يا اهل الترهيم : يايات الشاص الامامية المقفله هل تركب على الباترول

[sgl2002]

ياشباب عندي الباترول ٩٩ ابي اخلي وجهه ثابت


ركبت مساعدات شاص امامية ولكنه مازال وجه مع البطناج القوي بالنفود ما هو ثابت ويضيع عزم الموتر بسبب البطناج

بغيت اركب ياي استرالي امامي بس ما ابي وجه الموتر يرتفع زيادة


ففكرت اركب يايات حقات شاص سلق اللي تجي مقفله بس ما ادري تركب او لا واخاف تكون قصيرة ؟؟

[باترول 4500]

دبل مساعدات مرسيدس أزين لك

[خبايا انسان]

ياخي خذ ياي استرالي وقصة على الارتفاع الي تبيه

[sgl2002]

طيب احتررت بين التدبيل وبين الياي

التدبيل يقولون ما تصير السياره تلف لفه كامله

والياي مدري اذا انقص يبقى نفس الاداء او لا

[ls1.5700]

هلا اخوي اس جي ال
انا لو منك اركب ياي استرالي مع تدبيل مساعدات مورسيدس
ولو فيه قساوه شوي بس حلو مايخلي السياره تهابد ولا ياخذ المطب
تعرف ياي الباترول فيه ليونه زايده مايصلح للمطانيج
انا مجربه على باترول 95 مرهم 8 سلندر
ومدبل مساعدات موسيدس
عزالله من ابدع مايكون
اقمز الطعس على كبره ولا عنده مشكله
تقبل مروري بود

[You Like Me]

السلام عليكم ورحمه الله


لا تغير الياي خل حق البلد
بصراحه كل سياراتي ادبل مساعدات اماميه سواءً ربوع او صوالين
اول مره اسمع ان لها دخل بقصر او طول اللفه
ماعليها إلآ العافيه إن شاء الله


اذا انت راعي مراقي اومحلاتك بطناجها اقشر دبل مساعدات مرسيدس وريح سيارتك ونفسك
واذا راعي مسكات احياناً ركب مساعدات
اولد مان الاستراليه تفي بالغرض وزود

[abo naser 1]

ياشباب عندي الباترول 99 ابي اخلي وجهه ثابت


ركبت مساعدات شاص امامية ولكنه مازال وجه مع البطناج القوي بالنفود ما هو ثابت ويضيع عزم الموتر بسبب البطناج

بغيت اركب ياي استرالي امامي بس ما ابي وجه الموتر يرتفع زيادة


ففكرت اركب يايات حقات شاص سلق اللي تجي مقفله بس ما ادري تركب او لا واخاف تكون قصيرة ؟؟

السلام عليكم شف أخوي التدبيل مايصلح للبلد ابد ابدا والله ان تكسر انت واياه ان كنت راعي نفود اكيد بتجي شاد العزم من بعيد وبيصير يطامر وكل طمرة يضيع شوي من العزم بينما لوكان قساوته مناسبة يصير الموتر ماسك
تدري وش المشكلة عندك ان ياي البلد الي عندك لين مع الوقت والاستخدام فلذلك اكيد يبي يهابد الحل اذا ماتبي ترفع وجة الموتر ركب ياي أصلي وكالة مع مساعد شاص وشف الفرق وشيك شيك على جلدة المطب لاتصير منقطعة وهذا من أكبر الاسباب للمهابد
وتراي مجرب كنت اعاني بباترول 95 جربت الاسترالي والتجاري جديد حصاة ماهو ياي وبعده وكالة جديد مع مساعدات بلد محرك بلد ارتحت امشي عليه بالنفود قبل المرقا الى 110 بالدبل الثقيل بالخامس مايلحق ابد من اخواته عز الله انه دبل وقير ودفرنس 100% والي يقول يضرة مايعرف الباترول
والأن معي 98 علية مراوح وهدرز اخو موترك ياي شد بلد ومساعد شاص كفراته هنكوك دعسة شاهين احط هواه 12 ويالثقيل بالنفود مايردة شي ولا عانيت لا مهابد ولاغيرة مع سرعات عالية بالنفود



هلا اخوي اس جي ال
انا لو منك اركب ياي استرالي مع تدبيل مساعدات مورسيدس
ولو فيه قساوه شوي بس حلو مايخلي السياره تهابد ولا ياخذ المطب
تعرف ياي الباترول فيه ليونه زايده مايصلح للمطانيج
انا مجربه على باترول 95 مرهم 8 سلندر
ومدبل مساعدات موسيدس
عزالله من ابدع مايكون
اقمز الطعس على كبره ولا عنده مشكله
تقبل مروري بود



أخوي كلامك 100% بس على المرهم مايحتاج تجي طاير مسافة 100 متر بالكثير لشدة العزم كافية لأن التدبيل والياي الاسترالي المقصد منه رفع الوجة وعدم النزول لحماية المحرك من الدفرنس و السلف وعامود الدبل ولو باليد مادبلنا بس لأستخدام النفود معي موتر استخدام يومي والله ما احركة كثير بسبب القساوة تصدق ان الفرشة الارضية كلها شاهي وقهوة ماكثر ماتنكب والله كم مرة ارجع البيت اغير الثوب بسبب قهوة الله من لعنة ولعنة الله يعفو عنا بس المشكلة اذا عطيتة ابنص نسيتا هذا كله وخسايرة وتعبة

[sgl2002]

عز الله انكم كفيتو ووفيتو وماقصرتوا

انا حاليا مركب مساعدات شاص امامي لكن مازال المهابد والظاهر انه الياي اللي رايح فيها

لانه من وكالته ما تغير

بحاول ارهم ياي شاص لانه قاسي وبشوف يركب والا احط ياي الباترول نفسه

[سراي-01]

انا موتري مدبل وكفرات دنلوب واللفه كامله ... ركبت بوالين قصرت اللفه وزنت اللفه وزانت الامور ... باختصار التدبيل فلله ... بالتوفيق

[باترول 4500]

انا حاليا مركب مساعدات شاص امامي لكن مازال المهابد والظاهر انه الياي اللي رايح فيها

مساعد الشاص مجربه أنا مايمسك وجه الموتر مثل إذا دبلت مساعدات مرسيدس
أتوقع حتى لو غيرت الياي ماراح تستفيد
إذا تعرف أحد معه باترول جرب بدل معه اليايات

[sgl2002]

طيب ياشباب وين الورش المشهوره بالتدبيل في الرياض

[has-120]

اللي أعرفه
ورشه الخليج في الصناعيه القديمه
بس شرط يكون شغل الفلبيني

[anas]

مشكورين,,,,,,,,,,

[ابوسند9]

اخوي
sgl
ركب طقم ياي استرالي خلف وامام وريح عمرك وبلاش خساير مرتين
ومنها حمل اللي تبي ولا ينزل ولا شي ومنها لو تجي تمشي 160 وتطمر عقم ما عندك مشكله

[خبايا انسان]

ورشة مرات ف الصنعية القديمة ممتازة

[abo naser 1]

ورشة مرات ف الصنعية القديمة ممتازة

هي ماهي ممتازة لأكن أفضل السيئين في الرياض انا مدبل عندهم مرهم لحامة زين لا بأس بس ماهم دقيقين وش ترجي من ابو يمن

فرق بينه وبين التدبيل عند الصمعاني

[وجعين]

مشاء الله على جودة الصناعه في شركة تويوتا كلش ركبوه للباترول من مكينه الى مساعدات الى يايات الخ....