تكفون ابشاوركم

[mohamad_2010]

السلام عليكم ورحمة الله وبراكاته . .

كيف حالكم ياعضاء هذا المنتدى الي اكثر من رائع
يأخوان ابي اشاوركم ابشتري موتر بس محتار جدا بين شاص تويوتا وشاص نيسان كلها 2012
ابي الفرق والاحسن بينهم تكفون يالنشاما . .
:good2:

[(هزاع)]

انكان النقدي متوفر ولاعندك مشكله به
عليك بالتويوتا الشاص
راكب اللي كـن زولـه زول ذيـب == =ان نطحتـه .. وان قفيتـه مـن ورا
وان عرض لك قلت مابالوصف ريب === جنب ذيب ٍ لاحقـه جـوع وعـرا
شاصي التصميم لاند كـروز جيـب === مايبيعـه مــن شــراه ليـاشـرا
مايبيعـه غيـر مـردي النصـيـب === او مـن يحـده علـى قروشـه زرا
مايهـمـه لانـفـود ولاجـذيــب === ولا الطلوع اللي مثـل طلعـة كـرا
لاهمزو قير أدبله .. جالـه نحيـب === مثل مـن ميتـه علـى بالـه طـرا
ناحل الاطـراف تصميمـه عجيـب === مع سمـاح الـدرب مشيـه بختـرا
كـن جـرات الربابـه بالسبـيـب === صـوت ماطـوره ليامنـه ســرا

[abusummer]

الشاص معروف و النعم
وشاص النيسان بعد ما حطوله ماكينة فتك غير شكل لكن اسئل مجرب

[ريف النشاما]

الأمر يعتمد على عدة أمور

- البيع التيوتا أفضل
- الراحة النيسان أفضل
-القوة والتماسك التويتا أفضل
- الطرب / كلها تطربك
- الخفة والفزة / النيسان
- قوة التحمل وأكل التربان التويتا
- تكسير الظهر والمناقز الشاص أقوى:D

وتكفيك هالصورة مشاء الله
http://up.albrari.com/uploads/13617909405.jpg

[sgl2002]

تبي نصيحة مجرب


ما تكمل شهر الا والشاص تويوتا مطفشك

لا رساوة ولا راحه ولا مكينة تجمل خصوصا الجديد وسعره غالي

اذا تحميلك ماهو واجد عليك بالشاص النيسان

[You Like Me]

تبي نصيحة مجرب


ما تكمل شهر الا والشاص تويوتا مطفشك

لا رساوة ولا راحه ولا مكينة تجمل خصوصا الجديد وسعره غالي

اذا تحميلك ماهو واجد عليك بالشاص النيسان

:good2:
.

[راعي المجهم]

والله ثم والله ثم والله

أن أستخدمت الشاص لتعاف كل سيارة بر بعده

موتر يطرررررربك وسواقته طرررررب

والي يشريه مايبيعه ابد

[Salamah.y]

عليكم السلام و رحمة الله و بركاته


و الله , كل موتر يتميز عن الثاني بشيء
و لكن انت شف وش استخدامك له و حدد مبتغاك

اشوف ان النيسان يتفوق على التويوتا بثلاث حاجات
1- الراحة 2- قوة المكينة خصوصاً بالرمل 3- السعر أرخص

اما باقي الأشياء , تصب لمصلحة التويوتا
من شكل الى تحمل , الى سعر بيع , الى توفر قطع , الى وكيل , الى تحميل

عيب التويوتا , ظعف المكينة نسبياً و قلة عزمها
كذلك السعر نار , و الراحة صفر على الشمال << و حلاته بمناقزه يطرب !!

,

و عسى الله يوفقك بالإختيار الأفضل

[mohamad_2010]

الله يعطيكم العافيه وبيض الله وجيهكم ..
ماقصرتو يالربع . .

[خبايا انسان]

شف يا اخي الكريم ,, في مجتمعنا السعودي السمعه والموضه هي الدارجه ,,

شاص التيوتا من عام 2000 وهو كد ومد وسمعته بين الناس مشهوره والكل يتمنى يقتني هالموتر بصراحه ,,

فعشان كذا الناس تمسكت بشاص التيوتا وصار عادة عند الجميع ,,


اما شاص النيسان طلع من زمان بس للاسف مكينته كانت ضعيفه نسبيا بشاص التيوتا ,, ولكنهم توهم يطورونه الحين بعد 10 سنوات تقريبا ,, ف شاص النيسان يبي له فتره لين تقتنع الناس فيه ولين يبرز وجوده بالسوق ,, ماتدري يمكن تشتريه السنه ذي ب 105 الاف ويمكن السنه الثانيه يشتهر ويوصل سعره لشاص التيوتا ,,


عموما لو انا منك صراحه اخذ شاص التيوتا من 2009 وتحت لان مكينته راس واحد واقوى ,,

[ابوسند9]

شاص نيسان
ياي
مكينه قويه
مافيه تنسيم هواء بالخطوط
راحه لدرجه ما تتخييل
تطرد فيه ولا تخاف
تضرب جلد ورادميه 500كيلو ما تحس بتعب
بالخطوط راسي
سياره كد ومد
وان كانك رعي تحميل ياي استرالي وحمل اللي تبي
والشاص التايوتا عكس ما ذكرت لك
ونصيحه لو تجرب الاثنين وتشوف الفرق
ولا تعتمد على نصائح ناس ما جربت
والمفروض خليت العنوان من جرب الشاص النيسان والتويوتا
وادخل رابطة ملاك الشاص النيسان وخذ راي اللي جربو
وعلى العموم السياره انتشرت عندنا بالقصيم بكثره
واخير الله يكتب اللي لك فيه خير

[abo naser 1]

السلام عليكم

مافية كلام شاص التويوتا أثبت جدارته بلا منافس لفترة من الزمن وحتى الأن

لأكن رايي الشخصي
1- قوة المحرك والقير والدفرنسات لصالح النيسان
2- رساوة في الخط والجلد بشكل مميز
3- راحة تامة شبيهه براحة الباترول الصالون
4- لايوجد تنسيم هواء في الخطوط
5- السعر منافس جداً الأن سعره سعر هايلوكس غمارة دفرنسين 4 سرندل ولا تستغرب حسب ذكر أحد الأخوان السنة الجاية تأخذة ب 140 الف

[التعـ King ـديل]

ادفع 110 الاف على شاص نيسان بمكينه طرب 4800 وثلاجه ودفلك وموتر مريح وراسي بالخط

ولا ادفع 160 الف على شاص تويوتا مافيه غير دفرنس ومكيف ومكينه راسين 4000 يبرد عزمها


بس اذا خذت شاص تويوتا لاتنسى تفتح ملف في عياده العظام في الحبيب لانك بتكون زبون VIP بمراجعه العياده من الالام الظهر