أسعار اغرض الكشتااات

[ريح الخزامى]

بسم الله الرحمن الرحيم

اتمنى من ادارة المنتدىانها تثبت هالموضوع

نبداء بالموضوع

ودي في هالموضوع اننا نخليه مرجع لاسعار عدة الكشتات علشان الواحد لا بغى يشتري شي وإلا بيجهز شي إلا واهو عارف كم الاسعار وين تباع فيه علشان يعرف وين الزين فيه ويكاسر وتيسر امور الواحد في الطلعه ولا ياخذ إلا الشي السنع والمتعوب عليه والرخيص انشالله
وكل واحد شاري شي يحط سعره وإذا ماعليه كلافه يحط لنا من وين شاريه علشان اللي في منطقتك يعرف وين الاماكن الزينه اللي تبيع العده وتجهيزات الطلعات

انشالله نشوف التجاوب في هالموضوع ويصير مرجع انشالله
وانا ببداء بالاشياء اللي شريتها وعندي موجوده

1- رواق 9*1.50 شاري من الغرابي ب130
2 - كشاف ماج لايت 3 بطاريات شاريه من البطحاء ب70 ريال
2- ماطور هواء سفاري شاريه منا لغرابيه ب120 ريال
4- كريك يتسفط شاريه من برى الرياض ب18 ريال مساكته خشب وكبير
5- وايرات كل واحد 5 امتار عدد 2 ب40 ريال من الغرابي
6- رواق 7*90سم ب 80 يال من الغرابي
8 - دربيل روسي 8*50 ب150 ريال
9- كشاف 1000000 شمعه ب120 ريال من الغرابي
10- محول من AC-DC كويو ب180 ريال من البطحاء 120 امبير

والاشياء واجد بس ماذكر

وطبعا بالنسبه للدوافير عند سوق الزل والمركاب ان تسانك تبي الرخص في الغرابي عند محلات الخيام فيه محلات تبيع المواصير اللي تحط في الرواقات والمراكيب والملاقيط وكل شي


اخوكم ريح الخزامى

[فرد حمزة]

جيد
موفق في طرحك

حقيقه بعض ماذكر كان في مخيلتي أنها أغلى لكن من خلال موضوعك أتضح أنها أرخص بكثير

جزاك الله خير
:)

تحياتي لك ... أخوك فرد حمزة

[عروان]

أقول : والله الغلا عندنا بالشرقية. نار شابة

[جــلــمــود]

السلام عليكم

الف شكر للاخ ريح الخزامى على هذا الموضوع الطيب من طيب راعيه والمفيد وفكره ممتازه جدا
واسمحلي أن انتهز الفرصه من خلال موضوعك بتحية الاخ العزيز فرد حمزه

دافور صغير لشاهي المستعجل أيطالي + دبة ايطالي 30 ريال الدافور 20 واربع دبات غاز بعشرة من الغرابي

رواق 6 متر = 70 ريال من الغرابي وتفصيل بعد

فاس صغير امريكي ( والله يعزكم ) 20 ريال عملي جدا وصغير الحجم وقوي

لمبة مغناطيس 50 واط + جراب مبطن بأسفنج للحماية من الكسر = 20 ريال من اليوسف للخيام والرحلات

كشاف صغير ديريسال + بطارياته = 20 ريال من عند محطة ما

واير سحب حديد 6 طن من الغرابي = 40 ريال

مراكي بمواصفات خاصة = من زمان مفصلها = ناسي بكم .

هذا مايحضرني الان :rolleyes:


والعده واجد بس بعضها من زمان ولا اتذكر من وين شاريها لكن بكون معكم على الخط مع اول شي اتذكره


ودمتم في رعاية الله وحفظه



جــــلـــمـــود

[أيمن]

طيب وش الحل مع اللي ينسى بكم شرا .. بمجرد ما يطلع من المحل :mad:

[فرد حمزة]

جــلــمــود
السلام عليكم ورحمة الله وبركاته

حياك الله وبياك
وجعل الجنة مثونا ومثواك :)

أشتقنا لطرحك عزيزي ،،، ومن غاب جاب العنايم :)

تحياتي لك :)
أخوك فرد حمزة

[عود رمث]

الحقيقة أنا شخصيا سعرت بعض اغراض الكشتات في الرياض وطلع الفرق عن القصيم زيادة نصف القيمة ..

يعني شريت كرسي نار من القصيم بعشرة ولقيته بالرياض بخمسطعش ...... وعليكم الحساب .

وهذا مثال بس .:(

[weba2000]

السلام عليكم ياشباب
انا عندي مشاركه ماتغلا عليكم من فتره طويله وانا ادور عدة الكشته تكون صغيرة الحجم وعملية وذات حجم صغير مثل ابي مروحة صغيره وعملية لاسستخدام في شب النار ولقيتلكم مروحه ممممممممممتازه من طرف والطرف الثاني كشاف لاتفوتكممن نوع فيتارا
اعذروني على الاطاله

[الفرعاوي]

أنا عندي بطارية جافة محمولة صينية (اللي لونها صفرا) شريتها ب 130 ريال يوم اني كنت في عنيزة (نسيت اسم المحل و هو محل كبير على اليمين قبل الساعة).

و أرخص ما لقيتها في الرياض ب 170 في الغرابي !!!

و هي عملية و مميزتها أنها جواله و ما يحتاج تقرب السيارة عند الخيمة أو مكان الجلسة كذلك تطفي النور و انت بفراشك !

و تشغل لمبة 25 واط لمدة حوالي 20 ساعه أو أكثر بس تأخذ وقت للشحن.

كذلك عندي سخان موية ، شريت ماسورة النحاس بعشرة (2 متر) و شباب الجمر بثلا ثتريل و لويت الماسورة عليها وجربتها و تمام التمام و موجودة عند محل مقناص مخرج 15 بمية و عشرتريل !!!

أفكر أرتب وحدة (سخانة مهوب ثاني!) معها دافور(يشب بدون كبريت أو ولاعة) و بزبوز قطعة وحدة تشبك بلي و يالله من فضلك تحطها في الخيمة و ما يحتاج تطلع من الخيمة صلاة الفجر (الا في حالة وجود شغلات ثانية و هذي جاري العمل على اختراع شي لها بعد)...

أخيرا عندي خيمة السباكين 3 في 3 من اليوسف بسبعمية (قماش تنزاني و كيسة قماش تايلندي) ... و شغلهم طيب و فيها سعودي قصمنجي يحبه قلبك.

نصيحة ..... اللي يبي الرخص دايم يحاول يشتري في عز الصيف خصوصا الخيام و الرواقات و خياش النوم ..
الخ

و سلامتكم

[سكوربيون]

السلام عليكم

هلا بالشباب الحين جاء وقت الكشتات والقنص
لازم نعرف الاسعار
ولذلك انا ابعلمكم باللي عندي

انا شريت رواق (أخضر) 6*150 بـ65ريال بس اني شاري اثنين يعني بـ130ريال من الغرابي

وشريت كرسي النار اللي توضع عليه اصياخ الشوي بـ20 من الغرابي

وشريت عزبه وسط (للقهوة والشاهي) بـ30 من الغرابي

وشريت شنطة للدافور مبطنه في اسفنج بـ30 برضه من الغرابي

واذكر اني سألت عن الرواق 10*150 وكان بـ110ريال

وأنصح اللي يبون يشرون رواقات عليهم باللون الاخضر لأنه ما يبين في الوصخ

وهذا اللي عندي

[عاشق النحم]

هذي عنيزه والوفا والحقوق مهب بربسة بزارين (كلمه) دار بليسه كرسي النار بـ 15 ريال

[الهباق]

يازين التوليف مامثلة

[محبوب الجميع]

والله انكم ماقصرتم وعرفنا اسعار بعض الاغراض ( السعر الحقيقي ) واماكن تواجدها الله يوفقكم

[حطابه]

رحت للشرقيه قبل عشر شهور وخرب الدافور اللي معي وأنا جالس على البحر أنا ورفيقي حاولت فيه ما زان المهم رحت أدور لي دافور صغير في السوق مااااااااااااااالقيت فرحت للمخازن الكبرى اللي في طرف الخبر وألقى عندهم ذاك الدافور اللي كل من شافه جاز له صغير ووذف وعينه سنعه وقويه ولا فيها صوت أبداً بس الصحيح أنه غالي بـ90 ريال

[قرناس]

مشكور أخوي ريح الخزامى على طرح مثل هذا المواضيع
لكن بعد أن قرأت ماكتبت عرفت إن بعض المحلات يضربون في 2

[شـــــــارد]

مشكور أخوي ريح الخزامى والله موضوع أكثر من رائع

جزاك الله خير

أخوكم : شــــارد

[شـــــــارد]

السلام عليكم ورحمة الله وبركاته

هذا هو ردي الثاني على هذا الموضوع الرائع

أخواني الكرام انصحكم بزيارة محلات كل شي بريالين لمن أراد أن يجدد العزبه أو ينقصه شي من

الاشياء الصغيره أنا جربت واشتريت منها وهذا ناتج تجربتي :

- أنواع العلب (سكر ، شاهي ، قهوه ، هيل ، بهارات ، . . . . . إلخ)
- دبة الدافور الصغير
- جركل للوضوء
- ملقاط
- صحون بلاستيك (50 حبه)
- مكعبات اشعال
- ملاس
- سكين
- مفك علب
الحبه بريالين . . . . . . . . اكيد بتقولون عنده محل كل شي بريالين

أخوكم : شـــارد

[خالد الدلوع9999]

والله كلامك صحيح ياخوي شارد

[أيمن]

للرفع

[الدبل الثقيل]

السلام عليكم ورحمة الله وبركاته.. بسم الله نبدأ /
1/ دلة رسلان تقليد (كبيرة) =35 ريال
2/ دلة بغدادية تقليد(كبيرة) =50 ريال
3/ شراع لهنقلين هايلكس غمارة = 250 ريال
4/ تيزار 7*1.20 =90 ريال
5/ تيزار 5*1.50 =75ريال
6/ لمبة مع سلك ومشابك على بطارية السيارة =20 ريال
هذي من محل السنيدي في بريدة والصراحة من افضل المحلات في المملكة..
ثانيا/
1/ شنطة عزبة وسط (قماش اخضر) = 35 ريال
2/ عزبة قهوة وشاهي مبطنة بطربال من الداخل ( فارغة ) = 35 ريال
هذي من المحيميد في بريدة .. شارع الصناعة الأشارة اللي بعد سوق الحريم
ثالثا/
1/ فناجيل ميلامين (وارد المصنع الوطني للميلامين في الرياض) درزن فناجيل كبيرة ب 20 ريال ودرزن فناجيل وسط ب 12 ريال
2/ حافظة ماء (كيب كول الأماراتية) 24 لتر ب35 ريال
هذي من مجمع محلات الأواني المنزلية بالجملة في حي الهنداوية في جدة .. والله لو تدخلونها انكم ماتخرجون الا بدينا محملة اواني منزلية قدور وتوابعها..
رابعا/
1/ دربيل ستينر الألماني مقاس 7 * 50 الصقر ب 890 ريال بالقوة.. من عمارة الملكة في حي البلد في جدة..
2/ ذرا اكبر مقاس للدافور شغل السنيدي ب 25ريال بالمكاسرة من محل الصحراء في سوق ابن لادن في حي الجامعة في جدة..
3/ توانك ماء المدورة السودا اللي لها غطا صغير وكبير حجم 60 لتر الواحد مع تركيب بزبوز 33 ريال من محلات الجوالين شارع المخزومي في حي البلد في جدة...
4/ دربيل ليلي اكبر مقاس روسي ب 900 ريال من مكة ( مواقف كدي )..
5/ تفصيل هنقلين لهايلكس غمارة ارتفاع 30 سم مع حنايا ب 200 ريال من ورشة مقابل النجر في بريدة..
6/ هايلكس غمارة 2001 GL ب 48000 ريال من معرض جارالله القحطاني ( موزع لتويوتا في معارض جدة)... هههههههه فاضي D

[طيـــ بر ـــر]

الدبل الثقيل هههههههههه الله يقلع بليسك ......
الهايلكس هذا موجود عند محل اليوسف .. أرخص من كذا .... <<<< جاك الثاني :D

تنبيه : خاص للي يبون يشرون (( الرواق )) اللي 1.50 في 8 متر أو سته متر ... أو أو ..
التنبيه .. هو أن الحديد اللي يثبّت هذا الرواق في الأرض .. غالبا ..ينكسر ‍‍‍‍!! اذا كان ... مجوّف مثل المواصير يعني .... الحين ... بدأت المحلات تتلافى هذا الخلل .. وصاروا يحطّون (( أطناب كبيرة )) وهذي ممتازة ... ماتنكسر ... لذلك جرى التنويه ..

مراسلكم ..


طيـــ بر ـــر

الفلّوجه ..

قصدي .. الروضة .... الرياض ... قناة مشكات

[ريح الخزامى]

ونرجع لموضوعنا مرتن اخرى

فيه ماصوره تتسفط ويطلع طولها حول ال 50 سم تنفك ويطلع طولها حول المترين الظاهر
ولها في اسفل مثل الطنب تعلق عليها لمبه الغاز علشان تنور مساحه كبيره

شريتها من محل في الدوادمي اسمه رحلات ب 25 ريال
وفيه حوسه واجد بعد بس فيني النوم هالحين ولا اذكر شي
لين الله يسهل ونصبح انشالله ونشوف وش انحن عليه


فمان الكريم

[طيـــ بر ـــر]

ياشباب .. وين أحصّل الماصورة اللي قال عليها ( ريح الخزامى ) ... وين أحصلها في الرياض ... بصراحة شفت شباب حاطينها.. فوق طعس .. ماشاء الله منوّرة المكان بالغصب ..

[ريح الخزامى]

السلام عليكم



الماصوره هذي ياطويل العمر انا لقيتها مره عند محل على طريق الدائري الظاهر ان اسمه رحلات
عند مخرج عشره اول ماتدخل المحل شف السوداني رازرها لك على يدك اليسار ( عاد مدري ان تسانه غير مكانها وحطها على اليمين ماودي احط في ذمتي شي ) خبري فيها على اليسار وسعرها الظاهر انها حول ال30 ريال

بس كاسرهم تراهم غالين :)

[طيـــ بر ـــر]

يعطيك العافية .. ماقصرت ..

[اخو نورة]

الماصوره انا شاريها ب 25 ريال من سوق الخيام بالغرابي
شف الشويرع الى فيه محلات ادوات الرحلات بتلقى محل اسمه القناص او المقناص والله نسيت وش اسمه وماريته لاطخ الاسم الجديد على لوحة قديمه كان اسمه اليوسف المهم موب ذا المحل المحل الى بتلقى عنده الماصوره الى بعده على طول وانت وجهك جنوب وماريته سوداني الله يعينك على بروده (((((اللهم اني صائم ))))

[عاشق الصفاري]

الرسالة الأصلية كتبت بواسطة قرناس
مشكور أخوي ريح الخزامى على طرح مثل هذا المواضيع
لكن بعد أن قرأت ماكتبت عرفت إن بعض المحلات يضربون في 2