أريد تركيب تانكي بنزين إضافي على الهايلوكس الدبل

[شبح الصحراء]

السلام عليكم ورحمة الله وبركاته


كيف الحال يا اخواني الأعزاء في منتدانا الغالي مكشات


طبعاً الشتاء جاي ان شاء الله والطلعات الحلوة جاية وما ودي اتعرض لنفس المشكلة اللي اتعرضلها في كل طلعة في الشتاء الماضي ، تانكي بنزين الهايلوكس الدبل اللي معاي 60 لتر وما يكفي للطلعات الطويلة وكل مرة اطلع تلقاني شايل جركل البنزين معاي في الحوض وبصراحة مليت ، ابي تانكي بنزين احتياطي يركب تحت السيارة ويكون مخفي ومن حديد قوي مرة ويكون مشبوك بماصورة بتانكي البنزين الأساسي وبينهن حباس اتحكم فيه يعني لا قرب يخلص البنزين فكيت الحباس وعبيت التانكي الأصلي من التانكي الإحتياط .


على فكرة تحت الموتر فيه مكان يكفي احط فيه تانكي مثل حجم التانكي الأصلي .


وبنفس الوقت ودي اركب تانكي ماء صغير 50 لتر تحت الموتر .


يا ليت من يعرف افكار حلوة للطريقة هذي ومن يعرف ورشات بالرياض تسوي شغل إحترافي بس ما تكون غالية بالحيل .

[ابوطاقية]

وعليكم السلام

اقترح عليك تفصل المنيوم والا تروح للتشليح وتاخذ مقاسات التانكي الاضافي الي بالاندكروز وتقيسه اذا يركب والا مالك الا التفصيل
بالنسبه لتانكي الاندكروز الاضافي يجي معه تحويله يعني ماتحتاج تخريم فتحه للغطاء
وهذي صوره لتانكي بنزين

http://www.arbusa.com/Graphics/Long%20Ranger/long_ranger_tank.jpg

http://www.arbusa.com/Graphics/Long%20Ranger/Longranger_smallpic1.jpg

[شبح الصحراء]

أشكرك يا بو طاقية وجعل الله يرزقك شماغ وعقال :p ، كلامك صحيح بالنسبة للتشليح طيب وش رايك اشتري تانكي هايلوكس ثاني واركبه تحت الموتر؟ بس المشكلة ما هي التانكي المشكلة وين الورشات اللي تسوي شغل مضبوط؟ :confused: .

[برق تميم]

اخوي شبح الصحراء

فيه ورشة اسمها الدفع الرباعي في الرياض في ام الحمام هم غالين صح لكن والله ان شغلهم شغل وكاااااله شي خيااال

ان شاء الله اشوف لك رقمهم

[شبح الصحراء]

يا ليت والله رقمهم يا برق تميم .

[ابوطاقية]

الله يجزاك خير ياشبح الصحراء
مثل ماقلتلك انصحك بتانكي مصمم وجاهز مثل اللاندكروز ولاتنسي اهم شي الفاصل
بالنسبه لفاصل اللاندكروزر يجي يدوي وبالنسبه للامريكي يجي كهرب
والسلام ختام

[شبح الصحراء]

أشكرك مرة ثانية يا ابو طاقية ، بس وين راعين الهايلوكسات؟ اظن فيه واحد عضو هنا معاه مثل موتري ومرهم تانكي سبير ، بس وينه؟ .

[ابوطاقية]

يجيبه الله

[شبح الصحراء]

للرفع لا زال الموضوع يحتاج مساعدة من اصحاب الخبرة .

[قرقاص]

للرفع

وترى ربعك واجد :D

[خيام الندم]

أنتظر ردك يا شبح الصحراء أنا رعي الفرارات

[ابو ناصر2020]

السلام عليكم ورحمة الله
قايلك ياشبح قبل الني مركب تانكي احتياطي سعته 110 لتر يعني اعبي فل التانكيين واطلع من الرياض
مرورن بتنهات ومرورن بدهناء والصمان حتاوصلت قبل محطة ام رقيب ورجعت ثانيه الى الدهنا ثمن
شعبان الحفيره ومرورن بطوقي وبعده الى الرياض بتانكين فقط وباقي ربع تانكي الوكاله .
بس التفصيل مركبوه بصندوق ومادلوه خرطوش بجوار فتحة البنزين يعني اعبي بطرمبتين
ومددلوه الى تانكي الوكاله بمفتاح وقالي راعي الورشه اذاتبي نخليه لك تماتيك فقط بزرار
وينزل البنزين الى التانكي الرئيسي بس انا مانصح بهاذ الشي يمدحون اليدوي وبس
اي خدمه ثانيه امر بس .

[شبح الصحراء]

جابك الله يا ابو ناصر انا فكرت اركب تانكي بالصندوق بس خفت لا يتعبثون فيه عيال الحارة وتصير حريقة لا قدر الله ، فيه مكان تحت الصندوق بين الكفر الستبنه والجير يكون مخفي ويكفي اركب فيه تانكي بنفس حجم تانكيه الأول ومرتفع عن التانكي الأول يعني ما يحتاج طرنبة ترفع البنزين فوق بس راح يكون التانكي قريب من ماصورة الشكمان .

هل فيه ضرر لو اركب التانكي قريب من الشكمان (تحسباً لتأثير حرارة الشكمان) ؟
في اي ورشة فصلت تانكي البنزين اللي معاك؟ وكم كلفك؟
اي نوع من الحديد استخدمت حديد عادي او الامينيوم؟

[تــــوني]

ريح نفسك واشتر لك هايولكس 2006 التاكني اكثر من سبعين لتر

والله المستعان والا خلك على 2005 ورح فصل توانك عند محمد المصري بصناعية الدائري هو يدبر لك مكان له وشغلة نظيف وعندي لك تانكي يركب على 2005 يركب خلف الاستبنه كنت استخدمه للما ايام 2005 ماكان معي ستيل 1.5 ملي ومحلة مخفي وبعيد عن المطبات بس لو احد صدمك من ورا بيكب بنزينك ويشب بهايلوكسك :) هذا عيبه وتانكي البنزين لازم يصير متوسط السيارة عشان الصدمات لا قدر الله لا جاز لك رسالة خاصة

[ابو ناصر2020]

حسب خبرتي المتواضعه هو ان البزين سريع الأشتعال وخطر تحوه حول الشكمان
في ورشة المواهب الي بصناعيه والتكاليف حوالي 650ريال وهو 110لتر
والحديد هو حديد عادي انا كنة بحط ستيل وراعي الورشه بصراحه نصوح
قالي وشوله تحط ستيل الحديد مع البنزين مايصدي وقال الحديد ارخص من الستيل
واوفر .
ملاحظه : اذا تبي تجي تشوف التانكي على الطيبعه حاضرين انا بغرب الرياض.

[شبح الصحراء]

توني أشكرك على المساعدة وأشكرك على عرضك الطيب للتانكي اللي معاك ولكن مافيه مكان خلف الكفر السبير يكفي للتانكي وبعدين خطير المكان اللي تقول عنه وعلى العموم أشكرك على عرضك .

ابو ناصر أشكرك على إهتمامك ومساعدتك ويا ليت توصف لي ورشة المواهب علشان اطلع لها او رقم تليفونها .
ابو ناصر انت كيف تعبي التانكي اللي معاك؟ يعني الفتحة من فوق أو مخفية من تحت؟ انت ليش مركب طرمبتين للتانكي؟ مع ان التانكي اللي مركبه بالصنودوق المفروض البنزين ينزل تحت بدون الحاجة لطرمبة .

[تــــوني]

اخوي شبح الصحراء

وتراك ابخص بها الامور بس ترى كان عندي 2005 وكنت مركب التانكي ومكانه مضبوط بشكل قوس بين الاستبنه ونهاية البدي

والله يوفقك لكل خير

[شبح الصحراء]

هلا توني انا عارف المكان بس بصراحة موقعه خطير عند الحوادث لا قدر الله ، بس ممكن اعرف وصف المكان اللي فصلت التانكي هذا؟ علشان اشوف اذا يقدرون يفصلونه في مكان آخر من السيارة .

[ابو ناصر2020]

انا ماركبة:no2: طرمبه مخليه يدوي بس الطرمبه اقول انك تنقل البنزين بزرار وانت بسياره
وبنسبه للورشه هي موجوده بصناعيه القديمه تلفون 4461057 .
وفتحة التعبائه مطلعه مع لجنب ماهي مخفيه.
واسف على التخاير تخبر القميري قبل رمضان .

[شبح الصحراء]

مشكرو يا ابو ناصر ما قصرت والله يرزقك الصيد الزين .

[تــــوني]

حياك اخوي شبح الصحراء والشهر عليك مبارك

المكان ورشة المميز صناعية الدائري محمد المصري مشهو هناك
رح واسأل عنه

وبالتوفيق والسلام عليكم ورحمة الله وبركاته \

[شبح الصحراء]

أشكرك يا توني طيب ممكن سؤال ، فيه مكان تحت السيارة بين السبير وبين الجير بس شوي قريب لماصورة الكنداسة ، وش رايك اركب التانكي فيه؟ .

[تــــوني]

والله يا استاذ شبح

المثل يقول المكان الي يجيك منه الحريق خل معك طفايه

لو حصل لك تغير نفس التاكي الاساسي وتحط تانكي اكبر احسن لك في الشكل والمظهر والأداء شف لك تانكي سيارة اكبر من الي عندك واذا ماني واهم توانك بنزين المرسدسات القديمة تجي خلف المرتبه الخلفيه ولها نفس شكل التانكي للهايولكس شف يمكن يفيدك بشي الموضوع

والله اعلم

[شبح الصحراء]

أشكرك يا توني .

[تــــوني]

واذا تبي النصيحة يا عم شبح لا تزيد ولا تعيد لا بغيت تبعد عندك حوض تحطب به جالون بنزين 30 والا اقل لتر بنزين ولا احتجتها انزل
وشف لك قاروره مويه وشقها وعب التانكي ولا صار الجو بارد تدف على الجالون بعد ما تخلص من البنزين الي فيه والا رجعه معكم واستفد منه مره ثانيه ولا حط له لي وبزبوز ولا محقان ولا شي ويصير يعبي تماتيك وفي نفي الوقت ما يثقل على السيارة لا بغيت تحمل عليها فرضا وفي الخطوط وفي المطبات والله يستر من المطبات لان بعضها يطلع شرار همن تروح مضبي الله يستر عليك وعلى من معك وهذا لا شب القطه وارمه من الصندوق وصلى الله وبارك
والله اعلم انا على فكرة مع الأشياء الي تقدر تشيلها وتركبها بسهوله ولا تخرم ولا تلحم افضل لك


وهذي سواتنا ايام الرمله

[شبح الصحراء]

انا معاي تانكي بنزين خراجي 18 لتر بس صعب اشيله معاي كل شوي وانا احتاج تانكي داخلي خصوصاً على الخطوط فأحياناً اطلع من الرياض للقصيم تولع لمبة البنزين وطريق الرياض الدمام تلقاني ادور محطات قبل الدمام بـ 30 كلم بصراحة مليت لازم اركب تانكي داخلي .

[تــــوني]

ايوه ممتاز يا شبح الصحراء انا ابي اوصل لها النقطة وهي ان الهايلوكس والتايوتا القير العادي يصرف على الخطوط
وجلست ابحث في المشكلة لين حصلت ان المشكلة في القير تروسة صغار جداً

هذا عيب التويوتا على الخطوط والمشكلة اواجها بس بعد سرعة 160 على الخطوط شوي وانهبل من الصرفيه عندي
واذا مثبت على 140 وش حليله ما يصرف هذا بالنسبه للهايلوكس 2006
ما اقول الا جعل من صنع القير يهديه الله ويحط لنا نمره 5 كبريه ونفتك من الصرفيات في الخطوط والا في الديرة وش حليله ما يصرف ابد
وش رايك في ها الرمضانيه اروح انا وياك ندور لنا حل في التشاليح والصناعيات ونحط الهايلوكس تانكين بدون تفصيل ولا ترقيع لان الشيصان تركب لها توانك اضافيه وان كانك صامل انا بكون فاضي بعد ثلاث ايام وارسل لي رقمك على الخاص ولا حصلنا الحل نصوره ونحطها لمن يريد الاستفادة ......؟!!