سبحان الخالق ... سكرية بحجم نصف الفنجال ..!!

[راعي الكيف]

بداية مسيكم بالخير ...


وعساكم من يعود عليه رمضان سنين ومنين وهو مكتوب له اجر كل رمضان بقبول .... اللهم امين

بصراحة قبل فترة واحد من الربع اهداني محافر تمر سكري ... لايعلى عليه

وشدني منظر حدى هالتمير .... حجمها كان ملفت للنظر بصراحة ... حدود حجم الفنجال ...

قلت يابوسعد ... بسس وزها لين تلقط لها كم من صورة على كيف كيفك ...

مواصفات الصورة F2.8 .. iso 100

وتطلع لي بالشكل ذا ...


http://www.9q9q.org/index.php?image=dsyEebA94jkF (http://www.9q9q.org/index.php?image=KkhedAVWs)


ارجو ان تنال اعجابكم

[كحيلان 11]

مشاء الله ...
بالعافيه
خلاص صورتها كلها عاد لا توزيها لين تخرب

[عمار السفينه]

الله يمسيك بالنور والسرور



ماشاء الله



سكري طيب



بس عساك افطرت عليها;)



بالعافيه أن شاء الله



وحلوه الصوره



بس وش نوع الكميره؟؟

[قلبي طيب]

ماشاء الله تبارك الله


يبيلها هالتمرة وكم حبة معها ..... جلسة وشايبك معك على شبة سمر في مربعانية ومطر


الله من الدفاء بيجيك ...... سعرات حرارية H .


محبكم[b]

[ابو سمر]

حلو جدا أخي راعي الكيف ..

لكن ( العيارين ) يقولون إن هالتمرة مثل عيال هالوقت ، الواحد طوله مائة وثمانين ووزنه مائة كغم وعمره 17 بس ( ماهناش ) ، ديكور بس ..

وعلى ذلك أُلاحظ كبار السن عندما يتوجهون لسوق التمر ، يقومون بضغط التمور باليد ، ليروا مدى تكامل بنائها داخليا ، فإن كانت لا تضغط إلا قليلا وإن كانت التمرة صغيرة الحجم ، فمعنى ذلك أنها جيدة وممتلئة داخليا .

أما إذا انضغطت بسرعة فمعنى ذلك أنها ( فاضية ) من الداخل ، وهذا دليل أن النخلة تعطى كيماوي لكي تكبر التمرة ، و سيصبح إنتاجها لا طعم له .. ( بس شكل وديكور ) وليغش فيه من لا يعرف التمور جيدا ..

والآن أخي راعي الكيف ، ماذا وجدت هذه التمرة قوية أو فاضية ؟

وشكرا لك ..

[جلمود1]

رغم أني لست من عشاق تمر السكري لوجود تمر الخلاص ولكن حجمها مميز بس تبي شوري جرب الخلاص وشف الطعم واللون والحجم والله شي يفتح النفس

[راعي الكيف]

الاخ كحيلان ../

حياك ربي .. والله يعافيك ... والله اني الى الحين ما اكلتها .. متحسفن بها صراحة ... شكلها شي ... الظاهر ابخليها تحفة بالمجلس عندي هههههههههه .... اشكرك على مرورك الكريم

تحياتي لك


الاخ خراب السفينة ../

ياهلا وغلا ... والله مثل ماقلت لاخوي كحيلان ... شفقن عليها من زين شكلها ... والكاميرا ياطويل العمر والسلامة كاسيو اكسيليوم .. Ex-z750 ودقتها 7.2 ميقا بيكسيل ... وشكرا على المرور

تحياتي لك


الاخ قلبي طيب ... /

كنك حاس باللي في بالي ... الله يازين ذيك الاوقات ... لا ولو يصير الجو مغيم والديم مالين الجلسة ... هذي الكيافة ولا بلاش ... تسلم على مرورك الكريم

تحياتي لك


الاخ ابو سمر ... /

ماشاء الله عليك .. اثاريك من متابعين التمير ؟؟ ... انا بصراحة مالي بالتمر ابد .. بس كل اللي حول من عيال عم والوالد والعمام لهم بالتمر بشكل متعمق ... فلذا اكسب بعض الامور منهم مع اني مالي على التمر نفس إلا بالاكل ههههه

بس والله الي قلت انت منطقي جدا .. وراح اسأل الوالد عنها لزيادة التثبت .. بس تشبيهك جا في الصميم صراحة .. وبالنسبة للتمرة فالظاهر انها مليانة ان كاني مانيب واهم ..

اشكرك على مرورك ومشاركتك اسعدتني ..

تحياتي لك



الاخ جلمود 1 ... /

انشهد ان الخْلاص خَلاَصْ .. على قولة عمي ... من ارغب التمور لقلبي هالخلاص ... خفيف سكره .. ولاهوب حار يشب في حلقك ... وطعيييم

اشكر لك المرور

تحياتي لك

[alturki]

أخوي راعي الكيف وشلون طعم السكرية؟

صحيح انها شكل طيب لكن دائما الكبير مايجي طعمه بالراس
من خلال تجارب
على العموم ترانا مانرد الذواقه
http://www.mekshat.com/pix/upload/images20/mk35649_as.jpg

[راعي الهـــدد]

اخوي راعي كيف





مساك الله بالخير





احب اقول لك لاتحرص على الكبار من التمر خصوصا الكبر الزايد اذا كان لايعرف عن هالنوع كبر مثلاً





ثم اخي افيدك وافيد الأخوان





لقد تمت دراسه طبيه على انواع من التمر ومدى فائدتها الصحيه



فتوصل البحث الى ان التمر السكري اقل التمور فوائد

(( ماهوب معناه مافيه فائده بس اقل من غيره بكثير ))






وتوصلوا الى ان النبت من افضلها صحياً وأمداداً بالقيمه الغذائيه ثم بالدرجه الثانيه الخلاص




وانا اعرف الناس هالوقت طاروا بالسكري لكثرة تردد سماعه يوم كان وجود السكري قليل وكان غالي




ولا زالوا طايرين به كمشترى والا قل سعره عن اول



على العموم انا لا احب السكري ولا اطيقه





واحب اقول لك شي بعد فائده







(( تراه يسبب الأرياح في البطن ))







وهذا مجرب





دمت بخير





والله يبارك لك فيه آمين

[alturki]

اخوي راعي الهدد
تخيل إنك تبي تقهوى بدون سكري
او تكشت بدون سكري
أو تفطر بدون (المذكور انفا)


الصراحه يمكن أدوخ اويحصل لي إنفصام:eek:
إلا في حالة ان معي خلاص كنيز

عالعموم فيه اشاء كثيرة نأخذها للتطعم وليس للفائدة

[راعي الهـــدد]

اخوي التركي


شكلك مغرم بالسكري


الله يزيدك من زوايد فضله


بس ترى مثل ماقلت لك (( يجيب الأرياح في البطن ))


بكيفك


دمت بخير

[راعي الكيف]

حي الله القروم .. ياهلا ومسهلا .. واسف على التأخير في الرد


اخوي التركي .../

هلا وغلا فيك ... والله يخوي ماذقتها ليومك ... وقد قلت السبب في ردود سابقة لردك ...

وعن الذواقة .. حياك في ملفاك ... ونشيلك فوق الراس ان المكان ماوسعك ... وابركها من ساعة مسايرك علينا يالخوي

تحياتي لك


اخوي راعي الهدد ../

وكلامك على متمه ... فيه واحدن من الجماعة سمع عن دراسة حول التمور ... مفادها ان السكري تبلغ نسبة السكر فيه حول 45% ... وهذي نسبة مرتفعة اذا ماقورنت بالعدد الكبير المراد اكله من حبات التمر ... وخصوصا عندنا في نجد ... ناكل من التمر ليييين مايطق السكر عندنا 2000 ...!!

واجريت نفس الدراسة .. على تمر الخلاص ... وتبين انه ان ماكان اقل من 5% فهو اقرب إلى الـ 0 % نسبة السكر في التمرة الواحدة ..!! وشوف الفرق !!

بالنسبة لي ... الخلاص عندي مقدم على السكري باشواط ... لانه بارد .. وخفيف السكر ... وطعيييم

واعتذر عن الاطالة ... ولك التحية مني