الجراند شيروكي 2011 لمتد للبر

[عبدالمجيدالجه]

السلام عليكم ورحمة الله

أخواني أنا راعي تصوير وبر , ناوي أشتري سيارة تخدمني في الخطوط وتخدمني في البر واوصل أماكن صعبة حتى أصورها

قريت وشفت عند القراند شيروكي لمتد وشفت الموديلات حقته من 2011 و2012 و 2013 كلها زي بعض ولا فيه فرق فقلت آخذ 2011 وأحط الباقي في جيبي

وأفضل مكان أسأل فيه عن السيارة كيف في البر هو مكشات

ماأدري كيف السيارة في البر؟ كيف سواقتها وكيفها مع الرمال ؟ ودبلها يجمل ولا خرطي ومن هالكلام, كيف مشاكلها وأعطالها

المشكله بعد لقيت مستعمل كثير ولا هو ماشي وأصحابها بيبيعونها, ماأدري هل فيها مشاكل او لا

... ودي أسوم لكن ماأدري كم سعرها مستعمله, السعر العادل لها

الله يعطيكم العافيه وعذرأ على الإزعاج

[fj43 84]

شف تبي تااصل امااكن وعره ولا قد احد وصلهاا عليك بابو شنب عيبه متتتتتتعب بالخط


http://im11.gulfup.com/2011-10-23/1319385047882.jpg

[fj43 84]

http://up.arab-x.com/Jan12/peq06533.jpg

[fj43 84]

واذا تبي موتر ثاااني عليك بذااااا كد ومد واعتماادي بعد الله

http://im18.gulfup.com/aRD21.jpg

[hightech]

دور غيرة نصيحة

تاهو يوكن باترول لاندكروزر اي سيارة الا القراند شروكي وعلى فكرة أنا من اصحاب القراند

شروكي ومن عشاقة والمشكلة ليس بالسيارة الجبارة ولكن في الوكيل اي قطعة غيار ان

تخليك تطلع صك اعسار :mad:

[عبدالمجيدالجه]

يعطيكم العافيه على ردودكم السريعه

اف جي أنا معي عائله ولا ينفع لي ابو شنب ولا كان مايحتاج

هاي تك, هذا الي أشوفه من أغلب الردود, الذم يجي بالوكيل, لكن السيارة نفسها كيف؟

أمس مريت على حق القطع عندنا ويقول أسعارهم رمزيه !

أقدر أطلب القطع من النت إذا كنت مو مستعجل بس ماادري عن توافرها

معليش وش اللي معك ووش موديله وهل جربته في البر

المشكله بنفس الميزانيه ماتلقى نفس المواصفات الي فيه

[مشلخ الذيب]

نصيحتي خذ السيارة المنتشرة بالوعر والحضر مثل الجمس الشفر التويوتا النيسان .. الخ

انصحك بالباثفندر الجديد مريح وراسي ووسيع وقوي وفالبر مايحتاج

[ملك الفكتوريا]

شف لك الاكسبدشن والتاهو واللاندكروزر

[Jeep 2005]

الجيب ممتاز ويجمل معك فالبر وبقوة .. انا اتكلم عن الهيمي 5.7


لكن الوكيييييييييييييييييل .. حسبي الله عليه .. انا ادبر عمري بالقطع من التشاليح في حال مالقيت عند الوكيل

آخذ من التشاليح خاصه تشاليح الحاير بالرياض وتشاليح الكويت تغص بالجيوب وتلقى الي تبي

والله يسخر لك الي فيه خير

وفقكم ربي

[هواوي الشمال]

السياره ممتازه متماسكه وقويه.. لكن قطع غيارها نار ..قبل اسبوع غيرت الفحمات الاماميه فقط لموديل 2005 سعرها 475 قبل الخصم وبعد الخصم 400 هذي الفحمات فقط فما بالك بالبقيه..بالتوفيق

[حفيد بن صعصعة]

خذ لك اكستيرا ممتاز

[Jeep 2005]

الفحمات الأمامية والخلفية اصلي ((موبار)) ب400 ريال

سير المكينه اصلي من وكالته 200 ريال
البواجي للهيمي يجي لها 16 بوجي على كل بستم اثنين سعرهم جميع بعد الخصم 198 ريال
الأصطب الامامي من وكالته 1250 بعد الخصم يجي مع شمعاته كامله
الصدام الأمامي 1750 ان ماخاب ظني .. شريته من التشليح مع لحيته نظيييييف بالحيل ب800
الصدام الخلفي 1300 ريال


هذا الي واجهني ولله الحمد

طبعاً موجود بمحلات قطع الغيار تلقى البديل تايواني وصيني وبسعر بسيييط

[عبدالمجيدالجه]

الله يعطيكم العافيه على ردودكم , الف شكر لكم

[azera008]

والله هو موتر قوووي وانا جربت اخوه اللي هو دودج نايترو وبصراحه قوووي وممتاز ويجمل بالبر


لكن ماشديت عليه ودخلت نفوود جامده عشان طامن شوي


لكن دودج وشيروكي ماعليها كلام

لو بترفعه بطقم سست ويايات امريكي

انا اقولك توكل على الله

تراه رجال

[Bader-M]

وعليكم السلام

سيارة جبارة و قوية وقطع غيار معقول جدا
ولكن مشكلة غير متوفر وخاصة الموديل الجديد

بنسبة للبر
هذا شوركي
على كثر طلعاتي للبر ما عمي شفت شوركي (مغرز)
على فكرة محرك 6 سلندر الجديد اخذ من افضل عشر محركات بالعالم
يولد قوة 290 حصان رغم ان سعة المحرك 3.6 لتر
اعتبر هذا الرقم خرافي
ولا تنسى القير ذو 8 غيارات طبعا موديل 2013 م اما الذي قبلة اعتقد انه 6 غيارات
مشكلة الشوركي انه سعره يطيح (وهذا ميزة لك اذا كنت تبي مستعمل )
يعني تاخذ باقل من سعره مثلا 15-20 الف هذا تكفيك صيانة لمدة 5 سنوات مع الكفرات

موفق

[أب رحي]

وعليكم السلام ورحمة الله وبركاته


شوف يأاخي العزيز الشروكي مايمدحونه كثير...
عندك الربع التيوتا او الشاص التيوتا بيوصلك للـ المكان اللي تبيه...
نصيحتي لك ابعد عن الشروكي...

تقبل مروري.

[ابتكار]

ماخاب من استشار ولاندم من استخار

[عبدالمجيدالجه]

عز الله ماقصرتوا وبيض الله وجيههكم

يعني الجيب كجيب مافيه أي مشكله وعلى العكس ممتاز للبر

لكن زي مافهمت منكم مشكلة قطعه نار والوكيل سئ والقطع توفرها نادر

المشكله إن الواحد بيدفع أكثر من 100 ألف وبعدها لو خربت سيارته بتوقف على الوكيل متى يجيب القطعه !

المشكله الثانيه السعر بعد الإستعمال, سعره يطيح بسرعه

هذي المشاكل خلتني أعيد النظر فيه...

والتويتا مشكلته أسعاره مبالغ فيها بزياده, برادو 2007 مكروف ست سنين وينباع ب 90 ألف,

أحاول أحسبها براسي عجزت أجيبها

الشيروكي يغريك بالرفاهيه ويخوفك من أعطاله لو خرب

والتويتا مافيه ذيك مميزات لكن سوقه ماشي لو انحشرت وفكرت تبيع

ولو فكرت تشتري أسعاره نار

بس مدري احترت والله