ما خاب من استشار

[خيال سهيل]

السلام عليكم ورحمة الله وبركاته

كل عام وانتم بخير وبصحه وبسلامه

لي فتره افكر بتغيير موتري حق البر طبعا موتري باترل 99 كربريتر 4500 مع اني مادري ايش تعني
بس انها مكتوبه على جنبه فقط ههههههههه

يعني عرفتو اني ما اعرف شي في المكنايكا الا روس اقلام على ما يقولون

المهم انا نويت وبعد ما شفت وسمعة عن ال 91 الى 97 في خفته ومع الترهيم وكذا
وابي افهم بعض الشغلات في التعديل فحسب معلوماتي الي توفرت
من فهمي لمواضيع الشباب المستفيضه ما شاء الله عليهم في هالمجال
لقيت ان يركبون مكاين اكبر من حقت الوكاله من لكسز و فتك وفيه ناس تقول اعطال واجد تكاليف اكثر
وحيث اني راعي مقناص يعني الخراب جريه ورطه بنالسبه لي بالبر
واحتاج عزم قوي وزين في النفود
فكرت اني اركب على المديلات 97 الى 91 ماكينت 4500 بخاخ مع فلتر رياضي
اشرايكم كيف بيكون الوضع عزمه رحي يفرق
لان المديلات 99 وطالع مكاينها 4500 ويركبلها فتك 4800 يعني الفرق 300
وال 97 مكاينها اعتقد 4200 او 4300 وتركب عليه 4500 يعني نفس الفرق وخاصه ان بدي 97 اخف

وعندي اشياء ما فهمتها ولا اعرف فرق بين ذا وذاك مثل

1- ايش يعني 4500 و 4800 و 4200
2- كل مكينه كم حصان من الثلاث
3- ايش يعني سي سي
4- ايش فايدت التسارع وهل يفيدني وخاصه اني ماني راعي تحديات حدي مقناص
بس احيان في العروق او الرباضات احتاج قوت المكينه وعزمها
5 - اخر شي هل 4500 بخاخ مع فلتر رياضي تكون كافيه على 97 وخاصه اني ما احب صوت الهدرز مزعج
6- هل فيه اضافات غير تزيد من عزم الموتر غير الي ذكرت وتكون ما تستهلك بانزين زياده
يعني بلعربي ابي شرح ولا يكون معقد

اسف على الأطاله :):)

[خيال سهيل]

افاااااااااا
فوق 100 مشاهده ولا رد وين الشباب وين الكانيكيه وين اهل الخبره مابه احد يفزعلنا بالعلم
تكفون لا تخلونا

[اسبيدر مان]

1- ايش يعني 4500 و 4800 و 4200
هذا يعني سعه السرندل ويرمز له ب سي سي
2- كل مكينه كم حصان من الثلاث
4500 قوته 230 حصان اجمالي وليس الصافي وال 4800 قوته الاجمالي 280 حصان والصافي 248 حصان اما 4200 مدري والله كم
3- ايش يعني سي سي
سعه السرندل بالملي متر مكعب وكل ماكبر زاد العزم بالغالب
4- ايش فايدت التسارع وهل يفيدني وخاصه اني ماني راعي تحديات حدي مقناص
بس احيان في العروق او الرباضات احتاج قوت المكينه وعزمها
التسارع يفيد لحقين المقاومات لكن انت احرص على العزم لانه هو المهم للسحب والطلوع وغيره
5 - اخر شي هل 4500 بخاخ مع فلتر رياضي تكون كافيه على 97 وخاصه اني ما احب صوت الهدرز مزعج
دامك راعي قنص فبعد عن الترهيم والتلفيق بسبب كثره اعطاله ومشاكله
6- هل فيه اضافات غير تزيد من عزم الموتر غير الي ذكرت وتكون ما تستهلك بانزين زياده
يعني بلعربي ابي شرح ولا يكون معقد
ماعندي خبره بتعديل والتزويد لكن الى اعرفه ان اهل الباترول يلغون مروحه التبريد ويحطون بدالها مراوح كهرب هنا يزيد العزم ويقل استهلاك البنزين وايضا الفلتر مش بطال لكن احرص على تنضيفه مابين فتره وفتره وبعد ركب فرارات برضه يخف الموتر
هذا الي اعرف ونرجو السموحه

[خيال سهيل]

اسبيدر ما قصرت والله لا يهينك على الردورد نفعتني كثير واجبت على تسائلات محيرتني

وننتظر راي الأخوان يجيبون على باقي التسائلات

لاهنت يا ذيب

[ذهب صافي]

انا من رأئي ونظرتي اقول جدد موترك

يعني الفلوس الي تبي تشتري فيها سفاري 97 وتعدل فيه ... بع موترك ال99 وزود عليه واشتري 2004 وتكون كذا جمعت بين نشاط الموتر وتحديث موديله لاني ضد التعديل وخاصة انك راعي مقناص وبر ولو يتعطل عليك تبي توهق وبعدين (( يااا غبصه يا ... ))

والله يكتب الي فيه الخير

[محب الهيف]

الفررات +مراوح الكهرب يخف الموتر
هذا الي جربت

[خيال سهيل]

الفرارات لاازم بس المراوح اذا قصدك تلغي مروحة المكينه فهذي مصيب وخطره واضافت مراوح كهرب الزامي
اشكر مرورك محب

ذهب صافي الفرق بين الفتك وال 97 شاسع حيث اعطاله وقطع الغيار وخاصه المكينه

اما التعديل 97 قيمته من 20 الى 30 الف والمكينه 4500 بخاخ 9000 والكمبيوتر 1500 وتركيب 1500
يعني متوسط بيطلع 37000 الى 39000 والفتك مدري سعره كم سراحه بس انا شايله من خياراتي

اشكر مرورك وردك الجميييييل

[Abo_Faisal_506]

خذ ٩٧ والموديل الخفيف من 88-97
ركبله 4500 cc فلتر رهدرز وانت تقول يزعج حط دبت يوكن او اختر الصوت يكون مكتوم
وركب مراوح سوبارو وديتر GX-R 97 ويضبط معك من ٩٨ ثقيل في البر وفي القومه من الصفر الى ١٠٠ بين الله ٤٥٠٠98 و4200 97 يقوم ال97 بسبب الخفه
وعدد احصنت 4200 على ما اظن ١٨٠

[خيال سهيل]

ابو فارس اسعدني مرورك فادتني معلوماتك الله يثبت اجرك ويجعله بموازين اعمالك

[التعـ King ـديل]

خل موترك معك وركب عليه مكينه لكزس دقه سلف ب 18000 ريال بالرياض شغل مضمون عند رجال شروا من عندي

ومكينه موترك بعها لحاله تجيب لك مبلغ حلو بس بع المكينه وهي راكبه على الموتر افضل علشان تجيب لك سعر لان المشتري بيجربها

[zzx503]

والله ي خوك إن طعتني
دامك راعي مقانيص وفلة حجاج ولا تعرف بالترهيم شي
خلك مثلي باترول ربع 97 كلش شد بلد بس مراوح كهرب
وأضرب بة وين ما أبي وأقطع بة النقيان والوعر
بلا ترهيم بلا هم تروح تركب مكينة كابرس علية
الكابرس ومكينتة مركبة من بلادة يعاكس معك وشلون
ترهمها على بترول

والله يكتب لك اللي فية خير...

[خيال سهيل]

مشرفنا الغالي التعـ King ـديل (http://www.mekshat.com/vb/member.php?u=61060) واخي العزيز zzx503 (http://www.mekshat.com/vb/member.php?u=186668) يا هلا ومرحبا فيكم واشكر مروركم العطر
وارائكم النيره
انا مابي اركب مكينت لكزز ولا كابرس ابي مكينة باترل 4500 على 97 اخف للاعطال والمشاكل الفنيه
فانا انشد هل تضبط وتعطي السياره عزم اقوى وهل لها مشاكل فنيه مثل ماكينة الكزس والكابرس
وهل هي مجديه؟؟

لا تحرمونا من ارائكم

[ابومختار]

جازلي الموضوع وقلطت
الترهيم هو البلا وياكثر اللي رجعو قري
تهقون ان الخواجه غبي يومه مازود هذا وكبرهذا
لاعزمت على الترهيم لاتنسى ان تشري واير السحب تراو بيلزمك
كل شي بالموتر محسوب من عدد رصات الاديتور الى اخر مسمار بالدفرنس الخلفي
وكل ماتعبثت بقطعه اثرت على مجاورتها
خذ العلم من واحدن لادخل سهيل هامل بالخلا يادافع البلا

[معتدل]

جازلي الموضوع وقلطت
الترهيم هو البلا وياكثر اللي رجعو قري
تهقون ان الخواجه غبي يومه مازود هذا وكبرهذا
لاعزمت على الترهيم لاتنسى ان تشري واير السحب تراو بيلزمك
كل شي بالموتر محسوب من عدد رصات الاديتور الى اخر مسمار بالدفرنس الخلفي
وكل ماتعبثت بقطعه اثرت على مجاورتها
خذ العلم من واحدن لادخل سهيل هامل بالخلا يادافع البلا

ابومختار من يوم بعت موترك ابو الكوارث ونت عايف الترهيم يانت عزرت بالموتر وعزربك
مابالترهيم خير تخيط جهه وتنفتق جهه
خذلك الكبسوله المطور ابو اربع ابواب ترامامثلو ابد

[عضيد]

لاسرت معزم على الترهيم لاتهور بالدخول قطوع وتبعد عن ارسال الجوال
كل الترهيم مامنه خير ويوهق
والاخ اللي يقول واير السحب ترا يمكن انه مصيب
العام تعطل معنى سفاري فوق من المعضم مرهمله مكينه تشق الارض
انفرم تروس الدفرنس من قو المكينه
ونجبرنا نفك العمود ونفرغ التروس وشوا ان معنا مكنيكي وعده
ونفعنا واير السحب

[يزيد 999]

ابعد عن القديم 97 وتحت يبي يغربلك تفكك وأصوات وخلافه مثل ماقال أحد الأخوان دورلك 2004 بخاخ مامثله مكينة 4500 بخاخ قوة وخف وداخلية حليوة

[راعي الرود]

اذا موترك استخدام يومي و تقنص عليه بس ما تحتاج تغير مكينه ابداً

اول شيء تأكد مكينتك 4200 ولا 4500

و بالنسبه للرباضات وغيره النيسان ماشاء الله يخارج نفسه , اهم شيء بالجيوب او مواتر البر خصوصاً يكون فيها تورك طيب عشان نفس الموتر يطول

اذا موترك 4500 كلبريتر عليك بـكلبريتر ادل بروك + اسلاك بواجي + بواجي NGK + طرمبه بنزين فتك

و اذا تبي تنفس للموتر و يصير اخف عطه فلتر كي ان + هدرز بحريني او عتيبي + دبه يوكن تكتم صوت الهدرز اذا ماتبي له صوت

هذي الخلطه على موتر واحد من الشباب راقين به القديه وهو يقطع رابع و نفسه طويل ماشاء الله لين رقينا على الرابع

لا تستهين بالكلبريتر ترا فيه حقه بس يبي له عنايه كل فتره و مايسوى تغير موترك عشان بخاخ

[خيال سهيل]

اذا موترك استخدام يومي و تقنص عليه بس ما تحتاج تغير مكينه ابداً

اول شيء تأكد مكينتك 4200 ولا 4500

و بالنسبه للرباضات وغيره النيسان ماشاء الله يخارج نفسه , اهم شيء بالجيوب او مواتر البر خصوصاً يكون فيها تورك طيب عشان نفس الموتر يطول

اذا موترك 4500 كلبريتر عليك بـكلبريتر ادل بروك + اسلاك بواجي + بواجي NGK + طرمبه بنزين فتك

و اذا تبي تنفس للموتر و يصير اخف عطه فلتر كي ان + هدرز بحريني او عتيبي + دبه يوكن تكتم صوت الهدرز اذا ماتبي له صوت

هذي الخلطه على موتر واحد من الشباب راقين به القديه وهو يقطع رابع و نفسه طويل ماشاء الله لين رقينا على الرابع

لا تستهين بالكلبريتر ترا فيه حقه بس يبي له عنايه كل فتره و مايسوى تغير موترك عشان بخاخ


كلام جميل و خبره بالقطع لا هنت
بس عندي سؤال من ضمن ما قلت طرنبة بنزين فتك موتري طربة البنزين راكبه على المكينه يعني قصدك يلغونها ويركبون حقة الفتك ؟؟ حقة الفتك كهرب

[abo naser 1]

هذا شكله مشروعي الجاي أستخدام يومي محرك باترول 4500 على بدي 97 ونازل مع قزوز فلتر فرار مراوح أتوقع العزم مرضي نوعاً ما

المميزة الوحيدة فيه انها على كراسي البلد وبدون تحويلة القير واحد والكلتش واحد

الترهيم قص قواعد الوكالة وترهيم مكانها حسب المحرك , ترهيم تحويله وترهيم داير وعلب وكلتش يعني خلطة هذا الترهيم

[شنطة عده]

لو كنت مكانك وانا بدفع مبلغ كبير في مكينة
ابشتري مكينة جديدة من الوكاله على الزيرو واركبها
الترهيم ما وراه الا وجع راس
للمعلومية السياره مصممه لتناسب المحرك بمقايئس دقيقة
لو ركبت مكينة اقوى بيكون فيه سلبيات على باقي ما يتصل بالمكينة من قير وعمدان وصليبات ودفرنس
ولاننسى اختلال توازن السياره لثقل المكينة

[ابولمارالحربي]

سبحان الله وبحمده ... سبحان الله العظيم