أيهما افضل لاندكروزر فيبر او ربع ؟

[آل مهنا]

أيهما افضل لاندكروزر فيبر او ربع.... و ماهي مميزات وعيوب كل واحد مقارنة بالآخر.

شخصيا افضل الفيبر لانه (حسب علمي) اخف و الشنطه اكبر(السياره بشكل عام اطول من الربع) و المقاعد بالعرض. بالاضافة الي انه الين واريح من الربع. لكن معلوماتي ماهي اكيده عن السيارتين.

مع العلم ان الفرق في السعر بينهما حوالي (10,000 ريال ؟) طبعا الفيبر اغلى.

من ناحية اخرى هل الفيبر افضل من الباترول ستاندر في الرمال (الطعوس و البر)؟

ليه مانشوف الفيبر كثير في الشارع (بعكس الربع) هل السبب عيوب فيه (ايش الي راد الناس عنه)؟

اخيرا هل سيتغيراللاندكروزر (الفيبر والربع) السنة القادمه (2004)؟

السموحه على كثرة الاسئله .

افيدوني رجاء يا اهل المعرفه و لكم جزيل الشكر.

اخوكم:
عنيد

[راعي البعارين]

يمتاز الربع بقرب الدفرنسات لبعضهن, وهذا أفضل في التطعيس على السيوف.ويقلل من التعلق.وأفضل للأخوان الذين يذهبون لصيد الأرانب في مناطق فيها شطوب صخرية كبيرة مثل "الحرة".
أما الفيبر فيمتاز بأتساعه من الداخل, لأن فيه مكان للعزبة والأمتعة بدون فك المقعد الخلفيز وهو أرسى من الربع في الممشى وأقل مطامر.بالأضافة الى التجهيزات الأخرى من قزاز كهرب وأمبيرات أكثر من موديل 85 حتى اللآن........وسلامتكم.

[الخبير]

السلام عليكم
و الله للاسف ما عندي ذيك المعلومات لكن ابي اقول إلي عندي
ما بينهن فرق إلا في أشياء بسيطة.
اولاً الفيبر معروف انه اخف من الحديد .
الفيبر الكراسي الخلفية بالعرض اما الربع فهي بالطول . طبعاً إلي بالعرض افضل لانه يعطيك مساحة خلفية لعفشك. اما الربع فكأنكم راكبين في دورية.
للاسف الفيبر ما تلقاه كثير عندنا هو بسبب سعره المرتفع. و لانه ما بينه و بين الربع إلا اختلاف بسيط في الإكسسوارات. و مثل ما تعرف الإكسسوارات مهيب مهمة لذيك الدرجة.

انت سألت بعد عن الافضل في الطعوس الباترول ولا الاند .
الصراحة تختلف الاذواق و الآراء ، لكن الإختلاف لا يفسد للود قضية، على العموم معرف ان الابترول افضل في الطعوس من الاند .
الاند إذا حطيته بالاول و دعست ليقته يثبت محله لكن الباترول يطمر ( يفز ) طبعاً يمكن يعيب الباترول إلي تتكلم عنه انت قوة مكينته. الاند الجديد بخاخات لكن الباترول إلى الان كربريتر.

[آل مهنا]

راعي البعارين:
تسلم اخوي والله ما قصرت... وان ماخاب ظني مشاركتك في موضوعي هي اول مشاركه لك. وهذا والله شئ يشرفني ويسعدني. وعلى قولك الفيبر يعتبر اوسع و ارسى في الممشى من الربع.

الخبير:
مشكور والله على تلطفك بالرد ....لا تقول ما عندي معلومات انت الخبير.:D
معلوماتك ماشاءالله وافيه وكافيه يخوي.... بالنسبه للسعر والله انه فعلا فرق كبير جدا (10000ريال)... لكن الشكوى لله مابقي غيره قدامي.

بالنسبه للباترول فبالاضافه الي انه كربريتر (صرفية البنزين فيه كبيره) فهو يتهربد بسرعه و ماله سوق في البيع بعد الاستعمال زي اللاند (الخوف ان الفيبر يفرق هنا ويطيح بكبدي).

اكرر شكري لكم كلكم على ردودكم و مشاركتكم في موضوعي.

عنيد

[وجه الخير]

الاخ العنيد ان انصحك بالفيبر لانه الين ونزل الان بالشارقه استعمال ياباني فيه مواصفات روعه من قير تماتيك وكهرباء وديفلك ودبل كهربائي ودفايه للمرتبه الخلفيه وكراسي زيvxrمع ونش للسحب امامي ايظاً برفارف وجنوط لكزس
ونا ارفق صورته هنا
http://www.mekshat.com/pix/upload/images/jeep11.jpg

[وجه الخير]

وهذا ايظاً اربعه ابواب
وعلى فكره محرك السياره ديزل6 بستون
http://www.mekshat.com/pix/upload/images/jeep12.jpg

[آل مهنا]

وجه الخير.... والله انك جبت العلوم الي انا ادورها.

هل تقصد باستعمال يباني سيارات مستعمله في اليابان ولا سيارات جديده مخصصه لليابان؟
كم الاسعار للجديد 2003 و المستعمل؟ (اذا عندك علم بالاسعار).

مع خالص شكري .

[جــلــمــود]

السلام عليكم

استخدام ياباني يعني سيارات مستخدمه باليابان وتباع في الامارات
وهذا يعني أنها كانت ( دركسون يمين )
وهذا النوع من السيارات ممنوع دخوله للمملكة لانه كما يشاع بعد تغيير دركسونه ونقله من اليمين لليسار ونقل الضفيرة والاسلاك تحت يدي عمالة غير مدربة لاتتقن العمل ترتكب اخطاء في توصيل الكهرباء من جديد قد تسبب هذه الاخطاء اخطار على قائد السيارة كالحريق مثلا بسبب الالتماس
او تهاون في تثبيت ذراع طارة القياده ( الدركسون )

ولكن يوجد في الامارات في منطقة البريمي المشتركة جيوب فيبر عماني مستعمل وجديد
ولكنه يحمل مواصفات ممتازه جدا لاتتوفر في مثيلة وارد عبد اللطيف جميل

وشكرا

جـــلـــمود

[آل مهنا]

اخوي جلمود....

شكرا لك على النصيحه.... انا فعلا لايمكن اشتري سياره مغير مكان دركسونها... لكن سؤالي لاني مافهمت المقصود.

على اي حال البريمي اكيد فيه مواصفات احسن من اي مكان بالخليج... واي مكان في العالم تلاقي فيه مواصفات احسن من هنا...

والله عندنا GXR2002 اخذه الوالد من شركة عبداللطيف جميل (حرمت بعده اشتري من عندهم). طبعا حرمت لاني شفت الجيوب القطريه والعمانيه والاماراتيه يخوي تفرق كثير في المواصفات (لا والكايد ان سعرها اقل بعد) يعني هنا موت وخراب ديار (اسعار غاليه و مواصفات خايسه).:mad:

انا ابغى لاندكروزر فيبر و المواصفات الي ابيها هي كالتالي (قير عايدي - مقاعد سنعه غير الي هنا تكسر الظهر - هزاز - ثلاجه صغيره - جنوط وكفرات عريضه - مكيف - تحكم ايتوماتيك بالزجاج )

(:D وياليت مثبت سرعه و ريموت كنترول بعد :D ).

مع الشكر.

[راعي عنيزة]

شف يا خلفهم

الربع دارج اكثر في السوق وهو يعتبر شيك قيمته ما تطيح

اما الثلث عرضه قليل والطلب عليه اقل واخاف تاخذه وهو شايل قيمه وعند البيع ما يجيب لك مثل الربع

وعموما الربع والثلث كلهم مطب والرساوه الله بالخير وماهنا مواصفات تستاهل


لذلك كانك تبي شور يجمد على الشارب فكر بذا المزيون
http://www.nissan-me.com/pathfinder/images/path_gal_b_img6.jpg

مريح جدا ومواصفاته فخمه ومراتبه ملكيه وورا وسيع بالحيل وياخذ عزبتك كلها وفوقه شبك يشيل رواقاتك وخيمتك وفوق ذا كله 250 حصان يعني نفس قوة ال VXR ثمانيه سلندر ‍‍!! وسعره اقل من سعر الربع

ولا تنسى انه عملي بالديره وبالخطوط وبالبر ، مهب مثل الربع ما ينفع الا بالبر اما بالديره والخط كسافه بكسافه

وانت ابخص يا غالي

[(طيرشــــلوى)]

بالنسبة للمعلومة التي ذكرها راعي عنيزة ( بلدياتي - يعني من نفس الديرة)
الPathfinder أنه 250 حصان غير دقيقة لأن كل كاتلوجات سيارات الدفع الرباعي ذكروا أنه 240حصان يمكن الأخ العزيز راعي عنيزة سأل عنه في الوكالة وهم عادة يزودون شوي, وعموما هذا المحرك مجرب علىالجيب الأنفينيتي من عام 2001
وتم تطبيقه على الباثفايندرعام 2003 يعني الموديلات الي من 2002 وتحت محركها 185 حصان فقط .
تقبل خالص تحياتي ياراعي عنيزة...........

[آل مهنا]

راعي عنيزه....

بالاول اعذرني على تأخر الرد.... والله لي مده احاول ارد لكن الموقع ما يسمح لي... الحمد لله ان المشكله انتهت...

بالنسبه لرأيك في الربع وانه سيارة بر فقط (هذي مايختلف عليها اثنين) وانا معاك فيها 100% و هذا الشي هو الي مرددني لشتريه... خاصه اني ابو عيال واخذهم كثير معي للطلعات القريبه.

الباثفيندر والله سياره جيده (لكن صدقني اخوي انه سيارة مدينه اكثر منه سيارة بر) طبعا السيارة قوتها كبيره لكن حسب معلوماتي المتواضعه ان المهم في الرمال هو العزم وعزم السياره ضعيف مقارنه باللاند والباترول. بالاضافه الي انه سيتغير السنه القادمه.

على اي حال انا قررت اخذ سياره مستعمله(نص عمر) وبعدين ليا تغيرت الباثفيندر اقرر اشريها ولا لا.

الاخ طير شلوي:
السياره باثفيندر يختلف محركها حسب القير (250 حصان مع القير العادي و 240 حصان مع الايتوماتيك) هذا حسب ماصرح به الخبراء هنا.

مع خالص تحياتي .