

عندك ورشة وائل رواس في مرسى الاندلس ... الرجل محترم ويشتغل في تجهيز القوارب الجديدة غالبا وهو اصلا شغلته في الحرس في صيانة القوارب ( اذا ماكنت مخطيء ) .. يعني تجيب له صيانة قارب مستعمل ما اعتقد يرضى يمسكه الا اذا كان فاضي .. واسعار ادوات القوارب عنده ممتازة جدا اشتريت من عنده عدة مرات وخصوماته ترخي الحواجب بصراحه

نجي عند ورش التشليح بدون ذكر اسماء اصحابها ... وهي ورش قديمة ومعروفة ولكن للاسف لم يتطور اصحابها فالورش كانها حراج الخردة والمكاين مبطحة فوق بعضها وهاتك تشليح من المكينة ذي للمكينة ذي وانا يشهد الله عدة مرات رحت اشتري قطع مستعملة ويفكولي من المكاين الي على الارض وهي واضح انها مفكوكة قريب وحقت زباين

مرة تركت مكينتين عندهم للصيانة وبعد اسبوع اتصلت براعيه الله يصلحه وقلت له هاه المكاين جاهزة ؟ قال اي خلاص تعال استلمها .... وادق سلف من المدينة لجدة واروح الورشة والاقي المكاين زي ماهي وقت ما سلمتها ولا فك منها شي !!!! وصراحه فقدت اعصابي وانا اكلم الرجل وهو يرد ببرود ويقول معليش الان يفكوها ... واخوكم في الله راح البلد واستاجر فندق يومين واداوم في الورشة مع العمال والله افك بنفسي واربط بنفسي واشوف الزباين كلهم نفس معاناتي جايين على الموعد وشغلهم ما خلص ومناحلة وزعيق مع صاحب الورشة !!!

تبغو كمان قصص ولا كافي ؟؟

طيب فيه ورشة في البضيع رحت لها لاني اشتريت مرة قارب من البضيع وتعرفو كم يبعد مرسى البضيع عن وسط جدة خصوصا ايام الزحمة في اخر الاسبوع ... يعني بدون مبالغة ساعة كاملة واكثر

اخونا في الله اعطيته الرموتات الاثنين عشان ينظفها ويشحمها وعلى بالي من ثاني يوم استلمها واركبها لاني مسافر وماني فاضي اشحم وازيت ... المهم اضرب مشوار للبضيع من وسط البلد ثلاث مرات على مدى اسبوعين واتصل على الرجل ما يرد ثم يقفل الجوال ... وما استلمت اغراضي الا بعد تهديد بالشرطة او اللجوء للحلول الغير مرغوب فيها ...

هذا ما رأيته بشكل عام في ورش جدة واكيد التجارب لدى غيري كثيرة وحبيت احطها لكم هنا حتى يتعلم اصحاب الورش احترام اوقات الناس ومواعيدهم ويعلم الله ما كتبت هذا الكلام حقدا على احد او خلافه والله من وراء القصد

[ابوجنبيه]

بالنسبه للاسعار المعروف ان ورشة عم عبده في جده هي الافضل
من ناحية الاسعار وان ناوي اجهز عنده قارب ان شاء الله

[سائح الشرق]

مهندس عبدالله احتاج رقم ورشتك .. راسلني على الخاص ...

[عقام الرايس]

الاخ ابو جنبيه المشكلة ماهي في الاسعار طال عمرك

المشكلة نبغا واحد ( ناصح أمين) يعرف يشخص العطل قبل ما ينفض جيوبك وانت تشتري قطع وتبدل وتجدد الماكينة ويطلع العطل مثلا من الليات او من الطرمبة او شي بسيط

[عقام الرايس]

مهندس عبدالله اذا عندك ورشة او عندك امكانية للكشف واصلاح الاعطال فحبذا لو تفيدنا بالمكان مشكورا ماجورا ...
الناس تشتكي وتبحث والوضع كما تشاهد يؤسف له