المساعد الشخصي الرقمي

مشاهدة النسخة كاملة : السمر او الارطى او رمث او غضى او ..........


راعي برق
02/09/2006, 03:18 PM
السلام عليكم ورحمة الله وبركاتة
اخواني زرت سوق الحطب بالرياض ولقيتة ( نار وشرار ) :hot: غالي والحطب لك علية مغشوش والرصة دمار . فاذا تعرفون احد يبيع حطب زين ورخيص تكفون افيدونا .
ودمتم سالمين
غالي
02/09/2006, 11:33 PM
كنت اخذ سكس مرسيدس مليان حطب انا و3 اشخاص معي ونقسمه على ربع لكل واحد الا العام ماجابوا شيء واتمنى هالسنه يجيبون
والي يجيبه كان واحد حتى مااعرفه شخصيا بس زميل احد انسباي
يجيبه من الحوطه سمر طيب السكس كامل على 2400 وفيها
يعني كنت ادفع مايقارب 600 ريال واخذ لي ملي دتسنين تقريبا
فا نصيحتي لك دورلك احد ازملاك وتقاطوا في سكس وان نقصكم واحد تراني داخل معكم فيه
وان مابغيتوا احد ادعوا لكم بالتوفيق :)
وان قدرت تطلع برا الرياض تراه ارخص ............. وماخلاه يغلى بالرياض الا هالكاشات وهالمخيمات الي هبوا فيها وراء العاذريه وهالطقه
يذبون الدراهم ولا يهتمون واغلبهم صغار سن
السلام عليكم
الرهدن
02/09/2006, 11:54 PM
احذروا00
السمر والسلم قليل من يفرق بينهن00 ولذلك يضعون سلم ويقولون سمر أو يتم خلطهن
أو أسفل السيارة عودان صغيرة واستبنة والظاهر للناس كبار وجذوع حمراء اللون تأسر الألباب00

وقد غشني أحدهم كبير في السن وسيما وجهه الرزانة وأثره غشاش نمره واستمارة00 لكن وين يروح من الله00


والسوق اليوم في الغالب إلا من رحم الله00
يكثر فيه العمالة خاصة البنقالي المجرم ومن خلفهم عديمي ضمير لايفرقون بين الحلال والحرام00







.
قسوره2006
03/09/2006, 12:26 AM
معوض خير اخي الرهدن


ربي يعوضك خير واذ رحت تشري حطب خذني معك وبأذن الله ما يغشنا اطول شنب

اخوك محطاب

وجلابه وان شاء الله ادلك على الطيب بس ادع لي وصدقوني اخواني في السوق

شي طيب كثير بس وين الي يعرف وانصحكم اشرو من سودنيه لا تروحو بعيد عن الزول ترى سيماهم خير

وقليل فيهم من يغش

وزي ما قال اخونا غالي طرقتها حلوه واوفر وارخص واقل تكلفه

بس حاول ما تاخذ مرابيع كبار او سبور لان تجزئتها تاخذ وقت وتتطلب منشر احرص على الجذع المتوسط لا الصغير ولا الكبير

وفيه شي يصلح مشب مدخنة بيت وشي يصلح مكشات وشي يصلح سمره والليل بالشتاى ما يحتاج ومثلك عارف


وخلك على (( السمر )) على اسمها تسمر معك وابعد عن الارطه دخنتها واجد ما تصلح مشب مدخنه تذبحك بالعجاج وبالنسبه للغضى طيب بس غالي ونادر قليل الوجود بالسوق

وانتبه من المخلط يخلط معه الرمث والسلم والطلح والسدر وكثالك الاثله انتبه وشكر متوصل للجميع
عاشق VXR
03/09/2006, 01:11 AM
السلام عليكم ورحمة الله وبركاته ... حياكم الله كل واحد بأسمه ... اشكركم على هذا الموضوع الرائع وجزاكم الله خير ... انا والله مالي شطارة في الحطب ... لاكن اللي ناوي يشتري له او ناوي يفزع انا ابي لي سكس سمر كامل ولا هنتم اللي يقدر يعطيني رد وجزاكم الله خير ...
وبنائاً على السعر اللذي طرحه اخي العزيز ( غالي ) وهو 2400 او القريب منه ...
يفضل المراسله على الخاص ...
وجزاكم الله خير ...
وشكراً ،،،
الرهدن
03/09/2006, 01:22 AM
أخ قسورة الناصح تكفى إن خبرت لي شئ زين وعلى هالمواصفات اللي ذكرت وسعر معقول لاتخلين00

على الخاص00


.
راعي برق
03/09/2006, 01:21 PM
بسم الله الرحمن الرحيم
غالي
الرهدن
قسورة 2006
عاشق
اشكر الجميع على المرور
غالي .... اذا تخبر احد يبيع انا معك نتقاسم انا وياك الشحنة او ندبر لنا ثالث .وترى خشرتك لي شرف عظيم .
ولك الشكر ( اذا حصلت احد راسلني على الخاص )
عاشق VXR
03/09/2006, 01:24 PM
السلام عليكم ورحمة الله وبركاته ... حياكم الله كل واحد بأسمه ... اشكركم على هذا الموضوع الرائع وجزاكم الله خير ... انا والله مالي شطارة في الحطب ... لاكن اللي ناوي يشتري له او ناوي يفزع انا ابي لي سكس سمر كامل ولا هنتم اللي يقدر يعطيني رد وجزاكم الله خير ...
وبنائاً على السعر اللذي طرحه اخي العزيز ( غالي ) وهو 2400 او القريب منه ...
يفضل المراسله على الخاص ...
وجزاكم الله خير ...
وشكراً ،،،

لا تنسوني لاهنتم ... :j
جزاكم الله خير ...
غالي
04/09/2006, 12:08 AM
راعي برق
والله اني اسأل منذو مبطي من شهر تقريبا حتى سألت نسيبي يسأل خويه كانهم بيجيبون ولاجاني خبر حتى الان
والشرف لي وانا اخوك بمخاشرتك
وياليت اخونا قسوره 2006 كانه يخبر لنا سكس كامل وشيء طيب يعلمنا الله يجزاه بالجنه
وحنا نتقاسمه على ربع ان بغيتوا حنا كملنا اربعه ويمكن نزيد وان حصل هالايام يكون افضل الي يبي يقصصه صغار وغيره يمدينا
واتمنى من ربي التوفيق
قسوره2006
04/09/2006, 05:01 AM
شكر متواصل لاخواني الزملاء

انا بصراحه ما عمري شريت انا اجلب كل طلعه ومكشات لي اجلب معي الي الاقيه سمره - ارطه - غضى - رمثه - سلم اثله حتى مليت الحوش وكلها تاكله النار بس انصح واكرر السمره طيبه

بس اخبر لكم رجال يبيع وسعر ان شاء الله طيب عطوني فرصه بدور لكم الرجال او غيره انتم رجال تعرفون الطيب ولا يحكمكم احد فيه اذ تناسب السعر على طيبة الحطب خذه ولا تشاور
راعي برق
04/09/2006, 09:30 AM
غالي
حياك الله وبياك ...
الاسبوع الماضي زرقت للحوطة ( حوطة بني تميم ) ونشدت عن الحطب وقالو لي ما يبدون الحطابة يجلبون الى في منتصف رمضان وفوق ( يتلمسون الاسعار الزينة ) .
على العموم انا اببحث والباقي على رب العالمين .
ولك التحية
اخي قسورة 2006
تكفى لا تنسانا اذا جد جديد .
تحياتي
قسوره2006
06/09/2006, 02:09 AM
ابشر و بسعدكم يا اخواني

الي بيدي ما راح اتأخر به عليكم بس عطوني فرصه تعرفن الضروف والاتزامات ومثلكم ميخفاكم

ابشرو بعزكم وبسهل الله كل امر
قسوره2006
10/09/2006, 02:28 AM
السلام عليكم ورحمة الله وبركاته

اخواني ما اخفيكم واحب اوضح لكم ما حصلت الرجال الي اعرفه عجزت ادق على جواله مقفل مقفل لا اعلم اين هو وفي اي ديره

هذا راعي محطاب وجلابه يجيب من الجنوب ويبيع طرقي ولا ادري اين هو لكن ان شاء الله يبين قريب

واذ ما لقيته بنزل السوق وبتتيح الطيب وبعرف وبتعرف على من يمون لي كميه كبيره علكم تتشاركون فيها وتتقاسمونها

وان شاء الله ارد لكم

وشكر متواصل للجميع
قسوره2006
21/10/2006, 06:39 AM
يا اخواني

السلام عليكم ورحمة الله وبركاته

اهنيكم بقدوم العيد وقول لكم كل عام وانتم بخير

والرجال الى يومي هذا لم يبين وانا نزلت سوق الحطب بصراحه نار الاسعار فوق الخيال توقعت اقل من كذا

انا نازل هذه الايام الجنوب يم برك والافلاج والوادي لو حصلت شي طيب وسعره معقول بجيب لكم العلم وبنسق معكم واعذروني على التأخر في الرد مثلكم عارفين التزامات رمضان اعاده الله علينا اعوام مديده والسلام عليكم