المساعد الشخصي الرقمي

مشاهدة النسخة كاملة : سؤال يالنشامى عن كفرات مقاس 275 للهلي


الماجدي
02/10/2006, 06:23 AM
ياشباب عندي هايلوكس 2004 غماره ودي اركب لها كفرات هانكوك مقاس 275 ... السؤال ؟؟
هل تضر الموتر ؟؟
وماهي المساوئ اللي تتلحق الموتر ؟؟
الدبل الثقيل
02/10/2006, 08:26 AM
أعوذ بالله .. هذا مثل عرض كفر الجكسار... مايصلح أبد يطيح العزم تتطييح...

ركب مقاس 215 أو بالكثير 225 ولاتفكر بال275 يكفيك طيحت العزم شي غير طبيعي...
غضنفر
02/10/2006, 12:55 PM
يا حبيبي
الهلي يركبون عليها 255 و تسبب مشاكل وانت تبي 275
اصلا ما يركب 255 او 275 على الهلي من قدام
يضر الدفرنس و القير عاد من زين قير الهلي
راعي المدا
02/10/2006, 01:25 PM
افضل شئ 215*75 للنفود والشعبان
205 *75 اذا كانك راعي خطوط
والله يوفك بالي يناسبك
مصيول
02/10/2006, 01:44 PM
انصحك اخوي ابعد فر منها فرارك من الاسد

انا مركبها علي يوكون ومطلعه عيني مغير اثنين وللحين ماهي مريحتني نصيحه ابعد ..
عاشق البسيتين
02/10/2006, 01:47 PM
انا مركبها والحمدلله مافي ازين منها في الرمل والحصى والشعبان ومريحة للموتر
راع الونيت
02/10/2006, 02:30 PM
ياخوي هذا مقاس كبير جدا خصوصا قدام راح يحك بالرفرف مع اللفات ويطيح العزم
خير يارجال شف شي معقول تحياتي
&**البتار**&
02/10/2006, 07:56 PM
أنصحك ركب برجستون ياباني 225/75 الصراحة أنا معي غمارتين 2001 ومركبهن عليها والحمد لله من احسن ما يكون طامرت بهن بالنفود وضربت بهن جلد ومشيت بهن خطوط والكفرات من أحسن مايكو وبالنهاية الراي رايك ان صاحب السياره مثل مايقولون انت ابوها وسمها بس شف لك شي معقول
شبح الصحراء
03/10/2006, 05:16 AM
انا مركب على الهلي كفرات فايرستون مقاس 255 على جنط 16 ومرتاح منها مرة والحمد لله لأنها عريضة وتصلح للرمل أما كلام انها تطيح العزم فهذا خرافة !! بالعكس كفرات الوكالة مقاس 205 نشفت ريقي من كثر التغريز بالنفود ، وش فايدة العزم اذا كان الكفر يغوص بالرمل ؟! احسن اركب كفرات سيكل بعد!!!!! خذ مقاس 255 وما جاك علي وانصحك بالفايرستون .
الماجدي
03/10/2006, 05:35 AM
مشكورين والله ماقصرتوا ياشباب كفيتو و فيتو الله يجزاكم خير
والله صدقتوا 275 كبير جدا ويحك بالرفرف يقولي راعي البنشر والله لو انه جيب
لكن ابشركم لقيت هانكوك 255 \ 60 \15 كتبه طبعا وليس خط والله لقيتهن بالصدفه
وتقلني جزمت عليهن بس قلت خلن اشوف الشباب وش رايهم وابركب عليهن جنوط شبيهه لل جي تي فأيش رايكم ؟؟
شبح الصحراء
03/10/2006, 05:39 AM
ونعم الإختيار كفرات هانكوك مقاس 255 على جنوط جي تي تسوي بالهلي هوايل بالنفود بس نصيحة ترفق على الموتر .
شبح الصحراء
03/10/2006, 02:01 PM
على فكرة ارتفاع الكفر لازم يكون على الأقل 70 أما 60 فلا ينفع للتنسيم حسب ظني .
سيد النشاما..
03/10/2006, 02:13 PM
الماجدي .الله يكتب اللي فيه الخير والله يوفقك ان شاء الله
وعندي طلب بسيط وصغير الله يعافيك.((حسب رغبتك ومزاجك))
أنك تصور الموتر بعد ماتركب الكفرات 255/60 وتعرض لنا الصورة ؟؟؟لأن إذا كان منظرها جيد ونقدر نركبها !!!!!!!!!!!!!!!!

والله يجزاك خير .
هولوكس2005
03/10/2006, 02:21 PM
اخوي صدقني كبيرررررررررر والله كبير وش 255 والله لو اللواري حقات ارمكو الي بربع الخالي

دفرنسين هي ؟


225 أو 235 ويخبن على الهلي اخوي انت أوزنها بالعقل عندك
شف عندك 225 زينات مره وشكلهن وذف وعراض يمشن اعمارهن بنفود وخط

اما هذا كبير

بعدين انت ارفع كفر 255 على قولك وشف وارفع 225 وشف فرق الثقل

ليش الناس تركب جنوط مرسدس ؟ علشان انهن خفيفات

عندك
الهنكوك بس عمرهن مو طويل بس حقات شعبان ونفود ماينصلخن بس تراهن لينات يعني مو حقات ضرب خط وحصى

ودنلوب حقات كل شي نفود حصى شعبان برمائيات


والهنكوك عضلات شوي يكود تنسمهن واجد اقل من العشره بس ركبهن وأنسى همهن سنتين مابها كلام



تراك راح تندم على 255 وراح يصرف الموتر ويثقل والله بأن يثقل عليك موترك


ترى كل ماكبر عرض الكفر على سطح الزفلت كل مابذل طاقه زياده علشان الاحكتاك
هولوكس2005
03/10/2006, 02:24 PM
وبعدين تراح تثقل الطاره عليك
هولوكس2005
03/10/2006, 02:26 PM
انا مركب على الهلي كفرات فايرستون مقاس 255 على جنط 16 ومرتاح منها مرة والحمد لله لأنها عريضة وتصلح للرمل أما كلام انها تطيح العزم فهذا خرافة !! بالعكس كفرات الوكالة مقاس 205 نشفت ريقي من كثر التغريز بالنفود ، وش فايدة العزم اذا كان الكفر يغوص بالرمل ؟! احسن اركب كفرات سيكل بعد!!!!! خذ مقاس 255 وما جاك علي وانصحك بالفايرستون .





اخوي كل ماصار الكفر عريض كل مازاد الاحتكاك وكل مازاد الاحتكاك زادت الطاقه
والطاقه وشي مو البانزين



وبعدين 205 إذا كانت 2006 موديلها

و2005 ونازل 195
شبح الصحراء
03/10/2006, 02:27 PM
هولوكس ، اللي معاي 2005 دبل وصدقني مقاس 255/70 احسن للهلي العادية والدبل لأنه ما يغوص بالرمل مثل الـ 225 والفرق في العزم بسيط لا يذكر انا مجرب 205 و 255 ما حسيت فرق واجد بالعزم بالعكس 255 ريحتني لأنها عريضة تصلح للرمل .
الماجدي
04/10/2006, 05:59 AM
مشكورين وماقصرتو
هولوكس2005
04/10/2006, 07:29 PM
هولوكس ، اللي معاي 2005 دبل وصدقني مقاس 255/70 احسن للهلي العادية والدبل لأنه ما يغوص بالرمل مثل الـ 225 والفرق في العزم بسيط لا يذكر انا مجرب 205 و 255 ما حسيت فرق واجد بالعزم بالعكس 255 ريحتني لأنها عريضة تصلح للرمل .



اخوي يفرق بين الدفرنس والدفرنسين

المشرق والمغرب


الدفرنسين اشوف مو كبير255 متوسط


اما الدفرنس لا يخوي كبير


بعدين 225 ويحك عندي بالرفرف إذا كنت مسرع بالنفود وفيه مطبات عاد وش 255


حتى باللفات راح يحك
شبح الصحراء
05/10/2006, 04:36 PM
والله الظاهر ان كلامك هو الصحيح يا هالوكس2005 خصوصاً ان الهايلوكس العادية طامنة جداً ويضرب الكفر بالرفرف انا ما انتبهت لهذا الجانب وهو مهم جداً .