وش رايكم بربع الباترول؟

[بدر البير]

السلام عليكم ورحمة الله وبركاته :

حي النشاما وشلونكم طيبين ان شاء الله

ابي انشدكم وتعبت وانا انشد وكلن له كلام

وش رايكم بربع الباترول نص فل وش مميزاته
وش عيوبه
هل هو يصلح للمدينه والبر؟

وش افضل هو والا البرادو
وودي بعد باسعارهن جدد 2007

والله لايهينكم يالاجاويد

[aziz99]

لاتعدى الباترول ( سوبر سفاري 2007 ) بــ 158 الف عند معرض الفلاح
والا( سفاري رقم 2 ) 134 الف

الون / لؤلؤي وبس
تحياتي

[بدر البير]

عافاك الله عزيز
بس الدراهم مهيب واجد وتراه اقساط وسألت ابشوف
هن غاليات لاني سمعت ان ربع الباترول بحدود الثمانين الف
والبراود مثله
الا ان كانك بتقسطني انت ؟؟

[غضنفر]

اذ بتشري ربع باترول
خذها نصيحة مني
لا تشري الا اقل نوع السلقة
لأنك لو شريت السفاري الي تجي صداماته بنفس لون السيارة
راح يخسرك لين جيت تبيع لأن الشريطية حسبي الله عليهم يسومونه نفس سومة السلقة
اذكر سعره قبل مدة في الوكالة سفاري 2 لؤلؤي ثلاجة ومكيف لمس بــ 95 الف
لكن تراه قبل مدة الحين مدري كم سعره
واذا تبيه رخيص
انا شايفلك واحد قبل مدة بالنسيم ماشي اقل من 30 الف نظيـــــــف لكن مدري كم سعره
مبروك مقدما و ترى لي دورة بالربع الين شريته على خير

[ترتر]

اذا انت ناوي ربع جديد توكل على الله واجزم .. ولا تشري سلق لان مافيه اي مميزات .. خذ لك فل او نصف فل (ثلاجه , مكيف الكتروني , اقفال مركزيه , مرايات متحركه , نوافذ كهربائيه , جنوط رفارف) عز الله انه موتر من ناحية التحمل والكرف كد ومد وانا اشوف الناس اتجهت لها هالسنين الاخيره , اما هو فرق عن البرادو لا من حيث الشكل وقوة التحمل لانه ماهو عكوس هو دفرنس يعني اقوى تحمل .... اجزم بس يارجال وخذ لك لؤلؤي ... ومبروك مقدما

[waleed888]

ان كانك تبي تشتري ربع باترول يعني باب واحد لاتشتري الا سياحي (( السلقه ))

وسعرهـ كاش عند معرض نجد 77.000

[الاعتدال]

اخي الكريم السلام عليكم ورحمه الله وبركاتة
الاستخارة قبل كل شيء واطلب الله التوفيق --الاستخارة قبل كل شيء واطلب الله التوفيق--- الاستخارة قبل كل شيء واطلب الله التوفيق
1-الربع سفاري فل 4500 بخاخ-المواصفات التالية
(ثلاجة / جنوط ليست مثل الاربعة ابواب(الفل ابشن)/ليس مكيف لمس(بل مثل الstandr)/زعانف شد بلد/ليس به انوار زنون/بدون فتحة/مراتب مخمل مقاربة للـstandr /أقفال مركزية ورموت كنترول/لايمكن ومستحيل يكون لون غير الاسود ... وهذا عيب رئيسي بالنسبة لي (وهو نفس الـstandr)/بدون مثبت سرعة /ديكور خشبي رديء / بعض الاضافات الغير مهمة مثل علامة الفرامل الخلفية وغطاء الاستبنة والشبك الامامي نيكل ومسكات الابواب) .... السعر م2006 - 103 الف ريال ... أما موديل2007 حتى الان لم يصل حسب علمي...

2- الstandarبخاخ 4500 - المواصفات
زجاج عادي\بدون تكاية او ثلاجة\ اللون الداخلي اسود \المراتب مخمل \مكيف عادي \ بدون زعانف \ بدون جنوط
السعر 2006م - 77 الف ريال

بشكل عام وحسب تجربتي:
- سيارة شباب وممكن تكون عائلية كحد اقصى اربع اشخاص وذلك للصعوبة التي تواجة من يريد الركوب في الخلف بشكل عام سواء بالدخول او الخروج من السيارة.. نسبياً
- معدل صرف البنزين شبة عالي مقارنة بالسيارات الاخرى(حيث يمشي التانكي 500 كم في الظروف الطبيعية وفي حالة عدم السرعة أما خلاف ذالك فيمكن 430كم فقط)
- القوة والتحمل ممتازة
- عملي وغير مستهلك لقطع غيار عدا القطع الاستهلاكية والله الحافظ.
- نسبياً كشخة مقارنة بالربع التويوتا(اي يواجه نوعاً ما )
- مرن في الطرقات والبر والنفود
- سعر البيع يعتمد على مستوى نظافة السيارة وعلى رغبة المشتري .
- مناسب جدا داخل المدينة وخارجها .
- سعره جديد وخاصة للstandar يعتبر منافس للسيارات الاخرى من نفس الفئة سواء تويوتا او سزوكي أو مستبيشي أو غيرها.
.............................الخ

نصيحة -- حاول ان تدرس مدى احتياجك للسيارة حاليا وفي المستقبل ولاتهتم للسعر ان كانت لديك رغبة في السيارة لانة الان هناك سيارات مثل الكورلا قيمتها 63 الف ريال ما تسوى قيمتها من وجهة نظري مقارنة بسعر الجيب

وعلى قولة القايل (الجيب لك وللزمن)
هذا ما لدي....أما البرادو فمعلوماتي تقول انة سوف يتغير قريباً.. وليس لي به خبرة ولاتجربة..

أسال الله لك التوفيق
ولك فائق الاحترام
-- الاعتدال--

[عاشق النحم]

هذا واحد من العيال معه ((سلقة 2005)) ممتاز جدا
من ناحية العزم والتحمل
لاكن اذا كتبلك الله وشريت باترول لا تعدا السياحي S
وركب له جنوط عريضات عشان الموتر يعطيك عزمه كامل.....
عاشق النحم