فرش النوم [الأرشيف] - منتديات مكشات

راعي بر

30/12/2002, 12:08 AM

السلام عليكم ورحمة الله وبركاته

الى الاخوة الاعضاء الكرام

أريد أن أطلب منك معلومات عن فرش النوم وخاصة صغيرة الحجم وتكن تدفئتها ممتازة ولا اريد الفرش الوطنية لانها حجمها كبير وليست جيدة في التدفئة الا اذا وجد عكس ذلك .

وان كان هناك مواقع لشركات تصنع هذه الفرش عن طرق الانترنت فلا تبخلو علي .

انتظر الرد منكم

والف شكر لكم

ذيب حضن

31/12/2002, 08:29 PM

أخي
رأيت قبل مدة طويله عند وكيل( COLMANكولمان ) فرش نوم قريب من ماتصف
علما بأنه هو وكيل حافظات الثلج والكشافات 0000الخ ومولينكس وما اليه

راعي بر

31/12/2002, 11:59 PM

مشكووووووووووووور

على ردك السريع وماقصرت الله يعطيك الف عافية .

ولكن ممكن خدمة صغيرة الله لا يهينك .

وين محل الوكيل حق ؟؟؟؟؟؟؟؟

والف شكر لك

الجمس

01/01/2003, 07:26 AM

اخوي راعي بر
السلام عليكم ورحمة الله وبركاته

اهم ما على الانسان نفسه , محاسيك داج السوقه في الداخل والخارج وحتى امريكا ماخليتها وماهنا فراش ماشريته لكن خل عنك حتى اللي تكلم عنه الرجال والله ماتامنه على مواطيك كنك بكفن, ماشفت الراحه والدفا الا يوم طلعن الوطنيات وبدو يصنعونهن ياعل من بدعهن للجنه .
بعدين تعال وشلون تقول انك راعي بر وانت عجزان عن شيلة فريش ! نعنوبو بليسك والله ثم والله لاشيله بسنوني طول الرحلة ولا يذبحن البرد , طععععععععععععععع شوري وترك عنك ها الكسل .

مع تحيات الجمس

راعي بر

01/01/2003, 03:07 PM

وعليكم السلام ورحمة الله وبركاته

هلا بالجمس

ومشكور على الرد

مهوب العجز يا حبيبي ولا راعي البر لصار عجاز مهوب راعي بر لكن انك لشفت هالفرش الصغيرة الوظيفة انها تعجبك وتوفر عليك مكان بالموتر تخبر هالجيوب ما تشيل مثل الجمس ماشاء الله .

اما الفراش معي واحد شاريه من امريكا وش زينه وحليو ودافي الا اذا جاه طل ولكن ذا الفراش مشكلته امريكي ((لا زم نقاطعهم )) لكن قبل فتره خرب السحاب وحاولت اضبطه عند كم محل ولكن ماحولك احد فاهم فهو عاش ما قصر.

وسألت اخوياي عن هالوطنيات ويقولن اكبر حجم من الامريكي وهذي بحد ذاتها مهيب مشكلة لكن البلا في نوعية العازل يقولن هالفرش عزلها مهوب زين .

ولك مني افضل تحية وسلام

ابو علي القصيمي

04/01/2003, 04:47 PM

اللي يبي فراش نوم للبر سليب باك ممتاز مره من برا قماش تنزاني .........................

..... ومن الداخل فرو ابيض ..............

........... والمقاس واسع وممتاز جدا ...............

......... والسحاب كبير وقوي مره ............................

فلا تـــــــــــــــــــــفوتكم .....

واسعارها : حول الاربعميه (( 400)) ريال سعودي مع التوصيل لاي مكان في الرياض

................لا تفوتكم ............. لا .. وتراها دافيه .........

راعي البعارين

04/01/2003, 11:34 PM

بلنسبة للفراش الأمريكي فيه أنواع عديدة ومنها أنواع معالجة ضد الحرارة والبرودة ومكتوب عليها ضمان على العزل الحراري وتتميز بصغر الحجم وخفة الوزن وهذه الأنواع غالبا ماتكون غير متوفرة في السعودية. وسلبيتها أنها ضيقة فيراعون الطول فيها ولكن لا يراعون العرض فلا تستطيع التحرك بسهولة فيها, وهي ليست وثيرة(متعوب عليها وثيرة ..... ترى لوشفتم راعي البعارين مثقف) .

الزبدة رح لسوق المفارش وخذ لك مفرش من الأنواع الزينة اللي نسبة البوليسترين فيها كثيرة وأتذكر ان مصنع الدريويش ينتج مفارش جيدة وأيضا مصنع عماني ان لم تخونني الذاكرة اسمه الراحة ورح لحقين الخيام وخلهم يفصلون عليها شراع تنزاني
بالمقاس اللي يناسبك وصدقني راح تدعي ل( راع الشرفاء)= راع البعارين.

ريح الخزامى

05/01/2003, 02:50 PM

السلام عليكم يالله حي هالوجيه الطيبه

حبيت اشاركم في اول مشاركه لي وانشالله اني افيدكم

بالنسبه لفرش النوم ابي احاتسيكم عن الوطني اللي هو تلقاه في محلات الغرابي وسعره بين 400 إلى 230
على حسب القماش والتبطين والتبطين انواع فيه الفرو وفيه القماش العادي
بالنسبه للفرو انا انصحك فيه لانه مايجيب لك الصقع لادخلت فيه وبعدين تحس بالدفاء وناعم
اما العادي فيجيب لك الصقع ولاتدفي فيه

اما الفرو فانا مجربه عز الله انك تقول تسنك في القيض بس ان تسانك تبي الدفى زود شف لك بطانيه صغيره وخفيفه او قماش قطن دخله معك داخل الفراش وتغط فيه عز الله انك تبي تنسى البرد
وحجمه ماهنا زود تراه لا فرشته يجي نفر ونص وسيع وتاخذ راحتك فيه واذا صفطته حجمه زين ماعليه والسحاب حقه 10 م يعني لاتخاف انشالله لو تسحب موتر مغرز فيه بيطلعه خخخخخخخخخ

اما الامريكي والكولمان مجربه بس عيبه انه صغير حجمه ماتاخذ راحتك فيه وإلا يدفي لانه من داخل مبطن بقماش قطن وحلو وسحابه صغير يعني فتره ويخرب

واسعارهن انا ماخذه من الغرابي الفرو ب230 ريال بعد المكاسر وواحد قال لي انه شاريه من الدوادمي ب180 ريال الفرو اما الكولمان فجايني هديه وسعره تقريبا عند الرمايه ان تسانه على خبري بحول ال200 ريال

اما اخوي اللر خرب عليه السحاب رح للاسكافي ان تسانك في الرياض انشالله انهم بيصلحونه

تحياتي لكم وانشالله اني افدتكم وقدمت اللي فيه الخير وتلقى اللي انت تبي في هالرد

واي شي انا تحت امرك

اخوكم

ريح الخزامى

عروان

06/01/2003, 12:50 PM

ما لك غنا عن الوطني

مايدفي غيرة في بردنا ذا.

أنا أشتريت من منتج مصنع الدرويش فراش بطانة مفرش. أول ما بدو يصنعونهن كانت ضيقة. ثم طلعت مره للحفر ولقيت هالباكستانية في محلاتهم ماعندهم شغل ليلة من الليالي. كان أروح وأشري لي مفرش من النوع اللي وجه قماش و وجه فرو صناعي. رحت للباكستاني ولقيت عنده قماش تنزاني أصلي.

المراد عطيته المفرش وقلت له لبس علية تنزاني. أثر الباكستاني عند اللبس جاهز بس يبي البطانة. ويخيط الفرو على الكيس التنزاني في 15 دقيقة وأرقد في ذاك الليل والله انة دافي أدفى من شغل كوولمن وغيرة.

وكلفني 240 ريال.

وفية واحد أعرفة أشترى له بطانية أسباني غاطين وزن ثقيل ولبسها كيس عند الخياط وممتازة بعد. للي يبي بطانية أو عنده حساسية من الفرو.

بس أنا أشهد ان الفرو يدفي والله اني أحتر بعض الليالي منه.

هذا رأيي وسلامتكم.

التغلبي

07/01/2003, 12:03 PM

ياشباب شريت لي فراش من شارع الوزير مموه وزنه 300 جرام سعره 80 ريال ونمت فيه الاسبوع الماضي ودافي جدا مع العلم ان تيك الليلة جمد الماء عندنا ها وشتقولون

عروان

09/01/2003, 01:58 PM

أقول مبروك عليك

ونومة العافية أن شاء الله

سعر رخيص ودافي بعد, عز الطلب. بس ممكن أسمة / نوعة / صورة علشان نعرفة أكثر.

تحياتي لك

aif

09/01/2003, 02:09 PM

السلام عليكم

اخوي راعي البر تشتكي من فراشك الأمريكي انه خرب سحابه ويذبحك بالطل - كل اللي عليك إنك تفصل له طربال شراع خارجي من أي نوع والتنزاني أفضل .

أما عني فأفضل ما وجدت واستخدمت فراش الدريويش الوطني سليب باق - دافي جدا وحجمه معقول
وتقلب بوسط الفراش بسعه :bounce:

طبعا الفراش موجود بأغلب محلات الرحلات
والمصنع بالرياض وهذا تلفونه : 012413583

راعي عنيزة

10/01/2003, 08:36 PM

للاخوان في القصيم

عند محل الميمان بعنيزه فرش وطنيه شراع تنزاني وداخل فرو ابيض
مقاس مترين وعشرين في متر وعشرين وبسعر 200 ريال وشغل محلات الغرابي بالرياض

مع العلم ان محلات الرحلات الباقيه يبيعون نفس الفراش ب 300 - 250 ريال

==================

وياليت الشباب يعلمونا عن فرش الدريويش بكم سعره وانواعه

عاشق الطعوس

11/01/2003, 02:39 AM

أزين شي تلحف ببشت صوف أحسن من أي فراش :D

هذا رأيي :p

العمدة

13/01/2003, 11:38 AM

أخواني الأعزاء

بعد ان بحثت عن فراش جيد لي جديد ......(( ابغير فراشي الأول ...حر على كيفي عمدة وابتدلع ))

وجدت انه الجاهزة الخارجيه يميزها صغر حجمه بس ماتدفي ولا تتواسى مع الأرض الحوسه

والتفصيل انت تاقف عليهم صح انه بيطلع محكحك بس انه يبي يكلفك

شفت مع واحد فراش عز الله انه دلع سمكه تقل بغرفة نوم وعرضه ينام به الدبي ويتقلب علىكيفه وطوله ممتاز جدا ويقولي هذاي أعره لي سنتين من أروع مايكون......رحت لمصنع هالفراش وهو اللي ذكروه الأخوان فوق مصنع خالد الدريويش

ولقيت عندهم ثلاث أنواع
مبطن فرو
مبطن قماش جيشي دافي
مبطن قماش بني اسود

وكلهن القماش تنزاني أصلي وتحس انه يبرد اللتسبد
ونوعية البوليستر اللي به من أحسن الأنواع ومشهور هالمصنع بوليستره

وسألت وش آخذ

قالوا لي أهل الخبرة إنحش عن الفرو
أول شيء يمسك الرمل والتراب والعودان الصغار والشوك لو يجيه اي شيء متعلق برجلك وانتم بكرامه
والثانيه ايلا نسفته عليك تبي تتغطى ملى عيونك رمل

رحت وسألت خبير أقمشه وجاء معي عن ايهم اخذ من النوعين الجيشي او السادة وبعد تحري وبحث
اشار علي بالقماش الجيشي لأنه أفخر وأدفى من الثاني وهو من صناعة مصنع ببريده ( القماش الجيشي )

وشريته

والله من عيد الفطر وانا اكشتبه

يعلم الله انك ماتحس بالبرد أبد وتحتك هالبوليستر لو حدرك بطانيج مادرى عنه

مع العلم انه قال لي سعره 280
وأخذته 270
لكن خذ فراش .......مجربه يجي الى هالحين 10 ليالي تقل فوق سريري بغرفتي

وبس حبيت اني اقولكم رايي

راعي بر

20/01/2003, 01:17 AM

الله يعطيكم العافية ياشباب ماقصرتوا

اشكركم جميعاً على مشاركاتكم والله لايهينكم جميعاً

ابشركم شريت واحد امريكي ((ودنا نقاطعهم لكن ماحصل في هالموضوع)) ممتاز ومكتوب على كرتونه 18تحت الصفر غويلي شوي لكن ممتاز من براقماش ما ادري وشو لكن ضد المويه عيبه الاول انه امريكي والثاني ان السحاب ما يسكر الفراش كله الجهه العليا مفتوحة ومزاياه انه حجمه صغير ولا يتقارن بهالوطنيات والثاني انه يدفي .

ولو انه مهوب امريكي كان نصحتكم به

ومن لديه المزيد فلا يبخل علينا

العمدة

20/01/2003, 01:46 AM

أخوي راعي بر

الله يهنيك بدفاوه ويكفيك برده;)

اخوي راعي عنيزة

أذكر انك سألت عن رقم المصنع

هو
2413583

بالرياض

وتقدر تسألهم عن المصنع اللي ببريدة اللي يصنع لهم القماش الجيشي وتشريه

وسلامتك:light:

راعي عنيزة

20/01/2003, 06:23 AM

الله يرضى عليك يا عمدتنا :good:

هذا رقم مصنع الدريويش وابشرك لقيت محلات كثيره بالقصيم تورده ويبيعونه ب 275

يا مال التسلم يا خلفهم

m3622222

20/01/2003, 03:13 PM

بصراحه سليب باك الدريويش ممتاز وسعره زين

الهارف

20/01/2003, 10:31 PM

ما خليتوا فراش جا على بالي الا وقلتوه ما شاء الله عليكم

وانا معك يابو علي القصيمي أي شي للبر تبيه أصلي تلقاه بالقصيم خاصة (( بريدة ))

الفراش هذا ما تلقى مثله ولا بالعالم

وانا اقول بعده يعني بالمرتبة الثانية فيه فراش

( درويـــــــــــش )

هذا فراش رهييييييييييييييييب يدفيك وانت بوسط الفريزر

واتمنى اني أكون افدتكم

تحياتي

أيمن

31/01/2003, 10:28 PM

وين محل الدريويش في الرياض بالضبط؟

جــلــمــود

01/02/2003, 01:40 AM

السلام عليكم

ماقصرتو ياشباب

صراحة انا مجرب فراش الدريويش من تالي ممتاز ممتاز اما اول بها الامريكيات مدحوس نفسي

وبعد فراش الدريويش نم على الريش :)

شريته من مصنعهم مباشرة تفصيل بالمواصفات الي تبي والتبطين الي تبي ( فرو , قماش عادي )

والسعر على حسب الاضافات يزيد وينقص

سحابات على كيفك انواع واشكال

رقم هاتف المصنع الرئيسي بالرياض 4951396 / 01

وسمعت ان لهم فرع ببريده وجده وخميس مشيط والدمام كلها تفصل

عن قريب بحاول اجيب ارقام الفروع

الطير

03/02/2003, 09:56 PM

تحيه طيبه

الشباب وفو وكفو بس لا بد ان ادلي بدلوي غير فراش الدريوش لا تدور له والله معي تقريباً 8 -او 10 سنوات انام به والدنيا مطر وراسي تحت السياره وجسمي رى او مغطي راسي والا ماظرني ونمت به في برد شديد جداً والله ما ممثله .

اخوي راعي عنيزه :

تقول لقيته اي فراش الدريويش 275 في القصيم انا سائل عنه من فتره بتقريباً 320 والله ممتاز السعر بالنا عليه في اي مكان .

لك تحياتي

راعي عنيزة

03/02/2003, 11:53 PM

اخوي اعتقد ان ابو 320 هذا بطانته فرو

اما الي انا شريته ب 275 فهو بطانته قماش جيشي

الطير

04/02/2003, 02:47 PM

تحيه طيبه

مشكور اخو ي راعي عنيزه بس ما ادري عن سعر البلستر كم ؟؟؟؟؟

لك تحياتي

أيمن

15/06/2003, 05:07 PM

( لقد تم إضافة هذا الموضوع إلى المواضيع المميزة والشيقة في هذه الخيمة (http://www.mekshat.com/vb/showthread.php?s=&threadid=8691) )
مع الشكر للجميع ،،
http://www.mekshat.com/pix/upload/images/flow12.gif

مشرف الخيمة

عروق الدهناء

15/06/2003, 08:44 PM

اخوي العمده الله يعافيك وين القي هالفراش

ق ح ص 411

16/06/2003, 12:57 AM

اخواني الغالين بعد التحية
الله لايهينكم ابغاء رقم الموزع للفراش في بريدة
وشكراً لكم جميعاً...........

الشيخ

21/06/2003, 03:38 AM

الدريويش يعلو ولا يعلى عليه
هو الممتاز فقط ولا تدور غيره الا اذا انت غاوي تعب و ودك تفصل او انك تسويه على مزاجك
عندنا الديرويش سعره غالي لانه استيراد خارجي وسعره قريب 500 ريال اختصرت المسألة وشريت واحد امريكي ماركة WENZEL ممتاز جدا و صدف انه كان عند محل سلاح وعنده تصفيه فأخذته بنصف السعر وسعره قبل الخصم كان 45 دينار يعني تقريبا 500 ريال لكني اخذته ب 20 دينار فقط يعني 250 ريال تقريبا
لكنه من الداخل قماشه مثل قماش الفنيل ناعم لكنه يلقط الرطوبة وقماشه الخارجي عادي
وفيه عيب ان السحاب ما يسكر الفراش كله يخليه مفتوح من فوق المهم اني رحت لاهل الخيام وفصلت له لباس خارجي تنزاني وله بطانه بيضاء مثل قماش الخيام وصرت استعمل الطقم كامل بالشتاء وبالصيف اخذ معي اللباس الخارجي الي فصلته انا بس
والفراش مكتوب عليه 20 تحت الصفر وقابل للغسيل
اما عن الدريويش للاسف بعد ما خلصت من التفصيل والشغل هذا كله رحت يم حفر الباطن ولقيته على 220
الي تكون بطانته جيشيه اما عن الفرو ما شفته عندهم
لكن الحمدلله الي عندي الحين يكفي ويوفي واذا قضى عمره ناوي اشتري دريويش

ابو خلود

28/06/2003, 10:34 PM

يا اخوان مريت اليوم اشوف فرش الدريويش تنزاني ببطانة جيشي لقيته بـ 350 ريال
عند رحلتي مخرج 10 بالرياض ....

من وين شريتوه بـ 220-270 بالرياض ؟ وين المحل ؟

القماري

24/11/2003, 02:47 PM

للرفع
لأني شريت اليوم فرش من القاضي بالشرقية وإنشاء الله أجربه بعطلة العيد وأعطيكم خبر عنه

عروان

24/11/2003, 11:42 PM

فرش القاضي ممتازه.

القماش الخارجي قوي.

أنا كنت بالحفر كاشت مع الربع و معي فراش لك عليه. وكان علينا برد ومطر

ولا جملها معي الفراش. الصبح الله يجيرك رحت لسوق الحفر وشريت المفرش

اللي يجي وجه فرو و وجه قماش ناعم. وخذيته للخياطين اللي بالسوق اللي

يسوون الطرابيل ولقيت عند قماش تنزاني أصلي جاهز حق فرش النوم قال الباكستاني

عطني عشر دقايق والبسه المفرش حقك. والله وسواه الباكستاني على كيفك.

وجربته في نفس اليوم وكان دافي بالحيل. وجربته في مطر و جملها معي.

وكلفني 220 ريال140 الفرو و80 ريال القماش التنزاني

تحياتي

المسفهل

25/11/2003, 12:05 AM

إخواني ما ذكرتموه عن فراش الدريويش صحيح قوي ويدفي ...

ولكن المشكلة التي تواجهني في فراش الدريويش هي أنه ثقيل

جدا أثناء النوم فيضغطك حتى ما تقدر تنفس وكأنه جاثوم على صدرك :D

فياليت يذكر لنا أحد من الأعضاء فراش يكون خفيف ويدفي ويكون واسع جدا

يقدر الواحد يأخذ راحته أثناء النوم مهما كان السعر بس يكون مجرب فيحكي

عن واقع وتجربة .

بــرق الشمال

25/11/2003, 01:07 AM

أولا ياهلا بأخوي البري ثانيا كل عام وانتم بخير عنديلك ياالغالي فراشين
لو تجربهن ان تدعيلي قرن الأول هو الدريويش بس انه منقطع من السوق
ولكن ولله الحمد لقيته باالقصيم(بريده)وباالملعونه وخته:D (وش دخل أخته)
والثاني فراش أمريكي بولستر 100 باالميه ويدفي تحت الصفر حوالي 22
يعني انواع الوناسه وهذا تلقاه عند الهدف بشارع التخصصي وعلى العموم
كلامي هذا من واقع تجربه ونرجع للفراش الأول من مميزاته يجي معه مخده
وذفه(صغيره ومريحه)وخامته جيده جدا من الداخل والخارج ويدفي وكانك ياالغالي
انت وألى احد أعضاء أو مشرفين مكشات يريد السعر أوتوضيح احد أماكن المحلات
فأنا باالخدمه (كم عندي موقع مكشات ايه يه تلقون احد يدلعكم ياحبيلكم).......:D :D :D

* رمش العين *

16/12/2003, 10:57 AM

السلام عليكم
بالنسبه للفرش وانواعها واسعارها وما قالوه الاخوان تقريباً غطى الموضوع لكن الي ابي اقوله اني رحة للغرابي السبوع الماضي ولقيت ان فيه نوعين لفراش الفرو عند اغلب المحلات وهي :
1 - فرو باكستاني وشراع تنزاني سعره 160 ريال
2 - فرو تركي وشراع تنزاني وسعره 180 ريال
3 - شي غريب ومحير لقيت محل يقول ان عنده الفرو التركي والشراع تنزاني سعره 300 ريال وسألته ليش سعرك مختلف عن باقي المحلات قال ان فروه اصلي والدليل ان الخياطة الي عليه خياطة كمبيوتر وهذا دليل انه من مصنع مهب شغل عمال اي كلام وبعد مارجعت على المحلات الي قالوا ان التركي ب 180 ريال فعلاً لقية الخياطه الي على الفرو ملخبطة وحوسه
الي عنه معرفه بالفرق بين النوعين يفيدنا وهل فيه انواع اخرى للفرو
وياحبنالنا

abos3d

01/01/2004, 01:28 AM

يا شباب غير الفرش الي عند الرمايه الي في شارع التخصصي خلها عنك انا ماخذ من عنده فراش قسم بالله العظيم اني نمت فيه في عز البرد العام وقمت اعرق وربي شاهد على كلامي خذيته بحدود 470 ويجي معه مخده وهو من برا شراع بني كنه حق خيمه وتشوفه ثقيل لكن النومه ولا احلى ومن جوا قماش قطن نااااااااااااااااااااااااعم وقسم بالله لو انه اغلى من كذا كان شريته وفيه انواع وبعدين وسيييييييييييييع مره يعني انا سمين شوي بس اتبطح فيه على كيفي فنصيحه لكم اشترووووووه

حد السيف

02/01/2004, 09:06 PM

اي واحد يسئل عن فراش البر
يشتري بطانية كوري 8 ك نفرين ويبطنها بقماش تنزاني ولاينسى المخابي
لاتنسانا من دعاك ادا دفية

محبكم اخوكم
حد السيف

ذيب البر

02/01/2004, 10:07 PM

أنا اقول مافيه احسن من الغرابي فصل على كيفك

فصلت لي واحد قبل ثلاث سنوات بالغرابي قماش تنزاني ومن الداخل فرو على كيفك

بصراحه بالبرد ما فيه زيه ما تدري وين تهب معه بس ثقيل شوي لكن

مهيب مشكلة اذا جربت دفاه

تحياااااااااااااااااااااتي