استفسار عن نظام تأجير السيارات من بنك الراجحي

[KENANI]

السلام عليكم ورحمه الله وبركاته

صلّوا على النبي اللهم صلّ وسلم عليه

العلم سلامتكم

انا رجال اخذت من الراجحي سيارة كامري GLX 2011
طبعا الكلام هذا في 24-12-1431هـ

ودفعت لهم الى الان 27 شهر اقساط قيمة القسط 1465

وباقي 23 شهر بخلاف الدفعه الاخير 27 ألف ريال ..
علما انني دفعت 11 ألف ريال مقدم ..

بالحسبه البسيطة تبقى لهم 76 ألف ريال

المهم الان انا شاري عقار من بنك الرياض وهالعقار متوقف موافقته على بنك الراجحي ..
ياأسدد الراجحي يا يفتح الله والمشكلة دفعت عربون العقار ..

وش تنصحوني فيه يااخوان ..
هل ارجع لهم السياره اللي الى الان ماشيه 138 الف كيلو وادفع قيمة التأجير اللي ماني عارف كم توصل ؟؟

او اشوف لي احد يشتريها واسدد الراجحي ؟؟
وهل لو سددت بيخصمون لي من المبلغ الاجمالي ؟؟

فزعتكم الله لايهينكم

[حر اليدين]

اسألهم عن السداد المبكر هل تسقط عنك الدفعة الاخيرة .؟؟ اذا كان كذا اشتر منهم السيارة وبيعها في السوق ارحملك من انك تسددهم ايجار السيارة ومع العلم ترى حسبتهم معك كل شهر 2500 مجاني والكيلوا الزايد له تسعيرة

[العابر2222]

الأجار المنتهي بالتملك .... مثل الرجال الي شادك بحلقك ... لاهوب الي يخليك في حالك ولاهوب الي تهاوش معه وتخلص

الي اعرفه ان الراجحي يعطيك خيارين فقط
يا سدد كاس او سلمها وادفع الفرق الي عليك اذا فيه شي ... ما عنده نقل عقد او تقبل عقد

وانا اشوف انك تسددها اذا معاك مبلغها وتبيعها برى احسن .. او تشوف احد يسددها وياخذها وتخلص منها

[4x4ofroad]

اذا ما عندك امكانيه انك تسددها كاش بيعها واتفق مع المشتري ان السياره باسم البنك يعني تتخالصون وتاخذ منه الدراهم وتسلمها البنك واذا عليك شي كمله واذا لك شي خذه
والله يسهل امرك ويفرج همك