معلومات عن الشاص

[الداوردي]

أعزائي رواد هذا المنتدى السلام عليكم ورحمه الله وربركاته .....
يااخوان ابي في هذا الموضوع بعض الملومات عن الشاص حيث إني ابي أشتريلي شاص في الايام الجايه وحيران مدري آخذ من الاولات يعني من 99 وتحت ولا من الجديد من2000 وفوق .
أبيكم تعطوني السلبيات والاجابيات لكل قسم منهن مع العلم أني أبي أستخدم و أنا راعي جبال وطرد أحياناً.

أرجوا الاجابة منكم يا إخوان .....والتحيه لكم جميعاً.

[الخبير]

السلام عليكم
ما يخفى عليك ان الموديلات من 2000 و فوق صارت بخاخات و وسعوها من داخل و كبروا الصندوق.

لكن بعض الشباب يقولون ما فيه أفضل من القديم لأنه سست و الجديد يايات. و الأول كربريتر و الجديد بخاخ.
الاول ما يخرب و الجديد خرابه و اجد.
لكن كل من سألته عن الموديل الجديد وهو كان عنده الموديل القديم يقول الجديد ولا غير .

توكل على الله و استخر و خذ إلي انت تبي. و الله يبارك لك.

[الداوردي]

ماقصرت يامشرفنا الطيب .
وأبي انتظر لعل يجي بعض الردود التي تقنعني مرة لأني أبي أستخدم مثل ما قلت في البداية وشاكرين لكم التواصل والسلام .

[هلكس]

هلاااااااااا

كيف الحال طيبوووون انشاء الله ..

والله انا مالي خبره في الشاص بس ابي اقوول لك
الي عرفهم ومعه شيصان
طبعا اول معهم 97/ 99
وكلهم الحين باعوها وشروووو 2002
وكلهم يقولون انها ازين من الاووووله
واقل صرفيه في البنزين
ومطبه اخف من الاوول
والغماره اكبررررر من الاول
والصندوق بعد
وهذا الي انا اعررفه
وانشاء الله اني قدرت افيدك

في امان الله

[ابو الريم]

الجديد وبس ......... وصراحة ما فيه مقارنه ......

[ابو شجاع]

اخوي الداوردي اول شىء بسئـلك عن معنى اسمك او لقبك ثاني شئ توكل على الله واشتر الموتر انا مثلك مااقتنعت الا يوم طلعت عليه خط سفر موتر نشيط وسيع ومطب مهوب قاسي ولاهنا صرفيه ورزه وهيبه:D

[(طيرشــــلوى)]

الجديد أفضل من القديم بكل شي الا ان القديم يفضلونه اللي يدخلون الحره خصوصا المناطق اللي فيها شطوب صخرية لأن السست تحمل بس الياي على اسمه( ياي)؟؟؟
طــــــــــــــــــــــــــــــــــــــــير شــــــــــــــلـــــــــوى يدعو لك بالتوفيق............

[وجه الخير]

السلام عليكم خوي هنا عندنا باليمن يرغبون من99 وتحت لانه ثبت في الجبال والطرق الوعره احسن من الياي ومواتر يبيضن الوجه لااعطال وينسيك شارع الورش:D
والجديد ميزته قليل المطب وفارق شوي بالصرفيه ونا انصحك ب99 لاحصلت موتر جديد ونضيف احسن ونهن مرعبلات ومن ثاني يوم ونت بالورش لالا خله وخذ لك من الجداد

[عاشق الصحراء]

لان الشباب يقولون الجديد فيه نوع يسمونه (حضري)عدد
ريش السسته اقل و مريح بس ودك تمشي به لو من العشى حتى
الفجر مع مطبات الحرة.و سلامتك