استفسار عن الـ جمس 8100 هل يصلح للبر ؟

[Abdullatif]

لإخوة المكشاتيين الكرام السلام عليكم
ناوي آخذ سيارة تكون كبيرة, و استعمالها بيكون فقط خميس و جمعة, للبر (في سيارة صغيرة أستعملها خلال أيام الاسبوع)
طبعا معروف الجيب أو السفاري ما يحتاج مدح, بس أنا لي رغبة بالجمس, و تحديدا جمس 8100 الي تجي مكينته 8.1 (موديل 2002-2006), اللي يجي صالون و ليس الحوض, و أحتاج مشورتكم
كثيرين قالوا لي ما ينفع, لأنه ثقيل مرة و خصوصا من الأمام (لأن المكينة ضخمة)
و ما ينفع لأنه طويل و بيعلق في الطعوس
و أنا أدري ان هذا الكلام منطقي, لكن كل أخوياني اللي يقولون كذا ما عندهم جموس, يعني كلام ليس عن خبرة, و أنا لي رغبة أسمع من شخص يملك الجمس و يطلع به البر
السؤال هو:
- هل فعلا هذا الموتر ما ينفع تطلع في البر؟ و فعلا بيغرز و يغثني؟
علما أنه ما لي نيه أني أطعس فيه و تحدي و خرابيط, بس في نفس الوقت ما أبي أطلع البر مع جيوب و ما أقدر أوصل للمكان اللي يروحونه

-هل كبر حجم المكينة يعوض عن ثقل الوزن؟
-هل تركيب كفرات بالون أو كفرات 33 انش يفرق؟ و هل يحتاج الموتر ترفيع حتى تركب هذه الكفرات؟

و أخيرا, اذا أحد عنه جمس 8100 و يطلع بيه البر, هل من الممكن اشوفه كيف يمشي معك في البر؟
و شاكر لكم سعة صدركم

[طواش]

الموتر كثير اشوفه يستخدم في الطرقات الخارجيه والموتر جبار وخاصة في السحب والحموله الموتر ذو محرك كبير وقوي 8100 لكن البر ماعرف حد استخدمه

[مخ سعودي]

يالغالي هو نفس الحجم الصغير لكن يوجد به اختلافات مثل الدفرنس والقير وكذلك المكينة وهي ٦ لتر يالغالي مو ٨,١ وهو مخصص للسحب

[Abdullatif]

يالغالي هو نفس الحجم الصغير لكن يوجد به اختلافات مثل الدفرنس والقير وكذلك المكينة وهي 6 لتر يالغالي مو 8,1 وهو مخصص للسحب

عزيزي بالنسبة لمعلومة حجم المكينة فهي أكيدة 100% هي 8.1 لتر
شوف الرابط: http://en.wikipedia.org/wiki/GM_Vortec_engine#8100

و هذه المكينة نزلت على الجمس من 2001 حتى عام 2006 و يجي مكتوب على الجمس من الخلف 8100
و أشكر لك تفاعلك :)

[Abdullatif]

الموتر كثير اشوفه يستخدم في الطرقات الخارجيه والموتر جبار وخاصة في السحب والحموله الموتر ذو محرك كبير وقوي 8100 لكن البر ماعرف حد استخدمه

أخوي فعلا الموتر جبار و شيخ, الي بيمسك خط و سفر ولا بيسحب شيئ, ما في شي بيوقف بطريقك
بس السؤال هو البر ! فينكم يا راعيين الجموس؟

[الحبييب]

السلام عليكم
مهب معقوله المكينه 8.1
الدينالي هي اكبر مكينه في الجموس 6.2
تاكد ونا اخوك

[PATHFINDER 4]

المكينة 8.1 صحيح ونزلت الى موديل 2006 فيها توووورك مهبوووول تسحب لك جدار
بالنسبة للبر والنفود الموتر ثقيل بمعنى الكلمة واذا تعلقت من بيسحبك

ونزل مكينة 5.3 و6.0 و 6.2 خاص بالدينالي
جمس السوبر بان القديم كانت سعته 7.4

[1231]

8100 معروف بقوتة اقوى مكينة للجموس

ومكينته تشيله وبتشوف عزم يعجبك,

بخصوص البر ,,,

اتوقع لآزم تنسم, ولآ ريح نفسك وخذ جمس فيه دبل ,

وبيعجبك لآن مكينته اقوى من الجيوب,

وشكرا,

[رحّال 9]

وعليكم السلام اهلا بك

الجمس مكينه 8100 معروف ومكينه جيده ولا عليه اي ملاحظات من هذه الناحيه .

لكن كاستخدام داخل الصحراء في نظري انه لا يصلح الا كان شي خفيف وليس عن تجربه حقيقه لكن كمطالعه للصوالين الامريكيه اكثر عطال وسحب هي السيارات الامريكيه .

ولذلك يجب ان تحدد ماهيه استخدامك له ؟

وبالنسبه للنفود ماعليه يخارج عمره بعض المرات وحسب السواق طبعا .
ونصيحتي التريث قبل الشراء .

بالتوفيق .

[Abdullatif]

8100 معروف بقوتة اقوى مكينة للجموس

ومكينته تشيله وبتشوف عزم يعجبك,

بخصوص البر ,,,

اتوقع لآزم تنسم, ولآ ريح نفسك وخذ جمس فيه دبل ,

وبيعجبك لآن مكينته اقوى من الجيوب,

وشكرا,

مشكور تفاعلك, نسيت أقول انه لو أخذت الجمس بيكون أكيد دبل
بس كثيرين يقولون الجمس بدبل أو بدون دبل ما ينفع , و للذك قلت أستفسر من أهل الخبرة

[كاسر الميل]

شيخي معاك اخوك بوغانم من قطر والجمس اللي تكلم عنه 8100 من اقوى وافضل المحركات ..اذا ودك تحمل فيه اغراض حمل فيه كثر ماودك ولا ياثر في عزمه شي وكل ماحملته غدى الموتر عندك ريف بزياده والموتر في الطريق ريف لكن في البر فيه وعوره بحكم ثقل مكينته لكن بالامكان تحل هالمشكله انك تدبل له جانبيل في الامام عشان يخف عليك مناقز خشمه وموتر رهيب في اسخدامه والله يوفقك

[Abdullatif]

وعليكم السلام اهلا بك
...
ولذلك يجب ان تحدد ماهيه استخدامك له ؟

وبالنسبه للنفود ماعليه يخارج عمره بعض المرات وحسب السواق طبعا .
نصيحتي التريث قبل الشراء .


مشكور أخوي رحال
بالنسبة للإستخدام بيكون في نهايات الأسبوع, تحميل العزبة و الأهل و نطلع النفود من الأخوان
ما لي في التطعيس و المطامرة, بس في نفس الوقت ما أبي أتعلق في طعس صغير و يجون يسحبوني
و مثل ما ذكرت بيكون الموتر دبل
اللي يخوفوني يقولون انه الموتر طويل و ثقيل و انه بيعلق ما في مجال و لا يمكن يلحق الجيب

[محرين باالخير]

حياك الله اخوي :
باالنسبه لاختيارك سيارة الجمس لصالون فااتوقع انك احسنت الاختيار فهي افضل من سيارات الونيت اذاكت منت راعي تحميل وعفش واجد فهو بحق سياره مريحه وواسعه وانا معي واحد مجهزه للبر شايل المرتبه الثالثه وصاير اكبر من صندوق الونيت حط العفش الي تبي .
بعطيك نصايحي من واقع تجربه ...........
كثير الناس تشتكي من اعطال السيارات الامريكيه وغالبا ماتكون محصوره في اما طرمبة البنزين او الدبل وكلها وجدت لهاالحل السليم بتوفيق من الله .
اولا : لا تحرص علي المكينه 8100 لان فيها تورك عالي انت منت في حاجته ولا كن خذ مكينه 6 لتر اعلي منها احصنه واقل تورك واخف وزن وتجي علي السوبر 2007 وطالع .
لحل مشكلة عطل طرمبة البنزين لا تدخل نفسك بمتاهات وترهيم وخربطه فما اجدت معي نفع مثل طرمبة VXR او مرسدس !!!! ولاكن الافضل اطلب لك طرمبة هفي دوتي معدله من شركة سومت وريح راسك شفها معي كملت اكثر من سنتين والحمدلله .
مشكلة الدبل كذلك اطلب من نفس الشركه المغناطيس الي يجي في الدفرنس الامامي وهو كثير الاعطال . من نوع ميكانيكي موكهربائي وركبه وانسا الموضوع .
نصائح :
احرص علي وضع مبرد لزيت القير خارجي نوع رياضي للمحافضه علي برودة زيت القير وتخفيف الحراره علي الرديتر الاصلي .
اطلب مساعدات طقم من شركه امريكيه مناسبه لسيارتك وتتحمل الطرق الوعره وخل عنك التد بيل وعوار الراس .لا تحرص علي اضافة زوائد كهربائيه اضافيه الابطرق توصيل امنه ومدروسه .
انا لا افضل البطاريه الاضافيه الا اذا كانت مع السياره من الاصل . ولا كن ركب بطاريه انبير عالي افضل بشكل متوافق مع قدرت الدينمو كما هو مبين عليه .
اخيرا اتمني لك التوفيق ومبروك مقدما .

[التعـ King ـديل]

انت زي اللي يسال اذا عطشت اشرب مويه ولا لا

انت تسأل عن شيخ الجموس افضل محركات نزلت على الجمس قوه ورساوه بالخط ياشيخ قوته لو تبي تحرك بيتكم يمين ولا يسار يحركه الجمس

اذكر كان مع واحد من العيال 8100 دفرنس واحد وكنا نطلع على جيوب والرجل يتمشى على موتره وحنا دبل ويالله شايلين مواترنا

[يزيد 999]

والله عن تجربه ابعد عنه الموتر مكينه وعزم مايحتاج بس مشكلته الثقل وان غرز غرز ماينفع لاحفر ولاتنسيم لازم احد يسحبك وكان عائلتك مهب واجد عليك باليوكن 2006 وتحت ميزته خفيف وبالبر خذ مراقى وتطعيس وانس انك تغرز وايضا وجهه ارفع من الموديلات الجديده واحرص على السعودي النظيف وانصحك ابعد عن 2007 مشاكل والبدي مهب هالك الزود

على فكرة كان عندنا يوكن 2005 مطلعينه وكاله ويشهد الله 5سنين استخدام سفر وبر والموتر ماغير نجلده ولاصارت فيه ولا مشكله ولادخل ورش وقبل 3 سنين صار عليه حادث وراح تشليح والحين معنا تاهو 2005 وكل واحد احسن من الثاني بس انصحك باليوكن

[al faris]

وليش معزم ع 8100 لاتنسى انه سسته بالخلف يعني شوي قاسي وزود بالبنزين
خلك على 1500 ومنتشر مع غالب الشعب وفي البر ولا اروع ومطبه لين وحق سفر وعائلي
معي واحد 2001 ومركب عليه شغلات كثيره منها ونش سحب وبطاريه اضافيه ومحولات كهرب وصندوق عزبه وعده وخلافه
تحياتي