كيف أستطيع طلوع الكثبان المرتفعة جدا(( لخبراء التطعيس)) [الأرشيف]

جاروود

11/01/2003, 11:47 AM

بسم الله الرحمن الرحيم
ياشباب ودي أسلم عليكم اول شيء ثاني شيء ودي أسالكم سوال لأني في الأسبوع الماضي ذهبت انا و الشباب إلى الدهناء وفي أحد الأماكن المعروفة فيه وجدنا تل كبير اردت صعودة ولم استطيع ( لا قوم ولا افضل الجر على الموتر)
رايت بعض الشباب في كشتات اخراى يستطيع طلوع الكثبان الكبيرة ولاكن يقوم بالدعسة على اخر البنزين (والله اني حمدت ربي اني منيب سيارة )اشوف الضغط يروح ويرجع
المهم
هل توجد طريقة لصعود الكثبان ((لعدم وجود طريق اخر)) وتكون الطريقة مريحة نوع ما لسيارة
هل اقوم بالصعود بالنمرة صغيرة والواصل عليها ام هل أقوم بالصعود بنمرة اعلى ومن اثم في اثنا الصعود اغير للنمرة اقل وهل اضغط على الكلتش قليلا اذا ضعف عزم الموتر قليل
السيارة 4*4 يعني دبل

جــلــمــود

11/01/2003, 01:04 PM

السلام عليكم

الاخ جارود البداية تكون تنزيل هواء الكفرات لـضغط 15 او 10 للكفرات الاربعة

بعدين طالع الطعس كله فستجد اماكن اقل ارتفاع من اماكن اخرى

لان النوازي ارتفاعاتها مختلفه

اذا كان هنالك من سبقك وصعد الطعس فحاول ان تتبع اثره وتمشي على ( سكته ) لانها ستكون ممهده وجاهزة

اما اذا لم يسبقك احد في صعودها

توقف تحت الاقل ارتفاعا وابتعد مسافة 10 الى 15 متر

عطه الثقيل :mad:

ووعطه الثاني وتحرك بسرعة منخفضه جدا بأتجاه الطعس ستلاحظ ان السيارة تتحرك ببطى وعزم عالي

قبل الطعس بخمسة متر عطه الثالث ودوووووس على طول ستلاحظ ان السيارة تنطلق بقووووة ثابته وعزم عالي بعدها حاول تخفيف الدعس تدريجيا وثبت على مستوى ترى انه مناسب وستلاحظ سير السيارة بقوة ثابته وعزم ثابت ودون دعسسسسسس وضجيج ( ومرادح )

واذا اردت منتهى الهدوئ عشق القير بالثالث من البداية وادعس دعس خفيف وثابت

وسترى النتائج المرضية

طبعا لا تنسى ترجيع الدبل للخفيف بعد الصعود مباشرة
كما لا يفوتني ان انبهك لضرورة تثبيت الجراكل وماشابهها حتى لا تتسبب في أيذائك

جــلــمود

القماري

11/01/2003, 02:16 PM

مشكور ياجلمود على التعليمات وخصوصا تربيط الجراكل :D
أخوي جارود أضيف على ماتفضل به جلمود وأقول إذا كان الطعس عالي وإنحداره قوي فالأحسن ولسلامتك لاتغامر في طلوعه بل أبحث عن منفذ آخر (السيارة لها عزم معين ولاتنسى ثقلها مع الحمل)
كثير من الشباب يطلعون على الطعس الكبير بإندفاع قوي وبخط مائل ( غير مستقيم وعمودي) لكن مثل هذا التصرف يحتاج لخبرة وجرآة .
http://www.mailnnews.net/Natur/Sand_1/Bilder/Dune_2.jpg

راعي عنيزة

11/01/2003, 02:25 PM

البعض يعتقد ان التطعيس مراهقه ، ولكن في الواقع هي خبره لابد من اكتسابها لانك في يوم من الايام قد تحتاجها ، مثلا الدهنا ولا صعافيق تمسك جاده لمسافه طويله وبعدها تجد امامك نفود بارتفاع ميه متر ! يا ترقاه ولا ترجع ويضيع وقتك ودربك

لذلك احيي فيك حب التعلم والاخ جلمود ما قصر جابها لك وخبرته مشالله عليه تفوق خبره اكبر مطعس :p

وان كنت اعتقد ان استخدام الدبل الثقيل برقي النفود يعدم الدبل

لذلك امامك بعد تنسيم الكفرات خيارين لا ثالث لهما :

1- تبي تحافظ على المكينه وموترك يتفكك ؟؟ خذ عزم من مسافه بعيده وخلها بالثالث واذا بدا عزم السياره يبرد ردها للثاني وكبت الدعسه
الطريقه هذي الظغط على المكينه ما يكون كبير لان سرعة السياره تدفعك بالنفود

2- تبي الموتر ما يتفكك والمكينه بالطقاق :p ؟؟ دوس باتجاه النفود وانت معشق بالثاني لما يوصل حده ولا تخفف الدوسه ابد وبهذي الطريقه ترقى بدون ما تحتاج انك تسرع ويتنثر قشك

وطبعا حاول تختار المرقى الي يكون طريقه سهل ومافيه مطاب او غردقه لانها تضيع كثير من عزم السياره

ولو قربت لنهايه النفود وحسيت ان السياره برد عزمها حاول تميل السياره يمين او يسار وسايس النفود ووازن الدعسه
هذا طبعا اذا وصلت منطقه ميلانها معقول اما لو كان الميلان كبير فلا تسويها لانه خطر تقلب

جــلــمــود

11/01/2003, 02:39 PM

ويافتى عنيزه لا تطلع لسانك لو انه جايك جركل مع علباك مثل الي جاني بها الفايت انتسان ماتلومني

واعتقد ان الدبل الثقيل على ماقرأت في كاتلوجات اغلب سيارات الدفع الرباعي هو مخصص لصعود المنحدرات العالية ( يقصدون روس النوازي )

لذلك لا اعتقد انه يؤثر على الدبل اذا أستخدم بتعقل وعند الضروره القصوى فقط بشرط عدم استخدامه بسرعات عاليه لمدة طويلة .

جــلــمــود

11/01/2003, 02:50 PM

الاخ القماري

الجراكل من اكثر الاشياء انزلاقا فيجب التنبيه الى تربيطها جيدا

والحرص واجب :D

الخبير

11/01/2003, 06:54 PM

السلام عليكم
اسمحوا لي اشارككم في هذا الموضوع الشيق
انا كنت مثلك احطه بالثقيل و ما يوقفني إلا السيارة إلي واقفه فوق الطعس. لكن للاسف مع كثر ما اسوي العملية ذي انكسر قير الدبل.
انا الصراحة اوقف تحت الطعس و اعطيه الاول و اوكل الله . عزم السيارة ما يطيح و انت بإذن الله راقي راقي.
لكن إذا كنت ماغط و كانت سرعة دوران الكفرات اكثر من سرعة السيارة يعني تفحط و انت ترقى الطعس فصعبه انك ترقاه. لذلك هدهد السيارة و ترقاه بإذن الله.

جاروود

12/01/2003, 09:19 PM

بسم الله الرحمن الرحيم
طلعو المطعسجية

الله يعطيكم العافية وانا اقول من الي مالين الثمامة واثرهم شباب مكشات
والله ماقصرتو وشرحتو الغشيم بيطلع سواق
الي عنده زيادة يقولو

والي يقدر يشرح شرح مصري الله لايهينه

وابيكم تعلمون اسرار التطعيس

تراي راعي جبل وقمت اتلزق هالأيام في النفود

اعلم هو الرماية كل يوم فلما اشتد ساعه رماني
وكم علم تهو نضم القوافي فلما قال قافية هجاني

ابو الريم

13/01/2003, 11:37 AM

رد الاخوان جلمود وراعي عنيزة كافي ووافي

وانا مع راعي عنيزة بأن تعشيق الدبل الثقيل يعدم القير ....... والذي يقصدونه بالكتلوج ليس منحدرات وارتفاعات في الرمال وانما في الطريق المزفلت او الجاده ..... مثلا انت ساحب سيارة وقدامك طلعه كبيره او تبي تطلع من تغريز في هذه الحاله تحتاج الى الثقيل ولكن يجب ان تسير بهدوء وان لا يرتفع ضغط المكينة عن 3000 اما في صعود الطعوس فأنت اكثر ما تحتاجه العزم وضغط عالي للمكينة يتحمله الدبل الخفيف .

تحياتي ابو الريم ,,,

جــلــمــود

13/01/2003, 02:47 PM

السلام عليكم

يا أستاذي ابو الريم صدقني الثقيل + النمره الثالثة = عزم عالي وثابت وغير مؤثر على السيارة ابدا
وهي طريقة مجربة عند طلوع النفود من ارتدادات قصيرة وايضا مفيدة في سحب السيارات المغرزه تغريز اقشر
وأنا كنت مثلكم اتخوف من استخدام الدبل الثقيل ولكن بعد نصيحة احد الرجال الذين قضو ثلاث ارباع اعمارهم بين كثبان وهجر ومزارع نفود الثويرات

ثم أن استخدام الثقيل والثالث أو الثاني ( للمسافات القصيرة ) وبلا دعس عالي لا يضر بالسيارة ابدا

موج التريبي

24/01/2003, 06:56 AM

الله يعطيكم العافيه وما قصرتو يا شباب........لكن

كل المنتقشات كانت حول الجير العادي ، والجير الأوتوماتيك كيف التصرف معه ؟؟

لاتبخلوا بالإجابة

راعي الحزم

25/01/2003, 12:13 AM

السلام عليكم جاكم الهذره راعي الحزم اسمعوا حنا رحنا بالعيد للنفود الكبير ومعنا اربع سيارات جيوب ما بين سفاري ولاند اكروزر المهم حبينل نغامر اخذنا النفود اقطوع نبي الخنفة نبي نصير حوله ما هو بوسطة لاتفهمون خطأ بيوم من الايام لقينا انفسنا امام ذلك الطعس العالي لازم لازم لازم نرقاه كلام الدلولا وش نسوي كل واحد جرب سيارته وتعرفون العناد ما نخليه وشبعانين تعليق على بعض البارح وجاء دور التحدي
المهم ما اطول عليكم كل الطرق افشلت ما عدى طريقة واحدة عشق الثقيل وعطه الثاني واذا وصلت حول الطلعة عطه الثالث واتكل على الله احسن طريقة بس عند الضرورة ياشباب

ابو الريم

28/01/2003, 03:20 AM

اخوي جلمود ............... كن على ثقه ان طريقتك هذه اعرفها من بداية ما عرفت شي اسمه تطعيس يعني من سنين طويله يعني من بداية عمري :):)

..... وهي فعلا طريقة ممتازة وخاصة لمثل هذه الحالات ....... ولكن انا اكرر انها ( رغم مفعولها القوي والجيد ) مشكلتها انها تعدم القير وتنقص عمره وتتأكل تروسه بسرعه وللأسف هذه صارت لي من تجربة شخصية يعني عدمت قير وخليته يخبط كل من هذه الحركة وتكرارها .

ولذلك ان كنت تستطيع ان تتعدى الطعس بدون استخدام الثقيل حتى ولو كنت بسرعة عالية فهو افضل ....... واما استعمالات القير الثقيل فنحن لا نتخوف منه ولكن بالاستعمال السليم ما يضره شي مثل ما ذكرت تطلع سيارة مغرزه تغريز اقشر او غيرها اما الطعوس فأنت تحتاج الى دعس وهذا ما يضر الثقيل .

عموما انا لا اقصد بالمضره هنا انه راح يخبط الحين يعني :(:( لا وانما اقصد ان استهلاكه يزيد وخاصة مع الضغط عليه ....... واما وقت الحاجه له مثل ما ذكر اخونا راعي الحزم استعمله واستعمل كل الطرق اللي تسهل عليك ولا ترجع او تتوهق .

اما عن اجابة سؤال الاخ موج التريبي فالقير الاوتماتيك في هذه الحالة مثل القير العادي تحطه ثقيل وعلى الدي وتوكل على الله .....

تحياتي ابو الريم ,,,,,,

جاروود

29/01/2003, 01:14 PM

بسم الله الرحمن الرحيم

يالشباب بعد ماجربت كل ماقالو الشباب
واستعنت بخبرة الشباب ربعي
اتضح لي انك لاتعس موترك ولاتطامر واجد الا في الضروف القصوى وقف تحت الطعس وعطه الدبل الخفيف ونمره الاولى ولاعليك انشا الله
واذكان الطعس اكبر من انك تصير قريب من الطعس ابعد شوي وتعال بالدبل الخفيف وارقه واذا ضعف عزمه عطه نمره اقل بس بسرعه

المهم اتضح لي بعد مغامرات حتى اصبحت أفضل من اول في التطعيس
انه
اهم شي الهواء في الكفرات نقص ولا تخاف اذكانت السياره مافيه عفش ولانتاب مسيف حط فيها من عشره الى خمسطعش
ثاني شي الطاره لاتروح يمين ويسار تصير ثابته
ثالثا لاتحرص انك ترق الطعس على طول وتحن موترك ارق شوي ومهدلك الخط الشوي ستجد ان الموتر يستطيع الطلوع لمسافه اكثر
المهم
الدبل الثقيل قدرت استعيض عنه في اغلب الاحيان بالدبل الخفيف ونمره ثقيله
اشكر كل من تعاون معي
وأذا صار على شيء ثاني بخبركم

صحيح ان ماجبت جديد
لاكن هاذ الي طلعتبه من الرحلات المتكرره حتى صرت نص مطعسجي

جــلــمــود

29/01/2003, 01:53 PM

عزيزي جاروود مبروك وانا اخوك
وترا الدنيا مدرسه ولا احد يولد فاهم كل شي
والى الان امورك حلوه وماشيه صح
وفيه بعض الامور بقولك عنها وانشالله انها تبي تفيدك وارجو من الشباب اذا اخطيت ولا قصرت انهم يوجهوني

فيه امر مهم لازم تحطه بحسبانك انك اذا طلعت طعس سواء من تحته مباشره ولا من بعيد وجيت مسرع
اذا طلعته ووصلت نصفه او ربعه او اخره ووقف الموتر لا تحاول ترجع وتكسر الطاره يمين او شمال
خلك ماشي بالريوس سيده لين تاصل مكانك الي مشيت منه
ولا تخلي الموتر يدحدر على ورى بالفاضي يعني لازم تعطيه الريوس حتى لو كان يدحدر ويرجع بدون ريوس لانك اذا حطيته بالريوس تقدر تتحكم فيه الموتر وسرعت نزوله وغير كذا اذا كنت في مكان تطعيس مزدحم وفيه ناس ترقى وتنزل غيرك فأنهم ينتبهون لك ويشوفون لمبات الريوس ويعرفون انك بوضع رجوع لان فيه مطافيق يحط الصدام بالصدام وراك ولا يجي يرقى بنفس مكانك الي انت رقيت معه وبسرعه تقل محد قدامه فا عشان العالم الي وراك تنتبهلك ( اسأل مجرب وشايف ) مره هايلوكسين واحد طب بصندوق الثاني لان الاول يرجع يدحدر دحدره بدون ريوس الثاني جاي راقي مجلعد فا صار الي صار

الشي الثاني لو اضطريت تنزل من فوق طعس لتحت الطعس او تطب بنقره
( نقره = مكان منخفض بين طعسين او اكثر :D )
اذا اضطريت تنزل فا حاول تنزل الموتر على وجهه مباشره يعني لا تنزل على جمب وتخلي الموتر يزحف ترا ناس واجد جابو التنده وكفختهم الجراكل بسبب ذا الحركه
فحاول انك تنزل الموتر دايما على وجهه حتى ولو حك وجهه بسفل الطعس وانت مهدي اذا نزل وكان الطعس شديد الانحدار فلا يهم اذا تذكرت انك ممكن تعرض نفسك للخطر على جمب

ودايما حاول اذا بغيت تاقف بالرمل انك توقف الموتر على مكان يكون منحدر قليلا يعني يكون وجهه متصاغي لو شوي او متساوي على الاقل عشان اذا بغيت تمشي تمشي بكل سهوله بدون دعس وبدون تغريز
وعشان اذا طفيت الموتر ماتكون زيوته متصاغيه ومساعادته جهه منضغطه اكثر من جهه ومقصاته تكون بوضع غلط وهذا مع الزمن يضر الموتر

ولا تحاول تمشي على السيف مباشره يعني تحط راس السيف بين كفرات الموتر وتمشي
لان ناس واجد تميلحو وتورطو وتعلقو بها الطريقه وطاحت صاجاتهم

والطعس الي تشوف اسفله منحدر مره ويمكن يطق وجه الموتر فيه لا تجيه وانت مسرع ابد

ولا تحرص على المعاسر والدعسس الزايد اذا لقيت طريقه اسهل ( المسايس )

واي خدمه اخي جاروود تامر امر

ومع احلى الاماني

جــلــمــود

الاجودي

29/01/2003, 09:13 PM

والله توو مايدمر الموتر مثل التطعيس

انا معك لازم تعرف تسوق بالنفود وبالطعوس

اما انك تطعس والله مافيها الا الخسارة

انا من سابع المستحيلات اني اطعس اروح لأماكن التطعيس واصور واتفرج

اما اتعس والله لو تقطع رقبتي

الطير

03/02/2003, 12:52 AM

تتحيه طيبه

الله يعطيكم العافيه .

طيب وش رايكم في التماتيك وش من لحيه نشتري او لا .

لكم تحياتي

ابو الريم

04/02/2003, 01:04 AM

نصائح رائعة اخي جلمود وتدل على خبره طويله وتستحق ان توضع في موضوع مستقل

شكرا لك

تحياتي ابو الريم ,,,,

أيمن

15/06/2003, 09:50 AM

( لقد تم إضافة هذا الموضوع إلى المواضيع المميزة والشيقة في هذه الخيمة (http://www.mekshat.com/vb/showthread.php?s=&threadid=8666) )
مع الشكر للجميع ،،
http://www.mekshat.com/pix/upload/images/flow12.gif

مشرف الخيمة

ق ح ص 411

16/06/2003, 12:01 AM

الأخ الغالي جاررررود بعدالتحية
بصراحه الأخوان ماقصروا في الشرح والتوضيح ولكن احب اضيف شي مهم وهو ان السيارات تختلف
بأختلف قوة المكينة فمثلاً 8 سلندار لو حطيته بالثقيل من مسافة 15 متر فأن هذا المسافة بعيدة فعندم التقرب للطعس فأن القاطع بيتدي يقطع في هذه اللحظه فلا يستطيع الصعود .
واهم شي زي ماقالو الأخوان تنسيم الكفلرات واقتراح عليك تنزيل الهواء الى (5) لأن اخوي السيارات المعدلة رغم قوته فأنهم ينزلون الهواء
أما بالنسبة لخراب الدبل من الثقيل فلا أعتقد أنه يضر السيارة اذاء استخدام بطريقة صحيحة
والسلام عليكم ورحمة الله وبركاته

طمطماية

05/08/2003, 06:23 AM

ما قصرتوا يا شباب في طرحكم

وخاصة أخوي أبو الجراكل :D ( جلمود )

ماشاء الله عليه

خبره

بس حبيت أزيد شي بسيط عن نزول السيارو من الطعس

وأنا مجرب الحركة هذي أكثر من مره ونفعتني كثير

وهي إنك وأنت نازل من طعس وخفت أن وجه موترك يطق

فما عليك إلا إنك تنزل بالثاني وتزود سرعتك شوي ....... يعني مو تصير مطفوق وتدعس كثير :D

بس الله يسلمك قبل ما تاصل لنخاية الطعس بشوي

فرمل (( علشان ينزل الرمل ))

ولف بالسيارة بحيث تحليه تزحف الرمل معاها شوي (( أنا أفضل ألف يمين ))

وخل سيارتك تنزل على الكفر الأيمن

وإن شاء الله ما راح يطق وجه موترك

ولكل واحد أسلوبه بالتطعيس

وتقبلوا تحياتي

حر اليدين

12/10/2005, 10:31 AM

أهم شي اذا بغيت توقف سوءا مسند او محدر لاتربط فرامل فقط هدء السرعة والسيارة تقف بنفسها حتى لاتطعن الارض برماحها الامامية وتغرز

ثاني شي وانت نازل من الطعس لاتلمس الفرامل عشق بواحد او اثنيني وخل النمرة هي اللي تنزل الموتر

ثالث شي اذا انت عابر سبيل مانيتك تطعيس دور اسهل درب للصعود وخصوصا العراقيب وهي غالبا ماتكون بصلابة الازفلت مهم كان شدة انحدارها وتكون جهة نحت الهواء للطعس بينما يكون الجهة الاخرى من الخلف سافي (رباضة)

رابعا اذا نزلت سواءا مع سيف او مع ظهر الطعس وكنت بوضعية مائلة لاترفع رجلك عن البنزين وتدعس مرة اخرى لانها سوف تسبب اهتزازة قوية ربما تنقلب بك السيارة

التنسيم اهم نقطة في العبور وبعد ذلك عرض الكفر والحمولة لان الحمولة تجعل الموتر مايحفر بسهولة

هذا ماوددت ان اقوله مع اني ماني خبير لكن حنا قطعنا الدهنا على ددسن ليست دبل لكن سواقنا له باع طويل في هذا المجال مع انا لم نغرز تماما

واهم نقطة الوقت الي فيه انت تنوي العبور لانه كلما احتر الجو كلما زادت الصعوبة واحسن وقت لمطاعس هو الفجر او قبيل شروق الشمس احسن من ناحية التصوير وابرد على الموتر واوضح للرؤية (على الريق ) هههه

اخوكم حر اليدين

مزاااجي300

12/10/2005, 02:18 PM

طيب كلالالالالالالالالالالالالالالام حلوووووو

القير التماتيك نبي الطريقه السليمه لأستخدامه في الطعووووووووس اذا امكن ؟

معشق الدبل

12/10/2005, 02:32 PM

اهم خمسة عوامل تساعد على صعود الكثبان الرملية بإيجاز .

1- هواء الكفرات
2- هواء الكفرات
3- هواء الكفرات
4- هواء الكفرات
5 - عزم السيارة - الخبرة

تحية

salehhd

12/10/2005, 03:59 PM

نصائع رائعة ومفيدة

يعطيكم العافية

مزاااجي300

13/10/2005, 03:56 AM

طيب كلالالالالالالالالالالالالالالام حلوووووو

القير التماتيك نبي الطريقه السليمه لأستخدامه في الطعووووووووس اذا امكن ؟

انتظر الجووووووووووووووووواب :p

nsa10000

05/01/2006, 02:19 AM

الله يجزاكم خير

انا شريت جيب اوتوماتيك وودي اعرف طريقه التطعيس الله يجزاكم خير

افيدونا افادكم الله واثابكم ولا حرمكم الأجر

الربذي

05/01/2006, 08:04 AM

السلام عليكم
اثاريكم مراهقين تطعيس !!!!!!!
بس اكثر واحد اعجبن واضحكن وامتعن هو اخونا جلمود شكل الجراكن موجعته مره ومعقدته ومطلعه في علابيه صعارير!!!!! لاعليك اخي تصدق انك ذكرت الجراكن اكثر من اربع مرات في مشاركات مختلفه واضن كل ماتطعس تقول امسكوا الجراكن لو مامعكم عفش !!!!
تقبلها من اخ محب لجلمود المطعس @
انا هاوي تطعيس بصراحه
بس لقيت البانشي يسد هذا الشغف في التطعيس !!!
بس لازم بتجهيزات لباس كامله مكمله (والكامل وجه الله سبحانه )

جاروود

06/01/2006, 10:36 PM

بسم الله الرحمن الرحيم

هلا اخواني وش ذكركم بذ الموضوع ياه طلع غبار من الموضوع ثلاث سنين

بس بيني وبينكم استفدت من هذا الموضوع استفدت استفاده كامله

وصرت الحين مقطع جميع شيء يقولون اسمه رمل

الربع الخالي جيناه و الدهناء قطعناه تقطيع الى النفود الكبير الى قنيفذه الى عريق البلدان الى الداهنه الى ام حزم الى ام دباب الى الى الى محلات واجد

لا وبعد صرت اعلم لي ثلاثة ايام انا واحد من العيال في عريق البلدان كاشتين انا وياه بس وقاعد اعلمه على النفود لين غذى طاره

بين قوسين الي يبي يتعلم يروح لم الطعوس كثير عشان يتعلم ويجرب ماعليه الى العافيه

واهم شيء انى اشوفه في القياده في الرمل

هو اختيار الطريق المناسب

يعني ترفع راسك وتشوف وين تبي تمشي بالضبط وهذا يعتمد على سيارتك ودايم دور السهل وتحدد طريقك من على مسافات وهل سيارتك تقدر تمشي معه

وفي الغالب راس الطعس اكثر تماسك من الاسفل

وجوانب الطعس اقل تماسك من راس الطعس

والنقاش مازال مفتوح لاهل الخبره في اقطع العروق والخبوب والنقر والصياهد والنقيان

ويعطيكم العافيه ياخوان

anas

07/01/2006, 01:21 AM

جربت طلوع الكثبان الرملية المرتفعة بسيارة مستأجرها نوع باترول موديل 2004 جيرين 4800سي سي ( يعني كرفنا والديها ) وبصراحة جربت الدبل الثقيل والخفيف وبجميع النمر وأخذنا الطعس من اسفله الى اعلاه ومن اليمين الى اليسار حتى ان تسارع الماكينة او rpm كان يقطع من شدة الدوس على البنزين في الدبل الثقيل .. وبصراحة لا بد من الخبرة والخبرة لا تاتي إلا بالتجربة واحسن شيء انك تجرب وانت بعيد عن اعين الناس ومعاك صديق للمساعده عند اللزوم .

حرباش

08/01/2006, 12:33 PM

في السابق كان عندي جمس حوض 97

وكان لدي طريقتين لصعود القص
اما 1- القير في النمره الأولى مع الدبل الخفيف.
أو 2- القير في النمره الثالثه مع الدبل الثقيل .

وكانت الطريقه الثانيه اخف ازعاج اما الطريقه الاولى تكون اقوى واسرع

اما بعد ماشريت الباترول صرت احطه بالثاني مع الدبل الخفيف .

ولكني انصح للي دايم باستمرار في نفود يركب( فلتر رياضي + هدرز) تخفف الموتر وتنفس عن المكينه .

anas

09/01/2006, 02:46 AM

اخي حرباش الله يرضى عليك ممكن تشرح لنا ما هو الهدرز وما هي إيجابياته وما هي سلبياته وكذلك الفلتر الرياضي ؟

خالد 1

10/01/2006, 04:45 AM

اشهد اني استفدة من كل معلوماتكم المفيده

المطلق

10/01/2006, 01:30 PM

هذا رابط لموضوعي لمن أراد أخذ بعض الإحتياطات اللا زمة لكي لا تغرز

http://www.mekshat.com/vb/showthread.php?t=42389&page=1&pp=15 (http://www.mekshat.com/vb/showthread.php?t=42389&page=1&pp=15)

واشكر صراحةً جميع من افادنا بهذه الخبرات المتفاوته في هذا الموضوع

وأود أن يكون موضوعي يفد الجميع ولو بشيء بسيط

almobd3

01/07/2006, 05:04 PM

موضوع جميل...
طيب السيارات الي مافيها دبل وش يسون..؟

الشاقي

01/07/2006, 05:48 PM

جاروود
حياك اخوي والشباب ما قصرو الله يعطيهم العافية بس حبيت انوه هنا أن الدبل الثقيل ما يخرب لكن ياكل الكلتش وهذا عيبه ولك تحياتي

هاوي الله

02/07/2006, 04:48 AM

معلومه :

إذا كان قير السياره (بالثالث أو الثاني ) وأنت في نص الطعس وضعف عزم السياره فترى ماينفع ترجع القير من الثالث إلى الثاني أو من الثاني إلى الأول = توقف السياره وتغرز *

هاوي الله

02/07/2006, 04:57 AM

معلومه :

الكاتلوج حق السياره يقول لا تتعدى سرعة 60 وأنت مشغل الدبل الثقيل = يعني سرعة دوران المكينه مالها شغل بخراب الدبل الثقيل *

باجيرو شنب

07/07/2006, 11:29 PM

يعطيك العافية حبيبي

ابو تركيr

11/12/2006, 11:02 AM

مششششششششششششكورين على النصايح

مروق

11/12/2006, 02:13 PM

الصراااحه ماقصرو الاخوان .. ومعوماتهم وافيه وكافيه

((( القاعدة الذهبيه ان تعتبر النقرة من الداخل على شكل سلم , وتتجه من عتية الى العتبة الاعلى منها مباشرة )))

والاهم من ذلك اخذ صورة شاملة للمكان حسب المستطاع , في كل فرصة اثناء القيادة

ووقفت فعلا عند سوأل الاخ الكريم ..

اللي مامعه دبل ويش يسوي ؟؟

انا قد مرت على تجربة هلي غمارتين جديد بالدهناء , وكان مليان عفش وهو السيارة الوحيدة بالمشوار ( تحدي بين الاصحاب يستوجب قطع نفود الدهناء برمته ) دخول من ام نقي شمالا وخروج جنوب لينه 15 كم
وكان الوقت صيفا" ,, والرمل باشد حلات تفككه

واحب اذكر الملاحظات المكتسبة من هذه المغامرة

1- وضعت هواء الكفرات 15
2- تخففت من الملابس الزائده
3- استعنت بالله ودخلت بهدواء ( عملية الهدواء وظبت النفس اهم عملية )
4- وضعت بالحسبان ان السيارة ومكينتها اخر مافكر فيه
5- اول خطوة هو اتجاهي للنقرة الاعلى ومحاولة الاستفادة منها للسيطرة على المكان ( طبعا احيانا اصعد الى المنتصف واحني الموتر )
6- التركيز على اماكن الاشجار وهي اهم نقطه ومحاولة رسم خط وهمي الى لنقرة المقابلة بين الاشجار قبل الانطلاق
7- انطلاق بحذر مع شد متواصل للموتر
8- محاولة الوصول للغيار الثالث باسرع وقت لانه يعطي تحكم وفرصة شحط لااي مفاجأة
9- في الانزلاقات الطويله وعند حاجتك للفرامل ( استخدم الجلنط وهو محرر بيدك . ليسهل ارجاعه بسهولة ) << انتفعت كثير بهذا
10 -لاتقف الا وانت متأكد فوق منتصف النقرة
11- عند تشعر انك محاصر في نقرة وهي على علوو كبير اذهب الى ابعد نقطة ثم شد الموتر بتجاه النقطه اللتي تراه اسهل ورجع النمرة من السرعه الثالثة الى الثانيه في منتصف الصعود على الاكثر
12 - لاتفكر بالسيارة كثيرا .. ربما تعاطفك معها يجني عليها شيء اكبر ( التغريز يعدم الموتر اكثر من الشحط )

والحمدلله قطعت الدهناء خلال 45 دقيقة مع تغريزة واحدة فقط في مدخل الدهناء وكانت بسبب ارتباكي

وكان الوقت المخصص للتحدي ساعه واحدة وابشركم اكلت خروفهم:d

هاوي الله

11/12/2006, 08:58 PM

أشهد إنهم سوااااقين اللي يقطعون الرمله (الربع الخالي) من جنوبها إلى شمالها ومواترهم ما فيها دبل !! هوووووى يالهافات ولا بلاش &

ولد عبدالله

11/12/2006, 09:15 PM

من ناحيتي انا

نسم الكفرات وعطه الخفيف

وشف اقل مكان ارتفاع في الطعس واشعطه معه بدعسه حلوه

اول ماتوصل راس لطعس حاول توخر رجلك عن الدعسه لانك ماتدري وش اللي قدامك يمكن
يكون قدامك سكين ( كسر)
تقلب السياره

عموما انا حريف تطعيس اذا تبي دوره بــ 300 ريال
راسلني على الخاص
ههههههههههههههههههههههههه

امزح معاك

السالمي

11/12/2006, 10:20 PM

أشهد إنهم سوااااقين اللي يقطعون الرمله (الربع الخالي) من جنوبها إلى شمالها ومواترهم ما فيها دبل !! هوووووى يالهافات ولا بلاش &

صدقت والله

والحين يتهاوشون على سيارات البر

اللي يقول الشاص واللي يقول النيسان واللي يقول الجمس الحوض

مافيه شي اسمه سيارت بر

فيه شي اسمه سواق بر

انت لاصار معك سياره فيها دبل وغرزت تركبك الشرهه من راسك الا رجليك

اما لاصار موترك ماهو موتر بر وخليته يرقى مراقي الجيوب فأنت سواق بر

اما عن كلام الاخوان عن الطريقه اللي ترقى فيها الطعوس

انا اشوف انك اذا احتديت انسى السياره كلها في كبرها

وخل قلبك عند رجليك وانطح الطعس نطوح بس انتبه يدق وجهه ثم تطلع من الجهه الثانيه

والهواؤ خله على اقل شي اذا الكفر قاسي خله على 5 اما اذا هو لين على 10

والدبل الخفيف مشبوك وتوكل على الله وبأذن الله انك تبي تطلع

صليب الرأس

23/01/2007, 01:48 PM

يالله تجعله سالم ياجلمود ولا يهون الاخوان.
طيب عندي سؤال اذا جاك مسف وانت نازل كيف توجه الكفرات؟

وددممممممممممممممممممممممممممتم

الجماجمي

24/01/2007, 10:32 PM

التطعيس فن وذوق واخلاق وكلها ان شاء الله متوفرة في اعضاء منتدانا الحبيب والمشاركات السلبقة تدل على الخبرة الكافية فيهم وفقكم الله

نجم واحد

12/09/2008, 03:43 AM

الله يعطيكم العافيه

اسير الغضا

12/09/2008, 03:52 AM

الف شكر
وبالنسبه لراعين الدداسن يقولووووون
خذلك عزم من النفود الي قبله
وهي بثلاثه ارقى ثمن اذا
ضعف عزمه رده لثنين
واذا ضعف واحد واذا قوى واحد حطه بثنين
مزبووووووووووووووووووط ياشنب

سعد777

12/09/2008, 06:09 AM

تراء الموضوع له 6 سنوات وش تبون فيه

سطام vip

13/09/2008, 02:14 AM

صراحه موضوع مفيد ولو انه قديم اخوي سعد

وفيه تجارب حلوه مع اني ما عجبني ابد الي يقول

شب على السياره ياناس طالعين تنبسطون والا تكسرون وتخربون سياراتكم

الواحد يبي الوناسه بس بعقل اما اني اكسر سيارتي علشان طعس

عسى عمري ما طلعته الا في حالة اني محتد وما فيه طريق ثاني

والله يستر على اصحاب الهايلوكسات خاصه والله يا انا ارحم مكاينهم

الحمد لله اني مانيب هايلكس ههههههههه

بالتوفيق للجميع

الصامل1111

29/11/2008, 08:25 PM

أقول ارفقوا على مواتركم

بلا هبال إذا ماقدرت تطلع الطعس بهدوء دور غيره ...

شكش (شايب) كاشت مع عياله!!!!!!!!!

yfd

15/12/2008, 02:45 PM

احلاااا ولله وفي طعوس هنا ...
طيب السياره تختلف من سياره .. جيب .. ونيت .. صالون.. تريله..
................................ارجوالتوضيح

مايغرز

14/04/2009, 09:39 AM

بالنسبة لصعود الطعوس مع خبرتي المتواضعه جدا جدا انك تحاول ترسم خطك بروحك لا تدوس على خط سير اللي قبلك للانه تكون الارض تفللت كل ما حاولت تدوس على رمل ماسك افضل ومرات انك تصعد بدون دبل افضل خصوصا اذا كانت المسافة اللي تبي تقطعا طويلة واذا ضعف عزم الموتر القش الدبل لقش بس ترا يبيله فن وسرعه

المزابي

20/03/2010, 02:10 PM

يعطيك العافية على التقرير

ابومناحي

20/03/2010, 03:29 PM

ياخوك شكل راعي الموضوع طلع الطعس ولاعود
سبحان من يحيي العظام وهي رميم الله المستعان موضوع عام 1423 هجرى

abusalmaan

24/11/2010, 10:24 AM

بس والله موضوع شيق واهم شي المعلومات الجميله اللي فيه

ابوصالح77

24/11/2010, 02:10 PM

تراء الموضوع له 6 سنوات وش تبون فيه

والحين له أكثر من 8 سنوات
تمنى لمن شارك فيه الصحة والعافية

صراحه موضوع مفيد ولو انه قديم اخوي سعد

وفيه تجارب حلوه مع اني ما عجبني ابد الي يقول

شب على السياره ياناس طالعين تنبسطون والا تكسرون وتخربون سياراتكم

الواحد يبي الوناسه بس بعقل اما اني اكسر سيارتي علشان طعس

عسى عمري ما طلعته الا في حالة اني محتد وما فيه طريق ثاني

والله يستر على اصحاب الهايلوكسات خاصه والله يا انا ارحم مكاينهم

الحمد لله اني مانيب هايلكس ههههههههه

بالتوفيق للجميع

صدقت يحكي تجارب الآخرين

ياخوك شكل راعي الموضوع طلع الطعس ولاعود
سبحان من يحيي العظام وهي رميم الله المستعان موضوع عام 1423 هجرى
سبحانه جل شأنه
واليوم 1432/12/18

بس والله موضوع شيق واهم شي المعلومات الجميله اللي فيه

يدل على عظم كيان هذا المنتدى الشامخ بأعضائه ورجالاته

قايد الدمعه

24/11/2010, 05:35 PM

والحين له أكثر من 8 سنوات
تمنى لمن شارك فيه الصحة والعافية

صدقت يحكي تجارب الآخرين

سبحانه جل شأنه
واليوم 1432/12/18

يدل على عظم كيان هذا المنتدى الشامخ بأعضائه ورجالاته

تونا بدري على 1432/12 :)

الهاجس 354

24/11/2010, 07:00 PM

حمستوني ابا اروح اطعس :D:D

ولد عادل

24/11/2010, 07:01 PM

ممكن احد يعلمني كيف اسوي موضوع

WRWRWR

24/11/2010, 07:22 PM

ملقاط بن جمر

24/11/2010, 07:46 PM

ما شاء الله ..

الموضوع من 2003

وأنا مثل ما رد واحد من الأخوان :

أروح للطعوس اتفرج و أضحك .. لكن اطعس والا اطلع مع واحد للطعس والله لو تقطع راسي ما اطبه ..

السلامة والعافية ما فيه أطيب منها حتى لو مع أحسن واحد يطعس في العالم ..

الشيخ البدراني

24/11/2010, 08:03 PM

يعطيك العافية على التقرير

الليث الذهبي

20/03/2011, 10:41 AM

والله وانا اخيك هي على الخبرة والقلب
انت احلت قلبك قبل تركب السيارة ثمن توكل على الله وتبي تصير طارة مني واول ما تعلم عليه خذلك هلي او ددسن وحط بالكفر 7 او10 ثمن فاااطططططط فاااططططططط اط اط اط ااط اااط ااااط

N أبورغد N

20/03/2011, 10:55 AM

الحمد لله ماقد ردني طعس يرقا
احطه 1 + الدبل الخفيف + سايس الموتر واعرف متى تدعس + 12 ضغط الكفر
يعني فيه طعس كل الي يجون مسرعين مايرقون لان فيه تضاريس شوي يخلي الموتر يناقز
والي جوا بهداوه نسبيه قدرو يطلعون بسهول
الدبل الثقيل ما استخدمه الا اذا غرزت ولا طلع بالخفيف
والقصوص الطويله انتبه منها اذا عندك اي بي اس

بشكل عام
التطعيس يحتاج ممارسه وتطبيق الاخبرات

sgl2002

20/03/2011, 12:09 PM

خذ مسافة وعطه اثنين ثم ثالث واطلع ولاتخلي الدركسون ثابت تقول ماسك خط ... حاول تميل به واذا حسيت الموتر برد رده لـ 2 بس اهم شي تنطل يعني تلف يمين ويسار إذا برد العزم وهذي الطريقة جربتها تخلي الموتر يدوس زيادة والأهم من هذا كله خل الكفر 10 ...

زحلول

21/03/2011, 01:44 AM

احب اضيف على كلام اخواني اللي ماقصرو بصراحة وهذا الموضوع بصراحة مميز ومفيد وكل اللي جربو النفود حطو خبراتهم الله يعطيهم العافية ,,, واحب اضيف على كلام اخواني
بالنسبة لكفرات البالون حاول ماتنزل الهواء مرررره يعني بحد ادنى 18 لأن في بعض الأحيان اذا كنت نازل من منحدر اول ماتطب النقرة ينضغط الكفر وخاصةً اذا كنت على جنب او مسرع وانت نازل ينطوي الكفر ويطلع الهواء منه ويبنشر في هذه الحالة ماينفع ماطور الهواء اللي ناخذه معنا بالرحلات يبغالك مكينة يكون دفع الهواء فيها قوي نفس اللي في البناشر حتى ينفخ الكفر مره ثاني فتظطر الى تغييير الكفر بالأسبير هذي نقطه مهمه خاصة للبالون لأنها صارت معي وتوهقت ,,,
الشيء الثاني بالنسبة للدبل الثقيل استخدمه ماعندك مشكله بس بدون ضغط على الموتر ,,, ومعاك الى سرعة 50 فقط بعد هذه السرعة يبسبب لك مشاكل في الدبل ...طبعاً تعشييق الدبل الثقيل لازم تكون السيارة واقفه ماتتحرك تماماً
بالنسبة للدبل الخفيف استخدمه ماعندك مشكلة رووووووووووح الى سرعة 100 وبالإمكان وانت تمشي بسرعة 20 تعشيقه اكثر من كذا ماينفع وتفك الدبل ايضاً على اي سرعة مافيه مشكلة بعد

قاعدة (( الركاده مطلوبه ومافيه شي يجي بالقوه سايس الموتر واختر الدرب الزين وحاول انك ماتتهور او تغرك بعض الطعوس ))
تحياتي،،،،،،،،،،،

اعاشق الهلي

06/12/2011, 04:20 PM

طيب الهايلوكسات لاهنتم

sgl2002

06/12/2011, 06:19 PM

^^^
خذ عزم ولاتوقف الا في نزول ولاتديور بنص الطعس
والكفرات خلها ١٢ وتكون عراض

تركي الحربي 1

06/12/2011, 07:20 PM

بس حبيت اعرف معنى الجراكل

ثورة الشك

06/12/2011, 08:21 PM

حقيقه موضوع ومشاركات قيمه جدا

مراقب الصيد

06/12/2011, 09:23 PM

عليك في جرة الإبل امش معها والرمل اللي في عشب تعتبر شداد

karem4x4

09/12/2011, 11:18 AM

في الطلعة تحرى الميول الاقل و عند احساسك بضعف العزم لف الدركسون يمين و يسار و مع الممارسة بتعرف الارض الغراس من غيرها. احيان تفرق امتار فقط

فرخ قطا

05/05/2014, 10:57 AM

للرفع للفائده

GMC89

05/05/2014, 07:46 PM

انت رفعت موضوع له سنيييييييييييين ما ارفع ��

hani 66

05/05/2014, 08:24 PM

انتبه من الكثبان الهلاليه لا تعلق عليها

المنيعي1

06/05/2014, 12:49 AM

الطعس الطويل ﻻزم تدوس على الموتر وتجيب مابطنه كله
اما تبي تمشى وتطلع طعس مستحيل
وكذلك الثقيل انا مأنصح به لأنه ماسك شوي والطعوس الطوال يبي له سرعه.

انا لي اكثر من 15 سنه ماعمري استخدمت الثقيل الا لنزول الحاد لكي يمسك الموتر مايزحلق وكذلك لسحب وطلوع ونزول الجبال فقط

سفاري 95

01/06/2014, 01:56 PM

الله يعطيكم العافيه جميع
قريت واستفدت او بالاصح اخذت بعظ النصائح الطيبه منكم ولاكن الحقيقه انا عن نفسي اول ما اخش للطعس او اي شي مشابهه له كثبان رمليه او اي شي يجيني نافض برجلي :Dوانتو بكرامه ويصيبني خوف لدرجه انه معاد ادري ادوس ابنص والا فرامل.. ولا ادري وشهو سبب الخوف هذا ( بالمختصر امشي برجلي ازين لي:good2: )

هواة البر

01/06/2014, 03:51 PM

:good2:الموضوع استفدت كثيير

هاوي عسير

04/06/2014, 02:49 PM

نصايحة تشكرو عليها ومفيدة للغاية. ونسأل الله السلامه للجميع .

سعود الرويضان

05/06/2014, 04:34 AM

السلام عليكم

بالفعل موضوع جميل استفدت منه الكثير من الامور

تحيتي

ma042

05/06/2014, 05:14 AM

نقطه مهمه

لا تنسم الكفرات واجد عشان ما ينفصخ عليك الكفر
وخاصه عند الضرورة مثل التسييف .

وتنسيم الكفر على ٥ وانت تبي ترقى غلط لانه يبي
يصير ثقل على الموتر واحسن شي عند الطلوع ١٢ - ١٥

بالنسبه للتطعيس اذكى فكره هي عدم الدوس على البنزين
لان الدوس ينكب ويخلي السيارة تحفر ويضيع العزم
وعشان تحافظ على العزم هي الركادة ولا تضغط على
البنزين الا عند الحاجه .
وقبل كل شي التوكل على الله وتدوير السهل قبل الصعب
والتطعيس على السواق ٨٠٪ والباقي على السيارة .

اخر نقطه : اذا غرزت لا تخاف ولا تجهد نفسك استعن بالله
وفكر كيف تطلع السيارة بدون تجهد نفسك . يعني احفر وريح ادفن وريح
عشان ما تفحم بسرعه .

في امان الله

محب الجهاد

05/06/2014, 02:53 PM

موضوع ممتاز فعلا حفلت بجملة من الفوائد بارك الله فيكم جميعا ، وأشكركم جميعا على هذا التفاعل حتى وإن كان الموضوع قديما فالمسلم يبحث عن الفائدة مهما كانت بوركتم وبورك مسعاكم

بحر العطا

16/01/2015, 01:42 PM

الله يعطيكم العافيه ماقصرتوا

انا توني شاري جيب gxr 2006 سعودي فل كامل اتوماتيك وماطعست فيه نهائياً ولا عرف لتوماتيك ممكن تشرحون ليه لاهنتم

بربنجي

16/01/2015, 05:19 PM

الشي الثاني لو اضطريت تنزل من فوق طعس لتحت الطعس او تطب بنقره
( نقره = مكان منخفض بين طعسين او اكثر :D )
اذا اضطريت تنزل فا حاول تنزل الموتر على وجهه مباشره يعني لا تنزل على جمب وتخلي الموتر يزحف ترا ناس واجد جابو التنده وكفختهم الجراكل بسبب ذا الحركه
فحاول انك تنزل الموتر دايما على وجهه حتى ولو حك وجهه بسفل الطعس وانت مهدي اذا نزل وكان الطعس شديد الانحدار فلا يهم اذا تذكرت انك ممكن تعرض نفسك للخطر على جمب

جــلــمــود

جلمود
الله يسلمك كيف انزل الموتر في النقره على وجهه مباشره اكيد راح يدقر على وجهه
الافضل / طبعا لست خبير تطعيس / تاخذه شطف

والله يحفظكم جيمعاً