اذا خيروك بين سيارتين وش تختار

[مبارك الشمري]

السلام عليكم ورحمه الله وبركاته

أخواني اعضاء المنتدى الغالي

واحد من الاخوان عندي بالعمل محتار بين سيارتين ويبي الرأي الافضل
من جميع النواحي طبعاً بيأخذه جديد .....

بس أهم شي من غير تحيز !

الاول / سييرا غمارة دبل أرضي
الثاني / باترول نيسان حوض


ويعلم الجميع أن الانسان محاسب على كلامه وأن أي موضوع يطرح هنا بالمنتدى هو فائده للجميع .....ولكم جزيل الشكر

[على رمشي تمشي]

والله ماجربتهن - بس تقل عندي الباترول ممتاز والله وحتى سييرا - كلهن بهن الخير والبركه - اهم شى استخر

[sgl2002]

اختار الباترول


نظام تعليق قوي ومكينه قوية ومريح في نفس الوقت وسعر معقول وفوق هذا ياباني ، لاتخاف لاصرت بنص الصحراء يقطع بك مثل الامريكي

[طواش]

اذا انت راعي بر وطلعات اخذ البترول بلامنازع
اذا انت تبي الراحه والرفاهيه السييرا اريح لكن احيانا يشكل فيه الكهرباء والدبل يعلق

[دحيم الفزعة]

السلام عليكم ورحمة الله

للأمانه ما جربت السيارتين


لكن عن نفسي لو بشري حوض شريت شاص نيسان بدون مشاور


ودمت بود ===

[ابونبيل]

لو اني مكانه باخذ الفتك مع ان وكيله ماينبغى لاكن اطلق من الامريكي عله القير يحتمي ومانع الانزلاق حتى اذا فصلت فيوزه يمسح عليك القماشات


لاكن اهم شي يكون مقتنع لان الجموس منتشره اكثر في ناس واجد اذا ما اقتنع كل ماشاف موتر غير موتره الي شراه يتحسف ويقول ياليت

وطبعاً اذا هو من ذا النوع خله ياخذ الجمس لانه يمسك سعره اكثر من الفتك يعني اذا مابغاه مايخسر واجد زي لو خذ نيسان

[Salamah.y]

عليكم السلام و رحمة الله و بركاته

,

و الله يالغالي كل واحد و استخداماته و الغرض اللي يبيه من السيارة
اما انا لو كان ما قدامي غير هالخيارين ,, صراحه أختار النيسان 4800 بدون تردد
طبعاً , هذا بالنسبة لي شخصياً , و لأن الخيارات محصورة بين هالسيارتين فقط

,

و عسى الله يوفقك ويوفق خويك و كل من يقرأ

@~

[ابوسند9]

اخوي مبارك
زميل لي كان معاه سلفرداو باب واحد 2010 وراعي رميات با الشمال
با عه واشترا باترول حوض والرجال مبسوط منه
واهم شي استخر

[صياد الجبل]

الاستخاره اولا

ولو انا مكان خويك

اخذ الباترول الحوض فتك 4800

[((ابوملاك))]

والله بالنسبه لي انا لو فيه خيار ثالث كان الشاص لكن على كذا لا والله باترول فتك حوض

[abo naser 1]

السلام عليكم

وانا أخوك اذا صاحبك يستخدمة بالصحراء وراعي مكاشيت فلا تعدى الياباني وخصوصاً اذا انت تقصد الدبل ارضي HD2500 كأنه صالون حجمة كبير الشاص أوذف الأمريكي يقرقع مع الوعر مايتحمل القير والدبل والدفرنسات ماهي مثل النيسان في قوة التحمل

[أبا مجاهد]

والله الرجال اذا كان راعي قنص وكشتات فعليه بالباترول

مع العلم اني من عشاق الجموس والجمس قمه بالفخامه والرساوه والقوه..لكن وخصوص الجديد يبيله مداراه

[التعـ King ـديل]

حوض نيسان خفه ونشاط لايقدر بثمن

[اكسير الحياة]

اخوي النيسان اثبت نجاحة قبل الفتك وشف اسعاره من الشكل 88 الى 97 ومن موديل 98 الى 2009 اسعارها ترتفع ما تنقص لانها نجحت اكثر من التويوتا فما بالك بالأمريكي اللي ينفع خطوط فقط ... النيسان انحش منه اذا بدأ يطلب لانه ما يرحم ابد ولكن جديد خذه ولا تشاور

[abusaeef]

يامبارك السلام عليكم انا جربت الجمس زد سفن ون الفل كامل غماره 2008 مشي 240 الف طلعت عليه بران ونفود ولا فيه مكان ماجيته لا ظلعان ولا طعوس وبعته قبل شهر ما غيرت فيه شي ابد ولله الحمد بس يحتاج لك مساعدات قويه اماميه وترفيعه شوي 3 سانتي وكفرات بف قود رتش الل ترين او كوبر مد وعندي افضل من البترول مليون مره وانت استاجر واحد وجربه

[أبوفيصل 2007]

حاول تستأجر السيارتين او تشوف احد من معارفك لدية السياراة وجربة خميس وجمعة وعليك في الاستخارة
لاتغمار بشراء سيارة وانت لم تجربها وما يناسب غيرك قد لا يناسبك
بالتوفيق إن شاء الله

[4x4ofroad]

يبقى النيسان اجود من ناحيه المحركات والدفرنسات والعضلات
والناس اذواق
ولو خيروني بختار النيسان