اخواني ابي منكم مميزات الرنج وعيوبه

[magnum 350]

السلام عليكم
بسم الله الرحمن الرحيم
اخواني الاعزاء اسعد الله (صباحكم_ مسائكم)
بكل خير ومسررة انا اخوكم والله ناوي على رنج من موديل 2003 الى 2005 يعني من هالقبيل وبغيت من الي عنده خبره الله لايهينه و لا يرده لمكروه ان يكتب لي مميزاته وعيوبه وهل ينفع في البر وهل هو صبوووور او لا وقطعه كيفها وهل هو حساس او لا
ومن هالقبيل
طبعا انا ماخذ على الباترول بس الباترول مشكلته ع الطريق مو مثل الرنج وانا ابي اخذ منكم العلم الي يجمد ع الشارب وانا اخوكم
اخوكم الاصغر : ابو عبدالله

[قناص 28 عفيف]

بااختصار اذا انت رجال كاااش ومايهمك اسعار القطع اخذ الرنج اما اذا انت رجال على قد حالك خلك حول الياباني والكوري

[سم وعسل]

الله يصبحك بالخير
ما عندي خبرة ولكن الأخوان أن شاء الله ما راح يقصروا اختيار ممتاز كشكل .. ولكن انا انصحك ب الأف جي سيارة مجنونة وقوية .. والله يكتبلك ما فيه الخير .

[عقووول]

اخوي بما اني اعرف واحد معه رنجين

واحد 2003 كلاسيك

والثاني 2006 كات 400

بقولك الكلاسيك يعتبر ارخص من الكات

بس كلها غاليه على المستهلك العادي

اذا انت عادي عندك تحط كل سنه 16000الف او 20000 الف

فاشتره بس نصيحه اخو اشتر موتر مايعرف الورش

الرنج والله العظيم انا ساكن بالرياض

واروح للخرارة تبعد 30 كم من الرياض

طلعت بر ووناسة

والله كل ماجان يرجع للورشة وهو ما يطعس بس يوقف

ويتمشى معنا

وكلها مافيه لاحوادث

ونضيفة

واذا تبي 2003 راسلني على الخاص

والله يعينك عليه

[magnum 350]

لكم الف شكر اخواني الاعزاء
واالله ادام كذا هونت والله انا ركبت واحد واعجبني ماشاء الله تبارك الله داخليه وراحته ع الطريق وشكله من الخارج والي ركبته كلاسيك ويقولي صاحبه اذا بتحافظ زين
بس ماا ادري انه لها الدرجه عاد لا ان كان كذا فعسى الله يطرحنا في اخير منه وخلنا ع الباترول ابرك جزاكم الله خير يالغالين

[عبدالعزيز-1]

الرنج وعن تجربه هي السياره الوحيده اللي تسافر عليها وانت حاط يدك على قلبك

سياره لاينوثق فيها ابداً

[abo naser 1]

السلام عليكم

بعد الباترول تبي رنج الله يعينك شد الحيل وأعرف الورش المختصة ومحلات القطع وأفتح حساب خاص له ولاتنسى تحفظ أرقام السطحات

شلناه بسطحة 2011 سبورت وهو ممشاة 5000 كيلو تعطل في الطريق وقبل التعطل بيومين مطلع من الوكالة للصيانة

[يكفيني نظرة]

قرأت عنه قبل فتره من المنتديات من ملاكه يتشاورون بينهم ويسألون بعض عن القطع!!!
اذكر يقولون ان غطاء الرديتر يخرب!!
وحساس من ناحية الهدروليك والمطاب..
ويطلع بخرابات تحس انها مسألة عدم بركه بالموتر!!

[قايد لشاص]

فك عمرك وهج وبتدعي لي والله تراه دمار كان مع خوين لي قبل طفر به تطفرانححححش والله

[لسان الحقيقة]

الرنج لا بغيته اشتر 2013 استخدمه 3 سنوات وقضبه السووق
اما مشتراه بعد 10 سنين فمن وجهة نظري خطأ فادح وخسارة

[magnum 350]

الله يجزاكم خير يالغالين والله خوفتوني
خلاص ان شاء الله مابه غير الباترول ان شاء الله vtc دعواتكم يالغالين
عسى الله يوفقنا وياكم وجميع المسلمين.

[طواش]

ماعليك من كلام الشباب
اخذ الرنج الجديد2013 اسمه autobiography / Range rover vouge

[التعـ King ـديل]

اذا رابط صرافه ورا الموتر اشتر رنج لانه موتر حساس وخاصه انت متعود على الباترول بياكلك الرنج اجل شد جلنط ب 1500 ريال عند ورشه برا والوكاله ب 2200

[التعـ King ـديل]

ماعليك من كلام الشباب
اخذ الرنج الجديد2013 اسمه autobiography / Range rover vouge


اخوي طواش رايك نحترمه ولكن لا تهمش رأي الاخرين بكلمه ماعليك من كلام الشباب ولو قريت موضوع الزميل لقيته يتكلم عن موديل قديم راح يكلفه بالصيانه وكلنا عارفين ان الجديد يحتاج الى سنتين على الاقل علشان يطلب قطع غيار ،، اتمنى في المره المقبله تقراء الموضوع بشكل كامل وتحترم رأي زملائك

[تيسان 2013]

اذا رابط صرافه ورا الموتر اشتر رنج لانه موتر حساس وخاصه انت متعود على الباترول بياكلك الرنج اجل شد جلنط ب 1500 ريال عند ورشه برا والوكاله ب 2200



وين ذي الورشة الي تشد ب 1500

عطن اسمه

[أطلال نجد]

و عليكم السلام و رحمة الله و بركاته

حياك الله أخوي ،،، نصيحه أبتعد عن هذه النوعية من السيارات وخلك على الياباني

السيارات الانجليزية و خاصة الرنج روفر سيارات تتعطل و هي جديدة وواقفه بالكراج تحت الظل

وفوق ذلك السيارة عند وكيل لا يرحم

[راعي الرود]

خذ لك فره في الصناعيه القديمه و شف بعينك ..

الموتر حق كشخه سنه سنتين بعدين المعارض

اذا تبي جيب لطلعات البر لا تبعد عن اللاندكروزر و الباترول شيوخ الجيوب ذولا لا يهمك الرنج :)

[ls1.5700]

انا رايي من راي الجماعه الرنج مشاكله كثيره ومعقده ولا كل ورشه تعرف له
وقطع غياره غاليه وبعظها لازم طلابيه من جده ومن دبي وتاخذ مده طويله على بال ماتوصل
كل الرجال اللي قبلي نصحوك بالخير وانا واحد منهم
ابعد عنه ولا تعدى النيسان والتايوتاء والجموس

[عبدالعزيز-1]

ماعليك من كلام الشباب
اخذ الرنج الجديد2013 اسمه autobiography / Range rover vouge

عيب عليك حنا مو اطفال عندك عشان تقول ماعليك من كلامهم !!!

ثمن كلامك قبل ماتقوله

[التعـ King ـديل]

وين ذي الورشة الي تشد ب 1500

عطن اسمه


قبل تشكك بكلامي وتطلب اسم الورشه ،، اقولك اسأل عن شد الجلنط حق الرنج شلون بعدين تعال واعطيك رقم الورشه وموقعها بالرياض واجيب لك الفاتوره وصاحب السياره بعد :good2:
انا ادري انك مستغرب من السعر لانك ماتدري كيف ينشد

[تيسان 2013]

قبل تشكك بكلامي وتطلب اسم الورشه ،، اقولك اسأل عن شد الجلنط حق الرنج شلون بعدين تعال واعطيك رقم الورشه وموقعها بالرياض واجيب لك الفاتوره وصاحب السياره بعد :good2:

انا ادري انك مستغرب من السعر لانك ماتدري كيف ينشد


والله يالغالي بحثت بقوقل كله ولا لقيت أي موضوع عن الجلنط وعن الحكي ذا

[سوبربنلي90]

ماخبر ان الرنج موتر بر حق دوران بالتحليه وثمامه

[قدر مكتوب]

اخوي صاحب الموضوع بما انك صرفت نظر بس حبيت اعقب بشي واحد بس
بريطانيا تصنع سيارات من قديم الازل ولكن الرنج روفر والجاكور هي سيارات فارهه والفئة المستهدفه لها ليس المستخدم العادي اللي مثلي ومثل غيري من الناس ممن دخله محدود. هذا بفهم كثير من الناس وهذا الواقع بسبب غلاء السيارات وهي جديده

مشكلة الرنج والجاكور والبي ام دبليو والمرسيدس والسيارات الاوربية كلها ان الورش اللي تعرف لها قليل ولا اعطالها قد تتصلح بشكل يقلل من سعر التكلفه بس عشان اكثر الورشات اللي مختصة بصيانه هالسيارات اللي تشتغل با لسيارات ذي من جنسية معينة ونسبة كثيره منهم الا من رحم ربي نصب واحتيال ولعب على البشر باسم ان معاك سياره فارهه وانك مقرش

وعشان نكون اكثر صدق النظام عندنا تكرم زباله تكرم ويكرم كل من يقراء , مثلا في حال الاصتطدام لا سمح الله بسياره مثل رنج روفر او بي ام دبليو تعرف ان المرور يحولك على لجنة تقييم السيارات الفارهه علما ان اللي صادمك كامري 2013 وسعرها حوالي مية الف ريال بينما انت معاك رنج 2004 سعره 60 الف ويحول راعي الكامري الى اقرب معرض للتقييم , فاصبح اصحاب هالسيارات والورش ومحلات قطع الغيار تتجار بالموضوع هذا انت معاك سياره فارهه وهكذا واصحاب الورش خبرك ما يحتاج احد يفطنهم صار لو يبي يفك كفر مرسيدس ب 100 ريال مثلا ولو جاء صاحب افالون قاله له 10 والسبب انت سيارتك فارهه

البريطان عندهم سيارات حلوه وممتازة وسعرها وسعر قطعها معقول جدا بس مخصصة للشعب البريطاني وهي تسمي سياره الشعب البريطاني اسمها فاكس هيل لكن مادري ليه مالها وكيل عندنا وسعمت انها بالاساس ماتتصدر لغير اوربا فقط

اخوي انا ودي اجرب مثلك سياره انجليزية او المانية ولكن كل مافكرت اني بكون لعبه في ايدي اصحاب الورش ممن لا يخاف الله اقول جود مقرودك لايجيك اقرد منه

اما بالنسبة للي فاهم في الميكانيكا وشغل السيارات الجديدة اللي فيها عده كمبيوترات ونظامها الكتروني معقد ويعرف لشغلها فاقول له توكل على الله واشتري لان ماراح ينضحك عليك ان شاء الله واستمتع بالجودة الانجليزية والالمانية

[سليل قروم]

نصيحة ابعد

كان معاي رنج 2003 وكانت النصيحة من واحد قبل لااشتريه انها بيشاركني المصروف وبالفعل طيّر النوم من عيني ولاسمعت النصيحة لأني حطيته في راسي

اذا ناوي على رنج خلك كاش وخذ شي على الزيرو اما المستخدم بتكره السيارات من وراه