وش افضل كفرات صينية

[ابوحمد05]

ياشباب وش افضل كفرات صينية للجيب ومقاسه كبير

[سيف وقلم]

مب لازم تأخذ صيني, فيه ماكسس تايلندي وكيله الهاجري نوعية ممتازة وسعره متوسط نسبيا.

[الخلاوي 15]

رنواي نفس مقاس الحجري 16
10 غاط من تجربه ممتازه وخفيفه

وطقمها 1400 بدون تركيب

[.أبوعبدالرحمن]

الماكسس راح يكون أفضل من الكفرات الصينية إن شاء الله

طبعا من ناحية السعر نفس سعر الصيني أو يزيد بقليل وكفرات مجربة على أحجام مختلفة والأغلب يمدحونها

وهي الأفضل لك من الصيني

[وااضح]

ماكسس ممتازة من تجربه وسعرها رخيص

[عبدالرحمن السالم]

انا مركب IRONMAN له سنتين معي لين ومطبه ممتاز ونقشته نفس نقشه المشلان بالضبط

نفس هذا بالضبط وسعره 420 على جنط 17
http://pptac.http.internapcdn.net/pptac/imagesProducts4/10430.jpg

[ابوحمد05]

هلا بالجميع
رانوي صيني
يالخلاوي
ولايهون الجميع كويس ومتوفر بكل البناشر ومقاس يجي منه مقاس كبير يرفع الموتر

[ابو صالح 871]

ماكسس ممتازة من تجربه وسعرها رخيص

[MEMo_o]

في نوع اسمه مكسن الصراحه الطقم الاول معي 3سنوات وانا من النوع الي اجلد الكفرات قومات :D
واللحين ركبت طقم ثاني منهم
:good2:

[هداج]

رنواي نفس مقاس الحجري 16
10 غاط من تجربه ممتازه وخفيفه

وطقمها 1400 بدون تركيب






نصيحة لوجه الله من شخص مجرب هذه النوعية ابعد عنها ولا تقربها ابدا تبي الكفرات الجيدة واللينة والمريحة وسعرها اغلى بشوي من الصيني خذ لك هانكوك الكورية وليست الصينية وان كنت مصمم على الصيني خذ لك كفرات اسمها ( كندا ) هي كفرات صينية لكنها افضل من الرنواي بمراحل وهي مشابة في نقشتها تماما للدانلوب

[قناص 28 عفيف]

اذا انت راعي خطوط وسفر ماانصحك بالصيني لانه معاد تصنيعه
اخذ هانكوك كويس

[MEMo_o]

اذا انت راعي خطوط وسفر ماانصحك بالصيني لانه معاد تصنيعه
اخذ هانكوك كويس



انا شفت برنامج عن الكفرات في الخارج انه اغلب الشركات الكبيرة تعيد تصنيع الكفر موب تسيحه وتصب كفر جديد لا يقشطون النقشه ويحكون غراء ويجيبون طبقه نفس النقشه القديمة ويزبطونها ويدخلونها فرن وكذا


والكفر سعره ربع الكفر الجديد



يعني اعادت تدوير ياليت لو واحد من التجار يفتح مصنع اعادت تدوير الكفرات نفس الطريقة


على الاقل اخذ لي كفر دنلوب معاد تدويره افضل من الصيني البلاستك


:good2:



طبعا الشركه اوربيه وببلد اوروبي




وللمعلومية البعض يلخبط بين اعادت التصنيع واعادت التدوير اعادت


اعادت التصنيع انك مثلا لوعلبة ببسي تسخنها وتصبها بقوالب هاذي اعادت تصنيع


لاكن اعادت التدوير ادور طريقة اصلح العلبة من الطعجات والكسور واقشط الرسمة الي على العلبة واستخدمها ثاني


وسلامتكم :f

[مرموق.]

في كفر صيني هندسه استراليه. اسمه ألتينزو كل إلي ركبوه يمدحونه نقشته مثل ألمشنل. وتحمل سرعه v والتبرشر والتركشن a وسعر الطقم 1900 درهم ماعرف إذا هنوعيه موجوده في ألسعوديه

[التعـ King ـديل]

صحيح الموضوع قديم شوي ولكن نصيحه للجميع الكفر من الاشياء المهمه في السياره

اشتر الجوده حتى لو كانت غاليه لانك بتوفر مبلغ قليل جدا اذا قارنته بالجوده والحمايه بعد الله من اخطار الطرق

[مرموق.]

الفرق بين الكفر الصيني واليباني مايتعدا 1000 ريال

[مسير عليكم]

كنق التعديل كلامك سليم
بس ياخي الكفرات ولعت والمخبات فاضي ولا ايام الرخص من كان يركب صيني ولا تايلندي

اخواني انا ناوي اركب لقيت الصيني ب330 الي 385 والتايلندي 470 الي430 والياباني 430 الي 650 حسب النوع والجوده

[عاشق الددسن92]

رانوي الصيني

[2 محلا]

ما عرفنالكم ،، بغض النظر عن النصيحة الموضوع يقول افضل كفر صيني ( ايطار ) تروح تقول التيلندي افضل سعر×
وا الكفر الفلاني افضل ، من المفترض ان الشخص يرد على السؤال الرجال يسأل عن الكفر الصيني .

[2 محلا]

طبعا انا كتبت في المعرف افضل ايطارات صينة لقيت العنوان هذا ووجدت بعض الردود لا تسمن ولا تغني من جوع .

مع قدم الموضوع لكن كثير من الناس يبحث عن ايجابات في وقتها .

[واطي الجمرة]

ماكسترك مركبها في رمضان جنط20 300ريال ولا احلى

[YUKON_GMC]

الموضوع من عام 2013 والمفترض يمنع رفع المواضيع القديمه بعد سنه تتقفل المواضيع تلقائي كماهو معمول فيه في اغلب المنتديات

احتمال السؤال كان وقت غلاء الكفرات يوم ان مقاس 17 ياباني الحبه ب 800 ريال

الان الكفرات طاح نصف سعرها وصارت اسعارها معقوله .. ونرغب بالمزيد

الصيني فيه تقليد على الماركات المعروفه او بمعنى اصح خط انتاج ثاني من المصنع بالصين

مثلا البرجستون يجي صيني وممتاز انا مجربه وفيه الهنكوك يجي صيني وفيه الدنلوب يجي صيني .. مع ان فيه اصلي من المصنع ولكن بعد سنيتن ثلاثه ماتحصل بالسعوديه والخليج كلها كفر اصلي ياباني .. سوف تتحول كلها صيني بنفس الاسم كما تحولت ماركات الاجهزه الهيتاشي والسوني والسانيو الشارب والباناسونك الى صيني سوف تتحول الكفرات صيني

من خلال تجربه في نوع اسمه فيدرال صيني حجري ممتاز
وفيه الكينداء برضه ممتاز وفيه السايلون طيب بالحيل و لاجاك ولد سمه سايلون ينحزم به الظهر هههه
بس ماادري ادري يجي منه مقاس كبير والا مخصص للسيارات الصغيره وانا لي كم سنه استخدمه على سيارات صغيره يكد ويمد ..


:D

[turki_20041]

السلام عليكم ورحمة الله وبركاته
هل تنصحوني بتركيب كفرات ماتريكس الصينيه مقاس 205/60/16 على سيارة مازدا 3 , السياره طبعا للاستخدام داخل المدينه ؟؟