يا إخوان محتاج نصيحتكم في شراء سيارة

[ar17]

السلام عليكم ورحمة الله وبركاته
أحبتي الكرام انا أبغى اشتري سيارة للبر أبغى أتمشى وأروح واجي عليها وفلوسي تقريبا 40000 ألف ريال
عرض علي جيب 98 نيسان صالون ب 40
وجيب آخر ب 38
ومحتار هل اشتري ونيت وإلا ددسن وإلا جيب
علما باني عندي سيارة صغيرة لكن طفشت أبغى أروح البر وأشوف الطبيعة وزي كذا
أتمنى تساعدوني في اتخاذ القرار ولكم منى خالص الشكر والتقدير

[sgl2002]

خذ الباترول بس تاكد من الحرارة وجنزير الدبل

[أبا مجاهد]

والله وانا اخوك حاول تزيدها 5000 وخذلك باترول 2002 فتك4800 افضل خيار كان معروض علي واحد نفس الموديل بهالقيمه

[ذيب خزاز]

خذ الباترول بس تاكد من الحرارة وجنزير الدبل

كلاااااام سليييم:good2:

[ls1.5700]

خذ الباترول بس تاكد من نظافة الموتر
يعني اهم شي المحركات
مثل القير والدبل
طرقة فحص الدبل والقير
تعشق الدبل بـ الاسفلت وتلفه يمين ويسار وديور خذ لفه كامله
اذا فيه طقطقه معناته الزنجير يحتاج تغيير
وبعدين حطه على حفره وناظر هل مفكوك الدبل والقير من قبل
يعني يبين من المعجون على اطراف الوجه
والمسامير تحصلها معروشه من المفك المفتاح
وهاكذا الدفرنسات يعني نفس الطريقه تناظرلهم كلهم
والمحرك هو اهم شي
اول شي فك العيار وناظر الزيت وشمه اذا فيه ريحة حرق او قالب لونه اسود
قد تكون المكينه تحرق الزيت يعني ماتطول تطلب شنبر او توظيب
وشوف الراس مفكوك من قبل او لا
ترى يبين من المعجون او اثار المفك على المسامير
وناظر صدر المكينه اذا مفكوك يبين
الشي الثاني
الحراره
رح عليه مشوار طويل شوي وشغل كل المكيفات الامامي والمركزي
وناظر العداد كم تاصل حرارته
ولا تنسى الشاصي هو اهم من المكينه
قصه من اوله الا اخره
كلامي هذا سوا شريت الباترول او غيره
على اساس تكون عندك خبره شوي
والا اللحين تودي الموتر كمبيوتر ويفحص الموتر كله بـ 250 ريال
مادام فلوسك 40
عنك خيارين
الباترول
او فكسار 95 او 94 والله يطربك ويصبر معك دام الحياه
وقيمته بحدود 40 النظيف
انا تو بايعه بـ 35 لونه زيتي 94 زي الورده
وانت وكيفك
استخر وشوف وشـ اللي يصلح لك
والله يكتب اللي فيه خير
واسف على الاطاله
ومع السلامه وفي حفظ الرحمن

[أطلال نجد]

و عليكم السلام و رحمة الله ،،،

٤٥ ما تجيب لك جيب صاحي و أنا أخوك مع أحترامي لأراء الأخوة خذ الشور و دور لك هايلكس غمارتين دفرنسين أو ددسن أو أيسوزو ديماكس بتحصل موديلات حديثة إن شاء الله و ماشيه قليل بحدود فلوسك و تقوم بالغرض و زيادة لا خرابات ولا تقطيع و لا صرفية بنزين و فوق هذا معك صندوق تشيل فيه أغراض البر.

و الله يوفقنا و إياك و كل مسلم

[ar17]

الله يجزاكم خير
والله العظيم شاكر ومقدر لكل من رد
اسأل الله أن يوفقكم ويسعدكم ويصلح لكم
والله انا متواجد في القصيم وبصراحة حاط برأسي الباترول
اليوم حصلت واحد موديل 2000 قير أوتوماتيك فتحه ونظيفة على يد صاحبها وكالة ماشية 420000 طالب فيها 44 ألف قال افحص بكيفك
وايش رأيكم افضل 98 العايدي أو 2000 الأوتوماتيك
واللي عنده شئ يناسب يعلمني سوا ونيت أو جيب
ولكم منى خالص التحايا يا كرام

[باترول للأبد]

العادي أنشط الا أذا كانك تبي الراحه وما همك فارق النشاط

[sgl2002]

لا لا لا


انتبه ثم انتبه تاخذ باترول تماتيك من ٩٨ الى ٢٠٠١

حرارة وتكييف ضعيف وعزم فاشل جدا جدا


بعدين اللي انت محصله غالي وحده لو انه ايش مايتعدى ٣٥ الف

اذا بغيت تشري عليك بالقير العادي ورهم له على طول طرمبة بنزين فتك ومساعدات شاص وسو له تصفية كامله

وشيك على نظام التبريد عند العضو مركز حرارة عندك بالقصيم


المهم اذا شريت علمني عشان يضبط الموتر وانا مستخدم ٥ باترولات من هالمديل

واخر واحد معي الحين ومريحني

[ar17]

والله حيرتوني
انا الآن الموجود عندي ٩٨ قير عادي يبغى فيه ٤١
واللي موديله ٢٠٠٠ قير أوتو وطالب ٤٣
طبعا هذولي أنظف شئ لقيتهم
وإلا حصلت ب ٢٨ وب ٣٠ بس مؤ نظيفة

[باترول للأبد]

توكل على الله الباترول الزين سعره في بحر الأربعين فما فوق والرخيص ردي

[ar17]

أخوي باترول للأبد
يعنى اعزم على أي واحد ال ٩٨ وإلا ٢٠٠٠
والأخ sgl2002
خوفتنى من الأوتوماتيك
هل تتكلمون من واقع تجربة وإلا ايش

[أطلال نجد]

موديل 2000 و ماشي فوق الـ 400.000 ألف هذا يا أخوي منتهي

إذا أنت معزم على الباترول دور موتر نظيف و ممشاه أقل من 300 ألف


و زود العشرة في النظيف ترى ما هي واجده


بالتوفيق

[(((.ابوتميم .))))]

انا اقول هايلكس او ددسن دبل طبعا
موديل حديث وقليل الخرابات ويكد

[ابن روزه]

تبي نصيحة مجرب خذ لك سلفرادو حوض غمارة ونصف دبل ارضي موديل ٢۰۰٤ في هذا الحدود تراه موتر جبار واقتصادي وعندك حوض وسيع ويتسع لسبعة ركاب

[ابونبيل]

اخوي انصحك نصيحه لوجه الله دام هذي قرىشك ترا ماتجيب جيب صاحي انصحك تدور لك علىدحوض ددسن دبل موديل حديث تحصل ٢٠٠٧ او هايلكس او ونيت جمس دبل صدقني ابرك لك من الجيوب غاااليه وبتعذبك بالصيانه خاصه الباترول اذا طلب طلب

[بدر سليمان]

شف وانا اخوك .. ابقولك عن سيارة ومن وواقع تجربة فعلا مميزة وصبورة بشكل يفوق الوصف.. واكثر من يستخدمها بالسعودية هي الجهات الحكومية والقطاع الخاص.. يمكن تواجه مشكلة بالبحث عن السيارة يعني يبي لك تكون نشيط حبتين علشان تمخمخ وانت تدور,, طبعا طولت عليك ولكن السيارة هي ميتسوبيشي باجيرو.. يجي نوعين اربع ابواب وبابين وخذ حاجتك.. انا جربت الباجيرو الربع من اروع مايكون صبر وراحة ونشاط وقطع غيار اصلية وتعيش بشكل مهوب طبيعي ولكن كان عيبه معي هو حجم السيارة كان صغير نوعا ما بس انت تقول معك سيارة ثانية وتبي بس للبر.. يعني فك المراتب الخلفية وتبي تشيل.. واذكر اسعار ال 2005 النظيف بحدود المبلغ اللي عندك,,, اتمنى لك التوفيق

[ar17]

الله يجزكم خير على النصيحة
بصراحة
فعلا كلامكم الجيب قديم 98
واللي في بالي جيب نتيفا لكن ناس تقول بعض القطع ما تلاقيها حتى في الوكالة
وأنا جربته النتيفا حق واحد بصراحة يستهلك بنزين وكان القير أوتو

[أطلال نجد]

النتيفا قوي و غني عن التعريف و بالنسبة لقطع غياره فهي متوفرة و نصيحة لا تعتمد على ربع يقولون رح للوكالة واسأل عن قطع الغيار وأسعارها و عن أي استفسار يهمك و بعدها قرر بس كل اللي أقدر أفيدك فيه أن السيارة قوية وصبورة و كثير من اللي جربوها يثنون عليهابالتوفيق

[قدها ونص]

لاتشتري موديلات تحت 2000 والله ونا اخوك غير تدفع قروشك وتقعد تقاسط هلورشات
الحين كل شي غالي القطع وشغل يد العمال وقفت الورشه لحالها ترفع الضغط

انا اقول خذ كلام الاخوان دورلك موديلات جدد هايلوكس دبل او باجيرو او وانيت او ان شاء الله خذ صيني دبل
ولا تقرب القرنبع الي اكلها الزمن وشرب .

ونا اخوك كسبوها شيبانا عام التسعينات سيارات رخص وقوه وقطع بلاش وقله خراب

اما وقتنا ذا كلن يبي يمص جيبك ارحم شي الجديد حاليا .

اما هسيارات القدام يوم تحسبها لانت تدفع عليها قسط سياره 2013 .
اما خراب ولا صرف بنزين ولا صينات الخ .؟؟ واخرتها ماتحس امان بسفر البعيد .؟

مامثل الجديد ونا اخوك لامن حطيت سلاحك تحت المرتبه وخذت اهلك وقمت تحوف الديار حوف .؟؟ويدك على قلبك .

علعموم الله يحفضك ويكتبلك الي فيه الخير .؟؟

[sami2003]

النتيفا قوي و غني عن التعريف و بالنسبة لقطع غياره فهي متوفرة و نصيحة لا تعتمد على ربع يقولون رح للوكالة واسأل عن قطع الغيار وأسعارها و عن أي استفسار يهمك و بعدها قرر بس كل اللي أقدر أفيدك فيه أن السيارة قوية وصبورة و كثير من اللي جربوها يثنون عليهابالتوفيق



كلام سليم 100% .

معي نتيفا تبع الشركة موديل 2010م ، سيارة قويه و اقتصادية بالنزين !!! لكن عيبه تكيف امامي فقط و ارتفاع الحراره في بعض الاحيان رغم انها مشكلة طبيعيه ، وتروح الحرارة اذا دبلت راح تنزل الي الطبيعي ( في درجات حرارة فوق 48 مؤية بالرياض وقت الزحمات )

سيارة مرنه وخفيفة وعمليه جدا جدا .

[abu-turki2009]

أسمع وانا أخوك لاتشتري أي سيارة دبل بالشتاء لأنها بتكون غالية لوهي ماتسوى والأمطار أنتهى موسمها والربيع مابقى منه إلا خير. أنتظر بداية الصيف وبتنزل أسعارها

[4x4ofroad]

بصراحه الباترول من 98 الى 2001 يجيب المرض
لا عزم ولا اقتصاديه ولا شكل
مافي اي شي يشفعله بصراحه
عندي ال97 اجمل وانصب منه والنظيف سعره ماسك
وشور الاخوان بالباجيرو والناتيفا والهايلكس الدبل شور طيب
هذي وجهه نظري وكلن له راي وذوق