سؤال لأهل الدمام خاصة ولكم جميعا عامه

[joblak]

السلام عليكم

يا أخوان انا بكرة ان شاء الله ناوي اروح للدمام أبي ساكو اللي في الدمام وين مكانه بالظبط ؟؟

وابي ارهم بطاريه إحتياطية لجيب لاندكروزر هل فيه ورشة شغلها مضبوط تنصحوني فيها في الدمام وهل تنصحوني بشكل عام بتركيب بطارية إحتياطية لاني استعمل جهاز لاسلكي وبركب ليتات زنون ومحول كهربا هل الأشياء تحتاج تركيب بطاريه ؟؟؟

وشكرا لكم مقدما

[أبو هشام راشد]

وعليكم السلام ورحمة الله وبركاته
بكرة جمعة !! يمكن ما يفتحون بعض الورش

[alabewy]

حياك الله يالغالي وساكو عندك اثنين الاول عند مخطط 8 بس صغير
وانصحك تروح للي عند الظهران مول محل كبير وفيه كل شي

بالنسبة للورش عندك ورشة البتار بس سعرهم صلخ بين المقناص والرماية على طريق الملك فهد بمخطط 91

واي خدمة انا حاضر ارسل رقمك على الخاص وانا اتصل عليك

[طحنون]

مافيه غير بتار ياجماعه الخير
اسعاره فلكيه وﻻ هو سمح ابد على اسمه يبترك بتر
مريته قبل فتره يسوي نفسه مزحوم وﻻ يعطيك وجهه تقول مركز ناسا لعلوم الفضاء

[alabewy]

على طاري البتار رحتله وصلخني الهندي بقيمة بحدود الفين ريال
والمصيبة ماطلبت شي غير تركيب بطارية وفيش داخلي وفيش خارجي وتثبيت ماطور هواء
والبطارية علي والمحول علي يعني الفين شغل يد
واي فيش خارجي تبي تزيدة 400 ريال

[ابونبيل]

ورشة بتار الي جنب القناص الي ٩١ شغله ممتاز وعنده تركيب بطاريات ولمبات لد وكل شي

[ابونبيل]

ماعليك من الهندي شف راعي الحلال تراه طيب

[صياد الخبر]

السلام عليكم

جربوا رفيق الدرب

عندة فني وكل امور البطاريتين وتحويلاتها

موقعة في الدمام

طريق دلة بعد اربعمية متر بالضبط من اشارة زاوية سوق الغنم القديم

والله يوفق الجميع

[joblak]

الله يبيض وجيهكم جميع لا هنتوا

[alabewy]

للمعمية رفيق الدرب مايركب بطاريات بس بيرسلونك لورشة العامري بصناعية دلة
واذا وصلت لرفيق الدرب اسال عن عبدالرحمن و بيوصف لك الورشة وسعرهم رخيص
واللي شغال بالورشة سعودي وسعره رخيص

ومكان رفيق الدرب تقاطع الضغط العالي مع الملك سعود باتجاه الشمال بعد اول بنشري على اليمين قبل صيدلية الدواء

[الوانيت1]

مافيه غير بتار ياجماعه الخير
اسعاره فلكيه وﻻ هو سمح ابد على اسمه يبترك بتر
مريته قبل فتره يسوي نفسه مزحوم وﻻ يعطيك وجهه تقول مركز ناسا لعلوم الفضاء

:good2: :good2: :good2:

:D. :D. :D

هذا علي شأن يوهمك أنه مشغول و أن عليه زحمه وأنه ماهو فاضي
وأسعاره مالها علاقة بالواقع يظرب ظرب في السماااا :f. :f. :f. :f
الله يهديه بس ...../////.

[بيك اب 4X4]

لا حول ولا قوة إلا بالله
2000 ريال تركيب بطاريه و فيش
الواحد لازم يعتمد على نفسه يا جماعة الخير
منها يتعلم و منها يضمن الشغل و النت مليان صور و فديوهات تعليم

[joblak]

الله يعطيكم العافيه شباب والرد هذا بخليه دليلي للمحلات اللي انا ابيها بس ناقصني يالربع محلات لوازم البر مثل كشتة والسنيدي والقناص

وساكو عندك اثنين الاول عند مخطط 8 بس صغير
وانصحك تروح للي عند الظهران مول محل كبير وفيه كل شي

بالنسبة للورش عندك ورشة البتار بس سعرهم صلخ بين المقناص والرماية على طريق الملك فهد بمخطط 91

رفيق الدرب طريق دلة بعد اربعمية متر بالضبط من اشارة زاوية سوق الغنم القديم

مكان رفيق الدرب تقاطع الضغط العالي مع الملك سعود باتجاه الشمال بعد اول بنشري على اليمين قبل صيدلية الدواء

[joblak]

يا عيال انا في الدمام حاليا وعجزت ما لقيت وكاله الحاج رضا مدري شسمة اللي عندة بواجي ngk انا دورته في شارع تويوتا وعجزت ما لقيته كل اللي في الشارع محلات زينه

[وطن العزة]

ادخل على هالرابط واختر نوع موترك وموديله ويطلع لك رقم البوجي المخصص لسيارتك
http://www.ngksparkplugs.com/part_finder/car_truck_suv/default.asp?mode=nml


بعدين رح لمحل الأداء العالي اللي جمب أوتو مول بالدمام على طريق الملك سعود وتحصلها عنده بالرقم اللي تبي

بس خلك على نوع الأريديوم


ملاحظة إذا موترك نيسان ترى بواجيه حقت الوكاله هي نفسها NGK

[joblak]

مالك لوا موتري لاند كروزر واعرف رقمها وشكرا لك

[joblak]

السلام عليكم ابشركم لقيت اللي ابي والله لا يهينكم علي كل حال

اخي وطن العزه الريديوم عطوني هذي يقولون للاند كروزر 6 سلندر وقالولي هذي هي ارجوا الرد سريعا قبل لا اطلع من الدمام هذي صورة الاي عطوني هل هذي هي ؟؟؟

http://i.imgur.com/oyQiTrS.jpg