خبراء نظام التبريد في السيارات .. الرجاء الدخول للأهمية .. مشكلة غريبة من نوعها

[ابن صقيه]

السلام عليكم ورحمة الله وبركاته

مساكم الله بكل خير أعزائي أعضاء منتدانا الغالي مكشات

أنا امتلك باثفندر 2008 ( الجيل الجديد ) 6 سلندر 4.0 L

مشكلتي باختصار غريبة من نوعها وعرضتها على أكثر من مهندس سعودي ولم أجد التشخيص والحل والمناسب

حرارة الموتر عندي سابقا في الأحوال العادية وبشكل دائم فوق الربع بشيء قليل جدا مثل ما هو موضح بالصورة التالية

http://www.m5zn.com/newuploads/2013/01/11/jpg//m5zn_84dee3d06d0bb88.jpg (http://www.m5zn.com/out.php?code=14347591)


غيرت ماء الرديتر قبل 3 أشهر وسافرت بعدها وما شغلت الموتر لمدة شهر

بعد ما جيت من السفر شيكت على ماء الرديتر ولقيته ناقص زودته وشغلت الموتر

وبعدها طلعت للبر بالموتر ومع التطعيس ارتفعت الحرارة مباشرة ووجدت أن الماء زايد ويطيش من القربة وليات وخراطيش الرديتر محجرة

شخصنا المشكلة بشكل بسيط بأن الرديتر معبي هواء وفرغته من الهواء من بكرة وعبيت ماء جديد ولكن ما زال الموتر حرارته مع الاستخدام المستمر والتطعيس المعتدل ترتفع حرارته

غيرت توماتيك المروحة وبلف الحرارة وصيخت الرديتر وغيرت غطيان الرديتر والقربة وفحصت طرمبة الموية ووجدتها سليمة ونظيفة ما بها صداء

بعد ما عملت ما ذكرته أعلاه الحرارة أصبحت أقل من الربع وما ترتفع لمعدلها الطبيعي مثل ما هو موضح بالصورة التالية

http://www.m5zn.com/newuploads/2013/01/11/jpg//m5zn_4b07251440e7207.jpg (http://www.m5zn.com/out.php?code=14349047)

استغربت أن الموتر بعد كل هالإصلاحات ما رجعت حراراته للوضع الطبيعي فوق الربع بقليل بل مازال أبرد من المفترض

ومع أي جهد على المحرك ترتفع الحراراة إلى النص وتحجر الليات والخراطيش ويزيد الماء بالقربة مع أن الماء فل وموزون

( يعني باختصار الحرارة أقل من الوضع الطبيعي ومع الجهد الزايد للمحرك ترتفع الحرارة فجأة )

المفترض دام ان دورة التبريد فيها خلل تكون الحرارة مرتفعة على طول ولكن حاليا هي أبرد من المفترض وعند استخدام المحرك بجهد أكبر ترتفع الحرارة وهذا ما أثار استغرابي والكثير من المهندسين

أتمنى أن تفيدونا بخبرتكم لحل هذه المشكلة الغريبة

وشكرا لكم مقدما

[وااضح]

المشكلة من ماء الرديتر غيره
حط ما تايوتا

[ذيب زلفاوي]

يفيدونك الاعضاء بس الي اعرفه ان موية الاديتر لازم ماتكون مليانه بالقربة يعني تخلي القربة على النص او اقل

[ملك الفكتوريا]

الضغط يكون بسبب خلل بالخراطيش او البلف


يمكن البلف ينسفط وما تدخل المويه او البلف يبيله تغيير



على العموم دامك غيرت توماتيك المروحة فيه ثلاث اشياء لازم تشيك عليها

1- طرمبة الماء

2- بلف الحرارة

3- الخرطوش



وبالنسبة لنفقص المويه شيك على الطبات


واذا كل شئ سليم فيمكن من القير الحرارة وخاصه بالتطعيس


واذا تأكدت ان القير له دور حله مبرد قير اضافي

[ابن صقيه]

المشكلة من ماء الرديتر غيره
حط ما تايوتا

شكرا على ردك

ما أعتقد أن الماء هو سبب المشكلة

علما بأني جربت أكثر من 3 أنواع ماء رديتر وما فيه فرق



يفيدونك الاعضاء بس الي اعرفه ان موية الاديتر لازم ماتكون مليانه بالقربة يعني تخلي القربة على النص او اقل

صحيح

وأنا وازن الماء بالقربة والرديتر ومفرغ منها الهواء








الضغط يكون بسبب خلل بالخراطيش او البلف


يمكن البلف ينسفط وما تدخل المويه او البلف يبيله تغيير



على العموم دامك غيرت توماتيك المروحة فيه ثلاث اشياء لازم تشيك عليها

1- طرمبة الماء

2- بلف الحرارة

3- الخرطوش



وبالنسبة لنفقص المويه شيك على الطبات


واذا كل شئ سليم فيمكن من القير الحرارة وخاصه بالتطعيس


واذا تأكدت ان القير له دور حله مبرد قير اضافي

تسلم أخوي

الماء عندي ما ينقص بالعكس يزيد مع الضغط على المحرك

والخراطيش والطبات والرديتر وطرمبة الماء فحصتها سليمة وما بها شي وبلف الحرارة مغيره بجديد

والقير سليم وله مبرده الخاص

[ابن صقيه]

أرجوا من بقية إخواني الأعزاء قراءة الموضوع بتمعن والمشاركة بالحل

لاهنتم

[1من نجد]

معروف راديتر النيسان عمره قصير 100000وغير عموما اديترك فيه تمدد

وكان سبق وسويت له لحام المشكلة 100 % من الراديتر

[ابن صقيه]

^^^

الله يعطيك العافية

بس الرديتر مصيخ وأخو الجديد من داخل ولا قد جاه تلحيم أو ضربات

واعرف كثير معهم باثفندر 2006 و 2007 ماشية أكثر من 250.000 ولا عندهم مشاكل

واللي أفهمه لو به مشكلة بالرديتر كان ترتفع الحرارة دائما والحرارة ما تكون دون الربع مثل موتري

المشكلة عندي أن الموتر بالاستخدام اليومي الطبيعي أبرد من اللازم ومع التطعيس أو الضغط على المكينة ترتفع الحرارة مع أن البلف راكب وكلش جديد

[ملك الفكتوريا]

^^^

الله يعطيك العافية

بس الرديتر مصيخ وأخو الجديد من داخل ولا قد جاه تلحيم أو ضربات

واعرف كثير معهم باثفندر 2006 و 2007 ماشية أكثر من 250.000 ولا عندهم مشاكل

واللي أفهمه لو به مشكلة بالرديتر كان ترتفع الحرارة دائما والحرارة ما تكون دون الربع مثل موتري

المشكلة عندي أن الموتر بالاستخدام اليومي الطبيعي أبرد من اللازم ومع التطعيس أو الضغط على المكينة ترتفع الحرارة مع أن البلف راكب وكلش جديد



بالتطعيس والجزر على السيارة ترتفع حرارة القير ويرفع الحرارة معه وأكيد الباثفندر مثل هذي السيارات اذا مو كل السيارات


شيك على حراراته كبداية وشوف

[صمتي مهابه]

الرديتر يكسب هوا عن طريق تنسيم في راس المكينه ولا يبين هاذا التنسيم وارتفاع درجت الحراره الا عند زيادة الضغط علا المحرك وهاذا يمكن من الوجه او شعر في راس المحرك

[N أبورغد N]

الموتر 90% مكتوم غالبا شيك على دبات البيئه والله العالم تحتاج تغيير او تركب مواصير
انا كان موتري يرتفع حرارته في الدهنا اذا تجاوزت نص ساعه تطعيس حتى ولو بدون شد زايد
الى ان فكيت دبات البيئه وهذا الكلام ينطبق على كل سياره تحمل نفس هالمكينه
والله اعلم

[K.S.A.A]

أنا مؤيد لكلام أخونا صمتي مهابه
من غير قصور في كلام باقي الأخوان .

دامك سويت هالفحوصات كلها وطلع كلي شيء سليم فأعتقد أن المشكلة في راس المكينة والله يكون بعونك
لكن فيه محلول يضاف مع ماء الراديتر ويسكر جميع التنسيم اللي بالراديتر وبالراس إذا كان التنسيم بسيط
وسبق وأن تم عرضه في هذا المنتدى أبحث عنه وجربه لعل وعسى ينفع معك ..

وأنصحك بعدم الأستعجال وفك المكينة .

[عشق البر]

أخوي ابن صقيه بالنسبة لمشكلة ان الحرارة اقل من الطبيعي ممكن انك مركب بلف ابرد من حق الوكالة
عندي سؤال كم مقدار الماء اللي ينقص وكل كم تعبيه
للمعلومية واتوقع انك عارف هالشي بعض انواع موية الرديتر تكون مخلوطة مع موية فتعبيها على طول بالرديتر بدون اضافة ماء وبعضها لازم تحط نص ماء عادي ونص ماء رديتر وبعضهم بالخطأ يحط النوع الثاني ويعبي الرديتر بدون وهذا يسبب مشاكل

تحياتي

[كبسولة2]

أخي الكريم أعتقد والله العالم أنك عندما غيرت الماء

وضعت الماء بارد والمحرك حار وصار عندك تقوس بسيط في الرأس

ومع الضغط والحرارة ينسم بسيط ويرفع لك حرارة المكينة

الآن المطلوب منك كالتالي :

تشتري مادة سد الثقوب والتنسيم في المحرك من اي بنشري بـ 5 ريال

وتضعها في الرديتر وتجرب السيارة لمدة يومين

اليك هذا الرابط لتعرف اكثر

http://mekshat.com/vb/showthread.php?t=317517

[ماء نوفا]

المشكله عندك من البلف والدليل الانبير والماء الي يطلع من القربه لانه يكون قافل معك فيخرج الماء من القربه غيره وشوف حتى لو انك مغيره قبل

[الظافر]

غير الخراطيش وان شاء الله موترك يزين

[ابن صقيه]

جزاكم الله خير أخواني على تفاعلكم

بالنسبة لبلف الحراراة فهو أصلي من الوكالة بقياس 85c

بالنسبة لماء الرديتر فأنا استخدم الماء المخلوط الجاهز وله شركات كثيرة منها فوكس

يبدوا لي والله أعلم من تأكيداتكم وكلام بعض الورش أن المشكلة هي عبارة عن تنسيم من راس المكينة يضغط الهواء في الخراطيش والرديتر ويرفع حرارة المحرك

بالنسبة لمنتج ABRO سأجربه وإن شاء الله يعطينا نتيجة مرضية ويفكنا من فك المكينة

أنا فقط مستغرب من كون الحرارة حاليا أبرد من اللازم وراس المكينة فيه مشكلة ؟؟



الله يعطيكم العافية جميعا بلا إستثناء

[راديكالي]

شيك على الثلاجة

[بدوي جنوبي]

أشوف ما عندك اى مشكله
لان اى محرك طبيعي ترتفع حرارته عند الجهد الزائد مثل التطعيس
بالنسبه لنزول درجة الحرارة عن وضعها الطبيعي اتوقع السبب من بلف الحراره
أما يكون مختلف عن السابق او نفس البلف فيه مشكله بالرغم انه جديد

عموما أشوف ان وضع المحرك طبيعي ،،، بسبب عدم وجود اى مشاكل اخرى

[just 4 u]

أخي الكريم
كم مقدار ارتفاع الحرارة عندك ؟
هل غطاء الرديتر بسسته ام لا ؟
هل عطاء القربة بسسته ام لا ؟
هل في الطلعات الشاقة (مثل الهدا ) ترتفع الحرارة ؟
هل مع ارتفاع الحرارة في اي وضع يحصل تفوير ؟
هل مع ارتفاع الحرارة تشتغل مروحة التبريد الكهربائية على السرعة العالية ؟

أنا كنت املك واحد وكانت عندي مشكلة في الحرارة اختلفت الاراء حتى ممن يملكون الخبرة في نوعية السيارة وذلك افدني في ما سالت عنه لعل تجد مبتغاك عندي او ادلك على شي يقربك الى الحل
وبالتوفيق

[السليطين]

يابن صقية ..

لاتقرب المكينة ولاتجيها الان ...


الموتر عندك مضغوط ... شيك على دبات التلوث وفكها .. وشف فلتر الهواء لايكون مكتوم .

واذا مانفع .
افتح الاديتر الصبح قبل تشغل السيارة .. وامله ماء . وشغل الموتر وغطاء الاديتر الاماميي مفتوح .. وخل واحد من الاي عندك يدعس بنزين الضغط عند 3 او اعلى شوي .. اذا كان الاديتر يفور الماء او يطلع فقاقيع هواء والموتر بارد فالمشكلة تنسيم بالراس او وجه الراس .. وهذا الاحتمال بعيد ...

بخصوص الدبع وفلتر الهواء سبق وحصلت معي في كراون تويوتا .. سويت فيها كل شي ولا زانت الحرارة الا بعد تفريغ الدبه ويوم غير الفلتر نزلت زياده ...

[ابن صقيه]

الله يعطيكم العافية إخواني

نصايحكم سيتم العمل بها وساوافيكم بالمستجدات

اخوي just 4 u لك رسالة على الخاص

اتمنى التكرم بالرد

[ابن صقيه]

بعد مشورتكم ومشورة أخوي العزيز just 4 u

أبشركم غيرت الرديتر وانحلت المشكلة ورجعت حرارة الموتر طبيعية

طلع البلاء في الرديتر القديم كان يكسب ويعبي هواء

جزاكم الله ألف خير أخواني الغالين

[km0311]

تصدق نفس المشكلة عندي

لما اوقف السيارة اشم ريحة رديتر

وكل صبح اعبي موية تقريبا ربع علبة مويه ولما اوقف والسيارة وهي شغالة تكون شابكة المروحة الكهرباء على اعلاء سرعة

ولم امسك خط مثل امشي 160 الحرارة طبيعية جدا بس لما اقف ينط الحرارة ارتفاع شعرة بس ولا يتعدا كثير بس

الرديتر والخراطيش تشوفها معبية هوا منضغط مرة

حتى الصباح لما افك الرديتر والسيارة باردة مره كني فاتح علبة ببسي مرجوجة فية هواء يطلع صوت ويرشق موية

علما اني فاك لي الثلاجة حق المكيف الحار وفاصل مبرد القير عن الاديتر

بس المشكلة في تحجير الردينر وواكتسابة هواء ونقص الماء يومين

ارجو من لدية حل يخبرني

ويالية تخبرني يبن اصقية كم اشترية الرديتر وش نوعة


وهل انحل مشكلتك تماما