ياشباب استفسار عن الصدامات

[جاروود]

بسم الله الرحمن الرحيم
الله يعطيكم العافية
ياشباب

انا ابي اركب صدام الي يجي معه عده (المسحات والكريك .....الخ) ان كان احد يقدر يشور علي تكفون لاتخلوني ابي الطويل الي يغطي وجه الموتر كامل شفته على باثفندر بكم سعره ووين القا افضلها وهل هي عمليه
وان كان عندكم راي ثاني ارجو الافادة

[راعي البعارين]

ماهو عملي , وبالنسبة للكريك فيه نوع صغير قابل للثني ويجي معه جراب. وبعدين هالنوع من الصدامات يثقل على الموتر خصوصا في النفود لأن أي زيادة في وزن السيارة تقلل العزم. وبعدين شكله لك عليه. .....وسلامتكم.

[ابورشيد]

اخوي الجارود توكل علي الله وركبه
تراني مركبه من سنتين او حولها وبعدين هو حماية للصدام ووجه الموترمن الحوادث بأذن الله وحديده قوي ماهو مثل صدامات النيكل وبعدين مايقرقع من كثرة المكاشيت والمطبات وهو رخيص بالنسبةللاظافات اللي فية
تقدر تركبه عند ورشة المواهب وايضا ورشة المميز غرب مسجد العويضة بالصناعية القديمة

[راعي العشــه]

مساكم الله بالخير

انا رأيي من راي اخوي ابورشيد. اخوي جارووود ركبه وماجاك علي لاني انا مركبه وفيه
شاكوش
ومسحات
وفاس
ومنشار
ومعلاق ذبيحه
والحمدلله صار له كم شهر معي ولدرجه معلق على الصدام كذا ذبيحه ولا صار يرج ولا يحزنون الحمدلله واذا تبي تركبه ركبه في ورشه المواهب هم المختصين فيه واذا تبي رقم ابوخالد راعي المواهب عطيتك اياه واسف على الاطاله

[جاروود]

بسم الله الرحمن الرحيم
الله يعطيكم العافية يالشباب
على العموم انا شريته وركبته ابشركم
بس عندي سؤال معلاق الذبيحة كنه مهوب تكانة (يعني شكله مايشيل ذبيحة متوسطة الحجم)
أرجو الأفادة