مسافر ( بر ) : : دلوني الدروب الزينه ::: لـ هالمناطق

[بر الوالدين]

السلام عليكم ورحمة الله وبركاته

و أسعد الله أوقاتكم بكل خير و مسرات

أخواني و أحبتي

مسافر بإذن الله على السيارة نجرب الموتر و نفحصه

أنا بالرياض

متجه :::-------> المدينه / حقل / ينبع / أملج

أو

رايكم الجنوب أفضل ( خميس مشيط / أبها / الباحه ) وهاك الديار

وصفولي الدرب و على مهل ،، :) يعني لايجي واحد عجل و يوصف ، يشطف بعض الديار

وسلامتكم يالغالين

[رسّام]

اذا تبي زيارة مناطق اثرية ومتعة مشاهده بغض النظر عن الجو ..

اطلع من الرياض باتجاه القصيم ثم حايل ثم اسلك طريق الجهراء موقق الشملي وبعد 300 كم تقريبا يجيك الخط السريع حق تبوك المدينه . وفيه محطة الجهراء بالتقاطع هذا . عب بانزين وكمل سيده يبقى 100 كم على العلا
فيه فندق اسمه اراك العلا على طريق مدائن صالح .ممتاز جدا للاقامه .
خذلك كم ليله ورح لمدائن صالح وجبل الفيل وسكة القطار العثماني واستمتع باشكال الجبال الغريبه هناك .
يكفيها ليله ذيك المنطقه .

ثم فيه طريق يطلع من امام بوابة مدائن صالح لتبوك اطلع معه اتوقع 150 كم
واطلع من تبوك باتجاه قيال وشرما على الساحل 150 كم
وانزل مع طريق الساحل وتمر باملج والوجه وضبا وكلها هذي مدن ساحليه فيه شواطئ نظيفه لحد ماتوصل ينبع عاد وافرق للمدينة ولاتاكل شيئ واذا وصلت للمدينه مر البيك وخذلك بروستد حراق وصحن جمبري وببسي
وبتلقى البيك على طريق القصيم
خذ الطلب واطلع وامسك الخط واذا وصلت الكبري اللي يبيعون عنده نعناع وقف عقبه وافرش الفرشه وكل البيك
ثم اكمل طريقك للرياض

اما المنطقه الجنوبية لا اعرف عنها شيئ

طبعا فيه طريق يطلع من العلا للوجه مباشرة بس خطر وسيئ جداً
عشان كذا قلتلك رح لتبوك وانزل من هناك

[ابوزياد043]

تروح وتجى بالسلامة

[alssare]

السلام عليكم ورحمة الله وبركاته
واذا تبغي الجو الزين والبراد اطلع من الرياض ع الطايف وخذلك طريق الجنوب من الطايف الى ابها 500كم تقريباً تمشي ع الجبال والأيام هذي الجو كايف غيوم وامطار تمر ع الباحه تمشى ع الاشعاف المطله ع تهامه وادعيلي وبعدين سبت العلايه وبعدين النماص وتنومه وووو وصولاً الى ابها وانصحك بالسير نهاراً لسببين الاول ان الطريق أجزاء منه بسيطه لازلت تحت التعديل لان الخط كان مسار واحد والحين مسارين واغلبه انتهى الثاني للتمتع بالمناظر ويكفيك الجو البارد
ولاتنسي ملابس شتويه خفيفة لليل.
http://img.tapatalk.com/d/13/07/19/atazymaj.jpg

[بر الوالدين]

بيض الله و جهيكم

أخو رسام / خط سير رائع ما قصرت الله يجزاك خير ، وصفك مناطق أثريه مغريه للذهاب لها

و أهم شي البيك هو بطل الرحله

أخوي أبو زياد / الله يسلمك و يسعدك

أخوي الأسير / و الله مغري هالخط وهالجو الزين / تقصد 500كم كل جبال ؟ شرايك يستاهل العنوه

طيب رايكم لو اطلع لـ أبها من طريق وادي الدواسر صح كذا الدرب


الظاهر ( القارمن ضروووووووووري ) خاصه الجديد

[شايب حرب]

الله يوفقك فى السفر والطريق الزين


نعم اخوي من الطائف الى ابها كلها جبال ومتعبه شوي


ولاكن جوها مغري وينسيك تعب الرحله


اما اذا اردت الطريق الاسهل الى ابها اطلع عن طريق وادي الدواسر ..


موفق خير

[alssare]

اخوك الساري
نعم الطريق الاسهل من الوادي ولكن المتعه في السفر ع الجبال وعلى هونك الدعوه كشته وان عجبك مكان ريح فيه.
اما اذا انت تبغي ابها ع طول عليك بالوادي
المسافه من الطايف الى ابها 500كم تقريباً
تروح وتجي سالماً غانما.

[تربة الشمال]

رح للجنوب افضل شي الجو براد ورح علئ طريق وادي الدواسر افضل سهل والطريق سريع من الرياض الئ ابهاء 1100 كليو فقط

[بر الوالدين]

أخواني و أحبتي // //

الساري / ما قصرت و توجيهات لابد من الأخذ بها مأخذ الجد

تربة شمال / طريق وادي الدواسر مع إنه قد يكون ممل نظراً لإنك تشووووف الخط على مد نظرك

ولكنه سريع و على أبها /

طبعاً قبلها مناطق : ياليت تذكرون تلك المناطق لا عدمناكم