وش رايكم بالاكسبلورر

[ابوهديل 8]

السلام عليكم ورحمة الله وبركاته اخواني انا عندي نيه اشتري جيب وبعض الاخوان قالي وش رايك في الاكسبلوررطبعاً من موديل 2002 وطالع قلت مالك الا اخوانك في منتدى مكشات تسألهم يفيدونك ارجومن الاخوان اللي عنده معلومات عن هذه السياره اوانه استخدمها افادتنا ومدى ملائمتها لاستخدام البر والمكاشيت ولكم جزيل الشكر .

[تــــوني]

اذا ناوي اكسبلورر تراه زين بس لا تاخذ وكاله لان اسعارها تطيح
دور لك استخدام حشمة في المعارض ممشاه قليل وان حصل لك موديل 2006
تراه ممتاز واخواني مجربينه حتى يمدحون راحته وإلى الحين مافيه مشاكل
بس يطيح سعره عشان كذا شف لك استخدام حشمه عشان لا طاح ولا ه ما يطيح واجد
والله يوفقك الى ما يحب ويرضى ويطعمك خيره ويكفيك شره
ولا خاب من استخار .......!

[بواسامه]

نصيحه
اتركه عنك
واعرف اثنين فكوه وكاله وكلهم يشكون منه
والله اعلم

[فهد 1426]

السلام عليكم ورحمة الله وبركاته
اولا كل عام وانت بخير والشهر عليك مبارك جعلنا الله من صوامه وقوامه
اخي العزيز الكريم
قبل اي شي اود ان اوضح لك اهمية صلاة الاستخارة في اي شيئ تنوي عمله وانت متردد فهي خير معين لك بعد الله سبحانه في تيسير الأمور
ــــــــــــــــــــــــــــــــــــــــــــــــــ ــــ
اخي الكريم : لقد كنت املك فورد اكسبلورار موديل 98 فل كامل توكيلات الجزيره لمدة سنة تقريبا
فماذا عساني ان اقول لك ـ ولعلني ابلغ في القول لك بعته اقساط وبأقل من رأس المال ـ عموما ما علينا من البيع والمشترى
اهم شي السيارة :
سبدا اولا بالوكيل : لا بأس به غير ان بعض القطع قد لا تجدها فورا وقد تحتاج طلبيه وسعرها شبه معقول 0
بالنسبة للسيارة : شيء معروف ومتعارف عليه من موديل سيارتي الى 2004 يوجد تنسيم هواء اثناء سير السيارة
وكذلك صوت مروحة المكيف الداخليه مزعجه بشكل لافت اثناء تشغيل المكيف
بالنسبة للتكيف فهو ما شاء الله بارد وفعال وبالنسبة للحراره فهي دائما للنصف وبالنسبة لاستهلاك البنزين تعتبر اقل صرفيه من الجيوب الأخرى التي في حجمها مثل الاندكروز والباترول ـ بالنسبة للدفع الرباعي فهي اتماتيك واعتقد ان يفصل بعد 80 او 60 كم بالنسبة للدبل ما هو بمستوى الاندكروز والباترول ولا المستوبيشي ـ سبق ان تعطل الدبل وقمت بتغيره 00
هذا ما يحضرني الآن ومعليش انا مستعجل ابغى اتسحر ـ وأي خدمه انا جاهز وأسال الله لك ولكل مسلم التوفيق ـ ولا تنسى النصيحه 00

[نجـ*سهيل*ــم]

اخي الغالي السلام عليكم ورحمة الله وبركاته

اولا انا كنت مثلك ادور على اكسبلور ورحت للصالات اللي على الدايري الشرقي واللي في الشفا واللي في معارض النسيم ولقيت انواع نظيفة جدا ونشدت صاحب صالة وهو رجل ماشاء الله عليه ملتزم عن استخدامه وقال فيه عيب مصنعي اللي وهو الدفرنس ونصحني ما آخذ الا شي مضمون الدفرنس المهم قلت يمكن ان الرجال يبغاني اشري من عنده عشان الضمان على الفرنس ورحت لتوكيلات الجزيزة لان عندهم موديلات 2005 و2004 عليها الضمان ومستخدمه خفيف المهم سالت المصري اللي في التوكيلات عن مشكلة الدفرنس وانه قالوا لي انه فيه عيب مصنعي رد علي وقال حظك نصيبك المهم يوم قال كذا شلت الفكرة كلها من راسي واشتريت برادوا 2004 والحمد لله اني استخرت قبل كل شي

واخيرا انصحك اخوي بالاستخارة في كل امورك وعسى الله يوفقك
والسلام عليكم

[AL VICTORY]

تحياتي اخوي
والله انا مطلع 2006 او ل مانزل في القصيم
الموتر ماعليه خاصه با الطريق كانك راكب فورد كرون فكتوريا
كفائه عاليه وتقنيه اما عاد با انفود الموتر مدلع شوي ما يبي تروح عليه بعيد ؟؟
يعني تدخل نفود مره لا تبعد خلك حول الخط
وبصرحه اعتبره سيرتي المفضله من فورد
وذا كنت من القصيم وتبي تجرب الموتر انا ما عندي مانع بس نبي الدعا ءمنك
ولك تحياتي

[ابوهديل 8]

ياعساكم سالمين وغانمين اخواني توني وبواسامه وفهد 1426ونجم سهيل والفكتوري شكراً على المعلومات القيمه وبارك الله فيكم وكثر من امثالكم وجعلها في موازين حسناتكم ورزقنا واياكم العمل الصالح والقبول في هذا الشعر الفضيل .

[وثاب]

تقبل الله صيامنا وصيامكم

البارح انا عندهم بالوكاله وقعدت مع مندوب المبيعات اكثر من نص ساعه وهو يذكري مواصفات السياره

اللي فهمت من كلامه ان الموديلات اللي قبل 2006 فيها مشاكل وانهم تفادوها بهذا الموديل

والله يكتب لك اللي فيه خير وصالح