ابشتر شيروكي وابي رايكم [الأرشيف]

مشاهدة النسخة كاملة : ابشتر شيروكي وابي رايكم

ابودجانه33

28/01/2013, 08:07 PM

السلام عليكم

بصراحة معي صغيره وناوي اشتري شيروكي للبر من الموديلات القديمه

من ال 2000 ونازل حتى 90

المهم عندي كم استفسار الله يعينكم علي تراي جديد على الشيروكي

هل فيه فرق بقوة المكينه بهالمودلات العشره
هل فيه موديل تنصحون فيه عن باقي الموديلات
هل السعودي يفرق عن الامريكي
ماهو اشهر اعطال الشيروكي
اشوف بعضها يختلف الداخلي جلد ومخمل وش انوعها فيه فل كامل وفيه ستاندر
اكثر شي تنصحوني اسويه بالموتر بعد الشراء
عاد يكفي اذا عندك اي شي تفيدني فيه كثر خيرك يالغااااالي

هاوي الامريكي

28/01/2013, 10:55 PM

وعليكم السلام ورحمه الله وبركاته يالله حيه :burnout2:
الفرق اللي اعرفه انه تغير في موديل 2001 هو الافضل وتغير في عده امور ولو تستفسر بالنت بتلقى الفروق
انصحك والكل يفضل موديل 2001 لانه تحسنت ادائه للافضل
يفرق السعودي عن الامريكي بالمواصفات فقط والضاهر ان الاديتر الامريكي يختلف عن الاديتر السعودي
اشهر اعطاله الكهرباء وارتفاع الحراره
نعم يختلف فيه ستاندر وكلاسيكي وسبورت
انصحك تخليه على ماهو عليه اذا لم يتعطل مثلا الحراره سليمه وتروح تركب مرواح ولا بلف ما يصلح لان الموتر اساسا سليم اتمنى الفكره وصلت
واجب وحنا تحت امرك بالتوفيق ,,,

ابودجانه33

29/01/2013, 01:03 PM

اشكرك وايضاح جدا جميل

سؤال الهيدرز مناسب للموتر ولا لا

والمراوح اشوف كثير بالمنتدى يركب مراوح سوبارو ليش هل لها دور في اداء المحرك غير الحراره طبعا

وبغيت اسال ايهما افضل القير العادي ولا الاتوماتيك لانه احيانا يكون فيه عيوب بواحد منها

هاوي الامريكي

29/01/2013, 04:40 PM

هلابك اخوي ,,,
بالنسبه للهدرز اذا انت تبيه استخدام ما يصلح لكن اذا كان تبيه حق نفود ومراقي يصلح فقط بالبر لان الهدرز وظيفته يزيد من قوه المكينه معناها ان الضغط بيزود على المكينه وهذي تراها تسبب تلف المكينه ويقلل من عمرها لان ضغط المكينه يكون دائم شاد
بالنسبه للمراوح اكيد لها دور منها :- تخفيض حنحنه الموتر و تثبيت الحراره و قله الصرفيه البنزين واشياء كثيره ناسيها للاسف لكن لها مضار لانها ممكن تتعطل فجأه في اي وقت وفي اي زمان وراح يخرب الحساس لان المروحه توقفت فجأه و مكان المروحه قريب مره من الاديتر يعني لو ادنى صدمه من الوجهيه ممكن يختل توازن المروحه ثم يخرب عليك الاديتر وانتبه بعد من الورشات اللي يركبونها احرص كمال الحرص عليهم لان بعضهم ما يركز وممكن يسبب التماس والشيروكي حسااس مره من الكهرباء و تقصر من عمر المكينه
بالنسبه للقير !!! على حسب استخدامك وكل قير له مميزات وعيوب ومعروفه زي العادي الله يعينك كل شوي كلتش وغير نمره خصوص لاصرت بزحمه لكن ميزته بالتطعيس خفيف جداا زي الريشه والقير العادي والدبل تكون اعمده الكردان قصيره عشان كذا يكون خفيف نفس ونشيط بعكس التماتيك تكون اعمدته طويله والتماتيك بالقومه اضعف من العادي بفارق بسيط لان الشيروكي ميزته خفيف مره يختلف عن باقي الجيوب الشيروكي خفيف خفيف وراح تلاحظ اذا سقته والتماتيك صرفيه بنزينه اكثر من العادي ولكن ولكن ايضا فرق بسيط لان الجيب خفيف جدا فا مايصرف ذيك الصرفيه والتماتيك اذا طفى طفى مره وحده مو مثل العادي يتعتع واولا واخرا حسب استخدامك والمعذره اذا اني طولت واي خدمه حنا تحت امرك ,,,

ابودجانه33

29/01/2013, 09:46 PM

الف الف شكر انا بيكون استخدامي للبر فقط لاني معي صغيره

هاوي الامريكي

30/01/2013, 11:05 AM

اذا استخدامك فقط للبر وبالصيف توقفه الافضل القير العادي مع الاضافات اللي تبيها سواء هدرز او فتلر او مراوح وتخفيف وزن السياره مثل تركيب كبوت المنيوم مخفف وباب الشنطه بعد والتخفيف الداخليه مثل المراتب او الديكورات تشيلها مع التزويد مثل ماقلت من هدرز وفلتر والخ,, راح يكون طياره ولا يردك اي طعس ودق خشوم المواتر دق والعب يا معلم ونصيحه كانك تبي تشق الطعوس خذ شيروكي غماره (باب واحد) لانه اخف وزود عليه لكن لا تنسى مكان المراوح قريبه من الاديتر وادنى خله توازن ينشق الاديتر وابعد ريشه المروحه عن السيور والبكرات قدر المستطاع لانه ممكن يقطعهن ولازم توصل المراوح بكتاوت عشان يزودها كهرب ولازم تكون الاسلاك متينه اقل اقل شي 2ملم وبالنسبه للهدرز افضل شي تشريه جااااهز وليس مفصل لان الجاهز اضمن والشركات معروفه وكثيره لكن اذا ركبت هدرز ركب كيت باك لانك اذا ركبت هدرز والكت حق الوكاله ما تغير ماراح تطلع بفايده ابدااا لأن الهدرز يقوي المكينه ويحرق بنزين البنزين اذا ماااا طلع مع القزوز راح تكون دعسته مكتومه وممكن يخرب عليك الهدرز لكن اذا ركبت كيت باك نوع رياضي راح يتنفس لان الكت يسرع خروج الكربون والكت انواع مثل بورلا وفلوماستر وماجلنا فلو هذا اللي ببالي واعذرني على التقصير واي خدمه حنا تحت امرك ,,,

ابودجانه33

31/01/2013, 01:30 PM

الله يجزاك خير بس بقي سؤالين ربما ماوضحت عندي
الاول ماقدرت اعرف ليه 2001 هو المرغوب عن غيره

الثاني الجيب يجي ثمان سلندر وست او يجي نوع واحد (علما تراي ماني راعي مراقا وطعوس كشتات وبس)باختصار اذا كان راعي مراقا وفيه اعطال ماابيه يكفيني سلندرين

ص ق ر001

31/01/2013, 01:51 PM

نصيحة مجرب الشروكي حق خرابات وكل يوم وانت بالورشه وخاصة القديم
ابعد عنه حراره مرتفعه وقير حساس ودفرنس ضعيف
خذلك تويوتا ولانيسان لو تدفع قيمة الشروكي دبل

هاوي الامريكي

01/02/2013, 10:11 PM

ياهلا ومرحبا بالجميع معليش على الرد المتاخر اخوي ابو دجانه انا حسبت انك تقصد انك راعي تطعيس وتزويد مادريت انك تبي بس كشتات الا من ردك المههم معلينا اذا تبي موتر كشتات ما انصحك به لانه يتعطل فجأه وبدون سابق انذار يجيب العيد انا من رأيي تاخذ تويتا او نيسان او امريكي التويتا اذا ميزانيتك منتازه طق جكس2007 وتحت او نيسان 2005 وتحت والامريكي اكسبلور من 2013 وتحت او تاهو z71 من نظري الافضل تاهو زد سفن ون لانه مخصص ومصنع للاعمال الشاقه مثل بر وتطعيس وتحميل وكلشي وبنفس الوقت مريح جدا جدا والله يوفقك ,,,

هاوي الامريكي

01/02/2013, 10:12 PM

ابودجانه33

02/02/2013, 01:45 PM

لكن ياجماعه فلوسي كحد نهائي 30 الف وانا معي صغيره ماهو رسمي راح يكون

هاوي الامريكي

03/02/2013, 01:57 PM

معليش على الرد المتاخر من رايي تاخذ اكسدبشن 2003او 2004 او باترول 97 او ددسن 97 دفرنسين او شاص من موديل 84 الى 90 او يوكن دفرنسين من موديل 95 الى 99 والله يوفقك ويسهل دربك ’’’’

راسم الكلمة

06/02/2013, 03:32 PM

عندي لك شيروكي 2000 كلسك فل كامل سعودي ورده

سعره 24 الف

0505160319

ابو شكاع

08/02/2013, 11:50 AM

جربت الشيروكي سبورت موديل ٢٠٠١ ومازال معي
ايجابياته .. قوي وخفيف وبعد تجربته عرفت ان اليوكون بلبطة .... بلبطة يعني ثقيل ... يعني بالنفود لما تجرب الشيروكي تقول وين اناضايع
سلبياته ...كثرة صيانته

تساهيل1

08/02/2013, 12:20 PM

ابو دجانه

هاوي خساير انت

من جدك انت ياولد والله العكطيم ان تكره نفسك
الشيروكي سياره...
يومين معك واربع بالورشه كل شي كهرب حساس الداير حساس مرتبه حساس استبنه حساس فرشة الرجلين
و...و... وكلها على الكمبيوتر يعني لو تنزل فرشة الرجلين بالمغسله عيا يشتغل او قعد يقطع تقل ددسن 82 محترق بليتين

استغفر الله عين خير يارجال وشف لك جيب ثاني بس واستخر

وموفق ان شاء الله

ديفون

31/03/2013, 12:21 PM

يالربع معاي شيروكي 2012 اوتوماتك مثبت سرعة ودبل . استاندر . ماشاءالله سيارة على الكيف . مع العلم اني ماني راعي طعوس

ديفون

31/03/2013, 12:24 PM

وحبيت اوضح يالنشامى . السيارة من اي نوع على الاستخدام والمحافظة . اما تهملها وتعطيها لفلان وعلان بتروح فيها وطول ما انت محافظ على الصيانة . السيارة بتطول معك . وسلامتكم

x.ls1.x

03/04/2013, 11:04 AM

شف ياعم النصيحه ببلاش عند استراحتنا 3 شروكيات والله كل يوم والثاني بالورش ومبهذله اصحابها ياراس ياعاضه المكينه يالتماس ياحراره وخذ لك , دام ميزانيتك 30 بتاخذ لك باترول 94 نظيييف تستانس به ومايرده شي ابد وموتر متى مابغيت تبيعه شرايه موجود ومايتعبك ابد والله يرزقك

الهاص

03/04/2013, 11:50 AM

سمعت أن أفضل موديلات الشيروكي 2000 و 2001
لكن نصيحة عندك النيسان والتويوتا والميتسوبيشي أرغب وأفضل

محب القلوب

30/06/2013, 08:09 AM

اخوي
الشروكي مديل 2000 و 2001 يجي ديلكو
و 99 وتحت عادي
اذا الموتر نظيف اتكل على الله وخده

موفق العنزي

01/10/2013, 04:41 PM

انحش وانا معي 2012 نصيحه اخو وتبي تأكد رح للوكيل وقله ابي كم قطعه وحدد قطع معينه وشف وش يقولولنك وموظفين الوكاله تحس انهم كلام فاضي بالخدمه