الطريقه الصحيحه لأستخدام ونش الوكاله(المكره ) في السحب

[معاذ العلي]

الأخوان الكرام ...

السلام عليكم ورحمة الله وبركاته ..

أسعد الله مسائكم بكل خير والشهر عليكم مبارك .

يأخواني الكرام كما هو موضح في الموضوع ..

أنا والحمدلله وبفضل من الله ورزقه اشتريت سياره لاندكروزر جيب ربع فيه ونش وكاله ونطلب من الله ثم من اهل الخبره افادتنا عن الطرق الصحيحه لأستخدام الونش . لأنه وبحسب معرفتي ومعلوماتي البسيطه يحتاج عنايه وطرق صحيحه للأستخدام .وهل يوجد طريقه معينه او قطعه تركب تخفف الحراره على الدينمو .وارجو منكم تزويدي وافادتي بكامل المعلومات والطرق للأستخدام .


وشكرآ لكم ..

[sgl2002]

اهم شي لاتفله للاخير

ولاتبتل في السحب وقف كل فتره عشان تريحه

انتبه لترتيبه

[عاشق بترول]

السلام اخوي الكريم ترى لاندكروزر جيب ربع شاص كله تجي الاربعه وربع طن عدم سحب سياره وزانه كبر من كذا او في مكن صعب عليك ولا تنتل نتل فيه يخرب عليك الكلج او الترس حقه واحول تكون الكهرباء مدعومه بسلك ثاني لى البطاريه ويفضل تكون بطاريه خاصه له لانه كل تشغيله له تاخذ من البطاريه مايقل عن 100 انبير وكذا ينقص عمر البطاريه بسرعه

[الشهابة]

أول شي مبارك عليك السيارة و الله يعطيك من خيرها و يكفيك شرها و يبارك لك فيها ..

ثاني شي .. أهم الأمور اللي تعلمتها " و دفعت ثمن جهلها في البداية " بخصوص الونش :

1 . تشغيل الونش كل فترة على الأقل كل 3 شهور مره واحده تفله كامل و ترجع تلفه
2 . تنظيف الونش من الغبار و التراب و إعادة تشحيم الواير و بعض الأجزاء المهمة
3 . معرفة الطريقة الصحيحة لفل الواير و إعادة لفه عشان ما يلتوي أو ينقطع
4 . عدم تحميل الونش أكثر من قدرته و طاقته في الوزن أو الوقت

هذي الوصايا أخذتها " بعد تجربة " من ورشة الزايدي في صناعية العويضة و هو متخصص في تركيب و صيانة الونش على السيارات و بصراحه " على إن أسعاره مرتفعه شوي " و لكن أنصح فيه للتصليح و الصيانة و سبق و جربتهم أكثر من مره

[((ابوملاك))]

انا معي ونش
شف ما يحتاج تفله وتنظفه بس اهم شئ نشغله من فتره لفتره

ولا يحتاج تركب بطاريه ثانيه بس ادعس بنزين يعني وصل الضغط لثلاثه على كلام الوكاله لانه وانت تسحب وتضعف البطاريه الدينمو يشحنه بنفس الوقت
واول ماتشبكه يطلع صوت طقه معناته شبك ونفس الشئ لا فكيته
وفيه عندك بالريموت لمبتين حمراء وخضراء

الخضرا معناته مظبوط وكمل سحب لكن السحب يكون متقطع يعني تسحب شوي وتاقف وترجع تسحب ولا تعدم الصوفه

اذا ولعت حمراء معناته احتمى وقف سحب مرررره الا اذا كان شئ مهم

واذا جبت بتسحب اكسر الدركسون يمين او يسار واسحب الجلنط واضغط بريك

ولفه زين لايكون فك بعض

وحاول تصفه زين لكن على الاقل بوقته مو مهم بنفس الوقت لا رجعت تفضى له ويكون احد يساعدعك يمسك واحد والثاني يدخله

وضرور تشغله كل فتره ولا يجيم واحرص على تشحيمه

ولا تسفطه ينقطع مع الوقت ويخرب

وحاول مثلا سياره بعيده يكون معك واير تربطه بالسياره والواير عشان ماتفله كله

هذا اللي ولعل يفيدونك الاخوان بشئ نسيته

[بدوي جنوبي]

ما قصرو الشباب
وعندك الكتلوج ارجعله كل شي فيه مفصل وبالصور
كيف تستخدم الشجر مثلا لسحب السياره نفسها

[سلطان فراج]

بعد اذن الادارة

الونش موضوع شامل لكل مايخص الونش

http://www.shass.net/vb/showthread.php?t=5148

[معاذ العلي]

بيض الله وجيهكم يا حلوين بيض الله وجيهكم


ما دري كيف اشكركم . واحد واحد .

[Tyer_shalwa]

سمعت اذا بغيت تسحب موتر بالونش ..

حط الدبل بالفاضي .. " الي بين الخفيف والثقيل .

يقولون هذا فايدتة اذا بغيت تسحب أحد بالونش ..

ومادري عن صحة الكلام هذا ..

[قطب 999]

سمعت اذا بغيت تسحب موتر بالونش ..

حط الدبل بالفاضي .. " الي بين الخفيف والثقيل .

يقولون هذا فايدتة اذا بغيت تسحب أحد بالونش ..

ومادري عن صحة الكلام هذا ..

هذا الونش اللي يشتغل على القير اما الكهربائي على ما بدا لك

[مير خان]

السلام عليكم المكتوب على استكر الونش الوكالة (8000 lb triple line) يعنى ٨٠٠٠ باوند للسحب مع بكر تين وليس خطا مستقيما(الأمريكي ٨٠٠٠ باوند خط مستقيم) بدون بكرة وبدون بكرة طن واحد فقط فلا تغامر بسحب شئ ثقيل بدون استخدام البكرات .
ثانيا حتى تستفيد من قوة الونش الكاملة يجب أن يكون السحب على الماسورة مباشرة (يعني فل الونش حتى ترى الماصورة الداخلية)
ثالثا البكرة تستخدم للتخفيف على الدينموا حق الونش إلى النصف وبكر تين إلى الثلث . (الونش الأمريكي يسحب تقريبا ٤٥٠امبير بحد أقصى)
رابعا كلما ازداد عدد اللفات على الماصورة الداخلية كلما قلت الحمولة الكلية الونش وضعف السحب وزاد الضغط على الدينمو (مثلا لفة واحدة على الماصورة يسحب ٣طن ولفتين طنين وثلاث لفات قوة السحب القصوى طن واحد فقط تقريبا)
ما ذكر في أعلاه هو موجود بالكتالوجات بس بالانجليش الله يجريان وإياكم ويثبت نشأ وإياكم على طاعته
وبالتوفيق في الدنيا والآخرة وعساك ما تحتاجه

[فارس البيد]

اول شيئ مبروك الموتر

ثاني شيئ
لا تفل الواير بالكامل عند السحب .. أترك 3 او 4 لفات على البكرة
عند السحب لايكون الواير غير مستوي لازم يكون مستوي ولا يحتك بأي شيئ
عند السحب لابد يكون السحب متقطع حتى تعرف مدى تحمل البكرات
لاتسحب شيئ اقوى من تحمل الواير والبكرات
أخر شيئ

ضع قطعه قماش ممدوده (بطانية - شراع ) في منتصف الواير بين السيارة والشيئ اللي بتسحبه عشان لو قدر الله انقطع الواير ما يرتد بقوة .. وقطعة القماش تمتص صدمة الارتداد بس انتبه تنساها وانت تسحب وتدخل مع البكرات لابد كل شوي توقف السحب وترجعها للوسط

[ساهر حايل]

الف الف مبروك الموتر والله يعطيك خيره .. افادوا الاخوان وحسب علمي من شان تخفف السحب على أي ونش وتدبل قوته استخدم البكرات (المحاله) .. ربي يوفقك

[ساهر حايل]

افخم موضوع عن استفسارك

http://www.alrahalat.com/vb/showthread.php?t=6777

[بو خليفه]

الله يعطيك العافية
استخدم بكرة ليقلل الجهد على الونش

[اابو كرم]

الله يعطيك من خيرة ويكفيك شرة ، نفس الوضع عندي شاص ٢٠١٥ قد لي شارية ٦ شهور تقريبا ما قد حركت الونش ابد ..

[الحربي حاتم]

مبروك السيارة الجديدة